~~~~~~~~~~~~~~~~







2013年8月12日 星期一

一口咬定你!


一口咬定你! 



酒吧內其中張一枱,有男有女,正在碰杯,豪情地大叫:「飲!」Samuel右手舉起酒杯,右手前臂露出一個牙齒咬出的橢圓形牙印,上排四隻下排四隻,一共八隻牙齒的牙印。



傷口已開始結疤,按推斷,應該是大約一兩天前留下,憑傷口的形狀大小,行兇者應該是來自一張女性的嘴巴。Samuel望著牙印,偷偷地笑了起來。


Samuel的親密女朋友Alice,自小已經愛狗如命,家裡養了三頭名貴寵物狗。由於Alice自幼已經愛跟狗仔作伴玩樂,她特別愛模仿狗仔的行為;成年後竟然養成一個怪僻:「咬人」。但她平時跟常人無異,只是跟男友親熱時候才咬。

Samuel最初很抗拒被咬,但因為他太愛Alice而在半推半就之情況下,Samuel亦開始享受被咬。兩人之間存著「S&M」的關係。Samuel的各個不同的身體部位,久唔久就出現Alice的牙印Signature

AliceSamuel都愛飲酒,經常於夜深結伴到酒吧傾偈劈酒猜枚。他們還有一班mutual friends在酒吧打躉。只要一個電話吹雞,眾人就立即嘩啦啦趕到酒吧碰杯。


有一晚,眾公子哥兒們,又在酒吧內飲酒吹水,Alice缺席,因為她有一位好姊妹明天要出嫁,成班姊妹正在另一間卡拉OK內狂歡。

在酒吧裡,其中一位朋友Gilbert無意中見到Samuel的右臂有牙印,好奇地追問Samuel牙印的來歷。本來兩人之間的閨房樂趣,不應該向第三者透露,但Samuel已經飲到high high地,在酒精催化之下,加上Gilbert的威逼利誘之下,Samuel就迷迷糊糊和盤托出Alice的「秘密嗜好」。眾人知道內情後,明白男歡女愛都是很私人的事情,眾人應承在Alice面前三緘其口,扮今晚乜都無聽過。


一週後,星期六晚半夜,大伙兒又再相約酒吧飲酒。Samuel一人先來到,說Alice因為其他飯局,要遲半小時後才到。公子哥兒們先飲一round

Gilbert坐在Samuel旁邊,突然響起︰「♪在世間 遮風雨有一種愛 從六歲到八十也不更改 ♬」原來Gilbert的手提電話響起,他隨手接聽:「喂,點呀?而家同朋友…..」,
Samuel無意間望到Gilbert的右手前臂上有一個牙印,猜疑心立即爆炸!Samuel一口咬定GilbertAlice有染!無名火起,大聲責問Gilbert右手上那個牙印是從那裡弄回來?!

GilbertSamuel的突如其來一喝,嚇得差點連手提電話都掉在地上。Gilbert草草掛線後,理直氣壯:「我個牙印邊度整返嚟,關你叉事吖?!」Samuel面紅耳赤:「關我叉事?你溝Alice!你話關唔關我事呀?!」Samuel跟著青根暴現:「朋友妻都搞,咁賤格?!」、「食行遠啲!」、「佢溝你定你溝佢?!」

Gilbert反駁:「你邊隻眼見到?」、「溝Alice?你估佢係Angelababy?」Samuel愈鬧愈激動,忍唔住正想向Gilbert揮拳時,被同枱兄弟出手按著制止。爭執期間,Samuel見到Eric、阿Lo、阿康、AlexAngusDerek等眾人手上都有牙印,即係人人有份,永不落空。

Samuel︰「Alice個淫娃,賤格到個個男人都搞勻哂!?點解會咁架?!」

Samuel諗深一層,Alice點可以咁短時間之內,搭上哂咁多男人?

此時,Alex忍唔住,先笑了出來,其他人也跟隨大笑起來!Samuel知道自己被大家夾埋整蠱。AlexSamuel展示他手上的牙印,憑牙印的size,一睇就知道是屬於一個男性的大嘴巴。Eric、阿康也紛紛展示自製的牙印,輪到Gilbert想遞手展示之際,Samuel已經撥開唔睇:「哼!你班衰仔!咁樣夾埋整蠱我!」Angus一聲:「飲啦!」眾人舉杯,一笑泯恩仇。

眾人傾談剛才劍拔弩張的情況,咔咔大笑!大家連Alice來到酒吧也不察覺,Alice問:「Samuel,乜咁好笑?」Samuel:「無呀!無呀!啱啱講緊Gilbert公司個白痴老細之嘛!不如妳陪我出去食支煙先!」眾人識做,當然對牙印一事隻字不提。

SamuelAlice離開後,EricGilbert笑說:「你條橋真係好得,笑死我哋!」原來「事件主催人」是Gilbert,星期五晚(昨晚)他們飲酒時,GilbertSamuelAlice缺席,在席間發起:不如各兄弟即席自製牙印,星期六晚約Samuel出來整蠱佢。

EricGilbert:「其實…..我哋咁樣做,係咪……好無聊呢?」
Gilbert:「唔…..諗真…..其實都幾無聊架!」跟著哈哈大笑!

不過….. 其實Gilbert是逼於無奈,非做不可。

十天前,Gilbert背著Samuel,真的搭上Alice,跟她有一腿。上星期四他們首次親熱後,Gilbert手上加封了Alice的牙印。Gilbert心諗:與其遲早給Samuel發現,不如自己「主動引爆」。

星期五晚(昨晚),Gilbert約眾兄弟出嚟,相約集體自製牙印,星期六(今晚)的「整蠱局」中,GilbertSamuel面前把自己手上的牙印「合理化」。利用眾人掩護下,暗渡陳倉,人人有份,把自己的可疑程度減到最低。

SamuelAlice吸煙後回來,GilbertAlice偷偷地遙遠交換了一個曖昧的微笑,Samuel:「人齊啦!飲杯先!」男士們一齊用烙上「A貨牙印」的手,高舉酒杯,當然SamuelGilbert是「真貨牙印」。

眾哥兒:「好!Cheers~」笑聲中夾雜玻璃杯的清脆碰撞聲。



二少爺說︰人食人的社會。

30 則留言:

  1. 呢個post睇咗少少,我就記得睇過喇。

    Gilbert好嘢喎,咁嘅橋都畀佢諗到,抵佢食到Alice,不過下次要小心d喇,一條橋唔能夠用兩次。

    呢條橋咁絕,唔以係你憑空想像出嚟喎,唔通係真人真事改編?:p

    回覆刪除
    回覆
    1. 等我回憶下當時創作過程。

      印象中好似午飯時跟同事傾計,如何防止婚外情被揭發,傾傾下傾出這故事

      刪除
    2. 「如何防止婚外情被揭發」呢條題目好值得討論,實用價值亦都好高,我先發表兩點,拋磚引玉喇。

      少做少錯,唔做唔錯,做咗就一定唔可以出錯。

      警覺,保持警覺,同埋時刻保持警覺。

      刪除
    3. 唔做唔錯,多謝大師贈言

      我有個朋友用手電拍下GYM ROOM相片
      間中SENT俾老婆扮GYM
      最後老婆在他電話ALBUM中發現大批GYM相,死得。

      刪除
    4. 咁你朋友準備不足喇,我有小小建議。

      未被發現gym album前:
      下載「保密apps」將該album set password

      被發現gym album後:
      扮若無其事,話要每次做gym都影低幅相,比較吓自己進步咗幾多

      刪除
    5. 幾時都話你係執生王,臨危不亂。
      做你女朋友/太太都幾大鑊。

      刪除
    6. 人急智生吖嘛,如果執生唔成,分分鐘會搞出人命,搵人嚟執屍呀。 :o

      刪除
    7. 你一定化解到災難啦,催吉避凶你最叻

      刪除
    8. 咁你就太高估我喇,我逆來順受咋

      刪除
    9. 係! 我都要順勢而行,唔好逆天意。

      刪除
  2. Samuel草草掛線後,理直氣壯:「我個牙印邊度整返嚟,關你叉事吖?!」Gilbert面紅耳赤:「關我叉事?你溝Alice!你話關唔關我事呀?!」

    ﹣﹣﹣你調轉了Samuel/Gilbert的對白?

    回覆刪除
  3. 卡臣,
    "如何防止婚外情被揭發"呢條題目真係幾高深>.<!

    回覆刪除
    回覆
    1. 係呀,你又發表吓

      另,圖中就是我吃飯地方,好像是辣嘢,名字忘了。

      刪除
    2. 吓?發表吓...我乜都唔知架>.<!
      圖中地方真係估唔到,點去架?

      刪除
    3. 我都唔知,是深圳歡樂海灣裡一間食肆,我唔知呀,跟朋友去,所以無記低名字

      刪除
    4. 謝謝推介,下次有機會去搵吓先...

      刪除
  4. 呃到一次呃唔到第二次。。。
    法國夫婦既婚外情就見怪不怪
    大家隻眼開隻眼閉!

    回覆刪除
    回覆
    1. 咁開放?
      香港立立亂,我真希望到法國生活。

      刪除
  5. 卡臣:

    若果同愛麗絲玩69式,咪要入醫院?嘻嘻!

    回覆刪除

LinkWithin

Blog Widget by LinkWithin