~~~~~~~~~~~~~~~~







2014年2月16日 星期日

表白 by 歪歪


跟歪歪相識於2008年,轉眼6年啦。有時歪歪都會手癢露兩手寫故事,上一次的作品《原諒-袋錶-愛迪生》由起題、內容、佈局、結構至扭橋都是水準示範。睇返原來《原諒...》已是2011年元宵佳節時寫成,事隔三年後,選擇在情人節再寫新作《表白》,果然有心思,故事夠絕。再次多謝歪歪撥冗創作。

更正︰歪歪對上一作品是11年4月的《樂園》

表白 by 歪歪

前日你係同愛人甜蜜溫馨?定抑或係孤家寡人呢?我想借呢個機會同大家分享下我故事。

我係一間報社工作,公司除出版報紙,仲有幾本週刊,邊個會諗到我木口木面沉默寡言,成個宅男咁款,竟然會係屬於潮流雜誌個部門。我崗位主要係幫社交版嘅記者做電腦排版,即係佢哋去完啲名牌搞嘅酒會、時裝表演之類嘅活動,同啲名人影完相寫咗篇採訪報導之後就拋嚟畀我處理。我做咗呢份工兩年幾,估唔到三個月前,我每日响公司沉悶刻板嘅生活出現咗重大變化。事緣坐我對面社交版嘅主編Patrick因為要請一位助手,而呢位被安排坐係我斜對面嘅新同事叫做Cammy。

Cammy係由另一份報紙撬翻嚟,Patrick請佢除咗係因為佢真係做得嘢之外,仲貪佢年青貌美,有得日日同個靚女一齊出差,咁就梗係爽啦!不過呢個Patrick係名副其實嘅淫賤麻甩佬,出到去同啲女明星、靚模影幾張似樣嘅相嚟交差之外,仲會專登揾機會影啲女星走光露底嘅相嚟私人珍藏,Cammy跟著個咁衰格嘅上司,我真係戥佢擔心。

因為平安夜一晚同時有兩個品牌搞party,Patrick同Cammy就分別出席兩個場合。點知Patrick影完啲名人行完紅地氈之後,就走去飲咗幾杯主辦商提供嘅香檳,最後醉醉地連自己相機嗰張memory card都跌埋。第二日返到公司佢竟然夠膽走去同老總講係Cammy噚晚整唔見,好在老總仁慈,見Cammy係新人而無發火。其實Patrick之前經常都為咗唔想孭鑊,就卸哂落去其他同事到,有時無位卸就賴係部電腦出錯,真係頂佢個肺。今次佢咁對Cammy,我一定要諗辦法報仇。

於是我度咗條橋,計劃响大除夕嗰日進行。既然我熟識電腦運作,一於就靜靜雞幫Patrick安裝個駭客程式,然後偷取佢facebook,gmail嘅密碼,再趁住佢去食晏嗰陣,將佢儲起嘅淫照連埋啲鹹濕說話發放畀佢嘅所有女性親友。個懵佬唔知頭唔知路,食食下飯突然收到一大堆「問候」,即刻趕返嚟公司睇下點解會畀人偷入咗佢部電腦,點知未埋到位就已經畀老總召入房,仲即刻炒魷無得留低,梗係啦,老總身為女人,收到啲咁嘅相,仲點會容許呢位下屬繼續返工呀。

嗰日下晝Cammy就臨時拉夫做咗Patrick嘅職位,老總話只要Cammy試用期內做得滿意,就會畀佢正式坐正。呢個安排對我嚟講就梗係最滿意啦,唔單只唔駛再對住個猥瑣佬,仲可以有Cammy坐正我對面,真係意外收獲。為咗要幫Cammy繼續坐呢個位,佢有乜嘢要我處理,我都一定做到快、靚、正,有時為咗趕稿要一齊捱更抵夜,都在所不辭,只係驚佢做嘢咁搏捱殘咗,我就會心痛。好在,佢嘅努力並無白費,初七嗰日試用期滿,就正式加入公司。當日我都好想同佢講聲「恭喜!」,但係我當時無勇氣,因為我想儲起啲勇氣响二月十四號中西情人節當日,同佢表白。

諗嚟諗去,都唔知點樣先可以同Cammy開口,最後我決定喺前日趁佢臨收工要走之際,响電腦嘅螢光幕度打出我嘅心聲:

親愛的Cammy:

自你第一天上班起,我就立刻被你的漂亮面孔深深地吸引著,也許這就是人們所說的一見鍾情。

跟你在工作上的合作,令我體會到你的專業及認真。而你對每位同事也誠懇有禮,令我感受到你有一顆善良的心。

我從來未談過戀愛,你就是我一生中第一位愛上的人。我自知外表四平八穩,並非是你擇偶的首選,但是我亦有可取之處,就是我內在聰敏過人的頭腦,和不斷自我增值的上進心。

在這三個月,我們在辦工室內一同慶祝了聖誕、新年和農曆年,我很希望在這難得一遇的元宵情人節晚上,能夠和你一起度過

Cammy,你會接納我的愛意嗎?

傾慕你的

iMac OS X Version 10.9.1

Cammy眼定定咁望實我,直到睇完成段求愛宣言,然後就笑住問周圍嘅同事邊個整蠱佢,啲人即刻走哂埋嚟睇,個個都讚我夠誠意,無人認係惡作劇,之後一個二個就走咗去。於是辦公室內就只係凈返Cammy同我,佢就笑住咁同我講「情人節快樂!」跟住就响我塊面度錫咗一啖,我畀佢突如其來嘅一吻,驚喜到未嚟得及反應,然後佢就伸隻手過嚟想攬實我,吓,原來係撳掣熄機呀!我...



古巨基的《所謂愛情》。

23 則留言:

  1. 歪歪好嘢,我入了你設的局,看到那表白,拍案叫絕!

    電腦也設計了人工智慧,談起戀愛了。正

    回覆刪除
  2. 早晨!

    卡臣,都係多得你睇完Her之後寫嘅嗰兩篇作品,先至啟發到我去寫呢篇啫。

    另外,請問你有冇收到我今日先電郵畀你嘅修正版?

    回覆刪除
    回覆
    1. 午安,剛回來,立即更改
      果然精益求精。

      修正部分,更加有節日氣氛,加強了男主角的身份背景,讚!

      如果得閒就寫多啲啦,幫吓手嘛

      刪除
    2. 你話我『精益求精』?搞到我紅都面哂!

      仲有呀,多謝你一直畀我喺度擺文,不過上一篇唔係《原諒...》,而係一一年四月廿九號嘅《樂園》呀。

      刪除
    3. 係喎,我寫錯,應該係「精億求卵」至啱

      是樂園呀!證明我記性差,今晚加返先。

      刪除
  3. 歪歪:

    好搞笑。最搞笑喺蘋果作業系統寫嘅。不過,嗰封表白嘅情信,好似喺十九世紀嘅文句,舊到頂唔順。嘻嘻!

    回覆刪除
    回覆
    1. 而家啲港男邊寫到咁文藝的字句,所以先吸引到女仔,呢個先係賣點

      刪除
    2. 佛爺,卡臣:

      我都想寫到封潮文情信,不過我唔潮,無計啦。

      刪除
    3. 運用多些潮語,就可以寫成潮文

      刪除
    4. 咁就梗係要向你學習喇,大師!

      刪除
    5. 歪歪:

      你封情信寫得好夠味道,我攞到啲靈感,想寫一個無鹽愛情故事。嘻嘻!

      刪除
    6. 卡臣:

      我唔喺話歪歪寫啲嘢過時,只喺今日好少人咁樣寫嘢喇。

      刪除
    7. 卡臣,你直頭係大 C cup啦!

      佛爺,無鹽嘅愛情故事,會唔會「寡」咗啲?我仲諗住你寫潮文寫到個女主角潮吹𠻹。

      刪除
    8. 卡臣、歪歪:

      你哋睇住,我準備寫一個「同床無性」嘅愛情故事,淡過飲蒸溜水。嘻嘻!

      刪除
    9. 「同床無性」嘅愛情故事?佛爺,咁你咪要犧牲哂最轟烈嘅情節?

      刪除
    10. 歪歪:

      哈哈!最「轟烈」嘅情節?講得咁文藝。吾!……我今次要「來冇性」,「去冇色」。嘻嘻!

      刪除
  4. 歪歪,

    好嘢呀,我睇到差唔多最後,見到署名係「iMac OS」先知道主角唔係人,真係估唔你唔到。 :)

    回覆刪除
    回覆
    1. 多謝呀!你寫嗰篇模擬/虛擬嘅續集都好正呀!

      刪除
  5. 回覆
    1. 多謝讚賞!篇文有讀者喜歡我就最開心!

      刪除

LinkWithin

Blog Widget by LinkWithin