~~~~~~~~~~~~~~~~







2014年8月25日 星期一

錯誤的決定


錯誤的決定

《優客李林》於1991年的成名曲《認錯》,其中一句歌詞是:「是我自己錯誤的決定」。每人每天都需要做大大小小的各樣決定,當做了一些錯誤決定後,自己便會忟憎激氣。今次數一數些會令到自己忟憎的錯誤決定,都是些雞毛蒜皮的決定。而那些人生重大決定,例如:入錯行、移錯民、買錯樓、結錯婚、生錯仔等,都不在今次討論範圍之內。

第十位:幾個聚會同一晚撞期
命運弄人,一係就成個星期都無人約,一係就幾個functions撞啱喺同一晚發生。當你幾班朋友們,不約而同約你在同一個晚上去玩。由於分身乏術,你思前想後,揀了出席一個你以為最開心最過癮的聚會,推掉其他約會。結果,你出席的聚會悶到爆!反而從facebook見到你錯過的聚會相片,十分熱鬧高興!自己揀錯了,哼!真係激氣呀!

第九位:以為有得claim
當同事以為可以用公數,便會洗腳唔抹腳,胡亂揮霍起來。例如艱辛工作後,以為可以用公數吃晚飯當慰勞,狂叫到一枱都係,結果第朝先搞清楚原來無得claim錢,要各位同事自費,嘩!肉痛呀!早知唔喪叫啦!又例如OT遲放工,以為搭的士有得claim,飛taxi入天水圍。原來又係無得claim,早知慳啲唔搭的士啦!哼!真係激氣呀!

第八位:無化妝落街撞到朋友
女性有時貪方便或趕時間需要落街走一趟,諗著落一落街好快啫,無咁橋會撞到熟人啩?一於著住街坊裝兼唔化妝落街走一轉。點知在自己最鬆懈的狀態下,竟然撞到朋友同事、暗戀對象、前度情人、仇人等等。真想搵個窿捐入去,平日花好哂靚妝著好靚衫,又唔會撞見熟人。哼!真係激氣呀!

第七位:Order的食物最遲來或最難食
同事們吃lunch都是趕頭趕命。叫茶餐午餐快餐包無衰。點知有人「玩有個性」嫌套餐難食,獨自order一些餐牌的冷門食物。結果人人食完,佢order的食物仍未上枱。又例如餐廳有新菜色,無人夠膽試。而其中一人率先點了新菜式,唔介意自己做白老鼠試新嘢。結果新菜色超難食,唔衰攞嚟衰。哼!真係激氣呀!

第六位:考試答是非題
考試答是非題,一半機會啱一半機會錯。當做完試卷後而有時間剩可以覆卷,看到「是非題」的答案時,突然信心動搖,猶豫起來,把原本的答案改了。結果考完試對返答案時,先知道原來第一個答案才是正確,即是自己衰手多,唔錯攞嚟錯,哼!真係激氣呀!

第五位:轉搭的士,巴士便來
對於慳家一族來說,交通工具首選步行,次之巴士。但有時需趕時間,等了巴士很久,但巴士仍未到站,心裡焦急起來,終於到last minute都無巴士嚟,忍痛揮手叫的士。當跳上的士後,回頭一望,那部望穿秋水的巴士便徐徐駛至。巴士唔遲唔早,趁妳上taxi嗰刻才到站,哼!真係激氣呀!
另外一個例子:在未實施禁煙令之前,等了巴士很久很久,不如點一支煙消磨吓時間,一點起煙,巴士便到,被迫吸一口便趕快擠熄支煙登車。哼!真係激氣呀!

第四位:轉排第二條隊仲耐
香港人去自動櫃員機、超市付款、快餐店、過海關,都是multi-lining(多行排隊)。香港人出名心急,見到自己排緊條隊咁長,好似會好耐,千方百計想轉到另一條更快的隊。看準機會,轉排另一條好似會快啲的隊列。點知過了檔才發覺自己原本排開嗰條隊才是最快!因快得慢。哼!真係激氣呀!

第三位:購物後發覺有其他店舖更平
購物前已經做足research準備功夫,去完多間店舖格價後,幫趁價格最平宜最多嘢送嗰間店舖,開開心心攜著戰利品步出店舖。但購物後最好不要再格價,否則有可能在街尾找到另一間店舖更平更抵,咁就即時大嘆唔抵!點解唔行多一步呀!?哼!真係激氣呀!

第二位:遲到早退,兜路撞正老細
打工仔久唔久會上班遲到或下班早退,因為作賊心虛的心理,便會放棄使用正門出入,改兜後門或其他防煙門。結果咁神奇在那些後門撞正上司或老細!慘被老細怒啤及留下壞印象。可能老細專登捉蛇,打工仔十分後悔:如果行正門可能反而無事,今次真係「聰明反被聰明誤」!哼!真係激氣呀!

第一位:帶了雨傘,天便放晴
見天陰陰,似落雨又似唔會落,左度右度,唔知好唔好帶傘?但唔知點解:帶了雨傘嗰日,天便會放晴。唔帶雨傘嗰日,天便會落雨。同樣地:帶了厚外套嗰日,天氣便回暖。唔帶外套嗰日,便會刮風。你早返辦公室嗰日,老細遲返工睇唔到你早返。你遲到嗰日,老細便一早在公司見到你遲到,天呀!點解呀?哼!真係激氣呀!



二少爺說︰如果未做過錯誤的決定,就不知道什麼是正確的決定。


6 則留言:

  1. 卡臣:

    行防煙門後梯,通常見到抵死纏綿的嘴吻和愛撫!最激氣就是兩隻鴛鴦旁若無人,阻住地球轉.嘻嘻!

    回覆刪除
  2. clubbing時揀咗一個女仔搭訕,傾到差唔多可以起筷嘅時候,個女仔嘅fd突然出現,新女仲要超幾班添。 :p

    回覆刪除
  3. 揀左套爛片, 貼錢又浪費時間
    去左間又貴又唔好食既餐館
    掛住睇手機唔記得落車。。。。
    人生總有大大小小遺憾事件

    回覆刪除
    回覆
    1. 掛住睇手機唔記得落車。。。。<----我試過呀! 頂!!

      刪除

LinkWithin

Blog Widget by LinkWithin