~~~~~~~~~~~~~~~~







2009年2月1日 星期日

口是心非 (Homme)

口是心非 (Homme)

June是我2005年的舊同事,從她的Blog見到《Top Ten List 1/2 -口是心非》一文,十分抵死!獲得June同意後,接力續寫第十至第六位。

統計顯示,「口是心非」並不是女人的專利,有時男人講嘢,都咪話句句當真。

* * * 感情萌芽期 * * *

第十位:「嘩!好靚呀!」
大家初相識,首先認識如何欣賞對方;或者將彼此缺點看成優點。目的當然是讓她覺得有人明白自己和賞自己。女友買了新的衣衫鞋袋、整了新髮型、做了漂牙、纖體或釆光,問男友 :「靚唔靚?」唔使我講,男友見到乜都睜大對眼說,閃亮地說:「嘩!好靚呀!」當然呢句說話未能成功通過測謊機的測試。

第九位:「唔使急,我等得!」
女性要兼顧儀容的範疇,比男性的為多。男友因女友化妝換衫需時而在街中呆呆乾等。遲了成粒鐘,打個電話追吓,女友話就快得!男友只好扮無事:「唔使急,我等得!」實則有怒氣!人人每日都係只得24小時,點解男友要為女友浪費時間?如果把等女友的時間加起來,應該可以夠完成多一個Degree。

第八位:「我唔係嬲妳,我嬲自己之嘛!」
男友俾女友激到彈起,女友見到兩眼噴火、青筋暴現的男友,慰問:「你嬲我呀?」男友又要死頂扮大方夠量度,晦氣回應:「我唔係嬲妳,我嬲自己之嘛!」咁答法罷明唔妥面前的女友,又要死忍。其實男友沒有口是心非,因他真的在嬲自己:嬲自己點解會鐘意啲咁嘅女友?

第七位:「就當係我衰囉!」
如果激嬲了女朋友,男友知道自己將要用十倍氣力才能氹返掂野蠻女友,為了息事寧人和不讓事情惡化鬧大,錯不在己的男友都會肯先認衰!當女友向男友無理取鬧時,男友死死地氣:「就當係我衰囉!」男士硬食了這記顛倒是非。但這句並非100%口是心非!因為男友自嘆:「就當係我(當)衰囉!」或者「就當係我(自己攞嚟)衰囉!」

第六位:「我唔係玩玩吓!」
為了讓魚上釣,真係幾肉麻骨痺的說話都講得出口!雄性天生擁有唔專一的DNA(要廣為繁殖下代),能厚顏無恥講出一句:「我唔係玩玩吓!」或者「我係認真架!」其實心裡擺明就係玩厭就撇!講時仲要用堅定的眼神,一鬼祟閃縮就會露出馬腳。

* * * 過了萌芽期,進入感情成熟期 * * *

第五位:「我無事呀!」
面對面,口黑面黑,身為女友一定心知不妙,想為男友分擔一吓。戰戰兢兢慰問一吓:「你有咩嘢事吖?」男友繼續黑面,目無表情地回應:「我無事呀!」
得啦,無野講啦!咁嘅衰樣,真係無事?打死都唔信啦!唔講咪算數囉,以為真係好想同你分憂咩?人家只係唔想俾你影響到情緒咋!

第四位:「講你都唔識佢啦!」
這個答案,多數用來掩飾出街朋友嘅真正身份,沒錯,我們是不認識這些神秘人,但肯定不是什麼光明磊落的人物。平日約了蛇明、阿強、喪輝,都會大大聲聲講:「我約咗阿強去298呀/我約咗喪輝去唱K...」問多兩句阿邊個係乜嘢人,換來一句:「講你都唔識佢啦!」這個white lie的真相,真係唔知好過知。

第三位:「你鐘意啦!」
呢句說話有兩種語氣,第一種:陰聲細氣,面帶微笑,多出現於戀愛萌芽期,大約可以維持半年至一年不等。
第二種,晦晦氣氣,無尾音,聽落掘雷搥,好似撩交打咁。多數配合皺眉頭動作。
出現呢句話,多數都係以下情況:
女問:「你話買黑色呢件好?定係買白色呢件好呢?」男回應:「你鐘意啦!」
女問:「不如我哋去食剌生囉?」男回應:「你鐘意啦!」
女問:「不如我哋去圓方囉?」男冷冷回應:「你鐘意啦!」
明明就唔想買,唔想食,唔想去,但係偏偏要話「你鐘意啦!」,表面好似好就得人,但係語氣已經表達咗強烈嘅不滿,叫女友知難而退。如果女友們咁唔識做,當佢講真,換來只會是一副臭臉。

第二位:「我做緊嘢呀!」
男人以事業為重,尤其在香港這個資本主義社會之中,普遍的女性都會為努力工作的男士加分。所以,為咗做嘢,遲收工、出外應酬、出埠工幹,就是最佳隱瞞藉口。明明跟同事Happy Hour、或去旺角上樓買四仔、或同另一位靚女吃飯,都可以話:「我做緊嘢呀!」加多句:「遲啲call妳!」
身為女性,最慘嘅就係唔可以表現出懷疑的語氣,否則換來一大堆:「為咗大家未來而努力」、「都係想你生活過得好啲唧!」等正氣澟然的謊言,叫妳不得不說句:「好啦,咁你唔好做得咁辛苦喇...」

第一位:「我知錯喇!」
若要數全球化globalization的「口是心非謊言」,必定要選出呢一句:「我知錯喇!」或者「我一定會改過架!」有時為了讓女友更容易陷入圈套,老土一點加多啲戲,跪地拭眼淚等形體動作。
講還講,但是否真的斬手指不再重犯,女性可以肯定,達90%的男士會選擇繼續犯錯,不過,下次就無咁容易露出馬腳了。


Co-written by June and 卡臣


32 則留言:

  1. YEAH, No.1

    同意:
    第三位:「你鐘意啦!」

    另, 提議: 「對唔住囉!」--> 係晦氣個陣成日聽。

    我最唔想聽到依句!!
    我唔要有野對我唔住呀>>>>>>>>

    回覆刪除
  2. 卡臣:

    我個PA Degree(Distance Learning),就係因為唔使等女友,先有時間攞到噃~~~~~~:P

    Daniel.

    回覆刪除
  3. 卡臣,
    死囉!老公有時真係會同我講:「我做緊嘢呀!」...... 不過佢真係做緊嘢時講,
    其他就真係無講過,包括:「嘩!好靚呀!」.

    回覆刪除
  4. 「就當係我衰囉!」<---一句完全不能接受的疑似认错台词, 但实际其实是表达「系你错, 唔系我错」.

    觉得无错, 就唔好认错. 认错就要坦诚, 直接讲「係我衰」, 讲嗰「當」字出来, 种衰过乜都唔讲.

    回覆刪除
  5. 對於以上各點...好似都發生過!
    係未好大擠呢?

    回覆刪除
  6. JC

    >>「對唔住囉!」
    係呀!
    尤其係要加重「囉!」的語氣

    +++++++

    daniel

    咁如果你要等女友,分分鐘double degree添呀!


    +++++++

    肥貓

    >>想老公講「嘩!好靚呀!」?
    一於俾佢張相,問佢相中人靚唔靚仔?

    +++++

    瓶子

    男人就係咁衰!

    ++++++



    證明...天下烏鴉(男人)一樣黑!

    回覆刪除
  7. 口是心非,時常也會發生,有時自己以為沒所謂,其實是很介意的。
    但卻不已為意說出口,「沒所謂/我不介意/對不起/我下次不會的......」

    回覆刪除
  8. 我其實都冇乜記憶啦...
    倆人的相處當中的感受...累人心志!

    回覆刪除
  9. 小佚

    有時啲「口是心非」令旁人開心
    又不妨講吓!


    ++++++



    妳對愛情咁灰?
    有賭未為輸呀!

    回覆刪除
  10. 那是以前的事了...
    關於打牌頭四圈99% sure win 架!

    回覆刪除
  11. 我知錯喇...通常都會帶出另外一句....
    給多次機會啦...一樣隨手送埋.

    回覆刪除
  12. 第二位:「我做緊嘢呀!」

    呢句喺我嘅口頭禪,仲要另加「唔好煩著哂啦」

    後果可想而知。。灰...

    回覆刪除
  13. Homme tells lies, but woman likes to listen ....

    'She's just a friend!'
    'I swear, I will not....anymore!'

    回覆刪除


  14. >>打牌頭四圈99% sure win 架
    嘩! 唔同妳打啦!


    +++++

    鏡田

    >>我知錯喇...
    給多次機會啦....
    信埋我呢次....
    我真係會改架喇....

    ++++++

    eric

    呢句喺我嘅口頭禪:
    「我做緊啲無謂嘢唧!」


    +++++++

    巴黎

    「我同佢無嘢!」......不過精神上越軌過~

    回覆刪除
  15. 仲有:
    "你高興!"
    "是但!"
    "唔知!"

    話時話, 有d 我都有講過~~

    回覆刪除
  16. 哈哈哈.

    男人講o野咁靠唔住o架?? 咁以後o的男人講咩係咪要諗晒反話? 咁好 支力 o架喎~~~

    回覆刪除
  17. 卡臣兄:

    依家我果啲叫無得等,無GF嘛~~~~~~:P

    Daniel.

    回覆刪除
  18. 自由

    >>"是但!" "唔知!"<--不是口是心非喎
    因為果一刻,真係乜都無所謂!
    由他人揸主意

    +++

    素顏

    >>咁以後o的男人講咩係咪要諗晒反話?
    除了男士說:想上床,應該是真話!

    +++++

    danial

    咁祝你新一年找到新女友!
    一次過引爆哂佢!

    回覆刪除
  19. 回想一下可能最講得多係:你係邊呀?(飛左去邊)...熱愛的那陣子是會訂花去他酒店為他工作打氣.他索性出hotel/fright schedule比我就知到他在那裡,其實我們都理性機械得過份...但那段日子好有安全感好簡單開心的幾年,讓我可全情投入工作又有稱心的感情生活!

    回覆刪除
  20. 自由

    >>啊..又係喎..呵呵
    嗱!
    呢句可能係口是心非
    實則:「xyz#%+*!!」

    ++++++



    嘩~~睇到都甜埋一份!
    十年....

    回覆刪除
  21. 口是心非其實都唔係好受架,講大話我會口窒,都係揀唔出聲,或者引開話題好過!

    回覆刪除
  22. 校長

    >>講大話我會口窒,
    我都係呀!(唔知大家信唔信?)

    ++++

    JC

    3耳飛走了!

    回覆刪除
  23. 除了男士說:想上床,應該是真話!
    --->呢句簡直是金句呢^^

    回覆刪除
  24. 我最常講o既係

    "妖,唔好煩喇!"

    係咪好誠實呢...

    回覆刪除
  25. 逍遙小妹

    男人色迷迷嘛<--包括我本人

    ++++

    c+

    >>"妖,唔好煩喇!"
    ==> 口快心直!!

    回覆刪除
  26. 嘩!終於出爐喇!突然登上了大師既網誌,好犀利呀!
    很喜歡新加入既五大,尤其係「唔係玩玩下」,我上次就係咁,"領"左野...

    回覆刪除
  27. june

    >>突然登上了大師既網誌,好犀利呀!
    嘿!
    我邊度係大師?!
    我們是同事啊!

    妳喜歡便好了!

    >>尤其係「唔係玩玩下」,我上次就係咁,"領"左野...
    ==>算啦
    當上咗一課囉
    妳還年輕
    大把可能性!!

    回覆刪除
  28. 卡臣, 為了可以vote, 我一口氣把未讀的故事全都讀了,把讀了的又再翻看,都是一句,很精彩!

    回覆刪除
  29. Gwen

    >>我一口氣把未讀的故事全都讀了,把讀了的又再翻看,

    多謝妳的時間和勇氣!

    妳而家係咪眼痛/好滯?
    食粒消化丸先!

    回覆刪除

LinkWithin

Blog Widget by LinkWithin