~~~~~~~~~~~~~~~~







2008年5月29日 星期四

街頭表演

街頭表演

西九龍文娛藝術區傾咗咁耐,民意咨詢再咨詢,都係莫衷一是。
如果起劇院,到底有冇觀眾願意去幫襯呢?
其實就算唔使起劇院音樂廳,香港街頭都有好多精彩嘅街頭表演,
供市民工餘時免費欣賞。

第十位:菲傭詩歌唱詠
菲律賓是天主教國家,
星期日菲傭於中環結聚,唱宗教歌曲,
有樂器有speaker有制服,玩得好認真。
從歌頌上帝中忘記在港工作時受到的苦頭!

第九位:旺角街頭話劇
旺角西洋菜街4點後成為行人專用區,
變成劇團宣傳的熱點,做街頭話劇,接觸更多觀眾層面。
除了旺角,中環政府總部門外,
間中有請願人士,上演諷刺政府的街頭劇。
不過有時演員仲多過觀眾或記者。

第八位:灣仔hip hop踩板
灣仔政府大廈對開,
有一個露天休憩地方,
成為板仔踩板場地。
板仔是外籍或ABC居多,
一失手跌親,就叫「Oh!Shit!」

第七位:隧道樂器演奏
以前行人隧道搵到玩saxophone、二胡、小提琴的賣藝者,
而家喺旺角行人專用區,長期有一位老人家駐場,
玩結他唱懷舊英語金曲。
也有一位年輕人於旺角火車站,彈結他玩Beyond嘅歌,
算係一份搵到滿足感的兼職。

第六位:真人家具示範
Set一個booth喺街邊,
介紹廚鑊鋼刀、神奇清潔劑、多用途抹塵百潔布、磁石抹窗器、
戴着headset microphone的sales親身示範,
落足嘴頭,語氣聲線,動作手勢
「大家唔好睇小呢個切蔥機,佢有三大優點五項功能……」
都吸引到師奶駐足觀看!更迷迷糊糊地取出銀包。

第五位:大陸僧侶化緣
一些持雙程的大陸訪客,
穿上僧侶袈裟站在街頭敲鐘化緣。
假僧侶下班之後,換衫去快餐店食豬食牛,
明知佢係假扮,但佢始終都係一名演員,
所以撥入街頭表演的類別。

第四位:啤牌掩眼法
於街市附近,騙徒用紙皮箱當檯擺檔,
三隻啤牌,買邊一隻喺公仔,
騙徒嘅對象係去買餸嘅師奶,
大嗌:「好易中,就加餸」!
搵個專人喺你面前表達掩眼法,
梗係要俾啲學費啦!

第三位:迷魂催眠術
街頭當眾表演催眠術讀心術,
祈福黨零件黨補藥黨煉金黨,
令到事主神推鬼湧咁信哂佢,立即撳機俾錢!
醒後發覺破財,後悔莫及。
睇這個演出要付出很大的票價!

第二位:掘地修路工程
香港的馬路經常要鑿地維修,
當工人喺度鋤地擔泥,
就有一啲上年紀的長者,手揸報紙或雀籠,
駐足凝視工人掘地;
只要開始時有一個觀眾,就會慢慢吸引其他觀眾,
掘路工人估唔到自己變成北京填鴨師傅般,
要當眾親手示範真功夫。

第一位:情海翻波嗌交
電視劇有情侶悲歡離合的橋段和情境,
但娛樂性就比唔上真實的情侶嗌交!
街頭情侶吵鬧,越嘈得大聲就越多人圍觀。
有時途人忍唔住會幫口:「飛佢啦!」「冚佢兩巴啦!」
結局是其中一人走先,無戲可做,無戲可睇!
眾人傳出噓聲,紛紛鳥獸散!
高漲情緒飄散後,街中不曾留下半點痕跡。



下期預告:

繼07年11月的《兩花生》後,新作十集小說《紀漢醇》,將於6月1日推出。

主角紀漢醇,男姓,30餘歲,樣貌身村材算過得去,他自命靚仔,又好女色。
仲替自己的名字「漢醇」,改了一個貼切的英文名:Handsome,紀漢醇=Handsome Guy!

父親是北方外省人,所以姓紀。父親愛飲中國酒,所以替自己兒子改名為「漢醇」。
紀漢醇都愛劈酒,更在酒吧結識了現任妻子,婚後未有孩子。
《紀漢醇》就是描述他婚後的一段經歷……

「2345劇場」:十集都會在香港時間:晚上11時45分上載。
2008年6月1日星期日晚上11時45分(12345),紀漢醇首次跟大家見面;
紀漢醇將會陪足大家整個6月。

其實……我都驚搞到雷聲大雨點小,
《紀漢醇》其實只係平時啲《三毫子小說》,不過寫長少少而已。
如果睇完唔好睇,大家放喺心裏面算啦,

唔好噓我呀!

2008年5月26日 星期一

摸手仔

摸手仔

雖然時代進步,男女關係比以前隨便咗!
但仍有不少「怕醜仔」或「電車男」,
唔知點樣可以親近異性,,摸吓手仔。
今次數吓有咩方法可以摸到心儀對象的手:

第十位:扮識氣功
「橋」唔怕舊、最緊要「受」!
扮識氣功,可以從自己掌心輸出真氣給對方,
有病醫病,無病就強身!
乘機跟心儀對象四隻手,掌心對掌心,享受一分鐘的手溫。
(因為對方feel唔到真氣,一分鐘後就被人拆穿!)

第九位:物件交接
叫心儀對象傳遞物件給自己,
例如對方找錢、遞刀叉、交文件的時候,
詐傻扮懵地好似唔覺意咁輕輕摸吓對方的纖手!
扮嘢講句:「Oh! sorry!我無心架!」
揩一揩止住渴先!

第八位:打麻雀
跟心儀對象打牌,輪到洗牌時,
8隻手喺麻雀枱度任撞任揩任摸。
這是中國傳統最早的合法身體碰撞!
無人會發覺你「醉翁之意不在牌」而在「手」。

第七位:Give me five
雖然大家都係中國人,但香港人愛扮西化。
有開心嘢發生的時候,走到心儀對象面前,
興高采烈地嗌:「Yo!Give me five!」
如果對方「騷」你,你就可以擁有一秒鐘的蜻蜓點水式接觸!

第六位:作病手涷
見到心儀對象嗰樣唔多舒服,好似「作病」咁,
就第一時間撲上前、一手觸落佢隻手度,
親切慰問:「咦?妳隻手咁涷嘅?妳病呀!」
雖然佢會縮番隻手,但你都享有2秒的溫存。

第五位:按mouse
如果心儀對象遇上電腦問題,
你就自告奮勇上前幫手,
一手揸落佢按緊mouse的玉手,按正確的command。
她可能立即縮手,再用目光厲你一厲,
你解釋因為一時情急之下才這樣冒失。
成功騙走3秒鐘的溫柔!

第四位:交通工具扶手
跟心儀對象乘搭巴士地鐵火車輕鐵,
架車疾一疾,你就本能地要立即抓緊扶手,
你的目標當然就是她已按在扶手上的纖手!
一嘢按下去,講聲sorry!
換取兩秒的觸電感覺。

第三位:多餘hand cream
如果你跟心儀對象算是相熟,
冬天乾燥的季節,
把很多hand cream塗在自己手上,
走到她面前說:「我吱多咗啲hand cream喺手,益吓妳呀!」
自己雙手觸到她的雙手,表面上把多餘的hand cream揩到她手上,
實質是一種輕度的纏綿。

第二位:鬥手掌大小
跟心儀對象無聊吹水,
話題扯到手掌的大細,
提議比一比誰的手掌夠大。
兩隻手拼在一起量度,
有心者盡量用說話拖延時間,
爭取多一秒的旖旎。

第一位:打手背遊戲
跟心儀對象講「童年集體回憶」,
重溫小學時候玩過的一種「鬥反應快的打手背遊戲」;
兩人四隻手掌上下緊貼,下方的手心反轉拍打上方的手背,
一方鬥快打、一方鬥快縮。
如是者,做下方的你只要唔出手,你可以hold幾耐就hold幾耐,
這一招是十種方法中最持久耐用的摸手方法!
(如果對方肯跟你一齊傻的話。)

另外還有:「表演後牽手謝幕」、「紀律部隊手牽手做人鏈」、「牽手祈禱」、「幫人做水晶美甲」、「睇掌」。




2008年5月23日 星期五

殺入娛樂圈

殺入娛樂圈

好多自問樣貌上鏡的青春少艾,
他們夢寐以求的理想可能是入娛樂圈,
大紅大紫後,名利雙收!
究竟有乜途徑可以入娛樂圈?
以下是其中十種方法:

第十位:藝員訓練班
TVB藝員訓練班,近年來已沒有定期招生時間表,
在訓練班畢業後,便可能有機會於電視劇出鏡,
由閒角慢慢浸起,日後發展就睇自己造化。
周潤發都係由【民間傳奇】中的門口衙差做起,
這條途徑入電視圈是最簡單直接。

第九位:新秀比賽
以前無綫搞新秀歌唱比賽,
捧紅梅艷芳、呂方、杜德偉。
2004年無綫與英皇娛樂集團合作,
改稱《英皇新秀歌唱大賽》;
將吳浩康、泳兒、洪卓立、鍾舒漫等新人帶進樂壇,
為愛唱K的少年提供勇闖歌壇的入口。

第八位:選美活動
先有港姐亞姐華埠小姐,後有電視先生、香港男士,
為自問是型男型女的任何年紀人士,
提供進入電視城的途徑。
落選又上鏡的佳麗,不需要等一年卸任後,
便可以立即有Job接,拍劇做司儀。

第七位:省鏡模特兒
八卦雜誌報導名模的明爭暗鬥,
男女多角關係,撻著分手再返兜,模特兒成為紙上明星,
有些混血模特兒拍電影出唱片,
所以,只要先成為名模,
便有機會乘搭娛樂圈的直通車。

第六位:唱片騎師(DJ)
森美小儀、I Love You Boyz、
軟硬天師、都是從收音機殺入電視機,
再拍廣告、出唱片、出書、殺入影圈,
電台每年搞DJ訓練班,
不少自認口才了得的少年參加。
以前考DJ先注重聲線,現在當然要先睇樣!

第五位:遊戲節目
電視台搞由觀眾參加的真人show遊戲節目,
「殘酷一叮」帶出:喬寶寶、馮文樂和莫凱謙,
「一擲千金」帶出「一蚊雞先生」。
有些觀眾為了脫穎而出,甘心作騎呢打扮!
不惜付出任何代價,誓耍殺入娛樂圈。

第四位:電影招募
電影開拍前,用招募演員搞吓宣傳,
大班自問有演戲細胞的準演員去試鏡,
或者行街的時候,選擇多去旺區,希望被星探發掘;
李燦森都係踩緊滑板嗰陣被陳果導演所發掘。
當然也有不少所謂星探是騙財騙色的陷阱!

第三位:明星親戚
做明星的親戚可謂「近水樓台」,
衛蘭引入衛詩、陳慧琳引入陳司翰,
江欣燕引入江欣慈、杜德偉引入杜德智、林姍姍引入林海峰。
謝賢嗰仔叫謝霆鋒、成龍嗰仔叫房祖明、
許冠傑嗰仔叫許懷恩、肥肥嗰女叫欣兒。

第二位:專業人士
專業人士也可以涉足娛樂圈,
睇風水嘅蘇民峰麥玲玲楊天命李丞責、
飲食界嘅轁轁、李純恩、李錦聯、
寫作有陶傑、王貽興咁,
撈到去電視台電台,主持清談節目,
對鏡頭講吓風水、歷史、美食、生活品味。

第一位:自資出碟
如果以上各途徑都未能把你帶入娛樂圈,
最後一著就是自己出錢捧自己!
20年前有夏金城變賣的士自資出碟,
近有顏福偉自資灌錄唱片。
或者有個強勁老豆做back up,
Juno有充足水源射住;
開句聲就已經有大把人肯走出嚟幫手,
有錢嘅出錢!有力嘅出力!
少爺仔大腳踩油門,120咪駛上highway,眼都唔使眨一吓,
使乜同啲仲發緊夢嘅平民百姓,一齊行埋啲迂迴小徑啫?

2008年5月20日 星期二

* 按摩椅

按摩椅

阿豪在本港某一間大學畢業後,
轉眼間已經在社會打滾了5、6年。
雖然他畢業於公共及社會管理系學士課程,
但他考不上政府職位,當不成公務員。
畢業後的第一個年頭,轉了兩次工。
不是他心高氣傲、三心兩意,而是環境所迫成。

第一份工作當文具營業代表,可惜公司半年後倒閉。
時隔一個月,找到另一份當閉路電視器材的營業代表,
可惜老板立心拖糧,最後更鬧上小額錢債法庭,
雖然阿豪能取回大部分的薪金,
但他覺得自己畢業後,總是「頭頭碰着黑」!
其後又轉了幾次工,但發展機會只是一般。
去年找到一份影印紙的營業代表,
負責到各大公司的採購部推銷公司代理的影印紙。
雖然他為人勤奮,但對客戶未夠八面玲瓏,成績只屬一般。
在公司的每週業績檢討會議中,
如果該週阿豪的業績未乎合要求,就要俾上司當眾大力狂插!

阿豪有一位女朋友叫阿芳,
兩人都有共識,希望在三年後結婚,置業組織二人世界。
可惜「儲首期」對於他倆來說:
是一項遙遙無期、未能見岸的希望工程。
半年前阿芳主張阿豪投資炒股,希望快啲儲夠錢,
無奈財不入急門,結果阿豪損手離場,
阿豪如像受了傷的動物般,聞股色變!
破財後,兩口子的關係開始變壞。

昨夜阿芳寫了一封e-mail給阿豪,
內容大致是因為性格不合,不如就此分手!
但字行間流露出嫌棄的意味,
阿芳埋怨阿豪缺乏經濟條件,而她又搭上一名基金經理,
阿芳選擇了一位她覺得有實力、有安全感的大藍籌。
阿豪看完電郵後,不埋已是深夜1點鐘,
第一時間致電阿芳,但阿芳將所有通訊途徑中斷,
阿豪自卑心作祟,整夜失眠。
翌日起床後洗面時,他決定今天放工後去接阿芳放工,
盡力挽救一段告急的感情。

早上阿豪返到公司,辦公室內氣氛古怪,
大家交頭接耳,竊竊細語。
上午經理叫他入房,原來營業部爆了一個鑊,
罪魁禍首已先向上司打小報告,將罪名嫁禍給阿豪,
他極力向經理否認及解釋,想洗脫罪名,但經理對阿豪早已存有偏見,
一口咬定係阿豪,仲鬧:「解釋即係掩飾!」
阿豪又查唔出邊個屈佢?白白吃咗隻死貓!
阿豪覺得公司是一個是非顛倒的社會染缸縮影。

面對公事和私事的雙重打擊,阿豪放工後,已無心情去找阿芳,
咁大個人,要走嘅唔係勸兩句就可勸得番,由她走吧!
他獨自乘隧道巴士回家,望着車窗外發呆。
檢討自己為何畢業後一事無成,一無是處!
從未試過升職,女朋友嫌自己窮、難達到父母對自己的期望、
平日受上司客戶的冤屈氣、自己無投資眼光、今日仲被經理屈機!

阿豪落巴士後,在斑馬線前等過馬路時,
旁邊一名五歲男孩在媽媽懷裡大哭,
哭的原因不清楚,只看見孩子躲在媽媽的懷內盡情的喊。
阿豪想起自己細個嗰陣,都會像這孩子一樣,
在媽媽懷中找到安慰和溫暖。
無奈自己長大後,不能向媽媽披露自己太多的問題煩惱,
否則,問題未能解決之餘,只會換來母親更多的擔憂。
所以阿豪自中五畢業後,已習慣把自己的問題收藏起來。
此刻,阿豪望見這孩子後,十分羨慕小孩尚享有的特權。

回到家中,父親外出揸夜間的士,妹妹工作OT未返,只得母親在廳中看電視。
母親見阿豪回來,問阿豪食咗飯未,
阿豪根本無胃口,隨口答:「食咗!」
當阿豪想步入睡房之際,阿媽叫佢幫一幫手。
原來今年新年,兩兄妹夾錢2萬多元買下一張電動按摩椅送給父親,
好讓父親揸完通宵的士回家後,坐在按摩椅上,舒緩他的疲勞;
但母親至今仍未學會如何操作這張電動按摩椅。

母親舞弄了遙控器半天,仍未能啟動按摩椅;
此刻見阿豪回家,立即叫他幫手。
阿豪雖然滿腹冤屈,但他從不向家人發洩,
只會躲入房中,閉咀發自己脾氣。

阿豪幫媽媽set好program,替媽媽戴好按摩椅附設的音樂耳筒;
按掣後,見到媽媽閉目享受電動按摩和輕鬆音樂,
阿豪看見閉上眼的媽媽,可能受到剛才斑馬線前哭鬧小孩的影響,
阿豪突然有一股衝動向媽媽傾訴一吓心中的抑鬱。
阿豪見屋內並無第三者,加上媽媽的耳朵又被耳筒塞着,
便學《花樣年華》中的梁朝偉,細細聲向媽媽說出這幾年的冤屈:

好細聲:「唉~我都想做好啲,賺多啲錢等妳同老豆享吓福,但係生意唔好,公司人事又複雜…又被人屈…」
阿豪說完幾句牢騷後,心情真的舒服了不少,正想轉身入房之際,
阿媽突然向阿豪說:「阿豪,寧食開眉粥、莫食愁眉飯呀!」
原來阿豪剛才調校按摩椅時,心情恍惚,錯手把音樂的音量mute了!
結果阿媽隔着耳筒,把阿豪的說話聽得一清二楚!

阿媽的安慰說話傳入阿豪的耳中,
阿豪立即變成較早前遇見的五歲男孩般,倒跌在媽媽懷裡流淚,
所有抑鬱隨淚水排出體外。
這時,OT加班後的妹妹,正扭開鑰匙踏入家門,
妹妹見到阿媽同阿哥攬住喊的情境,
阿妹立即大嗌:「阿爸!你唔好死呀!」
阿豪和阿媽見到妹妹如此反應,馬上破涕為笑!

或許阿豪以後的愛情和事業繼續未能稱心如意,
但他知道只需要一回頭,背後早有一個避風喘息的地方,
永遠無條件地等着他。
知道這一點,他已經覺得很足夠!


2008年5月17日 星期六

敷衍.再見KT2592



敷衍

香港人出咗名趕時間之餘,仲無乜耐性,
對於無關痛癢的瑣碎事情,就會敷衍了事。
又或者對別人由衷的勸諭,求其敷衍。
以下介紹的「敷衍三部曲」,在敷衍別人說話時使用;
唔理對方講乜都好,「敷衍三部曲」也可以照用可也!

「敷衍三部曲」是「得啦!」、「係咪先?」&「我都話知囉!」
當對方向你作出衷心勸諭時,無論對方的說話內容係乜?一樣可以照講無誤!
如果外藉人士正在學廣東話,我提議他先學好「敷衍三部曲」,
咁跟任何人一問一答都唔會露出馬腳!

例句1:
媽:「咁夜仲打機?!快啲上床瞓啦!」
仔:「得啦!」
媽:「咁夜瞓傷肝傷腎架!」
仔:「係咪先?」
媽:「醫生講架!你仲唔瞓,我擝甩你電腦個插頭呀!」
仔:「我都話知囉!」

例句2:
女朋友:「唔好食咁多煙啦!」
男朋友:「得啦!」
女朋友:「食咁多煙好易生cancer架!」
男朋友:「係咪先?」
女朋友:「你唔戎、我哋分手啦!」
男朋友:「我都話知囉!」

例句3:
同事A:「你返工嗰陣,炒股票唔好炒得咁揚呀!」
同事B:「得啦!」
同事A:「咁揚,好易俾人篤背脊架!」
同事B:「係咪先?」
同事A:「呢排你老細成日行過嚟偷望你做緊乜,」
同事B:「我都話知囉!」

「敷衍三部曲」可應用在同輩朋友、情侶、父母身上,
但在老闆、警察、黑社會人士面前,切忌使用!
否則後果自負,與人無攸關。
切記切記!

我估你現在心裡正回答:「得啦!係咪先?都話知囉!」


再見KT2592!



阿KT2592,祝福你跟個位新主人家,都好似我咁錫你啦。
我會記着共你奔馳於龍翔道、吐露港、屯門公路、青山公路、東區走廊、青馬大橋……的舒適快意。保重!

突然詩興大發,想寫一首詩:

次見妳碰巧路過這舊地
妳被一名男士牽著走遠
剩下一人呆呆對影顧盼輕嘆
腦海中甜蜜記憶四溢翻來覆去
手中24K白金指環仍未捨得拋棄
究竟什麼是Timing什麼是天意
如果上天安排人相遇為何又安排分離
想跟妳面對面一一十傾吐分手後的思念
妳可否應承我每年月我生辰那天想我一遍
我不會奢求生生世世人私守只望妳夜來記起我


2008年5月14日 星期三

* 餞別晚餐 –下集(小說)


餞別晚餐 – 下集(小說)

八卦的Peggy問:「嘩Amily!著得咁靚,紅噹噹!約咗邊個先?」
Amily心虛地說:「我…我…今晚要出席電影首映禮。我有個同學做電影發行,
今晚海運戲院有個首映禮,多咗張飛,佢咪叫我一齊去睇囉!」
Peggy:「套戲妳有份拍架?」
Amily:「傻啦妳!我邊有本事?」
Peggy:「唔係?咁妳做乜著到咁『恆』呀?搏咩呀?!」
Amily:「係咩?我成世女第一次去睇首映禮咋!我以為要著成咁!」
Peggy:「哼!正大鄉里!」

Amily今天在辦公室裏,早已編好這個大話,必要時拿來替自己解圍。
為了Dennis,她甘願被人笑為「大鄉里」,沒有反駁!
就算明天自己被Peggy渲染成為office的笑柄,也是甘心!

到達地下大堂後,兩人分道揚鑣後,Amily拐個彎折返,回到大廈電梯大堂,
這時輪到Amily擔心Dennis會笑自己穿得太過隆重?
1號電梯的樓層指示燈亮起G字,Amily的手有點發抖;
她的疑慮隨著1號電梯門打開而如釋重負。
Dennis穿著窄身黑色西裝,從電梯徐徐步出。
原來Dennis也跟自己一樣,下班時更換「戰衣」應約。
Amily心裡一甜,知道Dennis和自己一樣重視今晚這個約會。

兩人都對這次約會充滿期望,
相信彼此成為一對情侶,只是遲早的問題;
兩人由沙田乘火車到達又一城。
Amily一早已經在餐廳訂了一個幽靜的卡位;
心想今晚一定水到渠城,馬到功成!

大家都想給對方一個良好印象,十分注重飲食禮儀:
由坐姿、點菜、進食、話題、大家都小心翼翼,
結果換來拘謹的氣氛;晚餐變成「志雲飯局」般的一個悶局!

當他們品嚐完主菜後,Amily點了一杯意大利咖啡。
侍應奉上咖啡後,Dennis偷望Amily加糖後攪拌咖啡時的溫柔姿態,
Dennis留意到Amily的手指十分纖幼,攪拌後滲出濃烈的咖啡香味。
Amily把咖啡杯遞到咀邊輕嚐一口後,
Dennis腦中閃出昨夜吃晚飯的情景:
昨夜會計部同事們請Dennis吃餞別晚飯時,
會計部的Eddie談論男女初次約會,如何能試探女方是否對男方有好感和興趣?
Eddie提出兩個試探方法,準確情度高達百分之九十以上!
Dennis決定今夜運用這個試探方法,
來評估Amily能否跟自己成為一對情侶?

首先,Dennis向Amily提出:「妳杯咖啡好香!可唔可以俾我『拔』一匙試吓?」
這是心理學的推理:如果女方樂意讓男方喝她的咖啡,
即表示女方對男方既沒有抗拒或防衛之心,也願意拉近彼此距離和關係。

怎料Amily聽到Dennis的要求後,
Amily立即緊張起來!張大眼睛、提高聲線、斬釘截鐵、堅拒地說:「唔可以!」
她這麼大的突發性反應,把Dennis嚇了一跳!
Amily亦自覺十分失儀,馬上低聲道歉:「Sorry!但係…但係…真係唔可以。」
Dennis心裡涼了一截,難掩失望表情,
畢竟遭人拒絕的滋味不是好受!
更為自己提出的要求感到自討沒趣;
心中已開始冒起打退堂鼓的念頭。

原來拘謹的氣氛令Amily處於緊張狀態。
這間餐廳餐檯上的鹽和糖也是用獨立紙包裝,都是用同樣設計顏色紙包裝,
只是用很細小的英文字「salt」和「sugar」去區別。
Amily一時錯手,誤把一包鹽當糖,搗進咖啡中。
她喝一口時知道自己「中招」,
但基於餐桌禮儀,她裝作無任何異樣,繼續死撐下去,照飲如常。
當她聽到Dennis想喝一口時,不其然大為緊張地一口拒絕!

餘下晚飯的氣氛急轉直下,冷場連連。
Dennis提議倒不如結帳離開。
Amily十分後悔剛才的嚴厲語氣。
離開餐廳後,兩人向又一城的火車站入口邁進,
Amily行到商場的洗手間時,想去洗手間,
其實她忍了好一陣子,不過剛才的冷漠氣氛下令她不好意思提出。
Dennis聽到Amily要去洗手間,他又想起會計部Eddie傳授的第二招,
雖然剛才Dennis受挫,但他對自己說:「給她最後一次機會,如果再衰多次,我就對她宣佈死咗條心!」
Dennis出招:「妳去洗手間?不如我幫妳拎着個紙袋先?」
Amily除了手袋外,還帶着一個anges'b的購物紙袋,
Eddie說如果女方願意把自己的行裝交給男方保管,即表示女方覺得男方可以信任。

Amily聽到Dennis的善意建議後,眼睛轉一轉,
面帶歉意說:「唔使啦!我自己拎得架啦。」
Dennis心裡立即打出「Game Over」的英文字句,仲有閃動的感嘆符號!
在同一晚遭同一人拒絕兩次,Dennis心灰意冷!
望着Amily轉身步入洗手間,
他用八個大字「高興而來,敗興而返!」來總結今晚約會的感受!

原來Amily的anges'b購物紙袋內,放有一份神秘禮物送給Dennis,
是一堆在「無印良品」購買的文具用品,
希望Dennis到新公司上任時,放在案頭上,一使用文具就立即記起Amily。
Amily初聽到Dennis的建議時,本應想把購物紙袋交給Dennis之際,
突然祀人憂天,擔心Dennis會好奇偷睇袋中物件,令神秘感消失!
一念之差,馬上收回承命,話自己keep番好啲,再一次拒絕Dennis的善意。

在洗手間門外等候的Dennis越想越氣結,
Dennis今朝在辦公室時打算:今晚先食飯後飲嘢再表白,
現在遭人冷待,Dennis把「再去飲嘢」的建議,硬生生吞回肚裏去。
巴不得立即消失,亦有想過不辭而別!

當Amily出來時,Dennis發揮演技,扮成神情緊張說剛收到屋企電話,
阿婆急病被送進醫院,他要趕去醫院探望。
Amily見到憂心忡忡,神色慌張的Dennis,立即著他快點趕去醫院。
Dennis半走半跑離開又一城,轉了身的他,十分後悔今夜應約,
破壞了記憶中Amily的美好印象。
剩下Amily一人拿着無印文具,剛才Dennis神色慌張,令她忘記把禮物送上。

往後日子,Amily曾經用手電、MSN、SMS、e-mail、facebook跟Dennis聯絡,
但Dennis用off-line、接駁至留言信箱、開緊會好忙、Out of town等藉口疏遠Amily;
Amily亦知難而退。不久兩人失去聯絡,各自湮沒在人海中。

原本一段剛開始萌芽的感情,被一包鹽和一念之差所誤毀,
最終未能開花結果,長埋在商場洗手間內,從此與陽光隔絕,不見天日。
擺在面前的一段充滿可能性的美滿姻緣,由於緣份上的偏差,
竟變成兩人回憶裏的一抺污跡。


2008年5月11日 星期日

* 餞別晚餐 - 上集(小說)


餞別晚餐 - 上集(小說)

Amily在衣櫃前挑選明晚應約的衣服,
嫌這件太單調、那件又太過時、沒有一件看得上眼,
弄得一床滿是衣服,但仍未揀到合心水的服飾。
可見她對星期三晚的約會是何等重視…

* * * * * * * * * * * * * * * * * *

Dennis和Amily在沙田工廠區一間的新式商業大廈內佔地兩層的美資電腦零件公司裏工作,
兩人隸屬不同的部門,一個在25樓的商業拓展部、一個在24樓的物流部。
他們因工作上的接觸,因而認識了對方好一段日子。
Dennis到今年5月便剛好在這公司做滿兩年,
但他已於4月遞上辭職信,蟬過別枝到另一間英資電腦公司工作。
他的last day 是5月14日;趕於5月16日到新公司上任。

Dennis五官俊朗、為人健談風趣、樂於助人又人緣好,
很多男女同事都捨不得他的離職。
尤其是和他合作了很久的Amily。
基本上他們都有成為情侶的基本條件:
獨身男女、外表吸引對方、心地好、性格相似。
但是兩人沒有任何一方願意先踏出一步,
只差這一小步,令兩人的命運從未重疊過。

由5月5日開始,Dennis忙於跟同事們吃餞別晚餐(farewell dinner)。
午飯和晚飯也排得密密麻麻,
但Dennis最希望的是跟Amily一起吃飯。
Amily其實也有幻想過跟Dennis拍拖,
無奈一對男女情侶在同一間公司內工作,
通常會引起同事們的指指點點、招來閒言閒語。
如今Dennis的離職正好造就出一個黃金機會給他們。

思前想後,Amily終於鼓起勇氣,打電話相約Dennis於14號星期三晚,
請他吃餞別晚餐,
Dennis收到Amily的邀請,一股甜蜜從電話筒湧進心頭!
他毫不猶豫應承星期三晚下班後,到九龍塘又一城的一間西餐廳共進晚膳。
Amily聽到Dennis用求之不得的口吻來應承自己的單獨約會、
並把離職5月14號的最後一晚留給Amily,
她心底裏也猜到Dennis對自己存有好感。

當晚Amily回家後,在衣櫃前挑選星期三晚應約的衣服,
這件嫌太單調、那件又太過時、沒有一件看得上眼,
弄得一床滿是衣服,但仍未揀到合心水的服飾。
可見她對星期三晚的約會是何等重視!

翻箱倒篋,Amily最後決定穿一條紅色連身裙應約,
因為Amily平日愛穿T-shirt牛仔褲等中性服裝;
望着這條為了參加去年大哥婚宴而買的紅色連身裙,
Amily相信它能夠增加自己的女人味。
但恐怕同事們會對她當天紅噹噹的衣著問長問短,
她索性把連身裙放入袋中,打算星期三傍晚在應約前,
才在洗手間更換衣服。

轉眼來到星期三,Amily懷着緊張的心情回到公司,
她整天無心工作,對着電腦屏幕,模擬今夜約會的情景。
Amily不停地望手錶,今天的時間似乎過得特別漫長!
中午12時,她按捺不住,借故走上商業拓展部,偷看Dennis今天穿什麼?
原來Dennis跟平常一樣,穿T-shirt牛仔褲,
Amily閃出一絲擔心,如果她今晚穿紅色連身裙應約,會否太過隆重誇張?

很辛苦才捱到6點鐘,Amily檯頭的電話響起,
原來是Dennis來電,因為一個在24樓一個在25樓,
他們相約於15分鐘後於地下電梯大堂等候。
Amily馬上到洗手間更換紅裙及輕施脂粉。
望着鏡中的自己,Amily心跳加速,
畢竟跟心儀的男士單獨約會,
除了運氣外,還需要一點勇氣!

Amily在24樓走廊大堂內等待電梯時,
一方面擔心會遇到認識的同事,對她身上的紅裙無限放大;
另一方面又擔心Dennis會否取笑自己穿得那麼隆重!
24樓的電梯門打開,Amily踏進電梯,在25樓工作的Dennis並沒有在昇降機內。
當電梯門快要關上,一把女性高八度的尖聲大嗌:「等埋!」
原來是人事部職員Peggy,她是全公司最八卦的員工之一。
Amily急得把頭垂下,詐看Peggy不見,希望Peggy見唔到自己。
但Peggy擁有狗仔隊的嗅覺,怎會輕易錯過面前這個機會?
Peggy隔著人群,遙遙望向Amily,懶好奇地問:「嘩Amily!著得咁靚,紅噹噹!約咗邊個先?」
Peggy一問後,全昇降機內的乘客,眼光聚焦在Amily身上,
Amily作賊心虛地:「我…我…」

待續

2008年5月8日 星期四

演唱會

演唱會

紅館快要裝修,歌星們趕於裝修前密密開演唱會。
香港歌星演唱會除了歌曲rundown、歌衫舞台唔同之外,
歌與歌之間嘅對白其實都係差唔多,可以循環再用。
以下十句是演唱會的百搭對白,
聽落都熟口熟面!

第十位:「我一話開演唱會,以下呢位嘉賓就立即話要嚟幫手。」
歌星唱到無氣,需要找個嘉賓嚟撐場,換吓衫抖吓氣,
介紹嘉賓的其中一個方法就是打「友情牌」;
江湖兒女講義氣相肩插刀義不容辭拍心口做嘉賓!
其實藉以增加自己曝光率,一家便宜兩家着。
歌星有時會加多一句:「佢認真唔話得,由加拿大飛返香港,啱啱落機就趕嚟呢度!」

第九位:「我今晚喉嚨唔係好舒服,唱得唔好,大家見諒!」
有啲歌手唱Live根本好「牙煙」,走音唔跟咇甩嘴忘記歌詞。
事先張揚自首投案話喉嚨痛失聲,打埋類固醇針,
唱得唔好變成順理成章的護身符。
難怪歌手愛用煙用酒用夜蒲去保養他的爛聲,
否則護身符失效,就會被打回原形!

第八位:「送上今晚最後嘅一首歌。」
如果歌星想製造一個小高潮,
只需宣佈以下一首歌係今晚最後嘅一首歌,
歌迷立即頓足大嗌encore!唔好咁快完場呀!
消費者總希望已付的門票能夠獲得最大效益;
無11:59分都唔捨得離座走人。

第七位:「邊個有睇我上次嘅演唱會?有就嗌一聲嚟聽吓!」
歌星想現場測試一吓自己嘅人氣,
問那些現場觀眾對自己不捨不棄,開親concert都嚟捧場,
但香港觀眾向來比較冷漠,
無咁容易就被你隨便講一句,就樂意替你造勢,吶喊助威!。

第六位:「揮動你哋嘅電筒,嘩!好靚呀!」
入場時派給觀眾一支小電筒,
唱冧歌時叫觀眾一齊開電筒,製造浪漫星光氣氛。
或者叫觀眾開啟手提電話的螢光幕,一樣有同樣滿天星的效果!
歌星一定好陶醉咁,賣魚讚魚新鮮,
懶感動講一句:「嘩!好靚呀!」

第五位:「邊面嗌得大聲啲,我就去邊面先!」
如果歌星開四面台,歌星面對邊面觀眾多啲,等如剝削其他三面觀眾!
大家都俾咁多錢入場,
如果歌星行嚟自己坐嗰邊多啲,就等於賺多咗!
咁嘅情形之下,觀眾受誘因驅使,就唔介意嗌大聲啲啦!
歌星就變成跳艷舞的dancer,邊面老板多就去邊面!

第四位:「識唱嘅朋友一齊唱吖!」
香港卡拉OK之風氣根深柢固,
演唱會的監製,想將紅館變成超大K房!
或者想觀眾重溫幼稚園唱遊堂的集體記憶。
最好觀眾一齊拍手一齊唱,咁就可以製造「萬人大合唱」的口碑!
日後推出DVD都多個賣點!

第三位:「希望佢喺第二個空間聽到!」
歌星向樂壇已故前輩歌星高歌致敬,
唱完之後眼泛淚光、聲音微震,
感性地說:「希望佢喺第二個空間聽到!」
歌星輕易借力讓觀眾在這個演唱會中找到感動位!
其實已故歌星泉下有知,見到後輩們仲不斷借自己過橋,
唔知應該感激定係感嘆?

第二位:「我哋今晚唱通宵!好唔好?」
對成萬觀眾開空頭支票,唔使負刑事責任,
邊有歌星會咁蝕底唱通宵?邊個賠錢俾紅館呀?
觀眾聽完之後,又好開心咁大叫「好呀!」
其實可能係恥笑歌星當觀眾係傻仔,講嘢唔經大腦!

第一位:「無咗你哋,我無可能企喺呢度!俾啲掌聲你哋自己!」
飲水思源,歌星多謝完各大贊助商之後,
梗要多謝一吓台下各位米飯班主啦!
歌星自己一個人替萬幾位觀眾鼓掌,只會顯得太過勢孤力弱,
心生一計,叫觀眾俾返啲掌聲佢哋自己,自己替自己鼓掌!
好似朋友生日,同佢食飯,埋單果陣叫佢都夾返一份錢。
自己慳水慳力之餘,大家又好似各得其所!
如果歌星下次再講:「俾啲掌聲你哋自己」,
台下觀眾會否回應大嗌:「俾啲噓聲你哋自己啦」!

其他句子:
「我要多謝台前幕後各單位…」、
「我今晚唔講咁多嘢,唱歌把啦!」、
「大家企起身跳舞啦!唔好俾佢停!」、
「我真係要唱出今晚最後嘅一首歌!」、
「Keyboard…Gary!高音結他手…Peter!鼓手……」
「你哋嘅反應,係咁多晚觀眾之中最好!」、
「等我飲啖水先。」、「我件衫閃唔閃呀?」、
「就算得番一個觀眾,我都會繼續唱落去!」。

2008年5月6日 星期二

* 初踏台板

初踏台板

我的好朋友阿強,講完佢啲健身經歷後,
跟我講出他一段有趣的軼事:

阿強於八十年代讀預科的時候,具有反叛的性格,
他不是叻在劈酒冧友抽煙賭馬隻揪偷嘢溝女啪丸,
而是他不甘心隨波逐流,唔想盲目跟主流走。

當同學睇港產喜劇,阿強就去睇歐洲藝術電影,
同學聽譚詠麟梅艷芳,阿強就聽英倫電子,
同學睇香港話劇團演出,阿強就睇本地前衛藝術團演出,

阿強睇嗰啲前衛藝術演出,就是那些沒有對白,一班演員喺台上行行企企、
搬檯搬櫈、大叫大嗌、無劇情無角色無佈景無道具無戲服的現代表演藝術。
阿強覺得睇這些演出會令自己「好型」!身邊的觀眾又超酷!好藝術feel!

有一次阿強膽粗粗填寫觀後問卷,誤打誤撞參加了這個前衛劇團舉辦的工作坊。
他又幸運地被選中及邀請參與劇團的下一個公開演出,
由觀眾變成演員,阿強心情好興奮,排戲時都是行吓、企吓、指吓、叫吓、跳吓、坐吓或者唔郁咁。
阿強從來唔會問導演點解要咁做,因為一問就「露底」,
顯示自己好蠢咁!咁就「唔型」啦!
其他演員都好cool唔笑,因為一笑就「唔型」啦!
其他演員講電影音樂,都揀啲十分另類小眾,因為睇太主流大路嘢就「唔型」啦!
其他演員都只穿黑白素色衣服,好少著colourful衫,因為一著鮮色衫就「唔型」啦!
阿強有樣學樣,扮做前衛青年,這是他加入劇團的目的之一。

一個月的排練轉眼便過去。當晚阿強首次踏上台板,心情緊張!
前衛演出的優點就是無論演員做啱定做錯,觀眾都不會察覺!無話啱定錯!
所以阿強從容面對,作他的處女演出,踏上舞台。

無驚無險演到一半,難不倒阿強,但當去到某一場戲時:
在台中央,有兩排演員,分別坐在「前排椅子」和「後排椅子」上,
前排演員是全女班、後排演員是全男班,阿強是後排演員。

根據排練,阿強記得此時全部後排男演員需要站起身,但此時無男演員有任何舉動,
舞台經驗尚淺的阿強,此時心裡方寸大亂,在觀眾眾目睽睽之下,
他不能發聲去提醒或用目光示意其他男演員站起來。
幸而坐在前排的女演員阻礙了觀眾的視線,觀眾只看到男演員的肩膊以上。
阿強靈機一觸,向右面男演員Moore,阿強伸出自己的右手,掌心向上,
緩緩向上擺動,示意叫Moore一齊站起來!

怎料Moore沒有站起來不特止,阿強在毫無心理準備之下,
Moore突然一手握着阿強的右手,Moore的左手在女演員椅背後握着阿強的右手。
阿強最初第一個反應是:「吓?乜導演幾時加了這個新的握手動作?」
但從Moore握手的溫柔力度和手指的緩慢孺動,
阿強立即知道這不是劇情所需,而是戲假情真!
嚇得阿強第一時間縮手,並立即彈起,其餘男演員見阿強彈起,才如夢初醒般相繼站起。

阿強在餘下的演出、入後台、收拾行裝、宵夜、都刻意避開Moore,
阿強記得事隔幾個月後,他在中環擺花街再次碰見Moore,
當時他和一名同性外籍人士一起,態度親暱,阿強沒有跟他打招呼,裝作看不見直行直過,Moore也沒有相認。
這一次之後,阿強再沒有見過Moore。

如果有人問阿強什麼是舞台經驗,他不會答「處變不驚」、「隨機應變」、「顧及對手」、「控制現場氣氛」、「聲線投射」等答案,
而是將以上的故事再細說一遍。


歡迎大家繼續分享吓阿強的其他的健身驚險經歷 :

賓佬 食人花 飛機仔 Catwalk男

倒三角 紋身漢 赤裸男

2008年5月3日 星期六

印象落差

印象落差

Stereotype是某一類型人士給予別人的一種集體表面印象,
例如高收入專業人士放工後,愛到蒲蘭桂芳happy hour、
成功男士必愛玩名錶、golf、紅酒、跑車,
富太愛high tea、shopping、spa、去ball等。
可能係啱、可能係錯、可能係啱與錯之間!
以下是十個普遍落差的印象:

第十位:十個賭徒九個抽煙
賭徒長期處於緊張搏殺的狀態中,
需要用抽煙來鎮靜神經、分散注意力。
麻雀館、賭場、投注站外、都見賭民擔住口煙,
隨着賭徒口中唸唸有詞,煙蒂在跌與未跌之間,輕輕擺動。
實際上,有些賭徒已戎煙。因為賭徒輸清光,
如果有錢,都寧願攞嚟落注,而唔攞嚟買煙!

第九位:影痴睇戲多數獨來獨往
做得影痴梗係要「型」要「酷」咁,去欣賞高深的藝術電影!
向電影大師朝聖時,切忌跟朋友喋喋不休。
所以絕對自我的影痴們,愛獨來獨往,從不需要人陪睇戲。
實際上,影痴都想在戲院大堂遇上認識的朋友,
互相交換一個眼神,惺惺相惜,
眼神示意:彼此都是識貨之人,懂得欣賞這套深奧的滄海遺珠!

第八位:返大陸工作的男士多數包二奶
男港客在大陸佔有優勢,受國內女性歡迎。
所以普遍印象中,認為十個男港客九個喺深圳有二奶,
實際上,香港經濟衰退後,此消彼長,港客變港燦,
未必個個男士再有經濟能力養二奶。
再加上二奶生育嘅小孩有居港權,有手尾要跟,
令男士放棄包固定二奶,改玩一夜情算啦。

第七位:專業人士多數獨居
專業人士收入豐厚,有經濟能力租買物業自住;
他們在自己的私人空間內享受yuppies生活,
由於獨居,方便帶不同的異性(或同性)回家渡宿。
實際上,部份專業人士風光不再,失業減薪,
或把熱錢押在股票市場上,故未能於獨居中吹saxophone或點香冥想。

第六位:男同性戀者多數愛健身
男同性戀者的身體,就是他們受歡迎的指標,
越大隻越有粗壯線條,在圈中就越吃得開。
實際上,很多直佬都愛健身。(就以本人為例!)
另外,有說男同性戀者多數愛聽林憶蓮、黃耀明的歌,
實際上,很多直佬都直認愛聽林憶蓮、黃耀明。
也有為數不少的直佬:既愛一邊聽林憶蓮黃耀明的歌、一邊做健身!

第五位:Designer多數著黑色衫褲
設計師如何能給矛客戶良好的第一印象和建立信心呢?
就是穿黑色衫褲,手持blackberry、ipod、iphone,再配上黑色粗框眼鏡,
講嘢玄之又玄,一半中文撈一半英文,就可以扮成一個出色的Designer。
實際上,我識啲Designers有部分係all black,亦有啲著得好colourful。
穿all black啲Designers話佢啲黑色都分層次虛實冷暖,係我唔識貨啫!

第四位:靚女多數高竇
在學校、公司、社會、總之有人嘅地方,
擁有天賦本錢的靚女,她們行的路會較醜女的路,來得平坦寬闊容易。
靚女由於追求者眾,靚女可以選擇具有較好條件的男士作男友。
所以培養到靚女們眼角高,無錢無權者,唔該彈開!
實際上,也有些靚女,沒有追求者,並非因為她們性格高竇,
而是因為她們實在太靚,男士們估自己只有吃檸檬的份兒,
所以先打定退堂鼓;讓單身靚女喺佳節時,留在家中無人約。

第三位:清潔阿嬸多數八卦
Office內的清潔阿嬸可以穿梭通行整個辦公室,
由廁所、pantry、影印房、會議室到老細房,對各人恩怨瓜葛都瞭如指掌!
結果阿嬸聽埋聽埋唔少路邊社消息。
實際上,Office內最八卦的可能是老闆秘書或receptionist,
清潔阿嬸聽的只是表面嘢,而秘書和接待員受過專業訓練,
定期給老闆打各同事的小報告,或於女廁內聯誼,講是非當作人情。

第二位:洋化Model多數性關係隨便
年輕的外籍混血或本地model,都慣了出show時在後台隨便當眾脫衣換衫,
培養成她們減輕對身體的禁忌,加上model年輕貌美又愛蒲,
加上八卦雜誌炒作,男讀者的主觀聯想,Model給人性關係隨便的印象。
實際上,有些model思想好保守好傳統。
至少我所認識的model都是!唉~~~

第一位:老闆多數心情差及愛鬧人
老闆憂心盤生意做唔好,要養起成間公司的員工,
承受沉重精神壓力,所以心情點會好?
仲要黑起塊面,與員工保持權力距離。
又要經常鬧人,否則員工唔驚你就難駕馭下屬;
鬧得有咁金得咁金,員工先唔會重複犯錯。
老闆出得糧俾你,員工就預咗要俾老闆鬧!
老闆太和善就無人會聽佢支笛,老細款係要適當地擺吓。
實際上呢…老闆都係逼不得已先鬧伙計,
鬧伙計時,可能老闆係真嬲,也可能老闆交戲扮嬲。
你估老闆好想死咁多腦細胞咩?鬧人傷身嘛!


LinkWithin

Blog Widget by LinkWithin