~~~~~~~~~~~~~~~~







2009年12月30日 星期三

電影金像獎


電影金像獎

上次講完「金曲頒獎禮」,今次講吓香港創意工業:電影。數一數喺「香港電影金像獎頒獎禮」中最常聽到的十句說話:

第十位「多謝台前幕後全體工作人員!」
無論頒技術獎項還是個人獎項,獲獎者上台致謝。因為電影是Team Work,不可能一人邀功,所以得獎者會說:「多謝台前幕後全體工作人員!」向上至出品人、下至茶水阿嬸講聲多謝。

第九位「獲得提名我已經好開心!」
新晉演員競逐「最佳新人獎」,獲獎後上台致謝,好謙卑話:「我無諗過我會攞到呢個獎!」或者「其實,獲得提名我已經好開心!」更甚者:「獲得提名我已經當自己贏咗!」新人獲得提名其實已經是一種肯定。

第八位「大家多啲入戲院,支持本地電影!」
本地電影業被BT、大陸網頁、老翻打殘,當電影業權威人士上台,他們就會藉這機會向觀眾宣揚知識版權的正面訊息:「大家多啲入戲院,支持本地電影!」台下無工開的電影同業,聽到後同仇敵愾,拍掌支持。觀眾會否聽入耳?則另當別論。

第七位「我哋衷心向呢位前輩致敬!」
金像獎頒獎禮,輪到頒發「終生成就獎」給在生或過世的電影前輩,播放該位前輩的精彩電影片段後,司儀說:「我哋衷心向呢位前輩致敬!」,台下的觀眾紛紛鼓掌。得獎者被攙扶出來,眼濕濕、聲震震,向觀眾說聲苦盡甘來的多謝。

第六位「廣告返嚟之後,我哋將會頒發…」
電視台攪頒獎禮,要照顧賣廣告的寶貴Air time,會場司儀如常主持頒獎禮時,身在錄影廠的主持說:「廣告返嚟之後,我哋將會頒發……,各位電視機旁邊嘅觀眾,千祈唔好行開啦!」先賣個關子,留住啲觀眾唔好按遙控器轉台。

第五位「我等咗呢個獎好多年啦!」
有些候選人屢獲提名,但都無手而回,心有不甘。直到某一次終於獲獎,有吐氣揚眉之感!走到台上,親手接過獎座,忍不住講句:「我等咗呢個獎好多年啦!」有實力的人,始終有出頭的一天,實至名歸。

第四位「以下呢位嘉賓專誠由外國遠道而來。」
大會為了加強頒獎禮的睇頭,專程從外國請來有份量的頒獎嘉賓,星光熠熠。或者一些電影老前輩移民外國多年,碰巧回港探親,被邀做嘉賓。司儀都會說:「呢位嘉賓專誠由外國遠道而來。」為了加強戲劇效果,說嘉賓於傍晚剛下機,便立即趕到會場,十分俾面。

第三位「佢今晚因有要事出席唔到。」
有人俾面大會,也有人唔俾面大會,就算是被提名的候選人,都唔會到場。結果又咁橋係佢贏了該獎項,台下一輪你推我讓之後,電影公司其中一名高層走上台代領獎項,抱歉講句:「佢今晚因有要事唔能夠出席,我代佢講聲多謝。」打了輸數結果又由黑馬跑出。

第二位「上埋嚟呀!」
當大會頒發重要大獎,獲獎者情緒好興奮走到台上獲獎,不想一人獨吞榮耀,想將該份光榮跟製作班底一起分享,向台下某幾位功不可沒的功臣大嗌:「上埋嚟呀!」五六位黑色禮服男士,從觀眾席走上台,共握著一個獎座,接受大家的掌聲。到節目ending時,司儀叫所有得獎者「上埋嚟呀!」在台上舉起香檳,互相恭賀一番。

第一位「我哋一齊睇吓候選名單先:」
頒獎禮講得最多的一句,非這一句莫屬:「我哋一齊睇吓候選名單先」,所有獎項頒發之前,司儀或嘉賓都要講:「我哋一齊睇吓候選名單先」,之後才可以拆開信封,公佈得獎者姓名。所以這一句成為十大之首位。


9 則留言:

  1. 「上埋嚟呀!」

    呢句我極有印象呀!

    kelly

    回覆刪除
  2. kelly

    「上埋嚟呀!」...無乜機會架,
    可能唔上就無得上架啦!


    ++++

    naruto

    係你呀! 偉仔, 又係梁朝偉

    回覆刪除
  3. 卡臣︰「阿爸阿媽,我終於得咗喇!」

    回覆刪除
  4. coffee

    「阿爸阿媽,我終於得咗喇!」<---呢句來自70年代日劇「青春幹探」的對白, 年長朋友應該知道(指我啫)

    ++++

    Brownie

    係喎
    「唔好圈我!等我講埋先!」
    視帝視后必講!

    回覆刪除
  5. 卡臣︰點會係講你呀?要講都係講我自己喇:P

    我好記得有一年曾志偉咁講︰今晚,係咪要改為「電影金像影碟頒獎典禮」?因為大家都少咗入戲院,等出碟,甚至買翻版。

    回覆刪除
  6. coffee

    比起上世紀
    我都少入咗戲院

    +++

    eric

    「幾時卡臣會講呢十句呢?」
    <==發開口夢果陣囉

    回覆刪除

LinkWithin

Blog Widget by LinkWithin