~~~~~~~~~~~~~~~~







2012年2月1日 星期三

武俠劇對白


武俠劇對白

我對「古代行走江湖」的印象和認知,來自電視台的武俠劇。《倚天屠龍記》、《射鵰英雄傳》、《天蠶變》、《沈勝衣》等等。今次數一數在武俠劇中聽到的典型對白。

第十位:「妳嗌呀!妳嗌破喉嚨都無人聽到架啦!」
弱質纖纖的民女,在荒山野嶺遭一名或多名流氓調戲。正所謂:「叫天不應,叫地不聞。」流氓就會笑淫淫地說:「妳嗌呀!妳嗌破喉嚨都無人聽到架啦!」當然就輪到男主角咁啱行過,路見不平,做「架兩」啦。大喝一聲:「光天化日,竟然調戲良家婦女!」

第九位:「刀下留人!」
刑場行刑戲;劊子手,通常是大肥佬,心口好多毛。手持大刀等待行刑的時辰。官吏下令落刀,千鈞一髮之際,遠處傳來一聲:「刀下留人!」一係就有人手持聖諭救人,一係就有高手劫犯。

第八位:「你唔應承我就唔起身!」
古代人情味濃,求人幫手不需要講錢,只需跪低哀求便可。所以出現:「你唔應承我就唔起身!」的對白。換來一句:「唉~ 起身啦」咁就乜都搞掂!古代人的耳仔真軟。

第七位:「小心有毒!」
古代盛行用毒,仲係西域劇毒。毒藥可以塗在武器上、或落入餸菜和酒內。就有人嗌:「小心有毒!」另外,花草和動物都有毒,如果不幸中毒,就要講如何搵解藥。例如要找「冰山雪蓮」做藥引,或者上武當山少林寺經過一輪考驗求藥。

第六位:「今日就係你嘅死期!」
終於等到正邪大戰啦!正邪雙方打之前都要講啲開場白。或者歹角會自動解釋他犯罪的經過和動機,等觀眾知道成個真相後,才大打出手。大嗌:「今日就係你嘅死期!」,回答:「今日唔係你死,就係我亡!」等無謂廢話。

第五位:「佢天資聰敏,骨格精奇係練功既好材料!」
做得男主角,一定要天資聰敏,骨格精奇。無意間遇上隱世高人高人就會驚嘆:「佢天資聰敏,骨格精奇係練功既好材料!」收為徒弟,並打通其任督二脈,成為武林大俠。

第四位:「阿爹,阿娘,孩兒一定會幫你哋報仇!」
雖說「冤冤相報何時了」,但報仇就成為武俠劇的主軸題材。正所謂:「殺父之仇,不並戴天」。孩兒一定會苦練武功,脫胎換骨,當他成功報仇,手刃仇人之後,就是接近完場。

第三位:「聽你嘅口音,唔似係中原人士。」
雖然成套武俠劇都是廣東話對白,但竟然有句對白是:「聽你嘅口音,唔似係中原人士。」因為劇中有塞外人士到中原復仇或尋人奪寶,所以有人會操外族口音。不過都係講廣東話。

第二位:「大膽刁民!見到本官仲唔下跪?」
武俠劇另一個元素就是「官逼民反」。貪官污吏欺壓百姓,闖蕩江湖的少俠當然要路見不平,拔刀相助。貪官見到「懶有型」的男主角,就大喝:「大膽刁民!見到本官仲唔下跪?」跟著跟官兵打一場,仲要以寡敵眾。當然男主角最後會打贏,跟官府結下仇怨。

第一位:「店小二,上等女兒紅,兩斤牛肉。」
武俠劇中的客棧,男主角要醫肚,好豪氣咁坐低,放低武器在枱上。唔使睇餐牌(或者根本無餐牌)男主角諗都唔使諗,向伙計嗌:「店小二,上等女兒紅,兩斤牛肉。」好快,店小二就奉上酒菜,笑笑口說:「咁多位客官,請慢用!」古代的食店,千篇一律,只供應一款酒菜。


二少爺說:武俠劇熱潮,出現男女合唱的電視劇主題曲,例如羅文和甄妮、葉振棠和葉麗儀。



笑傲江湖 - 葉振棠 葉麗儀
作詞:鄧偉雄
作曲:顧嘉輝 

那用爭世上浮名 世事似水去無定
要覓取世上深情 何用奔波險徑
也亦知劍是無情 會令此心再難靜
那恩怨未曾問
縱是相聚也短暫
心中此際情也可永

那懼千里路遙遙 未曾怕風霜勁
心中獨留 此生還剩
多少柔情 悲歡往影
過去悲歡 往日情境 此際情

笑傲天際踏前程 去歷幾多滄桑
歲月匆匆再不問
心中此際情也可永

32 則留言:

  1. 第三位呢個激讚呀!

    你咪行埋嚟呀!你再行埋嚟我就咬斷自己條脷 <-- 呢個入唔到十大,可惜呀~

    回覆刪除
  2. largeheadboy

    可能「咬利自盡」太血腥,驚小朋友模仿,近年少聽這一句了。拿交剪刺頸也少見。

    回覆刪除
  3. >>你再行埋嚟我就咬斷自己條脷 ...

    kakaka, 你咬咯,我飲埋你嘅血,hahahaha



    >>你得到我嘅人,得唔到我嘅心嘅 ...

    hahaha, 心? who care?

    (噢,我西域黎嘅)

    回覆刪除
  4. Laulong

    果然夠毒!原來你是西毒歐陽瘋!

    回覆刪除
  5. 多謝提示

    已把「應成」改回「應承」

    回覆刪除
  6. 阿彌陀佛,善哉善哉,呢位施主,放下屠刀,立地成佛,回頭是岸啊。

    回覆刪除
  7. Eric

    回你一句:今日我要大開殺戒啦!

    回覆刪除
  8. naruto

    回你一句:「俾你一注香嘅時間」

    回覆刪除
  9. 卡臣:

    仲有,班友毫無地理常識既。今晚係鵝眉山練功,頂朝係長白山比武,跟住打到去武夷山。唔夠十個時辰,走遍大江南北,快過飛機。

    回覆刪除
  10. 佛爺

    快過坐高鐵喎!唔通騎大鵰周圍飛。

    回覆刪除
  11. 仲有一句:經過咗昨晚嘅事,我以後就已經係你嘅人喇,你以後唔做得寡情薄幸架...

    回覆刪除
  12. Eben

    你呢句也可應用在60年代的粵語長片

    ///

    naruto

    回你:有刺客!有刺客!人嚟呀!

    回覆刪除
  13. 卡臣:

    我諗野唔係天馬行空架!

    金博士係以全自然科學的態度去理解社會科學,佛洛伊娃就係以人本的態度去理解社會科學,所以二人頻起爭拗。

    凡仁不是孿人,他是直佬,但性壓制使他歪曲了正常的性觀念,沒法調整過來。致使他有機會做正常的性行為時,他還是被錯誤的意念所主宰。

    賓妮兔在太空船上,「環境」使她自覺是一名太空人。但她重遇凡仁,「心態」就使她的角色變回夢娜。她在事業和愛情上起了衝突,「本我」產生混淆!

    夢娜參加太空性科學研究,是她受著壓抑的性出路。當她奪得凡仁後,她就再無做性研究的意願了。

    該個故事很大部份是搞笑的,但主要部份我是循著一定的規律的。

    回覆刪除
  14. naruto

    再回再回:你呢個魔頭,今天我要為武林除魔

    回覆刪除
  15. 佛爺

    經你解讀後,我更明白多咗,個故事有深度!好嘢

    回覆刪除
  16. 莫非你就係江湖上鼎鼎大名,人稱乜乜物物嘅乜乜?

    正是,正是在下!

    真係久仰大名,受乜水一拜!

    豈敢,豈敢!快快起來,快快起來!

    今日得見兄台,真係三生有幸,一定要和哥哥飲嗰痛快!

    好得很呀!請!請!

    (未講完架,不過都係停下啦,哈哈!)

    回覆刪除
  17. coffee

    果然犀利!估唔到妳愛紅樓夢,也愛武俠小說,我接唔上了。

    回覆刪除
  18. 其實第十位, 第八位, 第六位同第四位(不過改咗係阿爸阿媽), 都會喺時裝劇出現!

    回覆刪除
  19. 30

    又係喎,其實古裝劇同時裝劇由同一班演員,差不多啦!

    ////

    naruto

    江湖上有咁嘅功力,只有兩個人,一個死咗,另一個就係乜乜乜!

    回覆刪除
  20. #3 真係噴飯.

    又,「魔剎(monster)」TVB版裡面,一講到外語(故事背景係德語,配左廣東話)會問:「你識唔識講我地D話」,而唔係用廣東話問「你識唔識講我地德文.」

    一大長進也.

    回覆刪除
  21. 魔術師

    你好!

    #3 真係好經典

    浦澤直樹真係好堅
    套動畫我在無記看過,野心之作

    回覆刪除

LinkWithin

Blog Widget by LinkWithin