~~~~~~~~~~~~~~~~







2013年8月14日 星期三

直航英倫 – 上集


直航英倫 上集


(這篇是新寫的)

2004年,香港經歷了風雨飄搖的一年後,經濟仍待復甦。某女校的四位預科中學生,坐在快餐店內,唉聲嘆氣。

四位女學生:AbbyBessCamyDaisy,情同姊妹,是應屆預科畢業生。幾天前,高級程度會考成績公佈了。四人考得幾分,唔使等「大學聯招」的結果,都知道連「副學士」都無人肯收。她們明白自己並非讀書材料,重讀中七再考都只是嘥時間嘥父母錢,倒不如投身社會賺錢仲實際。

她們擔心社會經濟唔好,好難搵工。周街都係大學生,都慨嘆無公司肯請。自己只是預科程度,唔通要做基層工作?咁成世人嘅前途就係咁。想到這裡,四人不禁愁眉苦臉。

其中Abby比較樂觀,她經常扮演鼓勵大家的角色。Abby說:「大家唔好無哂心機,不如我哋玩個遊戲;我哋積極鬥快搵錢,睇吓邊個最快去到倫敦吖?」大家都同意參與,遊戲規則是大家都不可以向人借錢籌路費,要自己爭取。

四人在回家途中,已經盤算有什麼方法可以盡快去到倫敦。

* * * * * *

第二天,她們在網上尋找最平價的來回倫敦機票。經濟唔好,找到最平的來回機票是5,500元連稅。四人朝5,500元路費進發。

Abby性格積極進取,找導遊工作,希望盡快可以帶隊去倫敦。她向各大旅行社寄出求職信,等待面試回音。

Bess自幼運氣好,成日有中獎命。她發現有一個慈善幸運抽獎,頭獎是一張來回倫敦機票。Bess買了三十幾張獎券,希望中到頭獎,直飛倫敦。

Camy自問自己都幾靚女,她有一班女性朋友和富二代玩得幾熟。Camy希望埋堆,認識到一個有錢二世祖,帶她去倫敦旅行。

Daisy身材唔高,講嘢唔叻,做唔到導遊或空姐。她決定死慳死抵,每日十元八塊,希望盡快儲到5,500元。

* * * * * *

Abby的英文不靈光,又太年輕無工作經驗,無旅行社取錄她做導遊。不過Abby並未灰心,她仍不斷寄出求職信,希望奇蹟會出現。

Bess已買了三十幾張獎券,這個星期日早上便公佈抽獎結果。她希望今次幸運之神會眷顧自己,機票落入自己手中。

Camy終於搭通天地線,今個星期日和一班姊妹跟富二代去遊船河。她希望在遊艇上能結識到一個有錢仔,帶她去倫敦旅行。

Daisy學歷差,樣貌平庸,找不到工作,連面試機會也沒有。心裡打定輸數,唯有繼續寄出求職信,耐心等待佳音。

* * * * * *

星期日, AbbyDaisy早上一起去吃早餐。Camy因要出海遊船河,所以不能來。Bess則要留在家中,因她參加了的幸運抽獎,星期日早上十時舉行現場抽獎,在網上公佈得獎者結果。Bess要第一時間知道抽獎結果。

鏡頭這一邊,AbbyDaisy在快餐店對坐,Abby積極地研究有什麼方法可以做導遊。Daisy半放棄狀態,唔理咁多,一邊看八卦雜誌、一邊吃早餐。

鏡頭那一邊,Camy已經在遊艇上,公子哥兒躺在遊艇頂層曬太陽。穿上三點式泳衣的Camy,慢慢走到哥兒們面前……

鏡頭一轉,Bess緊張地把獎券的號碼,在電腦旁逐一核對……

待續

二少爺說:大家估吓邊個去到?定係四個都去唔到?

24 則留言:

  1. 有嘢估我梗係要霸頭位喇,估中咗係咪有奬先?係嘅話我就要嚟個大包圍,個個都估吓喇,咁咪冇死囉。

    如果以「勵志」為題,咁應該係Abby去到,佢不斷寄出求職信及練習英文,最終被一間旅行社聘用,而佢第一次出團,就係跟住一個資深導遊帶團去英國。

    如果以「賭博」為題,咁應該係Bess去到,佢一上網check,果然係自己手中嘅獎券中咗頭奬喎,一星期後去領奬,再過幾日之後就出發。

    如果以「色情」為題,咁應該係Camy去到,佢喺船上識咗個富二代,經過一夜纏綿,第二朝兩個人就出發去英國喇。

    如果以「科幻」為題,咁應該係Daisy去到,佢食完早餐之後,喺番屋企途中畀外星人捉咗上飛碟,佢毫無長處,所以外星人求其地將佢放咗喺英國。

    如果以上題目皆是,咁應該係四個都去到,佢哋仲喺英國相遇,一齊去shopping添。

    如果以下題目皆非,而係以「七月」為題,咁應該係四個都去唔到,因為過多幾日係「門關大開」之時,佢哋四個時辰到,做咗替死鬼。

    卡臣,咁究竟呢篇嘢係咩嘢劇目呀?

    回覆刪除
    回覆
    1. 好嘢! 你一向分析力高,仲從多角度切入點,無懈可擊。滴水不漏

      等我披露少少,去得成,但究竟一個定四個,明晚就知。

      刪除
    2. 好心急呀,等你聽晚將迷底揭開,我估一定好曲折,同埋係喜劇收場嘅。 :)

      刪除
    3. 哈哈!今次一啲都唔曲折,只是一個合情理的故事咋,係咪喜劇收場? 不是喎今次,或者可以說是黑色幽默。

      刪除
    4. 如果你話係黑色幽默呀,咁我估係Daisy去到喇,唔通係本八卦雜誌有玄機?? :o

      刪除
    5. 哈哈! 都話你係大師啦,有料到!

      刪除
    6. 吓,我求其估咋喎,唔通咁都開口中? :o

      刪除
    7. 你求其估都估中,如果認真起嚟,中六合彩都有你份

      刪除
    8. 唉,說來真係慚愧,我次次都好認真咁去馬會買電腦飛o架,可惜都冇次中。

      刪除
    9. 我明白嘅,邊個中咗六合彩會認架?!

      刪除
  2. 快啲開估好過啦,我一向聽故唔博故,你可以講比的聽先。。。嘻嘻!

    回覆刪除
    回覆
    1. 妳一向口密,好! 只告訴妳:一個成功去到咋,ABCD其中一個囉

      刪除
  3. 睇落...我對Daisy印象幾好,希望佢成功啦*.*!

    回覆刪除
    回覆
    1. 你都喜歡踏實人多啲,我都祝daisy得啦!

      刪除
  4. 卡臣:

    三點式泳衣,我估Camy可以一拖四.有富二代比她電到請哂她們四個一齊去倫敦,而且坐頭等艙.嘻嘻!

    回覆刪除
    回覆
    1. 哈哈! 證明你從「色情」主題出發,但這是個黑色幽默的故事喎。

      刪除
  5. 應該唔會係Bess 或者 Camy ,故事冇理由咁簡單

    回覆刪除
  6. 人人心中都有憧憬,有梦想才有希望。

    回覆刪除

LinkWithin

Blog Widget by LinkWithin