~~~~~~~~~~~~~~~~







2008年10月7日 星期二

恐嚇說話

恐嚇說話

80年代的港產片中,
常聽到一句對白:「想拋我?我嚇大架!」
在我們的成長過程中,確實聽過很多言帶恐嚇性的說話。
恐嚇說話只是一種意識,無實際行動,希望把對方嚇窒繼而屈服,
讓我揀選印象最深刻的十句。

第十位:「你搞唔掂?你聽日唔使返工!」
火爆老細常用的威脅說話,
用打爛飯碗來恐嚇下屬一定要完成艱巨任務,
如果不成功,便成仁,立即炒魷!
例句:「你通頂搞咗三日三夜,都仲未做好?你仲搞唔掂?你聽日唔使返工!」

第九位:「唔好行埋嚟!如果唔係我跳落去!」
危坐天台邊的企圖跳樓自殺者,
見到警察消防員走埋嚟,大聲嗌:「唔好行埋嚟!如果唔係…我跳落去!」
自殺者的企圖是尋死,但竟然用自己條命做威脅,勒令警員唔好接近。
究竟佢真係想自殺?定係想做場大龍鳳引人注意呢?
真係當事人先清楚。

第八位:「我爛命一條,最多咪攬住一鑊熟!」
所謂「趕狗入窮巷」,「好佬怕爛佬」,
爛佬唔怕爛命一條,「缸瓦撼陶瓷」!
所以喺貧富懸殊的社會,低下層邊緣人常用呢句來恐嚇有錢佬。
例句:「你身驕肉貴,我就爛命一條,最多咪攬住一鑊熟!」 ,「一鑊熟」是屬於80年代,現今,就算打邊爐都好少聽到「一鑊熟」。

第七位:「我做人仲有乜意思呀!我死咗去好過囉!」
遭拋棄的怨婦、失戀被遺棄情人,常用此句。
對方突然提出分手,失驚無神自己情緒失控,捶胸頓足!呼天搶地!
「我做人仲有乜意思呀!我死咗去好過囉!」
邊講邊作狀爬窗、攞刀、飲滴露,
希望以死嚟威脅對方,收回分手的成命。
另外,不孝子女激親阿媽,阿媽都會喊著講呢句!

第六位:「我就爆你大鑊!」
每個人都有秘密,分別在於「見得光」定「唔見得光」?
假如知道別人的一些不光彩的秘密,可以藉以要脅。
「如果你唔俾一百萬我,我就爆你大鑊!」
由娛樂圈爆料、商業犯罪、桃色醜聞、謀財害命,到政治陰謀,此句都適用。
同樣「爆大鑊」是上一代的舊有「動名詞」。
如今多用「篤爆、踢爆、揚開佢」。

第五位:「你做到咁絕?我做鬼都唔放過你呀!」
中國人比較迷信,相信鬼神、超自然力量。
所以如果要威脅人,要借靈界鬼魅來嚇唬對方,
你做初一?我做十五!「你做到咁絕?我做鬼都唔放過你呀!」
著紅色衫去自殺,化成怨氣沖天的厲鬼!纏身報復!
撈偏門及撈家,較信邪,會容易屈服。

第四位:「信唔信我port你呀?!」
政府拍宣傳短片:「今時今日,咁嘅服務態度係唔夠!」
釀成投訴風氣,「消費權益在你手,據理力爭要開口!」
結果服務員稍一怠慢,顧客立即破口要投訴,
抄低Staff number:「飲香檳,無免費魚子醬送?信唔信我port你呀?!」
從而獲得通容著數:快啲有檯、舊貨換新貨、無限次維修、送物送乜…
服務員為保飯碗或免麻煩,唯有暗啞底硬食!

第三位:「咁…我哋不如分手啦!」
男女關係,外弛內緊,寸土必爭!
如果一方提出的要求,未獲對方接納支持,
被拒絕一方只好出絕招,用成份感情作賭注,
「叫你偷支警鎗俾我玩都唔制,咁…我哋不如分手啦!」
結果好多傻事荒謬事,都在這種威脅情況下釀成發生,悲劇收場。

第二位:「你唔應承我,我就跪喺度唔起身!」
弱方哀求強方,不能行硬,只好行軟,死纏唔放!
男士求婚、借錢救命、挽留決裂情人、求醫生救人,皆適用。
以前「跪喺度」呢一條蹺,仲有人會受,現在只覺好「娘」!男士當眾跪喺度求婚,以為用群眾壓力作脅,但如果女士唔鐘意都唔會work!
上一次聽「你唔應承我,我就跪喺度唔起身!」好似已經是看粵語長片的時候。
想只用誠意來打動對方,在物質掛帥的社會來說,似乎十分戇居。

第一位:「妳試吓行出呢個門口,妳出咗去就唔好再返嚟!」
家庭暴力事件、離婚個案、虐妻虐兒案件,愈來愈多,
逼到受害者忍無可忍,執嘢走人!
施虐者出言恐嚇:「妳試吓行出呢個門口,妳出咗去就唔好再返嚟!」
受害者當然唔受威脅,亦唔想再返嚟呢個破碎的家。
呢句都係50、60年代,男尊女卑社會才聽到,
現在女性經濟獨立,再無太太會當丈夫是一張長期飯票。
如男性講此句,只覺得Camp到爆而已,
恐嚇成份只變成搞笑成份!

57 則留言:

  1. 睇完...好驚...唔好呀! 我唔敢呀!!

    回覆刪除
  2. 重有,80年代的警匪片,電視劇中, 衝動的探員,總是說: "信唔信我劈炮吾撈呀" 又或 "一係最多劈炮吾撈"

    在日常之中, 跟同事用這話說笑....... 但如在office說何來有"炮"呢!

    Hi Carson, 成了你的讀者已好幾星期了,我第一次回應, 請問你幾是出書呢! 寫得好!

    回覆刪除
  3. 「你試下再講多次!你夠膽你丫講!」...

    「你愛唔愛我?我問你呀,你唔聽我話我同你死過!」...

    「開片丫嘩?好呀!我等人際旗好耐喇!」

    「你係咪搞女人,好!你有女人我有阿仔,最多第二世再見囉!!!」


    .......

    至於港女方面,也有恐嚇說話,常用包括:

    「我鍾意話你就話你,點丫,你敢鬧番我?啊!你蝦女人,哈嘿嘿嘿嘿....」

    回覆刪除
  4. 第四位:「信唔信我port你呀?!」
    乜野係PORT?

    回覆刪除
  5. 唉呀!做唔到頭位留言,攰死,瞓著咗~!

    哈!多謝卡臣咁比面應邀寫比篇!我最鍾意係 port 你呀la! 哈,我響呢邊戒咗喇,你知喇,上海哪有得port可言?

    回覆刪除
  6. 我都諗到以下幾句,多數都係响戲入面出現:

    江湖大佬講一句:「你知唔知我係邊個!」就可以嚇窒好多人,而佢啲手下又會狐假虎威學佢咁講:「你知唔知我大佬係邊個!」

    小朋友遇到百厭星會講:「你仲係咁曳,我就話俾老師/你媽咪聽!」

    一般市民遇到惡霸會講;「你信唔信我打電話報警拉你呀喇!」

    有錢佬遇到啲唔順佢意嘅人會講;「我依家就去搵我個律師告到你甩褲!」

    回覆刪除
  7. 第一位:「妳試吓行出呢個門口,妳出咗去就唔好再返嚟!」

    哈哈哈呢句我可耐以前講過!

    回覆刪除
  8. 仲有好多ga!

    「我唔理啊!你死都同我死掂佢先啊!」

    「我請你來返來做嘜啊!你連呢d都唔識!你再係咁同我返屋企啦!」

    「你都做左咁多年啦!仲係好似個新人咁!叫我點我升你職啊!」

    係呢?卡臣有冇d老細想升你職時既說話呢?

    之前聽過朋友話,老細想升你職或者想炒你時d說話都差唔多ga!

    回覆刪除
  9. 「 Port 你」= 投訴你。通常應用在對公務員方面。因為「被投訴」公務員範疇是很忌諱。

    例如對警察有不滿,會說:「差人大晒? Port 你o架!」,以表示對該位警員的不滿。

    但對於私人機構,「 port 你」的作用不大。

    回覆刪除
  10. these are also the 10 most frequently heard dialogues in TVB soap drama episodes.

    回覆刪除
  11. 我聽得最多係:
    呢度唔比影相,再影報警拉你!

    回覆刪除
  12. Denzel:
    我聽得最多係:
    呢度唔比影相,再影報警拉你!
    -->哈哈!好笑
    但我聽得最多係!
    唔好駁嘴!
    我鐘意駁嘴駁舌ga:p

    回覆刪除
  13. 佚名,
    係呀,香港好多地方都唔比影相...奇怪???

    回覆刪除
  14. Denzel:
    係呀,香港好多地方都唔比影相...奇怪???
    -->靜靜雞偷影lor:p
    不過你個部相機太大部大顯眼啊!
    下次買個針孔相機xd!
    睇你點話我!kakaka

    回覆刪除
  15. 係要買針孔先得... =) 一係用部卡片機,你渣住部單反肯定死~

    回覆刪除
  16. 各方好友

    今天去拜山
    而家才歸家

    查比斑特頓

    多謝你支持先
    你blog未有文章喎!
    千里之行始於足下
    快啲動筆啦

    我邊度寫得好吖?
    出書一事,都係個句:同博益傾緊
    快啦~~

    +++++++

    diamond

    哈哈

    你次次提供果啲都好精彩!

    回你兩句:

    父母:「你再百厭,叫差人拉你!」

    男友:「妳要個LV袋? 妳一係殺死我啦!」

    +++++++
    eric

    大文已給你一個完美答案
    +++++

    回覆刪除
  17. lo哥
    sorry!尋晚打邊爐夜咗
    12:30先POST,搞到你瞓咗
    無所謂啦!

    我多謝你提供題目俾我就真
    (互動一番)

    各方好友,不妨向小弟提供題目
    有趣的一定會寫!

    +++++++

    歪歪

    回你兩句:

    「我知你住喺邊度架!」

    「你等收律師信啦!」

    +++++++

    C+

    估唔到咁有型格的妳
    都曾經講過句咁Camp嘅說話噃~

    回覆刪除
  18. 佚名

    >係呢?卡臣有冇d老細想升你職時既說話呢?
    ==>卡臣,發夢無咁早!死返出去做嘢啦!

    http://carson-chung.blogspot.com/2008/09/blog-post.html

    +++++

    大文

    唔該哂先!

    port應該係report呱
    無理由係export, 出口傷人架?!...我估

    +++++

    nost

    又係喎!
    電視劇都係你大我, 我拋你
    特別是第一位果句

    回覆刪除
  19. denzel

    唔俾影相?
    你喺女更衣室呀?
    梗係唔俾啦!

    +++++++

    佚名

    又一恐嚇說話:
    「再駁咀?信唔信我剪咗妳個咀呀?!」

    回覆刪除
  20. denzel, 佚名, lo哥

    香港唔俾影相
    係咪denzel帶部大機似記者/狗仔隊

    管理員見你影相,以為你拍下證據
    大作文章呀?

    偷拍好刺激喎!不過唔好喺MTR,
    瓜田李下嘛!

    回覆刪除
  21. 卡臣:
    我邊度寫得好吖?
    出書一事,都係個句:同博益傾緊
    快啦~~
    -->博益好啊!卡臣果真大作家><
    我呢d係星抖市民拉衫尾黏金鏮咋!

    卡臣,發夢無咁早!死返出去做嘢啦!
    -->卡臣應該係咁講,卡臣,我成日「哎」你升職,你就成日推,究竟你幾時先肯升職幫我減輕負擔啊?

    又一恐嚇說話:
    「再駁咀?信唔信我剪咗妳個咀呀?!」
    -->wa~好熟啊!我返工到有人咁恐嚇我ga!
    其他地方都有^^0
    我駁嘴已經駁上癮好耐啦!

    回覆刪除
  22. 卡臣:
    香港唔俾影相
    係咪denzel帶部大機似記者/狗仔隊
    -->細機都話,denzel拎機咁pro
    唔似我,拎住部細機,有時可能佢地心會咁諗,妹妹仔人影你又影,返屋企「鴨片啦」嗚~陰公...ahahahahaha^^0

    管理員見你影相,以為你拍下證據
    大作文章呀?
    -->嘜作文章唔係把口就得啦咩?駛影你相ga!xd
    譽論威力無窮...hoho

    偷拍好刺激喎!不過唔好喺MTR,
    瓜田李下嘛!
    -->mtr與火車閂口呢排招兵買馬,裁咁多人賺唔少啊!

    回覆刪除
  23. 其實都好無奈...商場屋苑都唔同你嘈啦,但係連公園,e.g.黃大仙至連...公開場所,e.g.土瓜灣牛棚藝術村...都唔比影相,矣...反而狗仔隊話影就影,正正經經影相仲多麻煩@@!

    回覆刪除
  24. 佚名

    妳做乜話妳係星斗市民拉衫尾黏金鏮呀?
    妳年紀輕輕,都寫得好好架!

    升職? 唉~~自己唔長進囉
    妳千祈唔好學我uncle car呀!

    妳影相都靚呀
    影螺絲釘/鐵架....
    有深度呀!

    ++++++
    denzel

    唔好放棄
    揾個拍檔
    引開管理員注意後,狂影
    祝你馬到功成先!

    回覆刪除
  25. 『父母:「你再百厭,叫差人拉你!」』

    大人好多時武唔點啲細佬就一味靠嚇,借差人嚟過橋恐嚇細佬都總算係好過話:「你仲亂咁走,一陣俾鴉烏公捉咗你去賣。」雖然呢句我細個都聽唔少,但係好彩未遇見過「鴉烏公」,而我當時心目中「鴉烏公」嘅型像,其實同卡臣嘅丐幫長老造型係非常之接近!

    回覆刪除
  26. >>「叫你偷支警鎗俾我玩都唔制,咁…我哋不如分手啦!」

    haha,可以改成:「叫你偷條柴俾我玩都唔制,咁…我哋不如分手啦!」

    我打死都唔打名出黎架喇,你地估啦!

    回覆刪除
  27. 歪歪

    「鴉烏公」嘅型像同我嘅丐幫長老造型非常之接近?
    我都係咁話!

    父母仲會當街話:「你仲亂咁走,一陣俾拐子佬捉咗你去賣。」
    原來唔係恐嚇,喺深圳真係有架!

    ++++

    匿名

    「偷條柴」<--上一代用語
    相信你年紀一定同我差唔幾

    回覆刪除
  28. Denzel:
    其實都好無奈...商場屋苑都唔同你嘈啦,但係連公園,e.g.黃大仙至連...公開場所,e.g.土瓜灣牛棚藝術村...都唔比影相,矣...反而狗仔隊話影就影,正正經經影相仲多麻煩@@!
    -->下次搵埋我去,我個樣似中二、三
    扮做project,狂影啊!kakakka

    回覆刪除
  29. 卡臣:
    妳做乜話妳係星斗市民拉衫尾黏金鏮呀?
    妳年紀輕輕,都寫得好好架!
    -->一埋肺言者

    升職? 唉~~自己唔長進囉
    妳千祈唔好學我uncle car呀!
    -->uncle car唔長進ga?唔覺

    妳影相都靚呀
    影螺絲釘/鐵架....
    有深度呀!
    -->沒有深度可言,係人都影到

    回覆刪除
  30. 啊...! 我都估到你係邊個..ha~ha~ha~

    回覆刪除
  31. 估到咪估到!

    我死都唔認呀,容乜易釘牌呀!

    回覆刪除
  32. 匿名

    哈哈!估到啦
    咁熟,做乜玩神秘
    間中鍾意role play?

    +++++

    佚名

    妳真係影得唔錯架!
    真心話!

    回覆刪除
  33. >>卡臣

    有題目都要識寫,我就無咁好文彩。
    哈,早兩日有個文人朋友睇你既handsome guy,大讚好。=)

    回覆刪除
  34. lo哥

    你的上海文人朋友都讚?
    係咪真架?!

    我高興~我高興~我高興~我高興~我高興~我高興~我高興~我高興~我高興~我高興~我高興~我高興~

    我又發作, sorry!

    回覆刪除
  35. 卡臣:
    妳真係影得唔錯架!
    真心話!
    -->嗚~多謝你啊!^^~

    回覆刪除
  36. Carson

    我想你幫我測字,問題是我會和女友分手嗎?
    現用「分」字測一測.多謝

    回覆刪除
  37. 心急人

    你想用「分」字測一測你會否和女友分手?

    好抱歉,「分」=八把刀,
    呢次你同女友一定分手,
    疊埋心水揾過第二個啦

    卡臣夫人上

    回覆刪除
  38. 卡臣:
    周身骨痛好返未呀?
    -->未,日日都周身痛,唔駛返工都痛^^0
    唔快得話我唔捱得啦!

    你想用「分」字測一測你會否和女友分手?

    好抱歉,「分」=八把刀,
    呢次你同女友一定分手,
    疊埋心水揾過第二個啦

    卡臣夫人上
    -->wa~卡臣夫人識測字0.0!

    回覆刪除
  39. 佚名

    測字?
    我邊度識吖
    亂吹之嘛

    妳都試吓

    回覆刪除
  40. 卡相士:

    咁唔爭在同我測下"包底", 睇下我有無運行? 唁該

    回覆刪除
  41. Hana

    chatroom咪幾好
    大家吹吓水


    +++++++

    自由

    恭喜哂

    正所謂「寶物沉歸底」
    妳用「包底」測
    一定保證滿載而歸,有運行啦

    回覆刪除
  42. 卡相士:

    >正所謂「寶物沉歸底」
    妳用「包底」測
    一定保證滿載而歸,有運行啦

    滿載「垃圾」而歸, 梗有一, 兩件岩駛!
    唔該晒...卡師傳!

    回覆刪除
  43. 卡臣:
    測字?
    我邊度識吖
    亂吹之嘛
    妳都試吓
    -->咁我不如搵我d fd測啦~
    :p唔搵你!原來你係神棍來ga!大家小心荷包啊!

    hana:
    原來哩度係chat room
    -->係啊!嘜唔係不摟都係既咩???:p
    爺爺個度都係~~

    回覆刪除
  44. 自由

    垃圾?
    好多垃圾婆
    其實係隱形富豪
    幾億身家架

    +++++

    佚名

    原來哩度係chat room
    -->係啊!嘜唔係不摟都係既咩?爺爺個度都係~~

    對呀,老人家怕悶
    貪熱鬧嘛!

    p.s. 老人家指我,非指校長

    回覆刪除
  45. 卡臣:
    對呀,老人家怕悶
    貪熱鬧嘛!
    -->哎!老人家我有時都係咁啊!
    所以咪同你爺兩句過下日晨,你都知啦!老人家周身痛,唔行得遠,唯有用internet同你傾下啦~
    xd:p

    回覆刪除
  46. 佚名

    老人家都識用internet?
    妳都算yeah囉~

    傾多啲, 如果唔係好易患美人癡呆症
    oh! 係老人癡呆症

    回覆刪除
  47. 卡臣:
    老人家都識用internet?
    妳都算yeah囉~
    -->你係咪家陣睇唔起我呢d老人家啊!!下!信唔信我搵我枝拐杖out 你 ar la!
    依家老人家我要update ar ma~唔係追唔止你地後生ma...咁都唔俾...嗚><~

    傾多啲, 如果唔係好易患美人癡呆症
    oh! 係老人癡呆症
    -->0.0...老人就老人啦!我唔係美人

    回覆刪除
  48. 卡臣:
    喂!妳細過我三年架
    我51,妳48
    -->咪就係lor...都48仲美女咩?殘花就有la!

    回覆刪除
  49. 佚名,
    吓...你今年48?但係個樣就中二,三!!!

    卡臣,
    呢句真係恐嚇說話@@!

    回覆刪除
  50. DENZEL

    哈哈
    呢句何止是恐嚇說話
    直情是怪談~~~~~

    回覆刪除
  51. Denzel:
    吓...你今年48?但係個樣就中二,三!!!

    卡臣,
    呢句真係恐嚇說話@@!
    -->哈哈哈哈哈!
    睇來你地撞邪啦~haha~!
    48,中二、三樣仲唔係妖怪!你地小心d la

    回覆刪除

LinkWithin

Blog Widget by LinkWithin