~~~~~~~~~~~~~~~~







2014年4月9日 星期三

藍妹啤酒



藍妹啤酒

75歲的波叔,重175磅,成個波咁肥。他每天早上到屋企附近的公園睇吓報紙,同街坊吹下水。他獨居在深水埗一間50尺的劏房內,沒有妻兒。業主將一個700尺唐樓單位,再分劏租給幾名單身老人。波叔退休前當裝修工人,沒有積蓄,每月靠政府千幾元綜援作交租及生活費。他花每一元都要左度右度,晚年過着「餐餐清」的日子。

波叔曾經在街上接過傳單,是雲吞麵店的「兩元優惠卷」,波叔因此吃麵時慳返兩元。這天早上,波叔路經大南街時,見到有人派傳單,食髓知味,立即上前索取。

波叔戴上老花眼鏡,細望傳單,原來是女性內衣店的宣傳單章,對自己無用。波叔用手一揸,把傳單扼成廢紙。碰巧他正路經一大排檔,檔主擺了幾張枱在行人路上,方便食客吸煙。波叔順手把手中廢紙,丟棄在一張食客剛幫襯完而未有執拾碗碟的枱面上。金毛伙計見到,立即向波叔大喝:「喂!死老坑!我張枱做生意,唔係俾你做圾垃筒呀!」

波叔反駁:「你都執枱架啦,順便同我扔埋有幾難呀?!」
金毛伙計扯火:「死老坑!你執唔執返佢呀?」
波叔好漢不吃眼前虧,死死地氣執返張廢紙。

    * * * * *

波叔行多兩個街口後,遇到兩名妙齡少女,手持10元慈善獎券向波叔兜售,少女落嘴頭讚波叔又健碩又有霸氣。被靚女迷惑之下,波叔豪氣地買下兩張獎券。頭獎是超市10,000元禮券,明天在報紙公佈得獎者名單;波叔當係買個希望。

波叔中午回到板間房,鄰房的陸叔正由廁所出來。陸叔是一個瘦削、貌似馬騮的排骨精。陸叔見到波叔回來:「喂!阿波,我前日借咗10蚊俾你買六合彩,你仲未還俾我噃!」

波叔見有兩張獎券喺褲袋,攞出嚟向陸叔講:「嗱!10蚊就無啦!不過我俾張獎券你,等你以小摶大,頭獎係百佳10,000蚊獎券,有你著數呀!」陸叔被一萬元所吸引,同意「錢債券償」,但波叔手中有兩張獎券:編號A014A018,唔知俾邊一張好。

陸叔隨意一抽,抽中A018,大讚「18.實發」,好意頭!陸叔回房後,波叔心裡籮籮攣,如果一個唔覺意,俾陸叔攞咗張A018獎券會中頭獎,自己咪好唔抵?!而且「14」唔好意頭,「14.實死」。波叔越諗越唔妥,決定以身犯險,潛入陸叔房間,偷回陸叔的A018獎券。

    * * * * *

當天下午兩時,波叔到樓下便利店,買了一支藍妹啤酒和一包花生。波叔拿著啤酒告花生走到陸叔房間:「阿陸,一齊啤一啤啦。」陸叔不妨有詐,一齊飲返杯。陸叔酒量淺,一兩杯後面紅耳熱,倒頭大睡。波叔斯斯然把陸叔放在枱上的A018獎券放入自己褲袋,並放回A014獎券在枱上後,任務完成,打道回房。

    * * * * *

傍晚六時,瘦削的陸叔從酒醉中醒過來,在夢境中,陸叔夢到死去的太太,報夢話波叔手中的編號A014的獎券一定中頭獎。陸叔瞓醒後,決定要去波叔的房間,偷偷調換獎券。

正當陸叔計劃如何奪回A014的獎券時,發現枱面上的獎券,已經是A014了。陸叔立即雙手合十,向天拜謝。多謝死鬼老婆顯靈。明天一定中頭獎,一萬元超市禮券非我莫屬啦。

* * * * * *

第二天是獎券抽獎的公佈日期,陸叔一早7時拿着獎券,落街去報攤買報紙對號碼。陸叔心急地向報販買了一份報紙,東翻西掀,但翻閱整份報紙也找不到獎券抽獎的公佈結果。

陸叔老眼昏花,看不清獎券的條款細字。陸叔見到一名中學生路過,他上前問:「後生仔,幫我睇吓張獎券,係咪今日公佈結果?」中學生接過獎券,望了一眼便答:「阿叔,邊度有『伸手挫人協會』架?你俾人呃啦!」

陸叔醒起警訊確實報導過近日有「假獎券黨」出沒深水埗區,專呃老人家。唉~邊個咁無陰功,連老人家啲棺材本都呃呀!

陸叔十分激氣,波叔欠下的10蚊收唔返,仲被騙徒呃,真係偷雞唔到蝕把米。望見手中的假獎券就扯火!

陸叔右手用力一揸,把獎券扼成廢紙。碰巧陸叔路經大南街一大排檔,見到一張食客剛幫襯完而未執拾碗碟的枱,枱上面還有一支空的藍妹啤酒樽。陸叔一怒,把手中廢紙扔在枱面上。

金毛伙計見到,立即向陸叔大喝:「喂!死老坑!我張枱做生意,唔係俾你做圾垃筒呀!」陸叔反駁……



二少爺說︰貪字變個貧。

12 則留言:

  1. 卡臣:

    加拿大都喺咁呃法.最近有人扮警局電話籌款,最多嗰個人被呃咗二千蚊加幣。有很多人連信用卡號碼都比埋騙徒,有排煩。

    回覆刪除
  2. 回覆
    1. 卡臣:

      美國的光棍,同大陸啲騙徒,可以一較高下.不過你喺香港,所以唔知美國社會啲陰暗面。

      刪除
    2. 我印象中︰中國多騙徒,美國有槍,多暴徒,多槍擊

      刪除
    3. 卡臣:

      美國紐約街頭不時有賊贓兜售,夠運的話,好多時執到平夾抵嘅筍嘢.

      有一次,有一架大貨車停喺路邊,打開後尾門,裡面全部都喺名牌迷你音響組合.100蚊美金一套.咁平,好明顯,就喺賊贓。好多男人去搶購,唔駛一陣間,全部貨賣哂,架貨車即刻開走咗。

      迷你音響組合被啲男人擺到番屋企,打開個「名牌盒」,裡面喺垃圾同石頭。我有個朋友的朋友,都用咗100蚊美金,買咗一個名牌迷你音響組合的「紙盒」同埋石頭。

      所以,若果你以為美國人好純情,就只喺你自己純情而已。嘻嘻!

      請寬恕我最後一句說話帶有侮辱性.嘻嘻!

      刪除
    4. 沒有嬲,我最純情,仲係處男添呀

      刪除
  3. 唉,兩個老人家晚景真淒涼,故事好警世呀。

    我睇完之後,要慳D駛,留多兩個錢養老呀,我擔心自己最後嗰幾年呀。 :(

    回覆刪除
    回覆
    1. 我都無乜望,但求一嘢死得痛快,唔好被頑疾長期折磨

      刪除
    2. 長期病患真係慘過死,我認為馬上死最好,死於高,死得潮,死咗仲會上埋新聞紙添,我諗大把長者羡慕呀。 :)

      刪除
    3. 馬上風而死,最好的死法
      來時光脫脫、死時光脫脫
      果然死得禪〝死得有智慧

      刪除
    4. 塵歸塵,土歸土嘛。

      出世前係一粒精子,離世時射出一團精子,好有輪迴嘅味道。

      另外,瞓瞓吓死都唔錯,又冇痛苦又安祥,發埋個綺夢仲正。

      刪除
    5. 記憶中,尤德,教宗,鄧光榮都是睡覺中過身,認真不錯。(燒碳唔計)

      刪除

LinkWithin

Blog Widget by LinkWithin