~~~~~~~~~~~~~~~~







2013年11月11日 星期一

人間蒸發 - 上集



人間蒸發 - 上集


辦公室接待員對阿飛說:「Kelly?佢已經resign。」阿飛聽後,不相信自己的耳朵,呆了……

                               

阿飛姓歐,同事給「歐飛」起了一個度身訂造的花名「Fade Out」。因阿飛做事魂遊、遲早被淘汰,所以冠以「Fade Out」。阿飛性格吊兒郎當、做事得過且過、唔爹唔吊、怕承擔責任。他在社會上打滾咁多年,仍是一事無成。33歲仍未學懂替自己好好打算,只知道以「做一日和尚、敲一日鐘」宗旨渡日。

三年前,阿飛做朋友的戥穿石,婚禮當日結識了新娘子的一位陪嫁姊妹Kelly。阿飛跟Kelly隨後約會,並發展成為情侶。Kelly雖然細阿飛三年,但思想比他成熟許多。

Kelly知道自己命中注定並非大富大貴之人,但求找到一個愛錫自己的男人便可付託終生,「公一份、婆一份」地過安穩生活。

Kelly喜歡看愛情小說,希望自己在30歲結婚,組織一個屬於自己的小康之家;雖然阿飛並非年青有為,但Kelly願意跟阿飛過清茶淡飯的日子。相信「雖然窮、但開心」的道理。

拍拖期間,Kelly曾多番暗示想結婚,無奈阿飛以未有經濟基礎為藉口,顧左右而言他。Kelly相信阿飛是愛自己的,只不過未有心理準備去結婚而已。愛看愛情小說的Kelly信奉浪漫主義,她相信終會有一日,阿飛會向自己求婚。

Kelly在她踏入30歲生辰的晚上,阿飛跟她吃晚飯慶祝。喝大幾杯啤酒的阿飛,隨口笑問:「妳今年想要乜生日禮物呀?」
Kelly笑瞇瞇說:「係咪要你送乜?你都應承?」
阿飛:「哈哈哈!我能力範圍之內,一定應承妳!」
Kelly半講笑口吻說:「好!要一個老公!」
阿飛打了個突,今天是Kelly生日,不想掃她興,望著Kelly堅毅的目光,阿飛心諗她已跟了自己三年,不想令她失望,阿飛其實有點醉醺醺,好!幾大就幾大!帶醉半開玩笑式答:「好!我哋……結婚!」Kelly笑著點頭,今年終於收到一份最好的生日禮物。

                               

阿飛帶醉回家,宿醉後第二天早上,醒來後望著天花板發吽呌,十分後悔。後悔昨夜應承跟Kelly結婚,阿飛不是不愛Kelly,只是擔心自己無本事養起頭家,又驚Kelly跟自己生活只會捱窮,自己不能勝任做一個丈夫。

「逃避責任」是阿飛的陋習,阿飛心想:「不如……打退堂鼓。」想得入神,母親突然拍打碌架床:「起身啦!發咗達吖?唔使做呀!?」阿飛立即換衫出門口,由屋邨趕返公司上班。

當夜,阿飛害怕直接面對Kelly,最後選擇隔著電話,要求她將婚事暫且擱下,結果換來電話旁Kelly的哭泣聲和大力cut線聲。這是他們最後一次的通話。阿飛嘗試再打電話給Kelly,可惜她已不再接聽。

過往嗌交,阿飛會讓Kelly冷靜一吓,兩三日後待她下了口氣,就會接聽電話。

                   

已經過了三天,Kelly仍然音訊全無,撥Kelly電話:「你打嘅電話號碼暫時未有用戶登記,請查清楚再打過啦。」吓!?乜Kelly連電話號碼都改咗?

阿飛終於忍唔住,上Kelly公司找她,ReceptionistKelly已經resign,「因她已儲了30天大假,所以即時可以離職,聽聞她因私事,要單身去一趟很遠很長的旅行,去流浪散吓心!」接待員八卦地告訴阿飛。

阿飛十分震驚!立即上Kelly的家找她,Kelly的父母留在大陸生活,她跟兩個女同鄉同租住一個小單位,女同屋說她幾天前已搬走,Kelly拒絕透露搬去邊。阿飛致電Kelly的朋友打聽,朋友怒氣地:「你個衰人咁對Kelly,仲係男人?」cut線。原來Kelly鐵起心腸,可以決絕到如此無情的地步。阿飛只好向Kelly的電郵、Facebook埋手,狂send道歉messages,都是徒然。

Kelly從此消聲匿跡,兩人在茫茫人海中,正式宣佈:失去聯繫。

阿飛在家中苦起臉,為自己的懦弱感到羞恥,母親估到一二,阿飛都需要一個訴苦對象傾訴一吓。

母親安慰:「當初我嫁俾你老豆,佢都無錢架!咪一齊捱囉!唔使死架!我仲記得生你嗰陣唔夠錢,逼住要去當舖『當』咗張棉胎籌錢!雖然窮,但係你出世之後,一見到你笑,我哋就乜嘢辛苦都唔記得哂……」阿飛的鼻變酸變紅。

阿飛對著個天講:「俾我再撞番Kelly啦!我一定唔會辜負佢!」
                   

轉眼三個月後,某一個周末下午,阿飛跟死黨在茶餐廳吃下午茶,心情仍未釋懷。阿飛一人步出茶餐廳門口,劃火柴,點香煙,青煙緩緩上升。

阿飛望著藍天一架飛機飛過,唔知Kelly而家喺邊個國家做緊乜呢?目光四遊,突然見到對面馬路,一個熟悉面孔:Kelly正站在對面街,似乎在等的士。

嘩!阿飛眼睛發光,唔埋一切,冒著被汽車撞死的危險,以99速度衝過馬路,在汽車響按聲中,阿飛大叫「KellyKelly…….

待續

二少爺說︰「自離別妳,心痛苦比處死更難受。」

12 則留言:

  1. 「劃火柴,點香煙」雖然冇用打火機咁方便,但係感覺非常良好。

    阿飛又係抵死嘅,結婚呢d嘢,應承咗人又反口,真不該呀。希望佢今次見番Kelly,會係happy ending喇。

    回覆刪除
    回覆
    1. 劃火柴,點香煙, 感覺好正,像個儀式。

      悔婚...好多HOLLYWOOD電影喜歡用的橋段

      刪除
    2. 有種休閒、放鬆嘅感覺,仲有一陣陣火柴嘅氣味添。去旅行嘅時候,我最鍾意攞酒店嗰盒火柴嚟點煙㗎喇。

      不如你寫番篇十大電影故事橋段吖,等小弟有機會二次創作嘛。

      刪除
    3. Good idea 喎,覆了你供你二次創作

      刪除
    4. 收到,好嘢呀,原來你2010年己經咗呢條題目。

      刪除
  2. 卡臣:

    婚前恐懼症,好過婚後恐懼症。嘻嘻!

    回覆刪除
    回覆
    1. 呢排咁多惡女, 令港男有「惡女恐懼症」

      刪除
  3. 回覆
    1. Kelly會當街摑阿飛16巴,之後就破鏡重圓

      刪除
  4. D韩剧又系好多甘嘅场面,两个人已经企左系个证婚人面前,问到一方系咪要成为对方嘅丈夫或妻子个阵时,梗系有一个突然后悔,吓到走夹唔抖!

    回覆刪除
    回覆
    1. 係呀~~仲要衝出教堂,穿高跟鞋奔走的場面, 親友嘩然

      刪除

LinkWithin

Blog Widget by LinkWithin