~~~~~~~~~~~~~~~~







2013年2月3日 星期日

卡臣 ╳ 世純合作企劃 (第一回) 之看圖作文–出文篇《暈逃》



卡臣 世純合作企劃 (第一回) 
之看圖作文 – 出文篇 《暈逃》


暈逃

各位人類嘅朋友,大家好!我係一隻「狒狒」,靈長類動物。跟你一樣都係屬於有脊椎哺乳類動物。我身處在大嶼山某個主題公園內,這公園為了吸引更多自由行旅客,新設咗一個野生動物園。我就從大陸運到這裡,關在鐵籠裡。公園沒有替我準備衣服,搞到我露出粉紅色的「咕咕」,醜死鬼囉!你哋啲人類咪好鐘意同啲寵物著衫著鞋嘅,點解唔俾件衫我著啊?!抗議!抗議!


我工作的主題公園最近要求員工「資源增值」,我除咗在鐵籠裡內供遊人觀看之外,也要參加下午三點的「花車遊行」,我在「獅子王Lion King」花車上客串吓。同車有隻「獅子演員」,成日望住我流口水,我真係驚有一日會俾佢食咗呀。但動物園管理員無理我生命安危囉!又無人同我賣保險,唉~我開工要搵命搏架。


今日多咗好多遊客喎,究竟乜事先?原來美國主題公園為咗促進美日關係,同日本漫畫玩crossover,整咗批「Doraemon」公仔,啲遊客咪癲咗咁同公仔合照,仲擺埋啲懶可愛嘅V字手勢,立即放上facebook等人like,仲以為好cute 添呀,哈哈哈哈


 我除了要做下午三點嗰轉「Lion King花車」外,我晚上九時又要OT啦。是咁的:中國啱啱成功搞火箭升空,今次航天員帶了隻「狒狒」升空,在太空進行動物實驗。主題公園的夜晚Parade,一輛「太空船環繞太陽旋轉的發光花車」上,我就會從太空艙彈出嚟同大家揮手,啲遊客見到我就會好high咁狂影相,正低能仔!我而家stand by緊,陣間艙門一打開,我就要伸個頭出去微笑。完成工作之後,咁我先有兩隻蕉咋,你哋香港咪有28蚊最低工資保障嘅咩?!搵日等我打電話去問吓先!


「嘭!嘭!嘭!」嘩!當我伸個頭出去嗰陣,咁啱見到夜晚煙花又發放啦!啲遊客又瘋狂咁影,癲架你哋!年初二又放煙花啦,啲人類下晝就仆去海旁霸頭位食海風,煙花有咩好睇呀?燒哂你哋錢呀傻仔!咦,乜個艙門無鎖嘅?呢架花車一定係深圳做,啲門鎖咁易壞架!嘩!度門無鎖,仲等咩?我立即逃走,自由啦我!yeah!夜麻麻,我都驚有危險,都係匿入樹林先,聽朝日頭先再逃走。

瞓醒一覺,肚餓添,以前朝早會有管理員餵嘢我食,而家唯有靠自己搵嘢食啦。咦,我見到主題公園入面有間快餐店喎,叫「麥肯基」,嘩!乜料呀!「麥當奴」定「肯德基」呀?招牌仲用簡體字,呢啲富中國特色嘅快餐店殺入香港啦!遲啲實會開野味店啦,食貓頭鷹、猴子腦啦,我要向愛護動物協會投訴!投訴呀!


肚餓啦,偷偷地爬入去「麥肯基」先,無乜客人,無人發覺我。啲人話香港人好多「廚餘」喎,原來係真架!啲人類食一啖就唔食啦,最鐘意浪費食物。有天收架地球人!咦,枱面上有塊麵包,我唔客氣啦。咦,我搞錯咗,原來呢份係陳列品,有個黃色價錢牌,不過我唔識中文字,唔知mark價幾多錢呢?唉~我好肚餓呀,陳列品都照食落肚。唔…..幾好味喎,食完要走啦,食飽就開始我嘅逃亡旅程。


我爬過鐵絲網,順利離開主題公園啦!回頭再望多眼這個剝削員工嘅美資公園,我發誓永遠都唔會再返嚟。唔~自由空氣嘅味道真係令我feeling good!行吓行吓,我聞到鹹魚、茶果、蝦醬嘅味道,我嚟到「水鄉大澳」啊!「東方威尼斯」名不虛傳。我要過河呀。咦,見到岸邊有個著紅衫蛋家婆婆揸住架艇喎,一於趁佢收錢之際,竄上船先。我匿起船尾等開船,呀!等咗五分鐘,架船終於開啦。


船埋岸啦,我趁機落船。我嚟到水道上的「棚屋」。都中午啦,又到食lunch時間,等我入去睇吓有無嘢食先?嘩!有啲大澳棚屋係「畫室」,我入呢間屋就係一個畫室啦。唉~~香港搞藝術啲畫家好Q窮架,實無嘢食啦。屋入面只見到啲畫架,唔食得。呀~~我個肚好痛、好暈呀,一定係頭先食咗有問題嘅麵包,頂!唔知落咗塑化劑、三聚氰胺定地溝油呀?間麥肯基真係有中國風味,眼前一黑,失去知覺,我暈啦……

當我再張開雙眼嘅時候,我見到阿象大哥,Oh my God!我又困返喺個鐵籠入面。原來我昨日喺「畫廊」入面暈咗,畫家發現我之後報警,送我返入嚟主題公園。好彩個畫家知道我係「狒狒」而唔係「野豬」,否則漁農署會派人射殺我。今次算叫做執返條命啦。如果我暈喺架艇上面,分分鐘俾個蛋家婆劏嚟食補身。今次「暈逃」雖然失敗咗,但我領悟到出面風大雨大,隨時會無命,都係公園安全啲。我又夠鐘要去Parade開工啦,各位人類嘅朋友,遲啲再嚟公園探我啦,記得帶多幾條蕉俾我,拜拜。


請大家再去世純那處,欣賞他的《三郎奇案》,
佛爺那處,欣賞他的《龍女蛇子七日情》。

今次crossover好好玩,世純和佛爺都是玩得之人,下次再玩得更瘋狂吧!

二少爺說:動物世界跟人類世界其實都差不多。


Love's Not For Me - Graham Gouldman
I've always run away
From things that tie me down
My life I love
But love's not for me

I see my goal ahead
With nothing in the way
If love should come
Then I'll run away

I've always been the type of man
Who's dedicated to his cause
And it's a lonely road I run
But I'll stay faithful to my course
There's only one direction

There comes a time when you must choose
About the path you're gonna take
And you must take it win or lose
And if you lose it's your mistake
There's only one direction

So when the race is won
And there's nothing left to do
Alone again but where are you

38 則留言:

  1. 「大嶼山某個主題公園」 ß 我以為係強國山寨嘢嚟o架添 :o

    「太空艙彈出嚟同大家揮手,啲遊客見到我就會好high咁狂影相,正低能仔!」 ß 狂影相嘅梗係低能仔,我就會拍短片喇 :p

    「有個黃色價錢牌,不過我唔識中文字,唔知mark價幾多錢呢?」 ß 利害喎,咁都畀你扭到條橋 :)

    「當我再張開雙眼嘅時候,我見到阿象大哥,Oh my God!」 ß 又回到起點喇。

    「領悟到出面風大雨大,隨時會無命,都係公園安全啲。」 ß 同我哋打工一樣呀 :(

    回覆刪除
    回覆
    1. 「大嶼山某個主題公園」 ß 我以為係強國山寨嘢嚟o架添 <===其實無乜所謂,見乜就想像它是乜
      我2005年年尾去DISNEY影架。

      我估你兩位會用人做主角,我想不如用動物做主角
      講牠的逃亡,側寫香港私怪現象

      我認我懶囉,寫了兩個鐘,出街玩
      你們花時間心機寫出鉅著,我慚愧呢

      刪除
    2. 我放大過張相觀察過o架,我見架花車流流哋,又好似好多強國人咁,哈哈。 :o

      利害,你個故事的確好多時事,例如28蚊,塑化劑,動物權益。同我最後大Sir所講嘅說話咁啱有呼應喎 :p

      「呢D資料前兩日報紙都登咗喇,叫你哋三個平時睇多D時事新聞架喇。」

      唔好咁講,唔係花時間長短嘅,係效率高啫。

      最後,我哋3個都寫咗唔同題材,幾好吖。

      刪除
    3. 係呀,我和你故事中有一絲關係,好奇妙

      我都驚有相同十張相,會有相似故事
      而最後竟然咁多元化
      證明CROSSOVER好順利
      見到大家的風格。

      刪除
    4. 其實最初我都有諗過會有相似故事o架,咁就冇咁有趣喇 :o

      點知出到嚟3個完全唔同喎,超正呀。

      刪除
    5. 我一早估佛爺一定寫他的專長,有味故
      所以只會我跟你撞
      我用動物立場出發,超現實一點,避一避你,應該唔會撞囉,結果都係

      刪除
    6. 我都係估佛爺係會寫鹽花作品,不過我呢方面好弱,一定唔會同佢撞 :p

      而我估你寫愛情/鬼故,所以我寫懸疑囉,點知你竟然寫動物,我一睇到當堂o晒咀呀 :o :o :o

      絕對唔會撞喇,你寫作題材廣泛D,而我剩係識寫愛情&懸疑,比較窄,我要改吓先得喇 :)

      刪除
    7. 其實我多睇電影,東抄西改咪搞掂囉,貪方便呢。

      刪除
    8. 都唔叫做抄喇 :)

      只不過你將唔同情節放咗入腦,將來咁啱不經意咁寫咗出嚟啫,我自己都係咁架 :)

      刪除
    9. 我記得一句說話
      The art of creative is don't tell anybody where you copy from it

      哈哈

      刪除
    10. 呢句說話啟發到我呀,簡直終生受用 :p

      我立志要做「創作達人」呀 :p :p

      刪除
    11. 我一早已經借用了這名句,哈哈

      刪除
  2. 佳作出炉,恭喜恭喜!的确是鬼才!
    周星星没有请你写剧本吗?

    夜了,等我明天得空才去看世纯和佛爷的佳作。
    大家一定都是一流!
    赞XD!!!

    回覆刪除
    回覆
    1. 果然準時到訪

      我的劇本....見笑了

      世纯和佛爷的作品看了,也是一流呀
      最緊要是大家限時內完成,考功夫

      刪除
  3. 十張唔啦咖嘅圖片,竟然可以串成故事,果然想像力豐富,佩服!

    回覆刪除
  4. 卡臣:

    你這篇的標題,其實可以叫作「猴眼瞥看瘋港情」.

    猴子、大笨象、畫室和早餐麵包,四張照片,已教我認知道,不可能寫一個清純的愛情故事.而你上一篇說是無厘頭之作,我就想寫笑話了.

    回覆刪除
    回覆
    1. 對呀
      這個故事名道出一切

      我喜歡無哩頭,生活壓力大,需要輕鬆吓

      你的笑話就勁啦,紀錄事情經過,奇情又抵死

      咁長篇,寫了多久?

      刪除
    2. 卡臣:

      我星期日凌晨二時才躺下床,真係坐到屁股痛,全程大約用了十三四個小時,不計星期五晚執相的時間.這篇是我最為精力耗盡的故事,因時間太過倉卒.

      刪除
    3. 佛爺,

      你好堅喎,連寫14個鐘,小弟實在佩服呀。

      另外,坐咁耐,小心生眼瘡喎,哈哈。

      刪除
    4. 嘩! 呢個挑戰真係引發出佛爺的爆炸力喎

      精力耗盡,讓對眼休息吓先

      唔寫唔知身體好,唔使多謝我哋啦

      刪除
    5. 世純:

      我無生痔瘡架!唔洗擔心!嘻嘻!

      我是騎虎難下,講了個標題給你們知,然後一齊出文,才硬著頭皮要完成.

      刪除
    6. 卡臣:

      我本來只打算寫短故事,心知時間不足夠.但想下想下,突然靈感山洪暴發,越寫越出靈感,咁我無理由三爬兩啖收爐的.不過,連續寫了十多小時,躺下床雖然是凌晨二時,但也是睡不了的,成個腦還想住個故仔.

      刪除
    7. 嘩! 果然激發你腦中的小宇宙,
      正所謂:唔滾唔知身體好,唔寫唔知腦力高
      靈感如泉湧的感覺真爽!

      刪除
    8. 卡臣:

      真係「唔嫖唔知身體好,唔賭唔知時運高」,我都無預計過自己可以撐得咁耐.我上一個笑話「低B洞房記」,寫了一個多星期,根本係度慢慢諗和砌出來.

      腦力高無用,最緊要時運高,去割包皮啦!嘻嘻!

      刪除
    9. 原本一星期,你兩日就谷了出來,把精力谷上䐉,你引發出的爆炸力,勁過割包皮多多聲,而家你升呢

      刪除
  5. 有意思
    描繪了小城現象。。。
    這歌
    是我許多年前愛過的。

    回覆刪除

LinkWithin

Blog Widget by LinkWithin