~~~~~~~~~~~~~~~~







2013年11月24日 星期日

卡臣 ╳ 世純合作企劃 (第六回) 「哥哥梅姐芳華絕代十周年」之《誰調換了我的賊人》



卡臣 世純合作企劃 (第六回)

哥哥梅姐芳華絕代十周年」
調換了我的賊人


鏡頭由遠鏡zoom入一間酒吧內,四名西裝男士放工後,正在happy hour。其中一位叫Leslie的男士,愁眉苦臉。旁邊的同事們則替他氣憤不平。

Leslie婚後生活十分煩惱,唯有向同事大吐苦水。Leslie的太太Anita婚前已經是個購物狂,婚後更加變本加厲,專愛買名牌手袋鑽飾,碌下大筆卡數。同事們討厭女購物狂,火上加油說︰「紅顏禍水錦上添花,教你蕩產傾家」。

Leslie無力勸止Anita的行為,太太婚後變了一隻「河東獅」,成日鬧Leslie。仲嫌老公唔夠男子氣慨,太過軟弱,結果導致「強妻弱夫」的情形。Leslie大嘆如何才能重振夫綱?

其中一名損友說︰「他有一個朋友也遇到同樣的困擾,結果他成功解決了問題。」Leslie立即追問,損友轉述︰「有一個叫九叔的朋友,專門搭路聘請大陸人跨境來港做案。叫大陸人扮賊入屋打劫,仲要扮想侵犯太太,結果由丈夫出手打退『假賊』,太太自然對老公神咁拜。」Leslie聽後立即拍掌。今次仲唔威番一次俾老婆睇!Leslie心諗︰「做個威水形象,咁點算癡心妄想?」

向同事取得九叔聯絡後,Leslie約九叔在旺角茶餐廳見面。過程十分順利,Leslie付款後,九叔說明晚凌晨2時,「賊人」便會經露台潛入Leslie單位,綁起兩人,搶略之餘,並企圖強姦Anita,綁著Leslie的繩其實唔緊,Leslie自行鬆綁後跟「賊人」搏鬥,「賊人」會被Leslie打退,慌忙逃離現場,完成這場「英雄救美」。Leslie十分滿意九叔的安排。

   

鏡頭一轉,鏡頭打出「第二晚 凌晨1:45」幾個字。

Leslie住在大型屋苑的三樓,家中有個露台,Leslie今晚專登沒有鎖好露台。窗外突然下起狂風大雨,嘩!連氣氛都襯埋。LeslieAnita在睡房看電視,Leslie望一望床邊的鬧鐘,還有15分鐘。

Leslie心中突然有點猶豫,始終都是一件犯法事情,追究起來,會有刑事責任。是否回頭是岸,到底應回頭?不應回頭?不過現在都已經太遲了,唯有照去馬喇。

二時後,電視在明暗字幕中消逝突然全屋無電,「賊人」的犯案手法,潛入屋後立即關上電源總掣,全屋一黑,一個外型如徐錦江的「賊人」進入睡房用刀指嚇夫婦。Anita驚叫!操大陸口音的徐錦江叫他們「閉咀!」。Leslie當然好鎮定啦,一切如安排中進行。

徐錦江用麻繩將夫婦緊綁後,開始搜略家中名貴手袋鑽飾。徐錦江滿載而歸後,回到睡房,向Anita發出淫笑,Leslie心諗︰「終於輪到我表演了!」

Leslie想掙脫麻繩,咦?乜綁得咁緊!Leslie動彈不得。點解徐錦江唔依劇情做?唔通九叔一伙人係真賊?今次真係弄假成真、引狼入室。Leslie好後悔,點解自己變得咁邪惡,心中︰「我暗罵我這晚變得太壞!」

事實上是︰九叔安排了那名「大陸賊人」,在往Leslie家途中,被警察截查,因為身上藏有刀及麻繩,遭警方拘留。而Leslie面前呢個徐錦江,是個100%的真賊,今晚選中Leslie這個無鎖好露台的單位做目標。

Leslie見到徐錦江正抱起Anita,情急之下不知那裡來的一股力量,真的鬆綁了,並起身跟徐錦江搏鬥。Anita好感動,原來老公係咁勇敢去保護自己。

可惜徐錦江孔武有力,大力打了Leslie大腦幾拳後,Leslie暈倒地上。Anita立即撲上前察看昏迷了的丈夫。徐錦江為免節外生枝,立即奪門逃走。呢個徐錦江果然喪心病狂,臨走前入廚房發火,想引起大廈混亂,方便自己趁亂逃走。

Anita見到廚房傳出火光和濃煙,立即衝出露台大嗌火蠋!大雨灑在Anita面上和口中,Anita唔理咁多,張開口似救生圈,實驗雨的酸與甜。

吵醒隔離單位業主,走出露台看過究竟。Anita見到鄰居,立即口震震咁講︰「快快…快叫火燭車火速的到步!」幸而火勢不太大,火勢遭管理處人員用滅火器自行撲熄。Leslie送院急救。Anita一夜之間遭受重大打擊︰家居失火、捐失財物、險遭強姦、丈夫昏迷……

   

第二天早上,Leslie甦醒過來。醫生說Leslie的大腦受到重擊,有後遺症。Leslie說︰「從那天起我不辨別前後,從那天起我竟調亂左右。」Leslie的腦神經問題,令他方向定位出了誤差,他再不能駕車了。同埋經常入錯女廁。

Leslie沒有怨天尤人,這後遺症全是他咎由自取Leslie多謝太太對自己不離不棄,心存感激,對Anita說︰「能同途偶遇在這星球上,是某種緣份,我多麼夠運。」Anita經這次遭遇後,差點以為老公會死,學會珍惜老公。又覺得老公好man,勇於保護自己。屋企太多名牌衣物首飾,結果引起賊人垂涎。Anita從此不再做購物狂,尊重老公唔再做惡妻。

鏡頭接上Leslie在酒吧內跟朋友們happy hour。以前他怕被朋友譏笑,笑他做「老婆奴」,結果搞出個「大頭佛」。Leslie現在自信滿心裡,休理會諷刺與質問,笑罵由人,灑脫地做人Leslie舉起手中啤酒,跟朋友碰杯,cheers


記得去世純,看他的版本。

二少爺說:有時限之下趕工,緊張又刺激,好好玩!多謝世純

19 則留言:

  1. 我踩緊單車都要停一停,睇吓你大作先。

    的確係好有教育意義,如果對對夫妻都咁識諗,咁就好喇,抱緊眼前人呀。

    回覆刪除
  2. 多謝呀,玩緊都睇咗先

    我的故事原名婆媽倫理劇場

    回覆刪除
    回覆
    1. 唔婆媽吖,你d歌詞用得好順好自然。

      「學會珍惜老公,尊重老公唔再做惡妻。」呢個先係重點呀,真係睇到我哋d小男人好有共鳴。

      刪除
    2. 咁我祝你早日夢想成真喇。

      而家會尊重老公嘅賢妻或者女朋友真係買少見少呀,唉。

      刪除
    3. 係囉,好彩你幫我算過,知道係好嘢

      刪除
    4. 哈哈,係你自己識揀啫,有個賢內助,好老婆,你要珍惜呀。

      刪除
  3. 卡臣:

    惡妻弱男通常可以維持很久,可能喺一個願打,一個願挨。嘻嘻!

    回覆刪除
  4. 卡臣,
    我上兩個月去香港文化博物館睇咗劉培基作品展, 有釨多梅姐登台服裝展覽, 值得一看架...

    回覆刪除
  5. 歌詞自然流露於字裡行間
    故事又教人珍惜所愛。。。


    回覆刪除
  6. 歌詞自然流露於字裡行間
    故事又教人珍惜所愛。。。


    回覆刪除
  7. 写得太棒了!好好好!精品呢!
    要去看世纯的了。

    回覆刪除

LinkWithin

Blog Widget by LinkWithin