~~~~~~~~~~~~~~~~







2013年11月20日 星期三

兒時傳聞



兒時傳聞


在我成長的年代,曾經聽過一些道聽途說的傳聞。其中一些是民間智慧、另一些則令我毛骨悚然。現在就重溫一吓呢十宗「兒時傳聞」:

第十位:對付蚊爛
當被蚊針到,長出又痕癢又腫的蚊爛,如果無「無比膏」喺身,土炮的止癢方法:就是先塗一些口水在「蚊爛」上,而後,用食指的手指甲,在圓形的蚊爛表面上用力壓劃四吓,打成一個「米」字,之後就可以止痕。其實是將新加痛楚蓋過痕癢的感覺。

第九位:壁虎斷尾跳入耳
阿媽話壁虎遇到敵人或受威嚇後,壁虎便會自斷尾巴,分散敵人注意力,趁機逃脫。但離體後的尾巴仍會跳動,阿媽話呢啲斷尾專跳入人的耳道內,嚇到我細個果陣,一見壁虎斷尾,就立即掩耳躲避。

第八位:山頂烏龜石
兒時在維多利亞山頂,沿盧吉道走一圓,欣賞維港景色(當時填海工程尚未破壞海岸線)。突然見到一嚿巨石,狀似烏龜。聽說此石叫「烏龜石」,每年會向山腳下移一厘米。當它到達維多利亞山腳時,香港便會陸沉。咁多年,烏龜石郁都唔郁。有傳說︰烏龜石化成灣仔會議展覽中心很明顯,它到了海傍,所以香港在97年後亦已玩完了。

第七位:海洋公園纜車墜毀
80年代當我首次乘海洋公園纜車時,小學同學話曾經有架纜車斷纜墜毀,纜車內一家幾口無一生還。海洋公園害怕影響生意,將事件隱瞞,把一筆巨款給其家屬作掩口費。我諗如果該事情屬實的話,相信應該有目擊者,紙又點可以包火?所以聽咗就算。(雖然不自禁地聯想到昂坪360

第六位:可口可樂浸死人
80年代初期,同學飲可口可樂,剩下四份一支汽水唔飲,點解呢?原來傳聞喺香港的可口可樂汽水製造廠,有一名員工失踪,後來發現在巨型糖漿搞拌器內,尋回搞難哂嘅屍體。屍體沉澱在任何一支可樂的底部,所以唔會飲到盡。這個避飲盡方法十分阿Q,如果支汽水真係加料,飲唔飲到底部,都會瀨架喇。

第五位:零晨對鏡批蘋果
踏正午夜零時零分前,點一支洋燭,對鏡批蘋果,如果一刀批到尾而蘋果皮又唔斷的話,鏡中便會出現未來配偶的樣子。我未試過(加上我批蘋果實批斷皮),所以唔知靈唔靈?

第四位:地府直撥電話
又係午夜零時零分,攞起家居電話筒(當時未有手提電話出現),撥666,電話便可直通地府,跟下面鬼魂直接對話。印象中,同學試打過一次,不過電話筒傳來的,只是「長烏」聲音而已(除非「長烏」就是鬼魂的聲音)。

第三位:四人歸西
歡樂今宵的戲寶之一:幻海奇情,其中有一集叫「四人歸西」,四位師奶搭好牌後,四人打出的第一隻牌都是「西」,結果四人都先後歸西。此傳聞一直影響至今,雀友最迷信意頭運氣。真係試都唔敢試,好邪呀!

第二位:夜夜痴纏
由顧嘉煇作曲、林振強作詞、麥潔雯主唱夜夜痴纏》,是周潤發和葉蒨文主演電影《靈氣迫人》的主題曲。聽聞是電台禁歌,特別是深宵節目,一播電台就會鬧鬼。皆因呢首歌音樂會招惹到靈界朋友埋嚟喎唔信你半夜可以試,不過唔使預我。

第一位:溫莎公爵大廈狐仙
1981年,當年的溫莎公爵大廈 (即今天的皇室堡),一幅雲石牆出現狐狸頭的圖案,引來很多市民到來圍觀狐仙。聽說事源於溫莎公爵大廈頂層某酒樓,有一對夫婦剛替兒子擺滿月酒後,當晚,婦人夢見到狐仙,一子就把嬰兒咬死。婦人驚醒,發現嬰兒已無呼吸,有傳嬰兒全身的血液已被狐仙吸乾!後來商場將整塊雲石牆拆掉,風波才告平息。此傳聞成為當年我們同學之間的火熱話題。


二少爺說︰「林過雲」也是我兒時的另一宗恐怖傳聞。

10 則留言:

  1. 我地學校當年喺維園水運會
    食晏嗰時啲同學專登走過去睇狐仙~

    回覆刪除
  2. 卡臣:

    我聽人講過,公仔麵啲湯放喺個鑊到,第二朝個鑊穿咗窿,啲湯料勁過鏹水。

    回覆刪除
    回覆
    1. 唔係吓嘛,的成日食公仔麵喎

      有無聽過「可樂」可以洗馬桶的惡漬?
      酸性很高呢

      刪除
  3. 四人歸西好似要打埋「一筒」先靈o架,第一隻牌係打「一筒」,之後順住打晒四隻「西」,喻意係「一同歸西」。 :o

    回覆刪除
  4. 细个戈阵时,阿妈话如果系夜晚剪脚甲,小强就会黎咬脚趾窝!

    回覆刪除
  5. 我聽個傳聞都係打電話落地府, 不過係連續撥打18個0字...有一次真係接通咗, 聽到背景有D火燒聲

    回覆刪除

LinkWithin

Blog Widget by LinkWithin