~~~~~~~~~~~~~~~~







2011年4月21日 星期四

同窗會


同窗會

九龍塘一間大學,十幾年前,某一學系的一班同學,經過三年歲月,畢業後在社會上打滾。各人有各人的造化。

 雖然他們拿著一樣的大學文憑,在同一出發點起步,但有一些同學向上爬,有一些同學仍然一事無成。

 這班同學每年都會聚一次,由其中一位男同學負責做搞手。他叫Vincent,是公司太子爺;讀書時已經揸車返學,出手闊綽,氣派十足。Vincent畢業後,順理成章入爹地公司幫手,做接班人。父親做的是成衣批發生意。

 
班中有一位男同學,叫Johnny,OK靚仔。可能上天是公平啦,有美貌就無才幹。Johnny做了十幾年,都只是做一些低級職位。Johnny口齒伶俐,有台型,所以他兼職做「婚禮司儀」,寓興趣於娛樂。
Vincent是二世祖,自幼染有尖酸刻薄之惡習。為什麼他會自願花時間和精神去為舊同學搞聚會呢?說穿了,無非都是想製造一個機會,讓他見吓那班「撈唔起」的廢柴同學,仍然咁失敗,好讓自己心涼一吓,佢好變態哦呵?

 * * * * *

這一年,Vincent在中環法國餐廳包了一個偏廳搞聚會。如今的Vincent是一個生意佬模樣,有肚腩雙下巴甩頭髮,周身是名貴衣履(不過是庸俗老土的所謂名牌)。其他同學的職業都是中下層,最出色的那位同學,只不過是在火炭某工廠當經理。Vincent看在眼裡,心中產生滿足的優越感,偷偷竊笑。

Johnny於八時來到,他的職業是在本地一間「証劵公司」當文職,負責計算當天証劵的買賣出入。Vincent讀書時,曾經妒忌過Johnny的靚仔樣貌。如今Vincent見Johnny仍然「三無主義:無車無樓無銀紙」。Vincent心裡想:「哈!哈!哈!點同我鬥呀?!」Vincent看不起在場所有人。

其他同學不知道遭Vincent藐視,只珍惜這個一年一度的聚會,互相問好、一起懷舊大學生活、或八卦一番大家的近況。

 * * * * *

十一個月又過去……

眨眼又快一年,Vincent正在選擇場地搞聚會。今年是畢業十五周年,他要搞得有聲有色。他預料其他同學跟上年一樣,都是「廢廢吓」。自己又係撈得最掂嗰位囉,哈哈~~

這晚Vincent回家看電視台的《晚間新聞》,在財經新聞見到一張熟悉的臉,是Johnny呀!Johnny接受財經新聞記者訪問?!

Vincent見到螢光幕的字幕:「美霖証劵有限公司執行總經理」。Johnny穿上英國製黑色畢挺西裝,正發表美國減息對亞洲金融市場的影響,一個成功才俊的風範。

嬲到Vincent激到彈起!一年之嘛,竟然比Johnny爬到集團的高層位置,自己只是珠江三角洲的一間小公司的第二代,蚊骴同牛骴。Johnny又無孿生阿哥,電視機中一定是他!Vincent接受唔到呢個事實,憤然抓狂,撼頭埋牆,暈倒地下。

 * * * * *

其實Johnny只是半年前轉工到「美霖証劵」做小職員。今天中午,電視台約了執行總經理做訪問,怎料臨拍攝之前,總經理和其他經理們一起lunch meeting後,竟然集體食物中毒,要送去急症室,公司無經理可以接受訪問。

總經理和電視台編輯是好朋友,不想電視台採訪隊撲場空。總經理察覺到Johnny有台型又口齒伶俐,不如叫Johnny把講稿背誦出來。又乘機可以搞吓公司形象,讓觀眾和投資者覺得該公司的管理層;既年青主動又充滿幹勁。總經理吩咐事情後,才送院醫治。

拍攝完畢,Johnny除下西裝,打回原形,返回寫字枱工作。畢竟開心過幾分鐘,今晚他回家錄低該段新聞,留為紀念。

 * * * * *

Vincent以患病為理由,拒絕搞十五周年聚會,亦不會出席。Vincent不想見到飛黃騰達的Johnny。Vincent沒有去找同學求證,避開大家,總之唔想再提起Johnny這個人。殊不知,Johnny仍然只是一名二打六。

Johnny見Vincent唔搞,唯有自己做搞手。大伙兒在旺角某酒樓吃晚飯,沒有法國餐廳的氣派和排場,大家反而覺得輕鬆自在,食得更開心。拍照後放上facebook,大家笑得比去年更開心!更開懷!



二少爺說:唔好睇阮兆祥現在咁搞笑,他在初出道之時,都chok過樣架。我真心喜歡這一首歌呀。

我心深處 - 阮兆祥

在客機上 在記憶深處是
共你分手時的風衣 配襯雨絲
做對的事 或錯得真幼稚
但愛的旨意不可知可會輸

在愛的天空 愛成廢紙
在愛的深淵 愛曾太癡

曾話共你永遠相愛
願永遠相處 卻未會知
容易是去永遠相愛
但說到相處 不知怎開始
快樂時冷漠時 在我心深處
邂逅時吻別時 也像愛詩 動聽悅耳 

66 則留言:

  1. 卡臣:

    無女主角,想加料都唔得!嘻嘻!

    現實真係有唔少Vincent咁既人,遇上某些人好過自己,就將自己收埋!

    回覆刪除
  2. 佛爺

    多謝你幫我執相先

    「遇上某些人好過自己,就將自己收埋!」
    你果然好嘢
    將成個故事的精髓講出哂

    回覆刪除
  3. 卡臣:

    不用客氣!你係應該先忍住,即係,唔好咁快食哂D野!嘻嘻!

    我也遇過一些這樣的人,所以看完你篇文後,感覺很深刻!

    回覆刪除
  4. 佛爺

    關於張相
    其實有感於大部分blogger都登美食相片
    我就登杯盤狼藉之圖片
    平衡一吓blog界

    我都識唔少咁嘅人
    見你風光就唔抵得
    見你PK就出嚟假慈悲

    回覆刪除
  5. 卡臣:

    我通常未食前就影,但好少影得好,酒樓D光源好雜!最近只影過兩隻大凍蟹,比較滿意!嘻嘻!

    我認識一個名人既仔,就係同Vincent一模一樣。香港、台灣、廣東省和東南亞,無人會唔識佢太爺,唔知點解佢會有個仔係咁既!其實佢好過我地成班人好多十倍,但成日就講野要踩地周圍既人。

    回覆刪除
  6. 佛爺

    食蟹咁正?
    仲要係兩隻添!
    你就爽啦

    我點叻都好,在果啲人眼中都微不足道啦
    點解都唔妥呢? 富二代唔係氣量大些嗎?
    真難明他們

    回覆刪除
  7. 卡臣:

    我根本無法理解佛洛伊德和他的追隨者所講,戒奶和戒尿片,會影響人的一生。

    成人說話口臭,怎可能跟他戒奶有關係?但我見過一些富二代,真係把口好臭,兼而好小器。真係要用戒奶和戒片才可以解釋他們的異常行為。

    回覆刪除
  8. 佛爺

    發財唔識去立品...唉

    富二代呢...
    正所謂:
    一代勤
    二代富
    三代驕
    四代妖

    回覆刪除
  9. vincent 自己諗埋一邊, 搞到自己唔開心...
    富二代因為缺少白手興家既過程, 所以沒有成功感, 怕被人睇小, 加上自卑.
    只有正真努力過既人至知道"莫欺少年窮"既道理.自然就謙卑 d.

    講到影食物相, 好難影未食之前個樣架, 一碟碟黎, 等齊又凍晒...其他人又唔會合作一齊等架啦~ ^^

    回覆刪除
  10. kateyip

    妳的分析很有道理,紅褲仔出身才知民間疾苦,(當然有些變成暴發戶心理)

    講到影食物相,食哂先影咪幾好,唔使等,餸又唔怕凍,唔會餓親大家
    一於咁話啦

    回覆刪除
  11. 阿卡臣,
    原来黎个肥仔祥识唱歌架?把声都唔错,弊在个样唔够俊咯,影艺圈就梗系唔会继续捧佢,唔怪得佢要系剧中扮丑角先至可以生存啦!

    最近中国的富二代,揸靓车撞左人,仲大声夹恶,骂人吐痰,班马打人,兼讲一句:“我系揸porsche 概!”

    回覆刪除
  12. 「憎人富貴厭人貧」就已經夠衰,阿「瘟神」仲要將自己嘅快樂建築响別人嘅痛苦上,最後剩得只有自己,身邊無人嚟俾佢睇低,肯定痛苦到死。

    回覆刪除
  13. 我最很憎啲reunion gathering,啲舊同學個個都變哂。我只去過一次,地點係旋轉66。非常唔like。舊同學個個放工著住西裝黎。有個喺野村做,遞張卡片過嚟,然後問你喺邊度撈。我想話我喺翠亨村做。

    回覆刪除
  14. helloninie

    肥仔祥<--其實好有喜劇細胞,拿握氣氛,唔做喜劇嘥咗佢,

    大陸富二代仲恐怖
    以為有錢大哂
    殺死人都得

    +++

    歪歪

    vincent唯有返公司搵下屬出氣
    唔怪得打工仔會受氣

    回覆刪除
  15. 卡卡,

    其实我到现在都不知道chok是什么意思,可否告知?

    说起来,明年就是毕业15周年(是初中),看看他们有没有兴趣搞个活动也好.

    回覆刪除
  16. desertfox

    chok 指裝出一個自覺最有型的模樣或表情
    是扮嘢作狀的意思

    你身在挪威喎,
    又返香港?

    回覆刪除
  17. 上電視就係高層?我見有人上電視喎

    回覆刪除
  18. naruto

    上電視唔係高層
    我睇新聞成日訪問啲赤貧人士
    尤其在亞視出現的甚多

    回覆刪除
  19. 卡臣:

    我未聽過「一代勤,二代富,三代驕,四代妖!」不過真係講得好合道理!

    回覆刪除
  20. kateyip:

    這句解釋「富二代因為缺少白手興家既過程,所以沒有成功感,怕被人睇小,加上自卑。」真是點醒了我!

    口臭的人,是因為自我價值低落,所以我一直想不通,為何條件優厚的富二代,竟然會口臭。其實是他們沒有成功感,以致自我價值低落。

    回覆刪除
  21. 樂樂:

    我童年時已見慣大炮王,所以對住D作大慣的人,頂得住。這個世界有很多人,把靈魂建立在形式上,樂此不疲!

    回覆刪除
  22. 佛爺,你好!我覺得,可以成為朋友嘅舊同學唔洗多,要聚舊的話,亦唔洗一年先至見一次,所以我唔LIKE同學會呢啲野,更加唔鍾意去啲高級食堂攪。

    回覆刪除
  23. 佛爺)))))))))
    你幾個字就講左我既意思啦~
    "自我價值低落" , exactly !

    回覆刪除
  24. coffee

    何止短視,就快失明添呀

    ++++

    佛爺

    「一代勤,二代富,三代驕,四代妖!」
    呢句係我打第一份長工
    我上司告訴我的

    +++

    樂樂

    可能我的同學跟我一樣唔進取
    大家仍然基層浮沉
    所以我唔介意出席聚會

    +++

    kateyip

    自我價值低落
    但身家價值高漲
    即是靠名牌撐起自己的軀殼

    回覆刪除
  25. largeheadboy

    我都係呀
    不失是一種福份啊

    回覆刪除
  26. 樂樂:

    若果是高級食堂,我就不會去,普通中價食肆,我也奉陪。我係電玩精,有不少男性題材,不需要去作大來交流。

    回覆刪除
  27. kateyip:

    我邊有咁本事,這句說話是心理學家研究的結論。

    回覆刪除
  28. 卡臣:

    自我價值低落
    但身家價值高漲
    即是靠名牌撐起自己的軀殼


    這句真係形容得好恰當!

    回覆刪除
  29. 自我價值低落
    但身家價值高漲
    即是靠名牌撐起自己的軀殼

    眼見社會上好多人追逐名牌, 有大學畢業生走去販毒,賺錢買名牌,名車...
    名牌其實好揾笨, 用幾百萬請個代言人, 唔覺著左件衫,俾人知你身家有咩好! 我反言覺得會招徠盜賊覬覦. 而且只係 copy cat 一名, 沒有自己的品味.
    可能我係"豆泥"一族,所以唔抵得, 嘻嘻~

    回覆刪除
  30. kateyip:

    你真係令我想起,自己有乜係名牌?真係諗唔到!只可以講,與「名」無緣!嘻嘻!

    回覆刪除
  31. 佛爺,我嘅中學時代,食午飯時,有時會同同學去窩打老道嗰間聯發餐廳食學生餐,食得好HAPPY。如果聯發依家仲喺度的話,我會首選呢間食堂做聚舊地方。可惜,嗰度好似已經變左做麥當勞。

    回覆刪除
  32. 佛爺, 我身上都無名牌喎~ label 對我無效 .. :p
    去高級餐廳/洒店食野既興趣都唔大, 我鍾意舊式茶餐廳, 雲吞面店, 尤其上海舖, 正!!

    回覆刪除
  33. 樂樂

    我中學時代跟同學曾經常去旺角火車站的酒廊餐廳,在那裡搞聚會不錯,可惜已拆,變成美心快餐店

    ++++

    kateyip & 佛爺

    讓我申報一聲

    我年輕時有因朋輩影響買名牌
    但是買A貨
    在Ooutlet買剪牌agnes b/Levis/Replay
    不過後來...覺得著假嘢,仲衰過著平嘢
    都係買返啲cheap嘢,啱哂我style

    去高級餐廳都試過
    但要dress up好唔舒服
    都係T shirt/jeans最舒適
    一句講哂:
    我著起龍袍都唔似太子

    回覆刪除
  34. 卡臣,對! 到中學時代常去嘅地方與舊同學聚餐,特別有意思。旺角依家都變哂囉,到"花園餐廳"攪聚餐都唔錯。

    回覆刪除
  35. 樂樂

    講起舊時

    美國寶、美國餐廳、美而廉餐廳、農場餐廳、都已經執咗,徒留下回憶

    回覆刪除
  36. 卡臣,仲又一間都已經執咗 -> 紅寶石。

    回覆刪除
  37. 樂樂:

    壟斷是大趨勢,成熟經濟社會就是這樣的。你只可以懷念,卻沒法改變現實。猶如初戀情人,只會是你在靜夜裡的旋律!

    回覆刪除
  38. kateyip:

    我成長在舊區,也只喜歡舊式食肆,尤其是茶餐廳的凍奶茶。

    回覆刪除
  39. 卡臣:

    最低工資只會加速小型餐廳的衰亡,令集團化的餐飲佔據大部份市場,這是歐美的現實,如你經常所說,有得必有失!

    回覆刪除
  40. 佛爺,"猶如初戀情人,只會是你在靜夜裡的旋律...."咁浪漫?你一定唔夠18歲,哈哈!

    回覆刪除
  41. 樂樂

    紅寶石,yeah!
    我回一間:馬理奧 mario

    佛爺閱人無數
    點會唔夠18歲?
    只不過佛爺偶爾扮吓詩意
    吸引吓啲年輕文藝少女啫

    +++

    佛爺

    今日睇新聞
    話老人院頂唔順最低工資
    要執笠
    咁啲老人家點算呀!!

    回覆刪除
  42. 卡臣,單靠睇你表列嗰D執咗嘅餐廳,我估你都唔過三十歲。好!醒多你一間 -> 大文豪(彌敦道)。呢間餐廳嘅天花,無得頂!

    回覆刪除
  43. 樂樂

    哈哈哈哈!

    多謝你氹我開心!
    我都想我唔夠30歲
    可惜唔係

    大文豪...我都有幫趁過
    在油麻地中華書局往尖沙咀方向前兩三個舖位
    個天花有米高安哲奴壁畫

    回覆刪除
  44. 卡臣,當年,喺大文豪隔離無幾遠,仲有間漢榮書局添,都執咗。仲有旺角嘅世界書局,都無埋。Sad!

    回覆刪除
  45. 我初中是在挪威读的,所以同学会也是在挪威。

    回覆刪除
  46. 講開旺角火車站既餐廳,果度有間"雅閣"係拍拖必去既餐廳,執左未呢 ? (申報:我只係聽人講拍拖必去,我就次次都係一大班朋友去)

    舊茶餐廳,我食西多士!

    回覆刪除
  47. 更正:世界書局 仲喺度。真好彩!

    http://www.wanlibk.com

    回覆刪除
  48. 樂樂

    漢榮/世界/晨衝書局
    我中學撲教科書的地方
    我果陣有向師兄買二手書
    而家教科書就勁貴

    +++

    desertfox

    咁你咁去過「挪威的森林」囉
    勁呀你!

    +++

    kateyip

    乜旺角火車站既餐廳叫「雅閣」呀!
    我忘記了名字

    舊茶餐廳,我必選奶茶蛋撻!

    回覆刪除
  49. 樂樂:

    哈哈!我叫得自己做阿爺,緊係過佐六十歲!點會唔夠十八歲呀?

    你未係老人院住過,所以唔知D阿伯既心態。老人院D阿伯,一係就孤獨,一係就被個衰婆鬧到仆係度,所以佢地經常要講起初戀情人,至有生存意志,無浪漫的追憶,佢地可能已經自殺死佐架喇!咁,你明白點解我都會講初戀情人喇!嘻嘻!

    回覆刪除
  50. 卡臣:

    最低工資未實施,我已經被老人院踢佐出黎,而家住佐係庵堂,雖然只可食齋,但就可以上網睇四仔AV女優,連祠堂都醒哂,生活好過係劍橋,成日睇電視,精神無出路!劍橋老人院,兩個字形容:悶爆!

    我的生活圈子細過你好多,無乜閱歷!我估我既靈感係來自集體潛意識,因為我經常發夢的夢境,係我無經歷過既環境。

    回覆刪除
  51. 佛爺

    你離開老人院之後
    入住了怡紅院
    天上人間
    正....

    如果將夢境寫出嚟
    應該幾有趣

    回覆刪除
  52. 卡臣:

    下!老人院轉怡虹院咁正!哈哈!

    寫夢境?係喎!夢騎胭脂馬!好提議!

    回覆刪除
  53. 卡臣,我中學時都有買二手書嘅習慣。不過,自從我喺一本二手書裡面嘅其中一頁,發現一條疑似係人嘅pubic hair 之後,我以後都唔想買二手書了。

    佛爺,哈哈!你又點知我未住過老人院呢?其實,我年輕時,曾經住過一啲有好多老人住嘅地方,當然知道一個老人,喺老人院住嗰種孤單寂寞啦。所以,我將來自己都有心理準備。好!第日再同你分享。

    回覆刪除
  54. 佛爺

    你寫親都應該係春夢和綺夢
    夢中還有遺留下...

    ++

    樂樂

    有條毛髮?
    你本係bio書呀?

    回覆刪除
  55. 樂樂

    竟然係數學書?!

    唔通學尹光「數毛」?

    回覆刪除
  56. 卡臣,嗰條唔似係尹光「數毛」歌裡面所講嗰啲,胳肋底毛,鼻毛,鬍鬚,耳毛,汗毛,睫毛,心口毛,眉毛0黎架!總之,我唔會再買二手書啦!

    回覆刪除
  57. 樂樂

    哈哈
    90年代我常買二手CD
    跟年Download所以好耐無買碟

    回覆刪除
  58. 樂樂:

    你唔洗驚二手書喎!前幾年有人用紫外燈測試酒店房間是否衛生,無意中,發現聖經有最多尿液,令人費解!

    【道德申報】我住酒店,無做過D咁變態既野架!

    回覆刪除
  59. 佛爺

    乜啲人咁憎聖經啊?
    非教徒都要尊重其他宗教呀

    回覆刪除
  60. 佛爺,佢哋咁樣對待本聖經,將來一定會後悔0架。

    回覆刪除
  61. 卡臣,樂樂:

    咁小事,無人肯撥款比心理學家去研究。但肯定有一些人,心理有問題,才會住酒店,在聖經撒尿!

    我從心理學角度出發,世事無話神聖或卑劣的,問題是:點解有一些人咁做?有何心理因素?

    回覆刪除
  62. 睇到Johnny上鏡, 本來想講係龜兔賽跑的現實版...原來係一場美麗的誤會...其實Vincent有咁好的條件, 駛乜靠搞聚會來自我膨脹...做d實際野好過...

    回覆刪除
  63. phyllis

    如果johnny真係可以在一年內由茄呢啡升做董事?
    除非佢救咗集團主席條性命
    否則點可以升得咁快?

    現實好多vincent呢啲無謂人

    回覆刪除

LinkWithin

Blog Widget by LinkWithin