~~~~~~~~~~~~~~~~







2008年7月29日 星期二

中國屋 (小說)

中國屋 (小說)

錢靜雯和袁志仁是高中同班同學,同住在柴灣區一公共屋邨內。
他們和幾位住在同邨的同學,經常一起打遊戲機、看電影、
打籃球和到屋邨的自修室溫習而成為朋友,
由於靜雯和志仁住同一座樓,因此經常約埋一齊返學放學,
沿途有傾有講,繼而成為了好朋友。

志仁為人較沉靜,說話時總是一句起兩句止,令人有點冷酷的感覺。
他亦是學校籃球隊的隊長,擔任前鋒位置,加上俊朗和高大的外型,
成了女同學們的頭號對象,經常在他身邊出現的靜雯,便慘成女同學們嫉妒的對象。

但男仔頭性格的靜雯,郤毫不在意其他人的目光,
她只覺得和志仁一起很舒服自然,感覺無拘無束。
由於他們經常和同邨的朋友大伙兒一起玩,
中學時代的靜雯未曾對志仁有過任何遐想。
而且在別人眼中「靚仔有型」的志仁,在靜雯眼裡郤是傻仔一名,
他們最愛互相戲謔,這也是志仁說話最多的時候:

「妳連咁嘅平宜都貪,錢靜雯真係『cheap精雯』呀!」
「你連PSP 嘅ISO係乜都唔知?袁志仁真係『原始人』!」

由於經常被志仁戲弄,於是靜雯改了個英文名叫Choco,
因她十分喜愛吃朱古力。

中七高考是學生們努力拼搏入大學而奮鬥的時候。
Choco自小喜愛建築,時常看有關的書籍,還和志仁談論世界各地的建築,
更天馬行空地構思如何重建他們所住的舊式屋邨。
她覺得能為別人建造安樂窩是一件很偉大的事情。
可惜臨近會考時Choco大病了一場,令她的高級程度會考成績失準,
未能考入她心儀的建築系,令她傷心不已。
而考入了建築系的志仁對Choco說:「唔緊要!其實妳對建築嘅認識咁豐富,就等我幫妳讀,然後我將妳嘅構想實踐成真嘅建築物吖!」
志仁這番話令Choco感覺很窩心,亦很感激這位好朋友的支持和鼓勵,
忘記傷心的情緒,重拾笑臉說:「哼!你估我唔知!你想搵人幫你做功課之嘛!」
志仁回應:「呀!咁都俾你識穿,記住俾啲好橋嚟呀!我要攞First Honour架!」

雖然Choco讀不成建築系,但她仍能和志仁入讀同一間大學,
若果時間配合的話,他們亦會相約一起上學或回家。
中學是灌籃高手的志仁,升上了大學後,自然亦成了大學籃球隊成員。
他更在多個聯校球賽中為學校贏取殊榮,很自然成為大學女同學們的傾慕對象。
經常和志仁出雙入對的Choco亦成了女同學們「最想互調身份的角色」投票得奬者。

同學們常常問Choco是否和志仁拍拖,又取笑她每天有男友接送。
男仔頭的Choco多少總會帶點少女情懷,有一個像志仁那樣酷的男朋友又實在不錯。
在Choco的記憶中,從沒聽聞志仁有拍拖,Choco心思思都想拍拖。
但由於太熟稔,令Choco對志仁的情感難以啓齒,而且她又不知道他的想法,於是唯有玩測試……

Choco:「唉~ 啲同學成日話我哋拍拖喎。」
志仁:「係咩?!咁你點答佢哋呀?」
Choco:「咁你想我點答佢哋呀?」
志仁:「咁妳想我叫妳點答佢哋呀?」
Choco被志仁的反問法氣得半死,知道再問下去也沒有結果,
於是只好將對志仁這份另類感情埋於心底。

一些知道Choco和志仁不是拖友的女同學,常常要求Choco介紹志仁給她們認識,Choco亦只有無奈地逐一介紹,
每次志仁的反應都很淡然,偶爾約會一兩次後,便沒有了下文。
Choco有時亦會打探一吓他對那些女同學的感覺,
但答案總是令Choco摸不著頭腦的:「她打機都唔叻」、「她唔識打籃球」、「她性格太女仔」……
這令Choco不期然問:「你係咪基架?」志仁只笑而不語,耐人尋味。
為了忘記對志仁的那種感情,Choco也曾和其他男孩子交往,
但可惜每次都不太投入,她覺得和其他男孩一起總有種拘束的感覺,
不似跟志仁般,能夠舒舒服服地做回自己。

大學畢業後,Choco舉家搬到了柴灣區的一個私人屋苑,
志仁在建築公司當初級設計員,Choco則找到一份時裝海外買手的工作。
兩人各有各忙,Choco和志仁亦不能像以往般經常見面,
但逢星期二他們總會相約出來見見面、看看特價電影、交換彼此的工作情況等。
雖然不再住同一屋邨,但他們仍可坐同一輛巴士回柴灣區,
Choco比志仁早一個巴士站下車,每次志仁只會一聲:「Bye」便和Choco話別,
但志仁從不會跟Choco一起下車,陪她步行回家。
但每當Choco抵達自己屋企門口時,她的手提電話便會響起。
志仁十分準時打來問她是否安全返家。
Choco有時候亦懷疑:「喂!你係咪跟蹤我?點解每次時間都咁準?我一入門口,你就打電話嚟?」志仁照舊是笑而不答。

志仁早前參加了一間日本建築商社舉辦的一個亞洲區新晉建築師設計比賽,
志仁的參選作品獲得大會的「新晉大獎」!並在三月中於東京舉行建築作品展覽會。
志仁獲得贊助商提供的機票及酒店住宿,碰巧Choco三月中要到東京公幹睇fashion show買貨版,
志仁邀請了Choco一起順道到東京,看他參與的建築作品展。

三月的東京,天氣仍然寒冷,Choco跟志仁一起乘地鐵到達會場,
展覽設計主題為「未來之家」。Choco穿過幾個hall後,終於看到志仁的作品,
那建築設計正是中學時候Choco和志仁天馬行空地談及自己心中夢想的家園,
而作品命題為「Choco」。

Choco見到眼前的建築模型很感動!心裡想多謝志仁終於實踐了自己多年來的建築構想,而完成這作品,志仁站在Choco身邊,默不作聲。
Choco笑問志仁:「點解你套作品會用我個英文名?」
志仁冷笑幾聲後答:「枉妳喺大學讀咗日文咁多年,竟然連『中國』嘅日文『ちゅうごくChuugoku』都唔識!呢個咁富中國特色嘅design,梗係叫做『中國Chuugoku』啦!」

Choco知道自己表錯情!十分難堪,始終是女仔嘛!
她馬上藉詞要去「御手洗い」(洗手間)化解這尷尬局面,
她對着洗手間的大鏡,冰冷的水澆在手上,
她心諗「Choco」和「Chuugoku」的發音都差幾遠,唔通係志仁死撐,亂說一通?
定係自己真係表錯情?

Choco步出洗手間,不想立即回去面對志仁,她獨自一人在展館內參觀遊蕩。
無意識地行到入口附近一塊大broad前,是介紹各參選建築師的背景和指示其展品放置的地圖。
Choco自然尋找「袁志仁」三個漢字,Broad上有他的相片、個人簡介、作品創作構思、鳴謝等等。
Choco看著志仁用英文撰寫的鳴謝:最後三句他寫:「…I would like to give my immense gratitude to a special person. I cannot complete my work without her support. In this regard, I would like to title my work by her name - Choco」。
 
Choco看罷,血液立即湧上頭部,不知是否由於場內暖氣太強?
還是情緒激動?她臉頰發熱變紅!
志仁早已站在走廊的另一端,遙遙偷望着Choco顫抖的背影,
志仁禁不住滿足地笑了起來!

兩人覺得今天場內的暖氣份外溫暖,
真的從未試過這般溫暖。



co-written by賢 &卡臣

2008年7月26日 星期六

便當盒 –下集

便當盒 –下集

晚上6:25分,Frankie的電話再次響起,Frankie急不及待拿起電話筒接聽,電話筒另一端傳來一把甜美的女聲:
「喂!你係唔係……9458 1963的機主吖?」
「我係代表和記電訊打俾你……而家有個家居電話優惠計劃介紹俾先生你…」
Frankie心頭湧出一股怒火:「哼!開緊會!」馬上收線。

Frankie留在公司至晚上7:30才肯離開,臨離開公司前,他到Pantry A的雪櫃內,檢視女主角的便當盒是否已物歸原主?

結果便當盒仍然完封不動,難怪下午女主角沒有致電給他;Frankie懷着忐忑的心情去旺角星際城市散吓心,買他心愛的電玩遊戲光碟。結果他忘記去日本城買地拖回家,給阿媽鬧了幾句:「做嘢唔上心」。Frankie那有心聽進耳裡?一心只希望女主角快些出現。

星期二早上,Frankie於9:05回到公司,第一件事便是去Pantry A的雪櫃內檢查便當盒。咦!便當盒的女主人昨夜已經取回便當盒,即女主角今日應該會致電給自己。緊張地返回坐位,守着電話寸步不離。

Sophie因趕貨版的關係,昨夜10時才下班,臨走前到Pantry A的雪櫃內找回自己的便當盒。她把紙條看過後,心中記着內線5006的Frankie。但因為太累的關係,打算明早星期二回公司才把事情搞清楚。

Sophie星期二9:30返回公司,馬上問人事部的相熟同事阿Moon:內線5006的Frankie坐喺邊度?

Sophie略知一二後,於10時根據阿Moon的指示去到「針織組」,憑阿Moon的描述,Sophie一眼就認出這個典型「電漫御宅族」的Frankie。

嘩!檯面雜亂無章,放滿高達和星球大戰的模型,坐位背後的牆角貼上日本動晝電影的大型海報。一個樣子平庸的Frankie坐在電腦屏幕前神情恍惚,雙眼盯實個電話。

Sophie見到Frankie立即轉身走,興趣全消。她很清楚自己就算終身孤獨,也一定不會跟這卡通男子拍拖。

Sophie回到自己位置後,她決定把便當盒棄掉。因為她不容許自己再用這個Frankie曾經用過的便當盒。見到Frankie的紙條,Sophie突然心生一計,決定策劃一齣好戲。

中午12時,Sophie去到Pantry B的雪櫃內找出女同事Jennifer的便當盒,把Jennifer的便當盒收到自己的抽屜內。

這個花名叫「阿花」的Jennifer,並非因為她貌美如花;只因她十分喜愛迪士尼卡通人物,特別是「花木蘭」,所以她喜歡別人叫她做「阿花」。

她的坐位放滿迪士尼卡通人物的文具、水杯、相架、椅墊,Sophie想撮合Frankie和阿花。阿花四年前給花心男友撇下,至今一直無人問津。



下午一時許,阿花發覺自己的便當盒不翼而飛,十分火光。她只好死死地氣吃抽屜內的杯麵充飢。

Sophie暗地裡把阿花的「巴斯光年便當盒」內的飯餸倒進垃圾桶內。自己洗乾淨「巴斯光年便當盒」後,把Frankie的紙條放進便當盒內,下午兩時後,把阿花的便當盒放回Pantry B的雪櫃內,回座位靜心等候好戲上演。

阿花於下午3時找回自己的便當盒,馬上按紙條致電給Frankie。結果久旱逢春的「阿花」與情場孤兒仔「Frankie」啱哂眼緣,仲一拍即合。

當晚兩人放工後相約吃晚飯,由Frankie請客,算是他向阿花賠罪。晚飯時,兩人的話題由公司開始,兩人都有點拘謹,但當話題一址到動晝,就一發不可收拾。酒逢知己千杯少,相逢恨晚。

最初,兩人對愛情同樣抱着悲觀的態度,站在兩個孤島,有「同是天涯淪落人」之共鳴。漸漸兩人都從對方身上找到人生的新希望。

拍拖一年後,因為阿花意外懷孕,(經手人的而且確是Frankie),兩人連忙註冊結婚派帖擺喜酒。

Sophie屬於另一Team,所以未被邀請出席他們的婚宴。她對於一年前自己親手的撮合,如今開花結果,感到非常完滿。

這個世界上,沒有第二個人知道這對新人背後的紅娘就是Sophie。但這封媒人利是,恐怕在Sophie的餘生,也無緣從Frankie和阿花手中接過來。但Sophie仍會暗暗祝福這一對絕配新人。



How am I Supposed To Live Without You ? - Michael Bolton

I could hardly believe it
When I heard the news today
I had to come and get it straight from you
They said you were leavin'
Someone swept you heart away
From the look upon your face I see it's true
So tell me all about it, tell me 'bout the plans you're makin'
Then tell me one thing more before I go

Tell me how am I supposed to live without you
Now that I've been lovin' you so long
How am I supposed to live without you
How am I supposed to carry on
When all that I've been livin' for is gone

I didn't come here for cryin'
Didn't come here to breakdown
It's just a dream of mine is coming to an end
An how can I blame you
When I built my world around
The hope that someday we'd be so much more than friends
And I don't wanna know the price I'm gonna pay for dreaming
When even now it's more than I can take

And I don't wanna face the price I'm gonna pay for dreaming
Now that your dream has come true

2008年7月24日 星期四

便當盒 –上集

便當盒 –上集

Frankie望着檯頭上的電話發呆,等待心目中的女主角來電,無奈打來的電話都是男聲和工作有關。但Frankie仍未絕望,期望下一次電話響起,電話筒會傳出她的聲音……

* * * * * *

Frankie在旺角信和中心地庫的玩具店內,他從銀包抽出現鈔買心愛的Batman action figure,他將1,800元交到店員手上,Frankie眉頭皺也不皺一吓。他是一個典型的香港「御宅族」。將每月份人工花在電子遊戲、漫畫、DVD和模型玩具。

至於拍拖…他則抱着積極性悲觀態度,等待一個可以陪他打機睇漫畫上網的女朋友。
但這一等已經過八個寒暑,他上一次拍拖,已是中五暑假。因女朋友一次無心整爛他心愛的「高達模型」而宣佈分手。

Frankie在長沙灣一間Garment Firm 做 Merchandiser。公司算是大模規,辦公室佔商廈全層二萬呎。由於公司員工眾多,所以公司設有三個 pantry放設雪櫃微波爐蒸餾水機。

Frankie為了慳錢買電玩,加上他不善交際,所以Frankie每天都有帶飯回公司的習慣。早上他把便當盒放進雪櫃內,午間到 pantry用微波爐加熱後,一邊上網一邊吃飯。

Frankie雖然樣子平庸、不善詞令,但他心地人品好,有一位在版房的男同事阿Don是Frankie的好朋友。上個星期,阿Don逛百貨公司時,見到有一個便當盒款式幾靚,決定買下送給Frankie,但百貨公司大酬賓,買兩個便當盒就享有半價優惠。結果阿Don買下兩個同色同款的便當盒;分別送給「針織組」的Frankie,和「梳織組」的Sophie。

雖然Frankie和Sophie隸屬於兩個不同部門,互不認識,但兩人從此便用着同一款式的便當盒。

星期一早上,Frankie如常把便當盒放進Pantry A的雪櫃內,Sophie則把便當盒放進Pantry B的雪櫃內。怎料Pantry B的雪櫃突然失靈,雪霜溶化成一灘水。清潔阿嬸把所有Pantry B雪櫃內的便當盒搬進Pantry A的雪櫃內。Frankie和Sophie的兩個同款便當盒,便擠身於同座一雪櫃內。

中午一時正,Frankie到Pantry A的雪櫃內取回自已的便當盒便放進微波爐「叮」熱。
5分鐘後取回便當盒回座位,打算一邊睇電腦動畫一邊吃飯。Frankie打開便當盒一看,咦?點解今日啲餸咁清淡咁齋嘅?是西蘭花、蒸魚、荳苗和帶子,唉!阿媽吖~唔埋咁多,大啖大啖食。Frankie一口氣吃完整個便當盒後,仍未飽肚下繼續看動畫。

忙碌趕貨版的Sophie到1:35分,才有空Pantry B去「叮飯」。見有一張A4紙貼在雪櫃上:「雪櫃壞了,請到Pantry A雪櫃取回你的便當盒。」

Sophie去Pantry A把便當盒加熱後,帶回自己座位享用。一打開,吓?點解啲餸變成咁?兩隻雞翼、幾塊牛扖豬扖、一條司華力腸和一大盒白飯?嘩!好似BBQ之後食剩嘅嘢加碗白飯咁,Sophie見到都無哂胃口,埋怨點解阿媽煮咁多肉,又無菜蔬?因為Sophie一向唔食紅肉,無理由阿媽會咁整蠱自己?Sophie諗都唔使諗,便把這堆BBQ掉落垃圾桶。吃朱古力頂肚算數,再埋首工作。

3:45分,Frankie的媽媽來電,叫Frankie今晚放工回家前,到日本城買一支地拖回家。Frankie順便問阿媽:「今日個飯盒啲餸好齋啫!」
阿媽反駁:「咪都係雞翼牛扖豬扖囉!」
Frankie終於知道自己食錯別人的便當盒,憑餸菜的清淡程度,Frankie推測便當盒的主人是一位女性。Frankie覺得緣份終於找上門來。

當日下午4點鐘,Franki立即把便當盒洗得乾乾淨淨,把一張紙條放入便當盒中,再放回Pantry A的雪櫃內。紙條上寫著:「對不起!吃了妳的便當盒,請致電內線5006找Frankie。」

Franki用「妳」字,主觀地相信對方是一名女同事;既然大家都不約而同用同一款的便當盒,口味應該相似。冥冥之中,她應該是緣份早已安排好,希望女主角見紙條後會盡快致電找他。

那邊廂,Sophie從媽媽的電話通話中,推敲自己的荳苗便當盒給別人吃了。憑BBQ食物推測,便當盒的主人是一位食肉獸的粗獷男士。Sophie只好把便當盒洗乾淨,於當日下午5:15分把便當盒放回Pantry A的雪櫃內。兩個乾淨的便當盒又再次碰頭,只不過其中一個便當盒懷着一張充滿盼望的紙條,另一倘是空的。

Frankie望着檯頭上的電話發呆,等待心目中的女主角來電,無奈打來的電話都男聲是和工作有關。但Frankie仍未絕望,期望下一次電話響起,電話筒會傳出她的聲音…

終於到晚上6:25分,Frankie的電話再次響起,Frankie急不及待接聽,電話筒另一端傳來一把甜美的女聲:「喂!你係唔係…」

待續

I'd Really Love To See You Tonight - England Dan And John Ford Coley

Hello, yeah, it's been a while.
Not much, how 'bout you?
I'm not sure why I called,
I guess I really just wanted to talk to you.
And I was thinking maybe later on,
We could get together for a while.
It's been such a long time,
And I really do miss your smile.

I'm not talking 'bout moving in,
And I don't want to change your life.
But there's a warm wind blowing the stars around,
And I'd really love to see you tonight.

We could go walking through a windy park,
Or take a drive along the beach.
Or stay at home and watch T.V.
You see, it really doesn't matter much to me.

I'm not talking 'bout moving in,
And I don't want to change your life.
But there's a warm wind blowing the stars around,
And I'd really love to see you tonight.

I won't ask for promises,
So you don't have to lie.
We've both played that game before,
Say I love you, then say goodbye.

I'm not talking 'bout moving in,
And I don't want to change your life.
But there's a warm wind blowing the stars around,
And I'd really love to see you tonight.

2008年7月20日 星期日

兒時傳聞

兒時傳聞

我成長的年代,聽過一些道聽途說的傳聞。其中一些是民間智慧、另一些則令我毛骨悚然,忐忑難眠。現在就重溫一吓我的十宗「兒時傳聞」:

第十位:對付蚊爛
如果被蚊針到,長出又痕癢又腫的蚊爛,如果無「無比膏」喺身,土炮的止癢方法:就是先塗一些口水在蚊爛上,然後,用食指的手指甲,在圓形的蚊爛表面上用力壓劃四吓,打成一個「米」字,之後就可以止痕!其實是將新加痛楚蓋過痕癢的感覺。

第九位:壁虎斷尾跳入耳
阿媽話壁虎遇到敵人或受威嚇後,壁虎便會自斷尾巴,分散敵人注意力,趁機逃脫。但離體後的尾巴仍會跳動,阿媽話呢啲斷尾專跳入人的耳道內,嚇到我細個果陣,一見壁虎斷尾,就立即掩耳逃跑。

第八位:山頂烏龜石
兒時在維多利亞山頂,沿盧吉道走一圓,欣賞維港景色,(當時填海工程尚未破壞海岸線)突然見到一嚿巨石,狀似烏龜。聽說此石叫「烏龜石」,每年會向山腳下移一厘米。當它到達維多利亞山腳時,香港便會陸沉。咁多年,烏龜石郁都唔郁,很明顯,此傳言純粹呃細路仔。(補充:有說狀似龜殼的灣仔會議中心新翼,就是該烏龜石,它已移到維港,所以香港風光不再。)

第七位:海洋公園纜車墜毀

80年代首次乘海洋公園纜車時,小學同學話曾經有架纜車斷纜墜毀,纜車內一家幾口無一生還。海洋公園害怕影響生意,將事件隱瞞,把一筆巨款給其家屬作掩口費。我諗如果該事情屬實的話,相信應該有目擊者,紙又點可以包着火?所以聽咗就算!(雖然不自禁地聯想到昂坪360)

第六位:可口可樂浸死人
80年代初期,同學飲可口可樂,剩下四份一支汽水唔飲,原來傳聞喺香港的可口可樂汽水製造廠,有一名員工失踪,最後發現在巨型糖漿搞拌器內,尋回搞難哂嘅屍體。屍體沉澱在任何一支可樂的底部,所以唔會飲到盡。這個避飲盡方法十分阿Q,如果支汽水真係加咗料,飲唔飲到底部,都會瀨嘢架!

第五位:零晨對鏡批蘋果
踏正午夜零時零分,點一支洋燭,對鏡批蘋果,如果一刀批到尾而蘋果皮又唔斷的話,鏡中便會出現未來配偶的樣子,我未試過,(加上我批蘋果實批斷皮),所以唔知靈唔靈?

第四位:地府直撥電話
又係喺午夜零時零分,攞起家居電話筒(當時未有手提電話出現),撥666,電話便可直通地府,跟下面鬼魂直接對話。印象中,同學試打過一次,不過電話筒傳來的,只是「長烏…」聲音而已。(除非「長烏…」就是鬼魂的聲音!)

第三位:四人歸西
歡樂今宵的戲寶之一:《幻海奇情》,其中有一集叫「四人歸西」,四位師奶搭好牌後,
四人打出的第一隻牌都是「西」,結果四人都先後歸西。此傳聞一直影響至今,雀友最迷信意頭運氣。真係試都唔敢試,好邪呀!

第二位:《夜夜痴纏》
由顧嘉煇作曲、林振強作詞、麥潔雯主唱的《夜夜痴纏》,是周潤發和葉蒨文主演電影《靈氣迫人》的主題曲。聽聞是電台禁歌,特別是深宵節目,一播電台就會鬧鬼!皆因呢首歌啲音樂會招惹到啲靈界朋友埋嚟喎,唔信你可以試吓,不過唔使預我!

第一位:溫莎公爵大廈狐仙
1981年,當年的溫莎公爵大廈 (即今天的皇室堡),一幅雲石牆出現狐狸頭的圖案!引來很多市民到來圍觀孤仙,後來商場將整塊雲石牆拆掉,風波才告平息。聽說事源於溫莎公爵大廈頂層某酒樓,有一對夫婦剛替兒子擺滿月酒後,當晚,婦人夢見到狐仙,一吓子就把嬰兒咬死。婦人驚醒,發現嬰兒已無呼吸,有傳嬰兒全身的血液已被狐仙吸乾!此傳聞成為當年我們同學之間的火熱話題!





Somebody's Watching me - Rockwell

I'm just an average guy with an average life
I work from nive to five, hey hell I pay the price
But I want is to be left alone in my average home
But why do I always feel like
I'm in the Twilight Zone

I always feel that somebody's watchin' me
And I have no privacy
I always feel that somebody's watchin' me
Is it just a dream?
When I come home at night
I bolt the door real tight
People call me on the phone I'm trying to avoid
Well, can the people on TV see me
or am I just paranoid

When I'm in the shower, I'm afraid to wash my hair
I might open my eyes and find
someone standing there
People say I'm crazy, just a little touched
But maybe showers remind me of Psycho too much
That's why...

I always feel like somebody's watching me
Who's playing tricks on me
I always feel like somebody's watching me
Tell me it can't be
I don't know anymore
Are the neighbors watching me
Well is the mailman watching me
And I don't feel safe anymore, oh what a mess
I wonder who's watching me now?
Who? The IRS?

I always feel like somebody's watching me
Who's playing tricks on meI always feel
like somebody's watching me
I can't enjoy my tea!

2008年7月16日 星期三

一個雨天

一個雨天

阿生和阿悅是一對二十出頭的年輕情侶,
兩人還年輕,沒有充裕的經濟條件下,有情飲水飽。
他們都跟家人同住,女的住大埔、男的住樂富。

阿生和阿悅剛好拍拖一個月,正是熱戀中最甜蜜的時候。
這個下午,兩人相約出來見面。

下午四時,阿生到大埔火車站接阿悅,
兩人在火車車廂中商量去邊度玩?
火車窗外風雨飄搖,雨點在玻璃窗上亂爬。
阿生陰陰嘴笑,把嘴巴挨近阿悅耳邊,細聲說:「落雨私濕、不如依泣!」
阿悅對男友這個大膽要求,沒有斷言反對,只是垂頭望著自己的手指,含羞說:「呢啲嘢…男人…話事喇!」
阿生聽後心花怒放!渴望已久的事情,終於在今個下午發生!

由於大家都跟父母家人同住,沒有地方可供親熱。
他們在九龍塘火車站下車,男的拖著女,撐著雨傘走在九龍塘街道上。
阿生有很多朋友,穿梭中港兩地工作,經常在九龍塘火車站出沒,
阿生驚給朋友撞到,把雨傘壓低貼著頭頂,用傘遮遮掩掩,鬼鬼祟祟。

他們找到一間時鐘酒店,臨步入之前,阿生用眼神問阿悅:「後悔仲嚟得切。」
阿悅用自己的腳回答了阿生,兩人極速步入酒店,走到接待處。
男女也是第一次來「開房」,心情既緊張又刺激;一起上人生的一課。

接待員帶他們入房間後問:「O唔OK?如果OK,多謝先生250元。」
阿生緊張到付款時,銀包脫手跌落地上,換來接待員冷笑說:「唔使咁緊張!」
男女相望,伸脷做個鬼瞼,自嘲一番。

接待員走後,阿生馬上把房間燈光調暗,畢竟他在卡拉OK文化薰陶下長大。
阿生只有從電影電視見過時鐘酒店,親身接觸倒是第一趟。
房間尚算清潔,阿生知道市面上有「偷拍開房的光碟」販賣,
四周檢查房間內有否裝上偷拍鏡頭,阿生覺得自己好像特務間諜般小心翼翼。
化妝枱上有安全套,阿生聽同事講時鐘酒店有安全套提供,
免卻他到便利店中,買一包煙二支汽水三本雜誌再搭…一盒安全套的尷尬情況。

好!戲肉到,阿生和阿悅在這200尺房間內,坦誠相對,翻雲覆雨。
纏綿溫存了三句鐘後,傍晚7:00分,兩人滿足地離開;雨亦已停了。

阿悅的婆婆今天生日,需要回家吃晚飯,阿生送阿悅一起乘火車回大埔。
到達沙田站時,阿生才驚覺手中的雨傘仍留在時鐘酒店內,
那把Gucci雨傘是他問家姐借用,絕對不能遺失!
他情急之下,在沙田站下車拆返九龍塘站,回時鐘酒店取回雨傘。
阿悅用眼神說:「咁大頭蝦架!」不過熱戀中男女,什麼缺點也當作可愛之處。

阿生一人返回時鐘酒店時,他又想起剛才纏綿溫馨鏡頭,不禁甜絲絲地笑了出來。
接待員把Gucci雨傘歸還時,接待員用眼神說:「唉~ 咁騰雞?試多幾次咪慣囉!」
阿生尋回家姐的新雨傘而鬆一口氣。
出酒店門口時,又下雨了,阿生截了一部的士返回樂富屋邨。

阿生在的士車廂內,滿腦子都是阿悅的優美身段影像,甜蜜地回味。
腦海裡想到入神之際,被司機叫醒:「先生,到啦!」
阿生下車回家,入屋後,母親剛好正在開飯。

家姐坐在飯枱前,問阿生:「咦?我借俾你嗰把Gucci雨遮呢?」
阿生O嘴:「哎呀!頭先坐車嗰陣,掛着諗嘢,把遮……留咗喺部的士度!」
「吓!把Gucci遮要成千蚊架!」

唉 ~ 頂!

2008年7月12日 星期六

一個下午

一個下午

阿妝和阿峰坐在客廳中,阿妝觀看阿峰陳年發黃的照片,
已經是下午4時了,為什麼另外三位朋友仍未現身?
窗外風雨大作。

阿峰的新居入伙,邀請一班朋友上他家作House warming。
約好下午各自上阿峰的家,結果只得阿妝最早上來。
兩人坐在客廳中,阿峰用烏龍茶招呼阿妝,
今天早上起,已經下著大雨。
此時,窗外橫風橫雨,電視機右上角出現「紅雨警報」的訊號。
阿峰陸續收到其他三位朋友的來電,不約而同說實在太大風雨,抱歉要爽約。
吓?!只剩下孤男寡女獨處在一室之中?

原本阿妝見其他朋友都缺席,應該告辭,但是窗外的風雨叫她留下。
只好等雨一停,便要告辭,
可惜這一場雨像缺堤的水壩。

阿妝是一名空姐,阿峰問她各國的經歷和感覺。
阿妝由東南亞講到東西歐至美加,對於最遠只到過菲律賓的阿峰來說,
只有點頭和聽的份兒,未能插上一嘴或半句!
阿峰覺得阿妝的眼神好像告訴自己為什麼你眼界這麼狹隘?
一個沒趣的悶氣男子;阿峰覺得很窟。

雨終於停了,已經是晚上7:30。
阿妝喝光兩支烏龍茶,要告辭了。
阿峰送阿妝到街口的計程車站,
阿峰指路,阿妝離遠見到計程車站後,她示意阿峰不必再送,
在毫無預兆之下,阿妝輕吻阿峰右邊面額一吓後便轉身走,步向的士站。
阿峰呆了,是Goodbye Kiss?還是多謝他兩支烏龍茶?
還是空姐的慣有禮儀?

阿峰轉身行了兩步後,再想回頭看多阿妝一眼,
怎料阿妝也在同一時間回頭,登時四目交投,
五秒後,阿妝乘的士離去。

阿峰望着街燈下的的士站,極力記下這個情景,
留下來日後回味。


2008年7月11日 星期五

的士司機

的士司機

早上8時,上班上學的途人正忙著趕路,一名行政裝束男士,截停阿Sam駕駛的計程車,登車後朝尖沙咀方向駛去。阿Sam習慣一邊駕駛、一邊聽電台晨早節目,他不會喋喋不休跟乘客搭訕或胡扯。

髮線開始後移、身材肥胖的阿Sam,父親是中港貨櫃車司機。阿Sam中五畢業後輟學,經父親介紹下,於一間小型運輸公司當貨車司機。做了四年,直至03年因為經濟不景,公司倒閉,阿Sam便轉行當的士司機。由於負擔不起購入昂貴的的士牌照,所以便向車行租車,做自僱人士。每朝六點半開工,下午五點半收工。每日扣除了車租和石油氣費的基本開支後,收入總算能夠負擔起一家三口的生活開支。

阿Sam今年三十一歲,四年前與拍拖多年的女友結婚,兩年前還誕下了一名女兒,生活尚算融洽安樂。

阿Sam今天跟平日一樣,清晨六點半便到屋企樓下取車開工。走了好幾轉,過了早上繁忙時間後,大約十時左右,阿Sam的收到太太的來電,太太告訴阿Sam,他的母親患了急病,需要阿Sam立即趕到醫院。由於阿Sam不能放下的士不顧而去,如果把的士停泊在停車場內,當天除了沒有收入之外,還要白付車租。

他突然想起一位中學死黨:阿堅,他在金鐘一間日本商社當司機,負責駕車接送客人老闆。上個月他剛給公司裁員解僱。如今阿堅整日待在家中,百無聊賴,打機睇波渡日,於是阿Sam立即致電給阿堅,希望他能夠為自己頂替「的士更」,扣除開支後,所有收入歸阿堅所有,當是接濟吓老友,一家平宜兩家著。阿堅二話不說便答應了阿Sam,有錢搵喎,阿堅立即換衫出門口。

阿Sam於聯合醫院外把車匙交給阿堅,並約定他五點鐘把的士交還。由於阿堅並不是職業的士司機,所以阿Sam把自己的「的士司機證」留給阿堅使用。阿Sam趕去急症室後,阿堅開車做生意,而司機位左邊的車頭位置,則豎立着「陳偉森」的「的士司機名牌」。

阿堅的車兜到觀塘偉業街時,有一名身型肥胖的中年女人截車,她左手右手各執兩大袋成衣,很吃力地把貨物和自己擠進車廂內。

上車後,胖女子叫阿堅載她到旺角中心,似乎是送貨到商場時裝店舖。阿堅從倒後鏡偷望這首位女乘客,面肉肥嘟嘟、雙下巴、眼細嘴大,手粗背厚。婦人身水身汗,肥嘟嘟的手指,取出一張紙巾抹擦額角黃豆般的汗珠。

女人在車廂內,無意間望到司機證,突然驚訝地問阿堅:「司機,你以前係咪讀東華三院第七紀念中學架?」
阿堅十分驚訝:「係呀!妳點知架?」
阿堅還未清楚發生什麼事情,這名女士已急不及待地相認:「你係陳偉森呀嘛!我係朱小美呀!中四嗰年同你同班,4A呀!你記唔記得我呀?」
阿堅當然未能想起她是誰,不過他知道這位女士一定因為「司機名牌」而誤認了自己是阿Sam,
阿堅一時之間貪玩,隨口應了她一句:「係呀,十年啦!好耐無見喇!阿…阿…小美!」
朱小美:「嘩!唔見你咁多年,你個樣變哂!」

阿Sam於中學時代是學校的風頭躉,當過籃球隊隊長,穿針球技精湛而且高大有型,所以阿Sam十分受女同學歡迎和傾心,所有校內和校外的球賽,都有一大群女同學在場內,為阿Sam這名萬人迷打氣。

由於阿堅也是籃球隊隊員,二人因此而熟絡,結成老友。只是阿Sam讀4A、阿堅讀4B,現在講起,阿堅也記起讀隔離班的朱小美,有點面善。

朱小美十分興奮,向阿堅傾說:「真係估唔到可以撞返你,當年你係籃球隊隊長,嗰陣你有型又靚仔,而家好似肥咗啲喎!」
阿堅亂答:「無計啦!要搵食!邊有時間打籃球吖,仲要成日坐喺度開工,有乜辦法唔肥呀?!」
朱小美:「嗰陣時,好多女同學都好仰慕你架,你知唔知道呀?」

阿堅腦裏突然想起:以前每逢比賽時,總會有一名身型肥胖,手持旗仔的女同學於籃球場邊大聲為阿Sam打氣,阿堅和其他隊員經常取笑阿Sam「艷福無邊」。

阿堅也是挑通眼眉之輩,一聽朱小美眼睛水汪汪、含情脈脈地問這條問題,心裡也猜到一二,明白她以前曾經芳心暗許的心事。阿堅決定將錯就錯,整蠱阿Sam,講了一個唔負責任的美麗謊言:
阿堅:「好多人鐘意我?係咩?唔覺喎!我剩係記得嗰陣逢比賽,妳都會企喺場邊幫我打氣,其實嗰時,我已經……好留意妳架啦!」
朱小美聽後靜了下來,只是經倒後鏡,痴痴地凝望「阿Sam」,淚水盈眶。2分鐘後,的士便到達旺角中心。

朱小美在付車資時,想抓緊繼續和「阿Sam」保持聯絡的機會,問「阿Sam」做唔做「8折的」,想向他取卡片,阿堅為了脫身所以唯有辯稱:「Sorry!我唔係八折黨,所以無印卡片。」阿堅故意找錢時展示自己無名指上的結婚指環:「我頂住後面啲車喇,有緣的話我地一定會再見!」朱小美亦明白事理,下車後,只有依依不捨地望著心目中的「阿Sam」駕車離去。

阿堅立即call阿Sam,把剛才巧遇朱小美及整蠱他的事情一五一十告訴阿Sam,阿Sam立即鬼煞咁嘈:「唔係吖化?!你咁大整蠱?嗰個黐脷根又醜嘅肥妹呀?嘈喧巴閉,成日係度纏鬼住晒,嗰時佢唔知醜,仲成日專登走埋嚟……」阿Sam在電話旁停唔到口咁談論著朱小美的醜事瘀事。

另一邊廂,朱小美落車後站在旺角街頭,仍然十分回味剛才跟「阿Sam」的對話,當年礙於自覺身型肥胖樣貌醜陋,怕會被阿Sam拒絕,所以一直不敢去向他表白心意,估唔到終於喺十年後,才知道「阿Sam」原來一早也在留意自己,突然一道光芒在她身上散發出來,所有自卑感一掃而空。挺起胸膛,妸娜多姿地走入商場店舖交貨。

Sales妹:「嘩!Mimi姐,做乜今日咁風騷?咁happy呀?」
朱小美:「哈哈!Zoey,開心係唔需要原因架!」

時裝店的微型Hi-Fi,正播放一首舊歌:「♪ 因有自信 所以美麗 使我自卑都放低 在半空之中親你 不管身世 ♪」 朱小美不禁一起輕唱低迴。



終身美麗 - 鄭秀文
作曲:陳輝陽
填詞:林夕

塔尖仍舊記得 這擁抱極美好
愛有千斤重 重過無涯的鐵路
你那手指再笨拙再粗 肌膚也被你修補
從前那一位 永未能做到

是你去喚醒我 努力才能被愛慕
但回頭目睹你 為我好自己不好
我這幸運兒合著眼睛 只得你沉重身影
如果這記憶非愛情 連天都不會太高興

莫非可終生美麗 才值得勾勾手指發誓
對你不止感激敬禮 當你知己才是虛偽
莫非多一分秀麗 才值得分享我的一切
給我自信 給我地位 這叫幸福 不怕流逝
任他們多漂亮 未及你矜貴

記憶無論再輕 輕不過脈搏聲
靠你的手臂 抱我人潮中暢泳
我這幸運兒幸運到一轉身找得到你 來為我打氣
如果可抱起這愛情 連天都會替我高興

因有自信 所以美麗 使我自卑都放低
在半空之中親你 不管身世

2008年7月9日 星期三

廢話–情侶篇

廢話 – 情侶篇

第十位:「係你就係你!唔係你就唔係你!」
情侶分手後、閨中密友、身邊朋友忙加上前安慰:
「唉~ 係你就係你!唔係你就唔係你!隨緣啦!」
屬於你嘅,就當然係屬於你架啦!
唔屬於你嘅,就梗係唔屬於你架啦!
煞有介事地講一個非常簡單的邏輯。

第九位:「喂!我吖!」
情侶講電話,第一句:「喂!我吖!」
假設對方已經知道自己是誰,所以不用報上姓名。
但如果對方早已知道係自己打電話嚟,
咁呢句「喂!我吖!」就無需要。
除非你身份証登記姓名真係叫「我吖」。

第八位:「總之鍾意就係鍾意啦!」
情侶之問,鐘意問對方:你鍾意我啲乜嘢?
期望對方講出自己嘅優點、好處、長處,
結果對方答:「唔知呀!總之鍾意就係鍾意啦!」
「鍾意就係鍾意」就是等於間接地唔想回答,
提供一個無答案嘅答案!

第七位:「如果我改到嘅,我一定會改!」
情侶之間,如果其中一方好煙好酒好賭好滾好揮霍,
另一方要對方改過自新,否則分手,
被屈服的一方會假扮誠心悔改:「如果我改到嘅,我一定會改!」
注意:「如果我改到嘅」是一句假設性說話,
實際上無答應過一定能夠改到!
所以只是用一張空頭支票,施行「拖」之訣。

六位:「如果我早啲識到你就好!」
情侶遇上第三者,相逢恨晚!
無奈受困於世俗枷鎖,又不想背負任何人,
只好說:「如果我早啲識到你就好!」
唉~ 又是「有早知,無乞兒!」的一派!
明知時光唔能夠倒流,咁講「如果」嚟做乜?

第五位:「我最初識妳嗰陣妳都唔係咁架!」
情侶的感情日久變淡,甚至產生磨擦。
受傷害一方抗議說:「我最初識妳嗰陣妳都唔係咁架!」
唉~ 情侶初相識,盡力表現自己的優點,隱藏缺點,
日後才慢慢暴露各自缺點,不再掩飾矣已。
另一方到這一刻才如夢初醒:「我最初識妳嗰陣妳都唔係咁架!」
會問這種問題的人,反映他不明白「日久見人心」的顯淺道理!

第四位:「如果我有錢,我一定俾最好嘅妳!」
又是假設性的說話,通常出自無乜錢的情人口中。
「如果我有錢,我一定俾最好嘅妳!」
但係我而家無錢呀嘛!又點俾到最好嘅妳呢?
但又無辦法保證到自己日後會大富大貴,
所以講這句說話時,只是一時「貪有型」的豪情壯語!

第三位:「妳好似已經有件係一模一樣囉喎?」
男方陪女友行街shopping,當女友見到時裝店某商品要買下之際,
男友阻止:「咦?妳好似已經有件係一模一樣囉喎?」
女友怒听:「梗係唔一樣啦!個款同色都唔同啦!唔識嘢!」
男友點樣講都阻止唔到女友的購物慾望,
咁講嚟做乜呀?!

第二位:「我而家同妳講緊電話囉!」
情侶日日晚晚通電話,或者報到,
女方可能問男方:「你而家做緊乜嘢呀?」
原本出發點是關心對方,再發掘新話題,
但不解溫柔的男方會答:「我而家做緊乜?我而家同妳講緊電話囉!」
鬼唔知你講緊電話咩?
女方最唔想聽到這句毫無誠意的敷衍廢話!

第一位:「我想點?你知架!」
男方不明女方心意,演變成爭拗,
男友問:「咁妳究竟想點?」
女友答:「我想點?你知架!」
唉~ 若果男友知妳諗緊乜,就唔使明知故問啦!搏妳鬧咩?
同樣地,「我想食乜?你知架!」、「我點樣先唔嬲?你知架!」
「我想要乜嘢生日禮物?你知架!」
若果兩人真係咁心靈相通,唔使明言都已經心照啦,
咁就唔使講呢句「廢話之王」啦!
正如我講咗咁多嘢係乜意思,你知架!



2008年7月5日 星期六

廢話–工作篇


廢話–工作篇

第十位:「如果我無記錯,應該係…」
員工忽然被上司問起一些工作數據或進程,
手足無措地回答:「如果我無記錯,應該係…」
「如果我無記錯」這句說話十分之廢!
唔通你想專登記錯講錯咩?

第九位:「如果未賣哂,就應該有貨!」
雖然政府拍宣傳短片呼籲零售業應該改善服務態度,
但仍有不少售貨員講:「如果未賣哂,就應該有貨!」
「掛哂喺度,有就有!冇就冇!自己摷吓啦!」
如果啲貨未賣哂,就梗係當然掛喺貨架上喇,
完全係唔專業嘅廢話!

第八位:「你有無嘢搞緊?」
上司有份急嘢要吩咐下屬做,
上司會問該下屬:「你有無嘢搞緊?」
唔通下屬會答:「我無嘢做,好得閒」咩?
所以這句「你有無嘢搞緊?」便是攞嚟問的廢話!

第七位:「今朝起身唔想返工!」
同事們一起早餐或lunch時傾計,
例必有一位同事慨嘆說:「唉~今朝起身唔想返工!」
但係佢成個人又明明已經返咗辦公室,仲「生勾勾」咁坐係你面前,
證明佢又講咗句無奈但真實嘅廢話!

第六位:「我同意你嘅講法,但係…」
開會期間,同事們交換意見,或者爭辯一些事情,
同事會講:「我同意你嘅講法,但係…」
「但係…」之後就是一堆反對的意見,亦是講者心中想講的戲肉,
所以「我同意你嘅講法」這句開場白是表面同意實際不同意的廢話。

第五位:「自己執生啦!」
零售業服務業是「以客為本」的行業,
Staff遇到客人有五花八門的要求時,不知如何應付?
問上司日後遇到同樣情況時,應該如何處理?
上司答:「無絕對答案喎!要睇到時實際情況,自己執生啦!」
無交低明確指示,總之自己搞掂佢,千祈唔好「揩嘢」就得啦!
「自己執生啦!」就是好似答咗其實無答的廢話!

第四位:「一定得!除非有突發嘢啫!」
有啲員工喺上司面前爭取表演,
上司委派一份任務給下屬時,
下屬好有自信咁拍心口:「一定得!除非有突發嘢啫!」
咁即係「得」定「唔得」呀?下屬講嘢都好「補底」。
只好求神拜佛無突發嘢發生囉!

第三位:「如果我幫到你,我就一定幫!」
無論同事之間、部門之間、面對客戶、
都聽到呢句:「如果我幫到你,我就一定幫!」
真實下一句就是:「但係今次我真係幫你唔到嘛,唔好意思!」
所以「如果我幫到你」就是一句廢話。

第二位:「俾我中咗今期六合彩頭獎,我聽朝就立即劈炮!」
每當六合彩有金多寶獎金,同事們必買多一個希望。
手持彩票滿懷希望講:「俾我中咗今期六合彩頭獎,我聽朝就立即劈炮!」
結果第二朝咪見齊哂每位同事死死地氣咁如常返工,
到下一期金多寶又重覆這句廢話多一次。

第一位:「咦?仲未走呀?」
同事們放工走人,見到另一位同事仍埋頭苦幹工作,
就會問:「咦?仲未走呀?」
一般打工仔,梗係想放工準時立即鬆人,如果放工後仲留喺公司,梗係OT啦!
OT期間,心情已經唔好,仲要俾人問:「咦?仲未走呀?」
同樣情況:「咦?咁忙!趕緊嘢俾老細呀?」、「咦?星期日仲返嚟公司嘅?」、「咦?飯都未食,有嘢趕呀?」等。
除非身邊有失明的傷健同事,
否則將目睹的事情用聲音描述多一次是十分廢!

待續



收到網友渣估的電郵,他說在家中翻箱倒篋,搵到一張陳年話劇宣傳單張,
得渣估兄同意,一於俾大家喺萬勝節之前一個驚嚇先!


咦?!1996 年4月?已經是12年前的遠古事跡,
原來1996 年4月13日當天,我在灣仔壽臣劇院做話劇,
那麼你又記唔記得在1996 年4月,你大抵在幹著什麼事情呢?

多謝渣估兄提供相片,

如果大家有乜投訴,冤有頭,債有主,搵我好啦!


2008年7月1日 星期二

廢話–人際篇

廢話 – 人際篇

香港人雖然出哂名生活節奏急速,
但仍然留有足夠的時間去講廢話,
喜歡講一啲講咗但又好似無講過嘅說話。
先數一數人際交友之間的廢話:

第十位:「凡事有兩面,睇你點睇啫!」
朋友遇上難題,需要做決擇:走或留?抓定放?
搏唔搏?追定縮?想朋友俾啲意見,
結果朋友就答:「凡事有兩面,睇你點睇啫!」
「有好有唔好啦」、「都係你自己先至最清楚」。
講咗但又好似無講過嘅三毫子一擔做人道理。

第九位:「你知我份人係點架啦!」
朋友之間發生誤會,搞到要當面對質,
被冤枉的一方百詞莫辯之際說:「你知我份人係點架啦!」
這樣說是先假設對方非常了解自己,希望對方相信自己的為人。
但係,如果對方真係咁了解你,就唔會有誤會發生啦,
亦唔需要大家三口六面講清楚!
對方就係知道你份人係咁打橫嚟架啦!

第八位:「俾我後生返十年?我一定可以…」
人會年老,身體機能轉差,這是不能改變的自然現象,
但有些人放不低昨天的光輝歲月,對自己的不濟感不滿!
「俾我後生返十年?我一定可以打低個賊!」
「俾我後生返十年?我一定可以跳Bumji Jumping!」
唉~ 連小學生都知道光陰一去不返啦!
唔通日日講,就真係會後生返啲咩?

第七位:「就當我無講過囉!」
朋友言談之間,無意講出一些不應講的說話,
例如冒犯說話、攻擊性言論、秘密、誨氣說話等,
朋友會補一句:「就當我無講過囉!」
無奈講咗出口的說話,如同撥出去的水,
點可以話收返,就真係可以收得返?

第六位:「早知我就咩啦!」
意思等如「有早知,無乞兒!」的馬後砲說話。
朋友遇上倒楣事情,呻笨大嘆:「早知我就唔做啦!」
「早知我就買啦!」、「早知我就去啦!」
講完都無補濟於事!

第五位:「你唔好再飲啦!」
朋友遇到失戀挫折打擊,要借酒澆愁。
旁人見到他酩酊大醉,劏緊仲要追酒飲,
朋友好言勸道:「你唔好再飲啦!」
結果當事人梗係唔會理你!聽完仲越飲越多添!
所以呢句「你唔好再飲啦!」似乎唔講好過講。

第四位:「如果我係你,我就一定…」
見到朋友吃虧,身邊人忿忿不平,
便插嘴講:「如果我係你,我就一定去報警啦!」
「如果我係你,我就一定要追究到底!」、
但係人都知道,一個人又點可以變成另一個人呢?

第三位:「搵日出嚟食飯吖!」
朋友偶然街上碰到,傾完兩句,交換近況之後,
某一方實會先開聲:「搵日出嚟食飯吖!」
「搵日出嚟飲嘢吖!」、「搵日出嚟吹水吖!」
結果,沒有講明「時、地、人」的約會,
當然是一個無傷大雅的廢(笑)話。

第二位:「你見到我咪就即係到囉!」
朋友搞聚會,問你出席定唔出席?
最老土的答覆就是先反問聚會發起人:「如果阿邊個去,我就去!」
另一種無菱兩可的答法就係:「你嗰晚見我到,咪就即係到囉!」
「見到我就見啦!」、「我到就自然會出現啦!」
朋友唔重視個party,就會答啲無重量的答案。

第一位:「咦?嚟咩呀!」
在茶樓遇到朋友:「咦?嚟飲茶呀!」
在健身室遇到朋友:「咦?嚟做gym呀!」
在戲院遇到朋友:「咦?嚟睇戲呀!」
在廟宇遇到朋友:「咦?嚟拜神呀!」
唔通嚟紋身?跳水?劈友?彈結他咩?
這是最「明知故問」的最佳示範例子。
講嘅無謂、聽嘅唔想答,一句講哂:「多餘發聲」!
成為廢話第一位!當之無愧!


待續

LinkWithin

Blog Widget by LinkWithin