~~~~~~~~~~~~~~~~







2008年1月31日 星期四

健身室之謎(赤裸男)

健身室之謎(赤裸男)

阿強和「賓佬」、「食人花」、「飛機男」、「Catwalk男」、 「倒三角」、「紋身漢」接觸後,
打後有一段日子,阿強健身健得風平浪靜,
但是「變幻才是永恆」!
水龍捲風每每潛伏在平靜如鏡的湖面上,
今次阿強又要面對一項終極挑戰。

阿強在更衣室內,間中會碰上一些豪放男士,
全身赤裸裸,行出行入,由sauna房「fing」到沖涼房、
再由廁所「fing」到stream room,全程「任劍輝」!
當阿強遇上這些「赤裸男」,阿強會立即扭轉面,
阿強推測這班赤裸男會因為自己的收視率增高而沾沾自喜。
所以阿強不會讓赤裸男奸計得逞,
更不會助長或鼓勵赤裸男的壯烈行為!

其實,阿強對赤裸男帶有一點鄙視;
阿強不是反對「天體主義者」,
如果一班天體主義者,處於一個特定範圍內,
一起享受天體樂趣是無可厚非!
但健身室的更衣室不是天體營,
赤裸男把自己的糖果變成旁人的砒霜。

這天下午,健身室人流不多,
阿強偷偷地在辦公時間蛇去健身。
健身到下午4時,急忙沐浴更衣;趕回公司報到。
他包裹着白毛巾去到shower room。

Shower room是一排獨立的花瀟格,
阿強揀了其中一個花瀟格,左右兩邊都無人用。
而每個花瀟格門框的左右兩邊,都裝有小鐵勾供人掛毛巾之用;
即使用者可以隨便把自已的毛巾掛於左手面或右手面的小鐵勾上,
而阿強習慣把自已的毛巾掛於門框右面。

5分鐘後,阿強沖完涼,
習慣地伸手出浴簾去取毛巾,
咦!點解條毛巾不翼而飛嘅?!
阿強探頭出浴簾,右面門框的小鐵勾上,空無一物,
阿強諗:「吓?邊個咁大整蠱呀?撻毛巾?我點行返出去呀?!」

阿強再睇真啲,自己花瀟格的右面一格,
浴簾拉上,有人正在使用。
而且右面花瀟格內,已沒有水聲,
阿強推斷:隔籬嗰位人兄,攞錯咗阿強條毛巾嚟抹緊身,
嗰位人兄的毛巾,則掛在他那格的門框上,原封不動。
阿強望住一格外的門框上掛着的一條毛巾,心裡爭扎應否攞嚟抹身?
但除了此舉,並無他法!

阿強吸一口氣,做了一個十分痛苦的決定,
就是要:「做赤裸男」!
他一向最藐視的赤裸男,今天自己就要被迫充當一次赤裸男!
他見周圍無乜人就立即衝出浴格,
快手取走毛巾再跳入另一空浴格內,馬上拉上浴簾。
幸而外面並無他人目睹自己的處女下海!

5秒鐘前,阿強用了萬二分的勇氣去做了一個痛苦的決定,
5秒鐘後,阿強要用了二萬四分的勇氣去做了另一個更痛苦的決定。
阿強望着手中拿着別人的毛巾,面對第二個心理關口,
阿強猶豫:應否把一條別人曾經包裹過下體的毛巾來替自己抹身?
但他想起:隔籬嗰位人兄也是用緊自己圍過下體的毛巾抹緊身,
只好安慰自己:「剃人頭者、人亦剃其頭」!
三扖兩撥係咁咦抹去身上多餘的水珠,
當然沒有抹面啦!如果唔係,行衰運就真係自己攞嚟衰!

阿強離開沖涼房時,不想知道隔籬嗰位人兄嗰樣,
務求將今次事件對自己產生的傷害性減至最低。
從當天起,他除低對「赤裸男」的有色眼鏡,
因為原來有些「赤裸男」是為勢所逼或者有難言之隱!


各方好友,久違了的「三亳子小說」將於2月3日(星期日)凌晨再跟大家見面。

2008年1月27日 星期日

健身室之謎(紋身漢)

2
健身室之謎(紋身漢)

阿強經過「賓佬」、「食人花」、「飛機仔」、「Catwalk男」同「倒三角」五人的洗禮後,阿強的適應力已將自己和大環境融合。本著「人不犯我,我不犯人」的理念繼續去健身。今次阿強會遇到什麼驚險的健身室經歷呢?

阿強後來轉了健身會,Join了另一間大型健身連鎖店。因阿強的工作地點和放工時間的關係,他習慣晚上10時後到旺角那間分店做運動。

旺角分店的特色是:有很多黑道人物幫襯。江湖大佬、古惑仔們晚上11點12點做完健身後,便返旺角區的娛樂場所,做坐館睇場。他們要經常保持身體最佳狀態,因為隨時要去劈友或被友劈,需要有「以一敵十」的身手。

在健身室內,大佬們當然大哂咁。生霸死霸啲器材,善男信女唔敢問佢地用完未?他們週身有紋身,不是荊棘、英文字、十字架或者火焰圖案,而是傳統的鷹、虎、龍、飯剷頭、觀音或關公。對於阿強來說,他們都是危險人物,生人勿近。

這個健身院的更衣室內,安裝了上下兩排Locker,Locker下有一排長櫈供人坐下著鞋之用。阿強慣了喜歡選用下一排的Locker,但這一夜,阿強發覺所有下排的Locker已被人佔用。阿強只好用上排Locker,雖然他不習慣。

一小時後,阿強運動後回到更衣室,打開鎖,脫去運動衣服,把白毛巾取出包裹下身。突然,一名手腳有紋身的魁梧大漢,一屁股坐在阿強的Locker下的長櫈。紋身漢俯身綁鞋帶時,露出背後的左青龍和右白虎的鐵青色圖案。阿強的警覺系統立即啟動,打醒十二分精神。

阿強把白毛巾底下的內褲脫下,把內褲順手「懶」瀟灑咁掟入上排的Locker內。怎料阿強今天的行裝特別多,早已把Locker塞滿,阿強的底褲撞到背囊後,反彈跌出Locker外,朝紋身漢的頭上急速飛墜!

阿強的瞳孔擴大,血壓急升!用平生最快的速度伸出左手,接着急跌的底褲。幸而左手手指尾成功地勾着目標物。

底褲和紋身漢頭部只剩下四吋的距離。阿強手急眼快,若無其事地把底褲放回Locker內。紋身漢綁完鞋帶站起來,嘩!樣貌凶神惡煞,肩頭仲有幾吋疤痕。阿強腳震震行去沖涼。

阿強驚魂甫定後,一邊沖涼一邊諗:如果那條底褲真的笠在紋身漢頭上,自己就一定被打到爆缸!打橫抬出健身室。從此阿強再唔可以喺旺角區出現;否則實被人「見一鑊、打一鑊」。

自此之後,阿強打死都唔再用上排Locker,亦唔會把底褲亂咁掟,否則,簡單到如一條底褲,也可能會招來殺身之禍。

講起古惑仔,便想起陳浩南了。

甘心替代你 - 鄭伊健
作曲︰陳光榮
填詞︰劉卓輝

不管天邊風已起 只想依依看著你
夜闌人靜會否仍可希冀

經得起憂傷與悲 只因心中有著你
路遙長夜記憶從不捨棄

長街的身影穿過風雨有傲氣
曾一起出走不怕闖進了絕地
如霧如煙 全像遊戲

彷彿天和地在挑選我跟你
如像我亦重遇了生死
難道只好淌淚心痛告別你
無法讓我此際〔甘心〕替代你

2008年1月24日 星期四

健身室之謎 (倒三角)

健身室之謎 - 倒三角

雖然阿強經歷過「賓佬」、「食人花」、
「飛機仔」同「Catwalk男」事件後,
阿強對健身仍是不離不棄。
今次終於輪到講吓:阿強在健身室首次跟異性接觸的經歷。

阿強在健身室做運動時,
間中碰到一些情侶結伴上來健身;
既可拍拖,又可以強健身體!
不失為一個拍拖好去處。

某些情侶,有時講多過做,
或者望住部電視,津津樂道!
有些情侶則踏健身單車,各自看雜誌聽歌。
另外,一些男朋友充當教練,指導女朋友正確運動姿勢。
乘機展示吓自己係幾咁識嘢!

阿強星期六下午到健身室,
他先到健身室的「器械部」玩擴胸器材,
阿強仍然將eye level 放在人的腰部以下;
突然聽到一把嬌滴滴的女聲問:「先生,唔好意思!」
阿強立即朝女聲方向望去,目光由底往上掃;
一對6號的adidas,幼腿短褲,紅色運動T恤,
長頭髮,樣子甜美的20幾歲的後生女。

阿強make sure面前這個是100%女性後,
心中暗喜,終於喺健身室內首次有機會跟異性接觸。
阿強露出親切的笑容上前,問:「小姐,妳叫我吖?」
小姐:「我想問呢部機,點樣可以教低啲個位呢?」
阿強:「啊,好簡單啫!等我幫妳呀!」
阿強義不容辭,調整位置後,
小姐:「多謝!」
阿強:「如果妳有嘢要幫手,再搵我吖!」
小姐:「好呀!」
說罷,阿強沒有再搭訕,
返回自已剛才玩緊的器材,繼續做運動。

10分鐘後,長髮小姐向阿強嗌:「喂!」
並揮手示意阿強走向她那處,
阿強相信她又有疑問需要解決。
阿強馬上放下手上的啞鈴,朝長髮妹方向走去。

怎料阿強左手邊有一個黑影擦過,比他更快走到長髮妹跟前。
是一個大約190磅的肥仔;
肥仔大大聲同長髮妹講:「無事吖嘛?無人蝦妳吖嘛?」
阿強表錯情,原來長髮妹叫喚的那位,是阿強身後的一名肥仔。
長髮妹和肥仔是一對情侶,約好今天到健身室先到先等,
一邊做運動一邊等;今次好明顯是女早過男啦!

阿強表錯情,只好半途折返。
從牆上鏡的反影中,阿強笑了出來!
原來那名肥仔挺胸收腹,把肚腩的肥肉谷上胸部,
變成倒三角型!
肥仔以為有男仔喺健身室度,騷擾自己的女友,
立即張牙舞爪,裝胸作勢上前保護女友,
情況跟青蛙遇到敵人,會吸氣谷漲自己的體積,
從而希望用體積嚇走敵人!

當阿強返回原位,舉起啞鈴時,再回望這對情侶。
肥仔見敵人已退,馬上解除身體防備警報系統,
把胸部中那啖谷了好耐的氣吐出,
肚腩立即打回原型!變回一座金字塔!
阿強搖頭嘆息,心諗:「肥仔,咁驚自己女友會蝕底?不如鎖起女友,唔好被佢出街吖笨?!」

十分鐘後,阿強路經跑步機時,又遇上這對情侶,
肥仔首先勁啤阿強,再谷胸收腹,變成一隻刺蝟。
總之阿強一出現在肥仔的視線範圍內,肥仔就立即谷胸、
只要阿強一消失於肥仔的視線範圍內,肥仔就立即放鬆!

阿強無肥仔咁好氣!也沒有被激嬲,
只覺得肥仔好可憐:佢對自己和女友都無安全感!
阿強心裡祝福肥仔早日快啲修身,並練得一身肌肉,
就唔使成日好似而家咁戲劇化,又變大又變細!

阿強此時感到「真材實料」才是最實際。
唔好學肥仔咁自欺欺人,
否則變成與牛鬥大的青蛙一樣,爆肚收場!
阿強眼尾瞄一瞄肥仔的胖影後,
帶着興奮心情去沖番個靚涼。


2008年1月22日 星期二

健身室之謎 (Catwalk男)

健身室之謎 – Catwalk男

上回講到我朋友「阿強」被「飛機仔」在浴室神交後,
每次阿強去沖涼前,都不自覺地緊張起來!
朋友「阿強」經過「賓佬」、「食人花」同「飛機仔」三役後。
究竟今次命運又安排了誰人給阿強去面對?

阿強的職業需要他外出見客,
阿強常常趁見客的時間,開小差偷偷地去健身。

這個星期一下午2:30,阿強偷偷地到了健身室,
他首先去舉鐵bar,舉了15分鐘後,
覺得有點攰!突然好想瞓覺!
由於昨晚星期日,是朋友生日,玩得太夜,
再者,因為下午「飯氣攻心」!
阿強決定要瞓一瞓。

以前,阿強曾經試過在健身室的「健康舞室」蓆地而睡,
舖好健康舞的軟塾在地上,倒頭大睡!
上一次他在健康舞室內睡了半小時,幸運地未遭任何騷擾。
阿強今次諗住照辨煮碗,替自己charge一charge電先!

健康舞室的入口是一度玻璃門,
阿強輕輕推門而入,沒有發出任何聲響!
阿強探頭向內一望,如果無人就可以瞓一瞓。
嘩!赫然見到一名身材瘦削的男子,
趁健康舞室沒有其他人,對落地的大牆鏡行catwalk擺post,
他比女人更女人!扭完兩步,回身俯低身、
右手撐腰、左側手送出飛吻!
陶醉在美妙步姿的catwalk男,
突然從鏡中察覺到阿強的存在,
Catwalk男立即擺出一個似跳緊aerobic的動作。

阿強撞破了catwalk男的好事,十分尷尬!
四目交投,阿強想先打破沉默,
阿強開聲問:「你有冇見過一對健身手套呀?」
Catwalk男專登壓低把聲、老牛咁聲答:「冇喎!」
阿強:「算罷啦!我出去搵吓!」
阿強急急腳離開aerobic房!

阿強的睡意全消,返出去繼續舉鐵。
45分鐘後,阿強完成今天的運動,
但其間阿強再沒有見到Catwalk男的踪影。

阿強步入更衣室,開locker之際,
見到Catwalk男再次出現,
他一邊行一邊講手提電話。
Catwalk男用好「man」好「麻甩佬」嘅語氣,
對電話另一邊講:「挑!我諗住追Nancy,點知Nancy個女同事Annie鐘意咗我,你話係咪吹漲呀?!」
阿強聽在耳中,早已明白Catwalk男另有用心,
專登大大聲講俾阿強聽。

阿強心諗:「就算見到你拖住個女仔行街,我只會覺得係兩位好姊妹的手帕交!」
「就算見到你同個女仔瞓埋一齊,我只會覺得係兩個Lesbian搞嘢咋!」
講了一個大話,跟着要講一百個大話來掩飾第一個大話!
任何人都可以呃,但最悲哀就係自己呃自己!

阿強以後都再有嘗試過入aerobic房瞓覺,
不過入之前,他會產生足夠的噪音,讓房內的人警覺;
情形類似到外國旅行、入酒店房間前,
明知房內無人也會先叩叩門!
心中唸着:「大佬唔該借借吖!小弟借宿咋!」


2008年1月19日 星期六

健身室之謎(飛機仔)

健身室之謎(飛機仔)

上回講到我朋友「阿強」差啲被「食人花」吞噬,今回繼續分享阿強的健身室經歷。

經過「賓佬」同「食人花」兩役之後,阿強盡力調節自己的心態,本着「河水不犯井水」的宗旨,繼續去健身;因為阿強貪平,一次過預繳一年月費,現在絕不能輕易退會,否則血本無歸!

阿強揀三四點靜中帶旺、旺中又帶靜的時段去健身,情況稍為改善,有人流:不會讓人有明目張膽下手的機會,但人流又不會多至需要排隊沖涼;阿強很滿意現在這個健身時段。

但人流呢家嘢,有時真係估佢唔到!阿強這天4點鐘去到健身室,竟然人流比平時多一倍,原來今日係中秋節迎月,好多公司提早放工!阿強沒有想到這一著,但又唔想走人,只好頂硬上,人多都照健身可也!

結果5點鐘,阿強又墜入沖涼房的人龍中,今次阿強已做好心理準備,打算先從浴簾旁往內裡瞄一瞄,確實浴格內無障礙物才使用。

他在健身室內已培養了一個特別習慣,就是把自己的eye level keep在別人腰下,因為阿強不想和任何人有eye contact。除非對方真係矮過3呎啦!

阿強在沖涼房排隊時,eye level 仍舊放在腰下。排到頭位時,眼睛無聊地遊走,發現其中一沖涼格,浴簾拉開了四份一,阿強的目光接觸到浴簾內,一名男子正在洗澡。
他正很細心地慢慢清洗他的下體,阿強立即把目光移到另一面,畢竟他介意別人當眾公開洗澡的姿勢。阿強不能叫他把浴簾關上,因為沒有一條會規要求會員沖涼一定要拉簾。

阿強又想:「嘩!呢個人嘅做事態度都好認真啫!連洗私處都洗得咁detail! 不過最好快啲啦!佢咁洗會拖延其他人輪候沖涼嘅時間嘛!」不過2秒後,阿強再想深一層,他才察覺到他看見的並非是洗澡的情形咁簡單,他的認知告訴他,Shower中的男子正在自慰!

阿強想認清邊個男子咁無自制能力,等日後見到佢就避之則吉!阿強把目光由下身向上移。原本,第三者自慰的情境,已經不想收入眼簾,最驚惶的事情是:當阿強的眼睛向上移,見到Shower中的男主角,原來一直是貪婪地望實自己!面部流露出興奮的表情、眼睛半開半合、並且急促喘着氣;熱水流到他的鼻頭,立即被吹成水波。

嘩!嚇到阿強連心也差點跳了出來!本能地立即垂下頭,不知如何是好!想立即擰轉身,但把自己的屁股show給格中人睇,
亦非上策!想唔沖涼走人,但等了這久,又滿身臭汗!只好繼續頂落去。

正當不知如何是好之際,另一邊傳來一吓拉開浴簾的聲音,拯救了阿強。阿強如怒海中見到一隻救生艇般高興!垂頭急急步走入浴格中,仲差啲跣倒!好彩沒有絆倒跌入「飛機佬」的浴格內,否則,豈非變成送佛(忽)送到西?!

阿強經一事、長一志!以後去健身前,會留意當日是否佳節或假期?但阿強已開始練得「不為外界所牽引」的境界,畢竟:見慣風雨、見慣改變、盡是作自然!


紙飛機 - 林憶蓮
作曲:林憶蓮/黃韻仁
填詞:小寒

王子騎白馬 月亮不見啦
還有貓咪總是 追著尾巴 有多傻
小時候的記憶 好無價

孩子們玩耍 雙腳全是沙
笑聲讓我想起 童年暑假 那個他
教我摺飛機的他 好嗎?

紙飛機 的摺法 藏在回憶陪我們長大
紙飛機 快飛吧 快樂方法並不複雜
不管未來怎樣多變化 保留這牽掛 
屬於我們的童話

紙飛機 的摺法 快樂是永不忘的呀
紙飛機 快飛吧 拋開煩惱自有解答
不管未來怎樣多變化 保留這牽掛 
屬於我們的童話

2008年1月16日 星期三

健身室之謎(食人花)

健身室之謎(食人花)

阿強被賓佬揩油後,
馬上開始對更衣室內其他男會員提高警覺。
見到有人企圖上次打招呼,
立即詐睇唔到,轉身行開。
杯弓蛇影,草木皆兵!
但阿強避得初一,又點避到十五吖?
繼續分享我朋友「阿強」的健身室經歷,

阿強以為健身室人流少的時候會容易出事,
警訊都勸人半夜三更,就唔好路經啲人少嘅地方;
所以阿強揀繁忙時間才上健身室。
人多就能產生安全感,
眾目睽睽之下,色狼難施祿山之爪!

由於人多的關係,副作用是:阿強要經常輪候健身器材;
更甚者,就是要輪候沖涼房洗澡。
有一天黃昏,阿強如常去健身。
由於他晚上八點鐘約了朋友,他已提前於7:40分去排隊沖涼。
一條人龍已出現在Shower Room外,
他站在隊尾,下身只圍着一條白毛巾。

自從賓佬一役之後,
阿強對空間和距離敏感了許多。
他潛意識覺得排在後面那位男士,
會借故越排越俟近,
當阿強感應到自己的屁股和後便那位的下身越來越接近時,
他會離隊企開少少,讓自己的屁股不在別人的射程範圍之內。

可能阿強今晚有約,所以特別心急,
他覺得自己已經等咗好耐,啲人就好滋油、慢慢沖!
7:55分終於輪到阿強排到頭位,
等待下一個人從shower room走出來,
他便會一個箭步衝入去,三扖兩撥淋過身!

終於有一名男士拉開半邊浴簾走出嚟,
阿強馬上半跑半走上前,準備入格;
拉開浴簾,見到入面的花瀟無閂,熱水反射打到自己膝下;
但最嚇人的是,花瀟下站着一名裸男,面向阿強,
水珠在他臉上狂爬,他用眼神向阿強發出請柬,
仲飢渴地嚥下一啖口水!

阿強的第一個本能反應就是:「Oh!Sorry!」
立即退後,把浴簾拉回,
情形似去試身室試衫,推門發覺入面有人,本能地say sorry!
阿強只好退回隊頭再等。

其他人見到阿強被打回頭,都見怪不怪!
唔怪之得輪候shower room啲時間要咁長啦!
阿強腦海中諗起睇過Discovery Channel的一套紀錄片,
講亞馬遜河,有一種食昆蟲的花,
鮮艷的花瓣顏色吸引昆蟲接近,
跟隨把昆蟲困在花囊中,成為晚餐。
阿強覺得浴簾的顏色和那種食人花的顏色都幾相似。

雖然當晚阿強遲咗應約,
但他保住自己算係執返身彩;
阿強盤算係咪應該喺非繁忙時間才到健身室?
至少起碼可以make sure沖涼嗰格內,係咪無人吖!

2008年1月13日 星期日

健身室之謎(賓佬)

健身室之謎(賓佬)

在健身室的更衣室內,
肌肉澎湃的大隻佬在換衫沖涼,
不失為同性戀者的天堂或「睇肉堂」。
我有個朋友喺健身室有幾段離奇的經歷,
不如講俾大家聽吓!

我朋友「阿強」於94年初次join健身會,
他94年前已有健身的習慣,
不過在大學體育館的健身室。
94年畢業後,他首次幫趁市面上的健身會;
健身室內的會員層面,各行各業,
不再只是大學生那麼單一。

該健身會設於酒店內,除了會員外,
也供酒店住客使用;
所以間中有外國住客到健身室參觀及使用。

話說阿強星期日早上9時去健身,
他步入更衣室時,見到一名菲律賓藉的男士(賓佬),
賓佬穿著恤衫西褲,在更衣室內探頭探腦,
相信他是該酒店的住客。

因為是星期日早上的關係,健身室內無乜會員,
賓佬見到阿強正在換運動衫,主動走上前打招呼,
阿強本於「香港好客之道」,回以微笑。
賓佬:「Hi!nice gym!」
阿強:「Yes!it's nice!」
賓佬:「Where is sauna room?」
阿強:「Go there and turn left!」
賓佬:「Thank you!It is nice gym!See you around!」
賓佬便住桑拿房走去。
阿強鎖好locker後便到健身室健身。

一小時後,阿強運動完畢後,回更衣室準備洗澡,
打開locker時,賓佬又再次出現,又再次走近阿強。
他依舊穿著恤衫西褲,莫非他花了一小時參觀健身室?
阿強:「You've been here for an hour?」
賓佬:「Yeap!it is nice gym!Ah!Where is stream room?」
阿強:「Go there and turn right!」
阿強鎖好locker後,便到沖涼房shower。
5分鐘後,阿強回到locker,
全身只披上一條白毛巾。
賓佬又再如鬼魅般出現!
站在阿強的右手邊。

賓佬:「Hi!it is nice gym!」
阿強點頭,並打算穿回內褲,
阿強伸手入locker之際,
傳來賓佬的說話:「This is a nice gym and you have a nice body!」
說時遲,那時快,賓佬一手揸落阿強的下體!
賓佬得手後,如鬼魅般立即閃走。

阿強在溫室般的大學健身室內,從未遇過風浪!
腦部未能做出任何反應,猶豫應該是嗌或是追的時候,
賓佬已如輕煙般消失於更衣室,欲追無從!
阿強見附近左右又無人睇到事發經過,
唉~只好當無事發生過!繼續換衫。
阿Q啲諗:將自己當做香港旅遊親善大使,
促進香港同菲律賓的國際友誼!
腦內迴響着賓佬的聲音:「It is nice gym?!」

2008年1月10日 星期四

大隻佬的壞處

大隻佬的壞處

如果你看完「大隻佬的好處」後,
認同做大隻佬會帶給你某些好處,
正準備到健身室,攞錢入會做member,
買定大隻佬奶粉手套運動衫。
但請想一想:健碩身形會為你帶來什麼壞處呢?

第十位:健身會健上癮
健身健上癮的人,
一日唔健身就周身唔聚財;
好似爭咗啲嘢未做咁!
好似唔操就立即肥返。
所以健身如吸毒般令人不能自拔。

第九位:買衫褲無size
潮流興窄身西裝(例如Dior Homme),
窄衫就無大隻佬份,
平時買衫時,鍾意其款式剪裁,
無奈就真無大隻佬size!
令到購物選擇相對減少。

第八位:搭lift搭車無位
如果一部升降機載滿人,
大隻佬和一名瘦人入lift而超重燈亮起,
群眾壓力下一定會叫大隻佬出去搭下一部。
同樣情形如搭私家車時,
也會有大隻佬無位坐而要自行搞掂的情況發生。
算是一種身材歧視!

第七位:解答無聊問題
當認識新朋友時,
新朋友對大隻身材產生興趣,
便會發問一埋問題:
幾時開始健身?幾耐去一次健身室?
有無戎宵夜?女朋友會唔會驚咗你?
能否搲到自己背脊嗎?有無食奶粉?
食奶粉會否皮膚乾?或便秘?
有無打算參加健美先生比賽?
答一次OK,但不斷重複回答就痛苦。
你問唔厭我都答攰!

第六位:手指粗多皺紋
長期手揸啞玲鐵bar,
令到手掌手指粗糙;
帶手套都係幫到少少咋!
還有使勁時哝牙鬆槓;
面部肌肉收緊導致眼尾皺紋增多。
所以想青靚白淨就唔好制!

第五位:被討厭人抽水
如果新相識的朋友未見過大隻佬,
就會有「眼見手動」的衝動,
想親手摸一摸肌肉的軟硬真偽。
被心儀的人觸摸身體當然開心,
但被討厭的人抽水就很痛苦!
所以記得學寶寶龍教落,要大聲說:「唔好呀!」

第四位:影相要企後排
拍團體大合照時,
大隻佬很少會企前面,
龐大身軀會擋住其他朋友;
所以一定被安排企後面。
剩番一個頭突出於人堆之中。

第三位:大隻佬食多啲
朋友們聚會晚饍,
食到最後階段,枱上仿剩下食物;
基於不浪費的環保信念,
大家盡力一吃而盡。
通常有人會話:「大隻佬食多啲!」
「驚乜呀?做兩吓sit up就消化咗啦!」
「全枱得你最有資格食多啲!」
大隻佬就成為清道夫垃圾焚化爐。

第二位:人前表演震波
海洋公園有海狗頂波表演,
朋友圈有胸肌震波表演。
新相識朋友一定問大隻佬:「你識唔識震波?」
大隻佬盛情難卻下震兩吓,
搏得朋友嘩嘩叫。
感到自己的遭遇和馬騮「金鷹」十分相似!

第一位:注定搬嘢拎嘢
家居和工作碰到要搬重嘢的時候,
大隻佬想免疫?當然唔得啦!
搬雪櫃、搬冷氣機、搬衣櫃、
搬file櫃、搬行李、換蒸餾水樽、
搬sofa、搬書、搬枱搬櫈!
朋友仲話:「搬嘢拎嘢,咪順便當健身囉!明益你啦!」
大隻佬注定係生成條苦力命。
做牛做馬,為人民服務!

大隻佬三部曲 - 完



2008年1月6日 星期日

大隻佬的好處

大隻佬的好處

政府提倡人人做運動,
如果每人放工後都去健身游水打波;
就會有健康的體格去應付工作學業。
如果你係一名大隻佬,
你估健碩身形會為你帶來什麼好處呢?

第十位:兼職做保鏢賺錢
當保鏢的先決條件就是要身型大隻,
推人撞人擋子彈,
再配戴黑超耳筒黑西裝,
眼前就是一個標準金牌G4保鏢。
其他工作:演唱會保安員、押款員、
DISCO睇場和劊子手也需要大隻佬。

第九位:權充減肥專家
跟新認識的朋友去吃飯,
話題必址到如何減肥練大隻?
遇到虛心請教的朋友,
不妨分享一吓減肥心得;
增進大家的聯誼感情。

第八位:女性要安全感
「猛男」在女性心目中有市場,
因為壯闊的肩膀是女性哭泣的避風塘。
澎湃胸肌和粗壯的雙臂,
擋住風霜暴雨,
8號風球把臂睇浪都唔使驚!

第七位:身形著衫好睇
健碩身形穿西裝份外好看,
即衣架身材,能「carry到件衫」。
或者簡單穿一件T恤已經outlook OK!
一個好的骨架是時裝的最佳拍檔。

第六位:特徵容易辨認
跟新朋友相識,除非自己太靚或太醜,
否則交換名字後便很容易遭人忘記。
所以身體特徵有助對方記起自己,
例如:「我記得!嗰個大隻佬叫Rambo呀嘛!」
但如果做咗衰嘢,也很容易讓人記起:
「喂!小心嗰個叫Rambo嘅大隻佬,好鹹濕架!」

第五位:巴士坐多個位
公共巴士的三個座位,
三個成年人已經坐得很擠迫。
但如果換著是大隻佬,
便無人會坐在他身旁,
(除非他喜歡半邊屁股懸空)。
大隻佬加一個成年人,分享三座位,
中間可放背囊、行李。

第四位:扖手唔敢落手
扖手專向無還擊力的途人落手,
就算被拆穿都可以跟目標打成平手。
但換上是大隻佬,
則令扖手的被打風險提高。
除非該扖手喜歡捨易取難,向難度挑戰,
否則不會打大隻佬主意!

第三位:擺脫吸毒嫌疑
藍帽子巡邏截查可疑藏毒販,
見到懷疑係道友,就叫佢攞身分證出嚟。
落disco捉吓邊個濫藥(特別係骨瘦無神);
但如果你係大隻佬,
就可以將吸毒嫌疑減到最低。

第二位:唔會俾人欺負
社會森林定律:弱肉強食,
弱者一定被強人欺負搵笨;
所以練得一身肌肉,
可以去「兇人」之餘,也可以自保。
做技安定做大雄,自己揀啦!

第一位:冷氣勁都唔怕涷
香港公共場所:冷氣巴士、商場、
戲院、酒樓、卡拉OK、Office、
都是冷氣十足!似足殮房!,
女士要披肩熱茶,
大隻佬則面不改容,
反過來問女士:「使唔使我除件外套俾妳?」
出入冷氣地方又無咁容易一冷一熱中招,患上感冒。
年中慳唔少醫藥費。
但唯有美中不足之處就是:
大隻佬告病假無人相信佢真係病倒,
只不過藉詞告假去偷懶遊樂!
唉~

待續

2008年1月3日 星期四

健身室風景

健身室風景

部分香港女士認為「瘦白即是美」、
部分香港男士則認為「健碩才是美」,
究竟在健身室會看到什麼風景呢?
我以過來人身份,
為大家數一數健身室十大風景:

第十位:飲奶粉
邊個大隻佬唔飲奶粉?
在更衣室內,健身之前,

有人沖奶粉有人食香蕉,
有人討論邊隻牌子好?邊度賣得最平;
補充好體力才出去舉鐵。

第九位:私人教練
有人愛聘用私人健身教練,
學習正確姿勢之餘、又有人陪健身。
有一些中年婦人愛聘用男教練,
有身體接觸又有人傾計解悶;
男教練向女士提供身軀鍛鍊和心靈慰藉。
同樣男學員也愛揀(靚)女教練。

第八位:照鏡谷肌
健身室的牆壁就是落地大鏡,
供會員操完一組動作後,
立即對鏡檢視肌肉脹大咗幾多吋?
練習震波彈老鼠仔。
會員的滿足感立即從眼睛傳入腦部中樞神經。

第七位:要多條毛巾
會員俾咗月費,
更係有咁多著數攞咁多著數啦!
一個人攞多幾條毛巾,
一條抺身、一條塾腳、一條抺臉、
一條桑拿、一條沖涼、一條洗頭、
一人用幾條毛巾,終於一嘗「豪」的滋味!

第六位:掉啞鈴
會員白天在工作裡受了氣,
晚間到健身室發洩。
舉幾吓超重啞鈴後,
砰砰聲掉啞鈴落地!發洩憤怒情緒!
或者因為太重無力舉,而迫於掉啞鈴落地,
旁人經常聽到砰砰聲,
好似暴龍逐步走近咁、
重base低音傳入耳裡。

第五位:運氣嗌
舉重舉到臨尾幾吓,開始無力,
就要大聲嗌吓嚟幫助發力。
呢邊嗌幾聲!嗰邊嗌幾聲!
此起彼落,仲有鬥大聲的趨勢。
大家覺得越大聲就越man!
嗌聲包括:「Wush!Hah!Hoh!」
如果掉啞鈴的聲音是低音的話,
那麼運氣嗌聲便是高音了!

第四位:桑拿鬥熱
武俠片中兩名俠客於客棧相遇,
搭枱後兩人表面相安無事,
實際兩人正用筷子酒杯比試功力。
桑拿房成為現代比試功力的場地;
兩人於桑拿房內對峙,
不斷撓水加溫,
比試內力耐力,睇吓邊個認輸先走出桑拿房?
難怪有人雖然贏了比試,
但需要付出暈倒桑拿房內的沉重代價。

第三位:長時間霸佔器材
香港精神:生霸死霸,
某些使用者長時間霸佔健身器材。
做2分鐘後,抖足10分鐘,

甚至索性睡覺。
其他人問可否使用器材?
立即回答:「用緊!」
變成山頭主義,各有各霸。

第二位:昅嘢
有些穿得sexy的少女和macho大隻佬,
成為「高收視的被昅對象」。
健身室成為昅與被昅的大廣場;
男昅女、女昅男、男昅男、女昅女,
特別在健身舞房中,
大班男女在房中作多角度近距離互相觀望。
在更衣室內,更成為名正言順的睇肉場!
難怪有人唔做運動都話要上去沖番個涼先啦!

第一位:吹水傾計
喺健身室唔健身剩係健談者,
為數的確不少。
三五之知己放工,聚首一堂,健談一番!
談天說地,吹水作大!
做2分鐘,跟着傾足20分鐘。
除了會員之間吹水,
教練與教練之間巡場吹吓水,
更衣室內員工之間吹水,
會員圍著電視機旁吹水,
或在桑拿房蒸氣房內吹水,
健談完之後感覺如同健完身。
帶著滿足感去洗澡之後離開。

待續



LinkWithin

Blog Widget by LinkWithin