~~~~~~~~~~~~~~~~







2008年10月19日 星期日



謎 ~ 這個城市有好多解破唔開嘅~謎,
對於一般香港人來說,可能已經是見怪不怪,
但在我心裡面,呢十個謎,
永遠都一直是個~謎。

第十位:夏天西裝友
全球溫室效應令香港氣溫不斷飊升,
夏天戶外的高溫,足以令人溶化。著住件背心都熱到出哂汗,
但奇就奇在有啲保險代理、地產代理仲可以著住件西裝周街穿梭!
雖然身穿西裝,但面上無乜汗水,
生活逼人,工作需要令到佢哋身體構造同耐熱程度,產生變化、異於常人,
身體基因點解會激變?點解唔見佢哋會中暑?
著咗西裝係咪就一定傾得成生意?
呢個~係一個謎!

第九位:食店門口排長龍
羊群心理作祟,好多食客見到多人幫趁某間食肆,該食肆點會難食吖?
結果門口就出現一大條人龍,愈多人「嗡」喺門口,就愈多人過嚟排隊,
點解啲人肚餓仲要等成粒鐘先可以醫肚?
點解佢哋肯將寶貴嘅時間投資喺排隊上面?
係咪排完一粒鐘之後,企到腳軟,苦盡甘來,
啲食物會變得份外好味?
呢個~係一個謎!

第八位:小巴單人坐孖位
香港人口稠密,人人想要爭取多點私人空間,
小巴在總站上客時,當「四個單座位」被坐滿後,登車的獨身乘客填滿各孖位,
當一對乘客猶豫是否登車分開坐,無人會主動地讓出孖位,
要由司機出聲:「唔該讓個孖位出嚟,快啲開車吖!」
點解乘客係都要被動地等司機出聲先肯讓座?
點解小巴唔整多啲單獨座位呢?
點解政府唔立例防止單獨乘客坐孖位呢?
呢個~係一個謎!

第七位:衝紅燈過馬路
香港人出哂名趕時間,見對面馬路無差佬就會衝紅燈過馬路,
有啲人就算見到架車衝緊過嚟,都誓要同引擎鬥快!喺響咹聲之下抵達彼岸。
不過呢啲勁趕時間的亡命之徒,過了馬路後便立即回復原來緩慢的步伐。
點解佢哋唔係好趕時間之下又要衝過馬路?
點解佢哋要用自己條命去挑戰汽車的性能?
點解佢哋慳咗一分鐘就會覺得自己條命會長咗?
呢個~係一個謎!

第六位:剪頭髮先洗頭
男士到髮型屋剪頭髮,Junior先替客人洗頭,
洗得好耐、好仔細、落哂精華液、護髮素、
之後才去剪,剪完就去沖水,但沖得很快、很馬虎,仍留有髮碎。
點解唔可以將程序調轉?先剪後洗?又例如我剪Skin Head,
那麼之前落的乜素物液落頭髮度,咪全部剪哂,成為浪費?
點解唔可以先稍為弄濕個頭,方便落剪,之後才慢慢洗過徹底?
點解髮型師和Junior穿到全身黑色?
點解髮型從業員很多都是Gay或Lesbian?
呢個~係一個謎!

第五位:街邊垃圾筒出煙
原本空氣已經污濁的鬧市街頭,偶爾傳來燒焦味道,
供人棄煙蒂煙頭的街邊垃圾筒頂部,遭人扔紙巾繼而燒著;冒出白煙。
路人見狀不會call消防隊,等「垃圾筒清潔承辦商」見到才用水撲熄。
點解路人扔易燃物體入垃圾筒頂部?
點解路人見到垃圾筒冒白煙都無動於衷?
點解又唔會有路人扔煙頭入垃圾筒下面嗰格呢?
呢個~係一個謎!

第四位:女sales必抽煙
有人話食煙的原因是舒緩壓力,
時裝店的女sales是否承受很大的壓力呢?
客人閹尖、上司捽數、男朋友唔上進、朋友嫁得好、自己仲無著落、
所以不論中環或深水埗、大label名店或商場舖仔,
見到女sales吃Lunch時一手傾電話,一手掀雜誌,飯後必抽煙。
點解十個女sales有九個愛抽煙呢?
係咪唔抽煙就無資格做sales呢?
點解女sales抽親都係薄荷幼身煙,而唔抽「良友」或「555」呢?
點解女sales唔抽雪茄或煙斗?
呢個~係一個謎!

第三位:小學生超重書包
十二歲以下的小學生,正值發育長高時期,
他們已經沉迷打機唔做運動喇,仲要孭個成噸重嘅書包,點會長高?
雖然有學生使用「空姐feel的有轆書包」,但點解書包要超重呢?
係咪教科書出版社同教育署官商勾結?本書厚啲賣貴啲?
係咪學校無地方安裝locker俾學生放書?
係咪學校編timetable時,要日日都上齊哂咁多科目?
係咪校方專登要學生孭個超重書包後,就無力喺操場上亂跑呢?
呢個~係一個謎!

第二位:教車揼骨時間
小學生都知道一小時有60分鐘3,600秒,
但係一進入骨場,時間空間就壓縮轉移,
一小時變成45分鐘,蒸發了15分鐘。
同樣地,教車師傅教車教一粒鐘,實際只得45分鐘。
他們比常人長得年輕,因為凡人過了10年寒暑,他們面上只留下7.5年的歲月痕跡。
點解佢哋一小時可以蒸發咗15分鐘?
點解係15分鐘?而唔係14分鐘或者16分鐘呢?
呢15分鐘加加埋埋,又去咗邊度呢?可唔可以儲值咁儲起呢?
呢個~係一個謎!

第一位:提款機提款單
政府想提高市民的環保意識,但市民唔領情!
在自動櫃員機前提款,電腦問是客人否需要列印「交易收據」?
很多人按「需要」,print咗張收據出嚟,
睇咗兩眼之後又立即扔落櫃員機旁的廢紙箱。
既然當垃圾,咁點解要print咗張收據出嚟?難道要揸巢張紙過吓手癮?
點解客人只相信hardcopy而唔相信電腦屏幕的數字顯示?
唔通銀行無派利息,所以要print返銀行張收據紙嚟補番返數?
點解銀行唔實施print一張收據會喺戶口扣返五毫?
點解唔用「紙巾料」嚟做「交易收據」?起碼可以抹吓嘢,
呢個~係一個謎!


53 則留言:

  1. 我去剪頭髮一定會要求最後先洗。

    "點解髮型師和Junior穿到全身黑色?"

    我諗成身黑色,啲頭髮碎就算黐咗喺衫都唔會太顯眼掛。

    "點解銀行唔實施print一張收據會喺戶口扣返五毫?"
    我會每個月keep住啲提款機提款單㗎。嘩,希望啲銀行唔好睇到...

    回覆刪除
  2. 我諗洗乾淨個頭先剪,可能係想個個客人既頭去到髮型師面前係乾淨既,好似衛生d咁ma!

    回覆刪除
  3. 上海咩燈都衝... 有唔少地方都係有燈等於無燈,分別在於撞死時你死響紅定綠,後者醜啲囉。 =(

    我最鍾意人留低啲個人資料....嘿................

    回覆刪除
  4. eric

    你已經替我解開「點解髮型師和Junior穿到全身黑色」的謎, 謝謝!

    我針對是:
    「print咗張收據出嚟,睇咗兩眼之後又立即扔落櫃員機旁的廢紙箱」
    如果你keep哂收據返屋企
    唔在此討論範圍之內

    +++++++

    kelly

    妳又替我解開另一個謎!謝謝!

    如此類推
    剶牙前咪要先洗牙?

    ++++++

    lo哥
    日本就唔同
    民族服從性強
    唔衝燈
    唔會害埋其他道路使用者

    「我最鍾意人留低啲個人資料....嘿................」
    嘩!
    呢句~何解呢?
    同另一人暗地裡溝通?
    有hiddden word?
    呢句~已經係一個謎!

    回覆刪除
  5. 出差半個月翻來又有感多好也睇,真系好~

    回覆刪除
  6. "女sales必抽煙" 應該第一位!!!!!!!!!!!!

    回覆刪除
  7. 卡臣,
    越睇越覺得真係好多謎...真係一個謎@@!

    回覆刪除
  8. 我都係大熱天時著住件冷背心(公司制服)周街行. 原因係件制服太肉酸, 又唔可以o係街買件外套仔笠上身, 咁咪好似發冷咁咯!

    回覆刪除
  9. 長毛必攪事...

    黃X民是否學台灣政客? 佢想點呀?

    回覆刪除
  10. 卡兄,呀明解。咁都好啲。

    我睇牙之前真喺會刷牙先㗎。細個俾牙醫鬧得多囉。

    大熱天時著冷衫。。以前屋企附近嘅中學女生喺夏天個個都喺咁㗎。長袖冷衫都有!

    回覆刪除
  11. 我去发型屋直头叫他不用洗, 反正我自己日日洗头, 无谓浪费时间&金钱叫他洗啦.

    回覆刪除
  12. 太好了。我同樣有一些謎,到現在為止,仍未能解開。

    -- 除了夏天 37 度西裝友,也有 OL 可以大熱天時,竟可以一滴汗都無,而且仲可以有外套仔在行街,就算剛從寫字樓出來,幾分鐘內都會熱呱,但係...佢地係唔會熱既。


    --剪髮先洗頭係有原因既,先洗濕你個頭,等你去唔甩,成個頭濕晒好唔方便走路。


    我還有一些謎.....遲啲講講 ~~

    回覆刪除
  13. >"點解銀行唔實施print一張收據會喺戶口扣返五毫?"

    未被人打過吖?

    我會keep哂所有收據直至收到月結單核對無誤先掉。

    又:哩篇有意思,好好!

    回覆刪除
  14. 哈哈,好正好正!

    點解咁刁鑽你都諗到,真係一個謎!

    回覆刪除
  15. carmen

    哦!妳去了公幹,
    怪不得妳blog咁耐無update啦!

    +++++


    jessie

    女sales必抽煙....是否放諸世界皆是呢?

    +++++


    denzel
    你影啲相靚得咁淒涼..都係一個謎!

    回覆刪除
  16. 自由

    公司制服?
    妳知唔知好多男人對制服好有遐想
    show it please!

    ++++++

    小妮

    長毛和黃毓X....立法會充滿娛樂性!
    又多一個謎啦

    +++++


    eric

    >大熱天時著冷衫
    如果人人係咁
    即溫室效應問題已經解決咗!
    有得救啦!

    回覆刪除
  17. 自由

    公司制服?
    妳知唔知好多男人對制服好有遐想
    show it please!

    ++++++

    小妮

    長毛和黃毓X....立法會充滿娛樂性!
    又多一個謎啦

    +++++


    eric

    >大熱天時著冷衫
    如果人人係咁
    即溫室效應問題已經解決咗!
    有得救啦!

    回覆刪除
  18. 小瓶子

    妳去发型屋直头叫他不用洗,
    咁....可唔可以...計平啲吖?!

    +++++

    大文探員,

    OL食極唔肥,唔食都肥
    呢個都係一個謎

    洗頭之謎被你解開!
    正宗「洗濕咗個頭」!
    多謝你!大文探員

    >你還有一些謎.....遲啲講講 ~~
    熱烈期待中

    卡探員

    回覆刪除
  19. Hana

    我唔愛keep收據
    有時簽完信用卡,馬上將收據現場撕毀。
    驚銀包太多嘢放

    另,
    妳兩母女都咁靚!
    似兩姊妹,
    呢個~係一個謎~

    ++++

    校長

    你贏得美人歸
    邊度識?
    唔講?
    呢個~係一個謎~

    回覆刪除
  20. 你的意見調查令我想起198x年,歡樂今宵"撻成一塊"的"壽頭記"

    回覆刪除
  21. 仲有…
    女學生都會係大熱天時著"冷"背心…
    呢個都係一個~謎!

    回覆刪除
  22. I avoid going to those restos which need to wait long time, I wonder if they are really worth a visit.
    Why Hongkongeses like to mould themselves the same ? They don't like to be orginal and unique?

    And the fashion designers too , most of them are gays .

    回覆刪除
  23. 呢度啲人都唔守交通規則㗎,亂過馬路,仲要好滋油淡定咁慢慢過。每次都喺得我一個人等燈,好似好戇居。

    卡臣本身都喺一個謎啦...

    回覆刪除
  24. >女學生都會係大熱天時著"冷"背心…
    呢個都係一個~謎!

    呢個我識答, 學生妹怕羞, "姐"住d身材o麻!

    >卡臣本身都喺一個謎啦...
    呢個我好認同x2, 點解1以有咁多靈感

    >OL食極唔肥,唔食都肥
    呢個我都想知!
    仲有, 點解份糧搵極都唔夠駛?
    瘦男配肥婆? 靚女拖醜男? 平凡男拖靚女?
    都係一個謎

    回覆刪除
  25. 鵬哥

    鵬哥,你同燦哥的「壽頭記」
    至今仍令我津津樂道

    ...呢舖雞糊呀原是詐!...

    +++++++

    karen

    妳呢個謎...係咪因為女生胸部發育
    驚俾男生見到太突出
    需要遮掩?

    回覆刪除
  26. 巴黎

    點呀?好玩到唔想返港?
    咦!?
    妳係法國人, 懂「慢活」
    應該好識「等」!

    fashion designer 是gay...可能細心啲.感性啲,從女性角度考慮

    +++++++

    eric

    英國人唔守交通燈,
    咁你代表我地中國人
    唔好break the rule

    本身都喺一個謎啦...點解咁...樣.衰.?


    ++++++

    自由

    我點解可以有咁多靈感?
    因為我...作嘢叻!

    點解份糧搵極都唔夠駛?
    瘦男配肥婆?
    靚女拖醜男?
    平凡男拖靚女?

    呀!...呀!...好多謎!
    點解妳咁多謎?...本身已經係一個謎~~~

    回覆刪除
  27. 同『夏天西裝友』呢個謎相對嘅,就係啲女仕天寒地凍著Deep V短裙,唔通佢哋嘅身體有特別嘅禦寒功能?

    呢個謎仲會係令到周圍嘅男仕色迷迷𠻹。

    另外,『女sales必抽煙』,如果我遇到男/女sales係成身/口煙味,我即刻掉頭走,唔勢旨意做到我嘅生意!

    回覆刪除
  28. >點解妳咁多謎?...本身已經係一個謎~~~
    無錯..我係謎女郎..哈哈

    卡~SIR~FILE~~

    回覆刪除
  29. 天使低低b亞波羅 回歸 也是一個謎 !!!!

    回覆刪除
  30. 歪歪

    同一個氣溫
    兩種感受....應該係外星人...

    煙味大?
    sales必備香口膠

    女士低腰褲露股坑....也是一個謎~~

    +++++++

    自由行
    呀謎女郎..妳隻腳好長~~

    FILE~~thank you

    ++++++

    天使低低b亞波羅

    吓? 你又回到陽間呀?

    回覆刪除
  31. 原來世界係咁多謎ga!!
    謎之世界~~

    回覆刪除
  32. d勁歌隻隻都咁頂癮, 好難揀呀!
    其中一首"一晚脹大"都好謎o下!

    回覆刪除
  33. 行姐:
    無一首揀得落手,覺得首首都唔好聽
    我唔鐘意呢d歌
    睇到歌名就="=
    ^^0...he

    回覆刪除
  34. 佚名:

    卡臣玩下o者! 唔需要理首歌好唔好聽, 最緊要歌名全部都好襯呢個post...謎~

    回覆刪除
  35. 自由 & 佚名

    我個民調....一笑置之!
    唔好咁認真

    因為....好謎~~~

    回覆刪除
  36. 第一位:提款機提款單

    我試過有次去提款機提款後無錢出,銀行職員要求我出示提款單俾佢地睇,我之前就因為環保一直無print到,無提款單就要到銀行打簿睇下係唔係已扣數,如果check到扣左先會退番錢俾我,自此之後我每次提款都會print提款單,怕事件重演時無單俾佢地睇

    回覆刪除
  37. 唉,如果成咗嘅我個謎就開估(都要問准佢),衰咗嘅我永世都唔講,仲要石沉大海,綁住我自己!

    回覆刪除
  38. rachel

    原來如此
    睇怕我都要print啦!

    妳為一個謎添多個謎~~~

    ++++++

    劉劉

    咁祝你快啲獲準曝光啦!
    全港讀者都好想你解謎!
    再唔係......私底話俾我一人知

    回覆刪除
  39. 我其實仲有一個謎,一直想探討好耐,而且覺得好好笑。

    就係「妖!好煩呀!」呢句嘢。

    究竟係幾時開始有人講?

    點解會係「好煩呀」呢?

    究竟煩乜嘢呢???

    我唸真係一個謎!

    回覆刪除
  40. 你不如整多幾首歌名喺民調:

    陳慧琳:中出

    鄭融:痴漢

    Freeze :飛機

    關心妍:輪 ....

    嗱,直覺上,直覺咋,覺得邊首歌會最正?

    回覆刪除
  41. 大文探員

    「妖!好煩呀!」呢句嘢。
    應該是女性講
    唔方便講粗口「屌」
    但「妖」又有粗口效果

    「好煩呀!」應該指女性月事
    心情另舍煩躁

    直覺上,我覺得 Freeze :飛機 會最正!
    因為三位model提供了許多幻想空間
    俾男士作飛機之用途

    卡探員上

    回覆刪除
  42. "卡臣本身都喺一個謎啦..."

    絕對係! 觀察力超強呀!

    &真正辦公室娛樂!

    回覆刪除
  43. 火女

    「卡臣本身都喺一個謎啦...」
    唔敢當!
    亂寫一通啫!

    廣告時間:

    愛情小品:「再遇」
    (2集完)
    今晚2345

    回覆刪除
  44. 又有新劇上呀!! 今晚要"喉"實先!

    回覆刪除
  45. >記得上頭注香
    學娜姐話齋, 要有一技傍身!
    所以我而家唔玩頭注香, 玩破地獄~

    回覆刪除
  46. 破地獄好似好難玩下喎......*o*

    期待你d新文啦~

    連留言都"撈"埋!

    回覆刪除
  47. >破地獄好似好難玩下喎
    話明一技之長o麻! 梗係要有d難度!!

    回覆刪除
  48. 自由

    破地獄都識?
    我煮孟婆湯囉~

    +++++

    海火火女

    >連留言都"撈"埋!
    妳果然識貨!
    呢度係全港唯一的blog, 啲留言會好睇過正文!

    回覆刪除
  49. >破地獄都識?
    我煮孟婆湯囉~

    嘩~ 你識呀, 咁岩呀! 一條龍服務, 經濟低迷都有得撈! 絕對一技傍身!

    回覆刪除
  50. 自由

    一條龍服務?

    我見過安老院樓下有殯儀館,啋~~

    回覆刪除
  51. 其實dup骨果D孖鐘都係45分鐘x2,呃人呀

    回覆刪除
  52. 唔知啲律師的consulting hour 是否一樣呃鐘呢?

    回覆刪除

LinkWithin

Blog Widget by LinkWithin