~~~~~~~~~~~~~~~~







2007年9月13日 星期四

小巴聲音

小巴聲音

我每天都是乘小巴上班下班,
小巴是我乘搭最多的交通工具。
在小巴車廂內除了汽車引擎聲外,
你會聽到什麼聲音呢?
現在就跟大家數一數!


第十位:收錢先
司機為了縮短行車時間,
避免乘客落車時才慢慢摷銀包及找錢,
乘客一上車,司機就要乘客先付款找續後才坐低。
尤其乘客手持一百五百的紙幣;
搭開搭熟的乘客會自動自覺先俾車費,
實施「小巴大巴化」:先俾錢才享用服務。


第九位:前面有薄絡(Block)扣安全帶
政府實施「小巴設置安全帶,乘客上車需配戴」後,
十個乘客中只得兩三個會戴,
話之你罰5000蚊及坐監3個月。
司機亦懶得理會貴客自理,
但如果前面遇上警察路障,
司機都會好心提乘客一句:「未扣快扣!」
霎時間乘客立即找椅上安全扣,
快而不亂,又快手又齊心。


第八位:經唔經邊度?
通常有些中年人或長者未登車前問:「司機,經唔經坪石邨呀?」
為什麼是中年長者發問而很少後生仔會問司機?
因為年輕人除了比較醒目之外,
他們由於怕瘀而不敢隨便開口問人。
最多坐錯車後再駁其他車輛。
司機為了做生意一般都會回答:「經,不過要行多幾步。」
例如:「經香港公園!我喺威靈頓街落俾你,行幾步就到。」


第七位:乘客對話
16位乘客,怎可能會個個都係啞?
婦人學生妹OL上車啄唔斷,
或者趁乘車時間跟朋友用手電聯誼,
「喺邊度?」、「5分鐘後到!」、「幾多號房?」
由於車廂細,基本上要被迫聽其他人的八卦家事。
「乘客對話」也有「繁忙時間」和「非繁忙時間」之分,
早上返工時大家爭取時間瞓覺,全車靜默,
除了司機聽電台晨早phone-in節目的收音機聲音,
下午5時後至深宵則是「繁忙時間」,
約人、講是非、談心、訴苦、嗌咬等等。


第六位:Walkie Talkie對話
路面交易情報對於司機搵到錢利多幾多轉有十分大的關係。
所以司機們裝有Walkie Talkie設備,
交換路面情況之餘,邊度塞車邊度映快相,
也會吹水以解開工時的苦悶。
對話內容包括:那舖食唔出的麻雀大牌、
深圳的小芬、部車嘅油箱要睇睇、
今晚邊度宵夜?邊個醫生醫風濕最好,等等。
有時司機對話互窒之精彩,
比大巴的Roadshow更具娛樂性。


第五位:強勁音樂
如果見到司機位已改裝成跑車seat位,
加上一支螢光波棍,
就一定配上兩座鴨寮街大喇叭,
播放的不會是民歌而一定是disco快bit勁歌!
司機一聽勁歌就如「標童」般踩油加速!
爬頭、抽頭、cut雙白、搶街客!
相信不少貨van司機客串(改行)揸客van,
將貨van司機fung機文化引入16座。


第四位:有落!
乘客需要嗌「有落!」司機才會停車,
有時因為音響太嘈或乘客太細聲,
司機聽唔到而導致雙方口角爭抝。
有些女乘客不想大聲嗌失儀而等待其他乘客叫落,
如果無其他乘客叫落則自己要頂硬上,
有時因為雙層巴士埋站而小巴司機貪方便唔cut入,
就會在中間線叫乘客落車,
乘客驚問:「喺呢度落車咁危險?」
司機答:「咁大個人識唔識睇車呀?慢慢落咪得囉!」


第三位:坐喺車頭先,好快有人落車!
在繁忙時間乘客求過於供,
他們務求盡快乘車上班或回家,
只要能鑽上車就不介意坐邊度。
16個座位之外,有2個位後加喺車頭車尾。
如果客滿又有人截車,
司機就講:「坐喺車頭先,下個街口就有人落車。」
乘客如果唔介意便會偷雞坐低!(但已造成小巴超載)
不過小巴再轉多十幾個街口仍未見有人落車,


第二位:讓個孖位,快啲開車!
香港人不喜歡跟陌生人共坐,
如果小巴的孖位被先登車的單客獨坐。
想登車的情侶見到沒有連坐便改乘下一班,
司機為了快啲開車就對其中一個單仃客講:
「呢位哥仔,唔該讓個孖位,快啲開車!」
通常大家想快啲開車都會知情識趣;
讓出孖位給情侶繼續痴纏或打NDS。


第一位:時速計提示聲
超速小巴換來「亡命van仔」的美譽。
小巴車廂內安裝「時速計提示器」。
一過80咪就咇咇叫!
提示器指示80、90、100直線上升!
咇咇聲就越叫越急越大聲。
引擎聲、車軸震動聲、車呔擺尾聲、
乘客心跳聲、司機呼吸聲、音響勁歌聲,
咇咇警告聲,構成一曲「本土環境音樂」;
17人在飛馳中齊向環境音樂大師Brian Eno致敬。


其他小巴聲音包括:
「後數」、「司機有冇兩個位呀?」、
「唔該燈前」、「唔該燈後」、「唔該轉車」、
「落車先找俾你」、「有冇碎紙呀?」、
「嘩!炒埋一堆咁大鑊!」、「無人落就上天橋。」、
「屯門公路而家靚仔哂!」等等。

小巴三部曲之三 - 完

6 則留言:

  1. finish your "van trilogy" so quick?! the funniest amongst 3!

    回覆刪除
  2. nost
    正在構思另一個小小說,
    大約下週星期二零辰推出,
    希望你喜歡
    car

    回覆刪除
  3. 小巴有很獨特的本地文化,你可以把它活形活現於紙上很有趣:)

    想起爾冬陞的電影"忘不了"(?), 張柏芝在古天樂死後"担起頭車"的故事 ...

    我最喜愛的小巴座位是左邊第2或第3個位:)

    回覆刪除
  4. V,
    多謝支持,
    你想起"忘了,忘不了",
    我則想起"大時代"的藍潔英担起頭車.
    p.s. v, 做乜咁容氣見外.
    我鬧讚都歡迎架
    c

    回覆刪除
  5. 呢一篇到今日睇,都係咁,香港無進步

    回覆刪除

LinkWithin

Blog Widget by LinkWithin