打工仔話…

多謝desertfox送我相片。

打工仔話…

繼《老細話…》之後，為了持平起見，今次輪到講「打工仔話」，我作為打工仔的一分子，數一數身邊同事愛講乜？

第十位：「新人靚唔靚呀？」

同事與同事，每日要相對大約8-10小時，梗係想同事個様好啲靚啲啦。所以當一聽到有新同事上任，同事們第一時間爭相打聽：「新人靚唔靚呀？」「吓？個女新人之前做過空姐？！」男同事一聽到，立即執乾淨自己張工作枱，同埋執一執自己個outlook。

第九位：「佢行開咗！」

無論有客來電，抑或有人親身過嚟揾人，如果嗰位同事咁啱唔喺個位度，隔籬位同事就話：「佢行開咗！」再追問：「咁去咗邊吖？」同事答：「唔知喎！」唔通咁老實話俾你聽：佢遲到仲未返到公司，或者下午去咗蛇王咩？

第八位：「幾時掛八號？」

打風季節的其中一個熱門問題：「幾時掛八號？」早上收音機一話下午可能掛八號，同事即刻約人下晝去街，唱K睇戲篤波，Lunch返嚟立即問「幾時掛八號？」可惜香港有力場保護，放工後先掛八號、返工前落波，徙添交通狀況更加混亂。

第七位：「老細今日心情唔好！」

其實老細日日心情都唔好架啦！見怪不怪。但同事們都慣咗將呢句說話掛喺嘴邊，提醒同事唔好行差踏錯，收歛一吓。「老細今日心情唔好！你唔好咁揚喺度玩facebook啦！」否則就有可能被老細就地開拖。

第六位：「夠鐘食晏！去邊度食好呀？」

每日Lunch前，大家都頭痛今日去邊度食飯好？唔想揸主意或懶得諗嘢的同事，先發制人問：「今日去邊度食好呀？」「飲茶？」、「茶餐廳？」、「泰國嘢？」大家最初都話：「你話事啦！」、「無所謂！」結果最後就嫌呢間難食嗰間無位！「一早都話咗唔嚟呢間架啦！」、「早知就唔嚟！」爭先事後孔明一番！

第五位：「今晚放工去邊？」

接近放工的時候，同事們特別精神！執嘢準備走或者在lift口等電梯時，同事問：「今晚放工去邊？」啱路就一齊夾錢坐taxi，或者揸車隨便兜埋。另外，如果某同事那天穿得特別隆重，同事都會八卦問：「今晚放工去邊？約咗邊個吖？」

第四位：「咁耐都未出糧嘅？」

除非是即時支取時薪的自僱人士，否則月尾最常聽到的一句說話，就是「咁耐都未出糧嘅？」「我窮到就快連電話都要cut！」。反映同事們很少有儲蓄習慣，發窮惡，又或者，其實是他們扮窮，以防止其他「真係窮的同事」問佢哋借錢。

第三位：「搞緊！差啲咋！」

老細催促下屬完成工作，或查問工作進度，下屬口震震地回覆：「搞緊！差啲咋！」其實十劃都未有一撇，拖住老細先，再諗吓有乜辦法搵其他人幫手。

第二位：「我諗我有啲唔舒服，今日返唔到。」

假期翌日，玩樂過度，十分疲累，不如攞病假蛇王一吓。壓低把聲，扮痛苦致電回公司：「我諗我有啲唔舒服，今日返唔到，」留意：「我諗我」（I think I am…）有推測的意思，意思是：自己可能一時估計錯誤，以為自己有病，所以不算是存心欺騙公司。

第一位：「最多咪唔撈！」

打工仔受了老細氣或者客人的怨氣，激起把火！大嗌：「最多咪唔撈！」但嗌完又無辭職者，大有人在。唔通為咗即時走人，大拿拿攞錢出嚟補返俾老細咩？！嗌咗出嚟！渲洩完股怒氣！咪乖乖地返回坐位繼續做嘢。但隨着經濟好轉，都有人嗌完之後，就跟手打辭埋封職信。而「最多咪唔撈！」中的「唔」字和「撈」字之間，通常會加多一個「L」音的廣東助語詞來加強語氣。

完

二少爺說︰一個辦公室的愛情故事。