~~~~~~~~~~~~~~~~







2014年4月28日 星期一

討厭這夜失眠


討厭這夜失眠

(這篇是新寫的)

我剛搬到這座於東涌新落成的私人屋苑,還未夠一個月。可能由於地點較為偏僻,居民入住率仍然很低。我住那一層樓只得我和隔籬單位兩伙人居住。我是獨居的,我不知我鄰居住了些什麼人,因我從來無碰見過他們,我回家時聽到隔籬門口傳出電視聲,我搗垃圾時,發現除了我的垃圾之外,還有另一袋垃圾。

    * * * * *

星期五晚上二時,我上床睡覺,朦朦朧朧便入睡。

「隆」我被鑽牆聲嘈醒,望一望床邊的鬧鐘,凌晨4時。嘩!乜隔籬單位住咗個傻佬,鍾意半夜玩鑽牆呀?!擾人清夢喎,我立即打電話去管理處投訴。

接電話的保安員答應會馬上上樓跟進事件。期間,電鑽聲仍未停止過。

十分鐘後,電鑽聲停了。五分鐘後,我電話響起,是保安員打來的。他用親切禮貌態度向我匯報︰「陳先生,我處理咗單投訴喇,B單位業主同意唔再鑽牆住,等到聽朝9點先再鑽過,多謝陳生使用我哋公司嘅服務,晚安。」

地產發展商為新落成私人屋苑聘用酒店式服務的物業管理公司。保安員由談吐、衣著到服務態度,都以酒店水準為目標。我滿意地收了線,再瞓過。

    * * * * *

「嘟」我被急速的電話聲嘈醒,望一望床邊的鬧鐘,黎明5時。嘩!邊個咁早打電話嚟嘈生哂?!接聽之下,原來是剛才那位保安員,他隔了一小時後再打嚟,他用親切禮貌態度向我講︰「陳生,我哋公司有服務指引,收到Complaint之後,須要喺一小時內再致電客人,確保問題無再發生,陳生,請問B單位仲有無發出噪音呢?」

我被呢個電話嘈醒,十分火滾,帶著怒意回答︰「隔籬無再嘈啦,不過畀你嘈醒囉,你打電話畀人之前,有無諗過而家幾多點呀!大佬你唔好再打嚟呀!」

保安員抱歉地︰「對唔住陳生,唔阻你休息啦,多謝陳生使用我哋公司嘅服務,晚安。」

cut了線後,繼續睡下去。

    * * * * *

「嘟」我又被急速的電話聲嘈醒,望一望床邊的鬧鐘,晨早6時。嘩!邊Q    個咁早打電話嚟嘈生哂?!接聽之下,一位男人自我介紹︰「早晨陳先生,我叫Gary,我係負責第8座嘅物業主管。」Gary繼續用親切禮貌態度向我講︰「陳生,我哋公司有服務指引,收到Complaint之後,要一小時內再致電客人,確保問題無再發生,陳生,請問我哋嘅保安員仲有無打電話畀你呢?」

我真係畀呢位物業主管激到「啤」一聲,十分火滾地回答︰「你哋個保安員無再打嚟啦,不過就畀你打嚟嘈醒囉,你唔好再打嚟呀!」

Gary抱歉地︰「對唔住陳生,唔阻你休息啦,多謝陳生使用我哋公司嘅服務,晚安。呀,Sorry,應該係早晨。」

cut了線後,驚Gary個上司、或者佢上司個上司再打緊跟進事件,索性把電話熄咗,繼續返瞓。

    * * * * *

「哎呀!!」我又被噪音嘈醒喇!!

我望一望床邊的鬧鐘,早上9時。原來隔籬單位個傻佬,十分守時,一踏正9點便拿起電鑽繼續鑽牆……我頂你個肺呀!



二少爺說︰董太曾經話過︰唔好成日Complaint complaint

8 則留言:

  1. 除咗Complaint complaint,仲有洗手、洗手、洗手。 :)

    保安員同物業主管都好盡責喎,呢個屋苑服務水準咁高,請問仲有冇咩嘢特別嘅service,啱呢位單身嘅男主客嘅呢?

    回覆刪除
    回覆
    1. 正喎,男人貪睡,如果朝早有一把溫柔嘅女聲叫起床,一定嗱嗱聲起伸做嘢番工,唔會遲到。

      住家菜送遞: 廚師準備不加味精的家常小菜,於晚飯時段送遞至住客單位。

      刪除
    2. 最妤有美少細心傾聽男住客的煩惱。

      刪除
  2. 如果整多幾晚,睇怕個男主角会被搞到黐缐!

    回覆刪除
  3. 卡臣:

    加拿大都係咁,財務機構為了搶生意,香港時間的半夜也打電話到香港或台灣,問那些回流人士買唔買投資產品.佢地班友勁到比客人罵完,隔半年又再做過.

    回覆刪除
    回覆
    1. 香港的COLD CALL也不遑多讓,一樣煩到你死架。

      刪除

LinkWithin

Blog Widget by LinkWithin