* 阿媽話...

阿媽話...

媽媽是孩子的第一個老師，
孩子的性知識：「阿媽話男仔要企係度痾尿女仔坐係度。」
孩子的科學知識：「阿媽話檸檬汁同鮮奶唔可以一齊飲。」
孩子的自律性：「阿媽話做哂功課先可以睇電視。」
孩子大咗，由於價值觀和上一代不同，
「阿媽話」就由資訊泉源的「Discovery Channel」，
漸漸變成婆婆媽媽的「無線TVB」。
其實阿媽都係為仔女好；
現在數一數天下阿媽通常講個十句話：

第十位：今晚返唔返嚟食飯？
阿媽嗰代經歷過打仗飢荒，
最擔心仔女餓親無嘢食。
所以成日問仔女：「今晚返唔返嚟食飯？」、
「點解仲未返到嚟食飯？」、「飲多碗湯啦？」
對着想減肥的仔女講：「無米落肚？暈都有份！」
「日日食飯盒，而家食多條菜啦！」


第九位：我嗰陣時…
阿媽嗰代物資唔充裕捱過苦，
見到呢代郁啲都嗌辛苦就最睇唔過眼！
「我嗰陣時，兩餐都唔飽，你竟然食剩咁多嘢？」
「我嗰陣時，風煽都無把，你開遲陣冷氣就嗌熱？」
「我嗰陣時，想讀書都無機會，你就有得讀都唔俾心機讀？」


第八位：咁夜仲唔瞓？
阿媽知道熬夜對身體唔好，
見到仔女一夜瞓就催促快啲瞓。
（部分原因是想熄燈慳電），
阿媽記憶仍保留兒時：歡樂今宵未完仔女就應該上哂床！
「咁夜仲唔瞓？」的下集是：「咁晏仲唔起身？」
兩者存在着互動因果關係。


第七位：你阿爸問你…
阿媽問道：「你阿爸問你幾時帶個女仔返嚟屋企食飯？」
句中的「阿爸」實際上唔存在，
其實是阿媽想問；藉詞阿爸想問。
例句：阿媽想問個仔係唔係gay？又唔好意思直接問，
就話：「你阿爸問你係唔係興玩嗰味嘢呀？」


第六位：儲返個錢
父母擔心子女有否獨立能力照顧自己？
擔心子女老來無錢就晚景淒涼，
所以就成日提醒仔女要儲錢積殼防飢。
一見到仔女消費購物就話：「一出糧就fing！儲返個錢啦！」
阿媽的消費信心指數長期處於低位徘徊。


第五位：今年好年…
傳統的父母想仔女早日開枝散葉，
最怕碰到自己仔女遲婚唔生。
所以要間接催婚催生：
「今年好年，最啱結婚，如果今年唔結就要等多十年！」
「今年好年，最啱生仔，生金豬仔，父母一世唔使憂！」
仔女通常回答：「嘩！今年咁好年，阿媽不如妳嫁過、生多過啦！」


第四位：喂幫我…
時代科技進步一日千里，
很多複雜程序阿媽不能應付，
要叫仔女幫手處理：
「喂幫我睇吓呢封雞腸信講乜？」
「喂幫我錄低今晚套電視劇大結局！」
「喂幫我登記排隊換身分證！」


第三位：間隔屋陳太嗰仔…
阿媽有時會攞人地嗰仔嚟比較吓，
如果自己嗰仔勝人地嗰仔就無乜事，
相反的話，問題就嚟啦：
「間隔屋陳太嗰仔一畢業已經做經理，你仲係無業！」
「間隔屋陳太嗰仔25歲就做老竇，你就連女仔隻手都未摸過！」
「間隔屋陳太嗰仔會幫吓媽做家務，你就連鞋帶都唔識綁！」
仔女通常回答：「挑！間隔屋陳太嗰仔咁好！妳認佢做仔把啦！」


第二位：唔好使啲無謂錢
第二位呼應第六位 - 儲返個錢，
阿媽慳慣節儉慣，不想仔女使無謂錢。
例如母親節，仔女送名貴燕窩給阿媽，
阿媽答：「買燕窩？唔好使啲無謂錢啦，食雪耳咪一樣！」
「唔好買生日禮物！唔好使啲無謂錢！年年都有生日啦！」
「去遊埠唔好買手信！唔好使啲無謂錢啦！香港乜都有得買。」


第一位：返屋企煮仲好！
仔女怕阿媽煮飯辛苦，請阿媽出街食，
特別是年夜飯、生日、母親節、冬至。
阿媽很抗拒光顧街外食肆（抗拒消費），
「嘩！等位等咁耐！返屋企煮仲好！」
「嘩！收得咁貴！返屋企煮仲好！」
「嘩！咁多味精！返屋企食仲好！」
「嘩！碟餸咁細碟！返屋企煮仲好！」
雖然辛苦點：要切、要煮、要執枱、要洗碗、
但阿媽就是從中找到樂趣、自我價值和存在意義。

多謝賢提供部分位置