~~~~~~~~~~~~~~~~







2014年4月23日 星期三

雨夜鋼琴


雨夜鋼琴

(這篇是新寫的)

我叫周輝,自己一個人住喺東涌某個私人屋苑。同其他香港人一樣,我唔認識我啲隔籬鄰舍,好間唔中先撞到鄰居一次,大家喺走廊等電梯,互相當對方透明。大家都唔想主動打招呼囉。

    * * * *

某個星期六傍晚,我回家發現屋苑梯間個垃圾房,堆滿紙皮箱同「卜卜膠」。一睇就知有人搬嚟我層樓,新鮮熱辣,啱啱拆箱,應該是當天下午剛搬來的。

我發現我對面個單位,門口放了三對鞋,我猜有新鄰居搬進我對面個B單位。兩對成人鞋加一對小童鞋,應該是一家三口吧。童裝鞋是女裝,憑size大小應該是7歲左右。父母通常生一個小孩,三人核心家庭。

我每天出門口都喜歡觀察B單位門前放了多少對鞋。我觀察到他們有一個怪習慣︰他們一家人每天回家,必把穿過的鞋放在門前擺一晚,可能擔心街外多細菌,唔著入屋啩。第二天出門口再穿鞋走人,憑門口鞋的數目,我估到他們的成員在不在家。

    * * * *

這天早上,我聽到對面屋傳來鋼琴聲,技術唔叻,琴音斷斷續續。我八卦起來,從防盜鏡望去B單位。門前只得一對女裝成人鞋和一對童裝鞋。我幻想到一個畫面︰父親今早外出工作,母女吃完早餐,母親坐在沙發上,手持ipad睇韓劇,督促女兒練琴,7歲女兒努力彈著琴。好典型的中產家庭畫面。

    * * * *

再過幾天的一個早上,我聽到對面屋又傳來鋼琴聲,琴藝進步咗少少,唔會甩甩漏漏。我八卦起來,從防盜鏡望去B單位。門前只得一對成人女裝鞋和一對童裝鞋,即是父親又不在家了。突然傳來女兒發脾氣扔嘢的吵鬧聲,但琴聲從沒有間斷過。我立即幻想到一個畫面︰原來彈琴的是媽媽,女兒公主病發作,扔嘢發脾氣,大吵大鬧。母親為了不讓女兒公主病加深,索性唔理女兒發癲,繼續專心彈琴。母親參加了母校將在月尾舉行的周年校慶晚會,需要表演彈琴,時間無多,母親臨急抱佛腳,加緊鍛鍊。琴藝總算進步咗少少。

    * * * *

再過了幾天的一個早上,我聽到對面屋又傳來鋼琴聲,琴藝相當有水準。我懂得分辨真鋼琴聲和Hi fiCD聲的分別。真琴聲能夠引起家具的共鳴,沉實過Hi fi的喇叭聲。我八卦起來,從防盜鏡望去B單位。門前只得一對男裝皮鞋,即是說母親和女兒不在家,只得父親一人。我立即幻想到一個畫面︰原來父親在大陸是鋼琴演奏家,為了女兒接受到更好教育,舉家移民到香港。父親靠認識大陸幹部關係,在香港一間中資公司撈返一官半職。他間中也會彈奏鋼琴,不讓手指生疏。這一刻,父親很滿足地閉目彈奏。

    * * * *

再過了幾天的一個早上,我聽到對面屋又傳來鋼琴聲,今次琴藝超高水準。我懂得分辨真鋼琴聲和Hi fi聲的分別。這絕對係真實琴聲。我八卦起來,從防盜鏡望去B單位。門前沒有任何鞋,即是說…....對面屋企可能無人,但琴聲仍然鳴亮地傳出,吓!我好驚呀!我立即幻想到一個畫面︰屋內窗簾緊閉,沒有光線,牆上貼滿黃色靈符,用黑狗血在牆上寫滿符咒,一副棺材放中央,周地都有大撻血跡,勁多香、勁大煙。塵封的鋼琴放在客廳旁,琴鍵自動跳動,琴聲洪亮。

    * * * *

自從這次之後,B單位再無傳出鋼琴聲,門前亦再無鞋擺出嚟。我立即幻想到一個畫面︰父親突然半夜鬼上身,入廚房攞出菜刀,先將睡夢中的妻女斬死,自己再自刎。

正當我猶豫應唔應該打電話給管理處,叫保安員代為報警之際,明亮的鋼琴聲又突然傳出來。我立即幻想到一個畫面…….......


後記︰這個故事沒有明確的結局,只想講人的想像力,其實和現實可以差天共地。




二少爺說︰想像力和胡思亂想,都是一線之差。

10 則留言:

  1. 卡臣:

    宜家真鋼琴都有用電腦控制,配上伺服馬達就惦哂。可能就喺一部咁嘅鋼琴,就令你諗多咗喇!嘻嘻!

    回覆刪除
    回覆
    1. 係喎,科技咁進步,我真係大鄉里啦

      刪除
    2. 卡臣:

      配上伺服馬達嘅鋼琴,按鍵力度等全由電腦程式控制,無咗個人風格囉!

      刪除
    3. 或者專登彈錯幾個音,更富有人性

      刪除
  2. 今次中晒計,好緊張咁睇落去,去到「牆上貼滿黃色靈符,用黑狗血...」以為係陰陽路,原來最後冇結局,我要抗議呀。 :o

    回覆刪除
    回覆
    1. 唔使抗議,你想像力咁豐富,你心目中的結局應該更精彩!

      刪除
    2. 我嘅想像力已被無情嘅工作吸走晒,而家得番個軀殼。 :(

      刪除
    3. 傳說中的「吸精大法」? 咁你小心條命仔啦。

      刪除
    4. 人嘅精神靈魂被吸去,就好似變咗機械人咁,成為一件死物,我命仔不保喇。

      刪除
    5. 咁又唔好,快啲忙裡偷閒 RELAX下啦

      刪除

LinkWithin

Blog Widget by LinkWithin