~~~~~~~~~~~~~~~~







2013年7月25日 星期四

卸膊說話


卸膊說話



廣東話「卸膊」解作:推卸責任、不負責任,將責任從自己個膊頭卸落去旁人度。講「卸膊嘢」時,要理直氣壯,才可提高其說服性。以下是我在辦公室經常聽到的十句「卸膊說話」:

第十位:「我之前未做過噃!」
年輕新同事被上司差遣新任務,年輕同事未接觸過該項工作或者唔識做,會衝口而出:「我之前未做過噃!」企圖唔使做。上司一句:「就係因為你未做過,所以先要你去學,唔識就唔使做呀?」上司輕易一句就秒殺年輕同事的藉口啦!

第九位:「呢啲嘢唔係我跟開喎!」
好典型的一句。公司將工作分工種分組,劃清界線。唔係自己跟開嘅嘢當然唔理會,「呢啲嘢唔係我跟開喎!」水不犯井水嘛。唔跟開唔知頭知路,梗係事半功倍,有違公司經濟效益。

第八位:「上手交得唔好囉!」
公司有同事離職,或者跟開嗰位同事要放產假或去旅行,就由另一位同事暫代處理。如果期間爆了大鑊,該位暫代同事就會把責任歸咎於「上手交得唔好囉!」因為上手臨走前交待唔清楚所以出了問題囉。

第七位:「你都無叫我咁做喎!」
當爆了鑊,下屬被上司召見,質問哪裡出了問題?有無做漏嘢?下屬自辯:「你都無叫我咁做喎!」。證明該同事「踢一踢,郁一郁。」死跟上司指令,唔會做多。

第六位:「我已經跟足你講咁做!」
和第七位有少少關係。如果爆了鑊,下屬被上司召見,質問問題出在哪裡?有無做漏嘢?下屬自辯:「我已經跟足你講咁做!」意思即是指上司做錯決定、錯誤判斷,是整件事失敗的原因。下屬只是follow order,要怪就怪上司自己啦!

第五位:「上手都係咁做啦!」
有歷史的公司,已經發展成一套固有機制和程序。後輩仿傚前人的工作程序咁做。如果一旦出現問題,後輩唯有照搬出「上手都係咁做啦!」來做擋箭牌。

第四位:「啲資料有問題!」
report需要匯集多個部門或同事的資料數據而成。結果「報告」出錯,就要立即把責任歸咎其他人,「啲資料有問題!」所以才連累你出錯,一於拖埋其他人落水。

第三位:「邊個搞過我部電腦!?」
要推卸責任,招式真要層出不窮,竟然要賴電腦。電腦檔案被人刪除或中毒,都是大話,未做話做好咗但又唔見咗個file,把責任推落部電腦度,科技累死人。

第二位:「你問我?我問邊個?」
「上司級數」的推卸說話。當下屬要詢問上司意見時,上司唔想為自己做的決定負上責任,就一句:「你問我?我問邊個?」上司把個波拋返俾下屬,加多一句:「總之你同我死掂佢!」如果事成,那就是下屬的基本要求,如果事敗,那就是下屬辦事不力,攞佢出嚟祭旗。

第一位:「我從來無咁講過呀!」
有時上司或老闆做錯了決定,令到事情出了亂子,上司或老闆先發制人,自辯:「我從來無咁講過呀!」就算之前當著其他員工前講過都可以話無講過。老闆一定唔會講錯,一定是下屬聽錯。呢招一出,下屬無從招架,老細食硬下屬,下屬唯有硬食老細啦。


二少爺說:我喜歡的一首70年代舊歌。



You Take My Heart Away - Deetta Little & Nelson Pigford

Touch me, take me in your arm, shelter me from harm,
let me love you for a million years or more,
I never felt this way before,
before your dreams,
you take my heart away, away.

Love me, love me from your heart,
let us never part,
bring me all the dreams you thought would never be,
we'll make them all reality,
just you and me,
you take my heart away, away.

You're my dream come true,
baby I love you,
I confess I need ya,
I will never leave you alone,
Oh, I love you true,
my whole world is you,
I confess I need ya,
and I will never leave you alone.
You take my heart away, away.

12 則留言:

  1. 啱啱今日就有個做暑期工嘅小妹妹同我講第六同第七,好在淨喺做兩個月啫。

    回覆刪除
    回覆
    1. 唔好話暑期工,我都仲犯錯緊,所以寫此這篇警惕自己

      刪除
  2. 卡臣:

    其實好多人開工都可以莫名其妙!西班牙火車出軌,八十公里彎位開到一百九十公里.不過咁,兩個火車司機生還,都仲有得查.

    大約三個星期前,魁北克省一列運油火車,凌晨一時多在一個小鎮市中心大爆炸,四十七人在睡夢中升了天.火車是沒有司機的,因他把火車泊了在鎮外,忘記把火車「煞制」.怎料那裡是一條暗斜坡,整列火車慢慢溜入了小鎮,跟住出軌爆炸.有部份車卡跌了入河,流出大量原油,污染了成條河.

    兩年多前,一列從尼加拉瓜大瀑布開回多倫多的火車,以八十公里的速度渡過一個二十公里速限的彎位,結果四十四名乘客受傷,但三個火車司機也升了天.為何三位火車司機也沒有留意二十公里速限的彎位?這個問題將永遠是個謎。

    回覆刪除
    回覆
    1. 香港也有很多事故,醫生做錯手剩、開錯藥、撞船、地產商賣酒店又賣唔成,官員謀私,補習社令學生零分,都好多卸膊說話聽到。

      刪除
  3. 我最鍾意「第一位」嗰個,講嘅時候帶點霸氣,下屬食到應晒呀。見你寫咗10個咁辛苦,我都參與吓喇。 :)

    第十一位:「你而家個運唔得吖嘛!」
    我常常接到友人投訴,佢哋話:「唓,乜唔係話佈咗風水局之後會飛黃騰達嘅咩,點解我得個〝做〞字,冇料到嘅,你係咪流o架?」
    我嘅標準卸膊回應係:「你而家個運唔得吖嘛!如果唔佈嘅話,你畀人炒咗喇。」

    回覆刪除
    回覆
    1. 我又唔覺得你講卸膊說話喎,雖則你擺好風水陣,但當事人如果行惡,都無符架。所以你做了你那part, 結果就天決定。

      刪除
    2. 如果個個人都好似你咁識諗就好喇,做嘢冇鑊氣,我諗我會quit咗而家份工出嚟幫人做風水。

      刪除
    3. 咁你一於全職做風水師傅,教人鑽風水洞,講好靚好靚,賺大錢。

      刪除
  4. 我個法國老細只係一句:「I did read the email and I remembered I asked you to do it but I want to stop it now. Do it.」

    當對方公司訂晒貨連invoice都send埋俾我,老細喱句真係正。

    回覆刪除
  5. 以上是你在辦公室經常聽到的十句卸膊說話?
    吓,唔通我地係同一間公司返工?

    回覆刪除

LinkWithin

Blog Widget by LinkWithin