~~~~~~~~~~~~~~~~







2008年9月14日 星期日

狂野派對

狂野派對

阿強不愛蒲夜店,因為他怕熬夜, 經過一天工作後,已經筋疲力竭,無多餘體力去支撐。 加上阿強知道「蒲夜店」,就是一場殘酷的「外貌比試」。甫一踏進夜店入口,To see and to be seen。遇到場內打躉的型男索女,他們就像評判團,眼睛會先向自己瞄一瞄,0.1秒內已經扭歪面望向第二面,加送嘴藐藐的表情!如果這裡是「殘酷一叮」,第一關已經俾人叮走咗!自己企埋牆一面,目光四遊,但大家當你隱形,坐完張冷板櫈;最後戇居居一人離開,耳仔被嘈吵音樂搞到耳鳴, 一身殘留的二手煙味,捱眼瞓搭的士回家,第二日無精打釆返工,整件事對於阿強來說:都是十分無癮!阿強當然了解到,如果自己靚仔啲,把口叻啲,cash多啲,咁「蒲夜店」先會係一個好玩的消遣,仲會上癮添!

話雖如此,阿強都曾經在夜店內,經歷過一次「西洋少女的情挑」。話說,阿強經歷過上世紀末的威化派對 (Rave Party) 熱潮,之前,他沒有去過這些狂野派對,報章報導入面污煙障氣、啪丸、打架、警察查牌,分分鐘仲要搞到上差館,總之不去為妙!但阿強心底裏,其實都想去見識一吓這種時尚玩意!

於1998年深秋,阿強有一位男性朋友開時裝店,他收到四張Rave Party的請柬,是一個法國時裝名牌,喺柴灣工廠區一個由工廠改建成的夜場內搞fashion show,只邀請時裝界潮人出席。睇完fashion show之後,就舉行傳言十分狂野的威化派對Rave Party! 阿強十分高興能夠有機會去見識一吓狂野派對,最緊要是「唔使俾錢入場」嘛!

當晚十時,他們一行四人抵達柴灣, 阿強同行的除了時裝店老闆Dave外,還有兩位fashion designers:Henry和Ray。泊車後,四人黑夜摸到某工廠大廈。見到門口有一大班記者,爭相拍攝入場的明星仔、公眾人物、潮人達人,阿強見到今晚星光熠熠,自己又是嘉賓之一,虛榮心立即急昇上腦,沾沾自喜!

當阿強一行四人走近門口時,娛記本着「有殺錯無放過」的專業精神,舉起相機鏡頭瞄準阿強,阿強以為自己可以一嚐被娛記影相的滋味,等待記者們嗌:「強哥,呢面吖唔該!望一望呢面呀!唔該呀!」 怎料記者睇清楚阿強連二打六、七八線茄呢啡都唔係!原來係路人一名, 娛記立即輕哼一聲:「妖!」,立即轉身追影派對的真正名人。 阿強未入場,先被兜頭淋以一桶冷水!

門口有黑白門神,穿西裝的黑人白人大隻佬收請柬把關, 阿強覺得守衛深嚴,平時一定好多人打架搞事。 入場後,場內強勁燈光音樂節奏,跟電影中場景描述的差不多。
型男索女都好自覺咁擺出super model的超模懶有型pose!大家都當咗自己係吳嘉龍或者Janice Man、Angelababy咁,左手揸煙,右手揸酒,企喺度個頭起勢搖呀搖!個身un 吓un 吓!

每張請柬可以換一杯drink,怕蝕底的阿強第一時間去bar枱換了一杯啤酒,在旁一位rave女換了一杯塋光黃色的cocktail,頂多100ml,阿強斜望她,擔心她如果一啖飲哂,咁點樣捱足成晚? 飲第二杯酒就要自己俾錢嘛!阿強就唔使驚啦,杯啤酒咁重咁大杯!

Fashion show開始啦!觀眾圍着runway,人頭湧湧、水洩不通!阿強跟友人被逼散咗,阿強的左手面是一名陌生潮男,右面是一名20歲的鬼妹,由於人多擠逼的關係,阿強當然不介意俟近右手邊的鬼妹。 

當第三個model出嚟嗰陣,阿強的垂下右手,突然被一隻纖纖玉手握着, 阿強立即把頭右轉,望去鬼妹度,同時間,鬼妹個頭左轉,望返阿強,阿強禮貌地向鬼妹點頭微笑,鬼妹又向他點頭報以微笑! 嘩!乜狂野派對真係咁開放?!隨時進行身體接觸都OK喎!

阿強第一次喺夜場有收穫,一時間都唔知應該點做好呢? 阿強嘗試輕輕放開那隻手,唔使2秒,鬼妹隻玉手又扣番實阿強隻右手!今次輪到鬼妹先點頭微笑,阿強回禮向她點頭微笑!

嘩!狂野派對真係另舍不同!難道鬼妹食慣西餐?今晚要食中菜?鬼妹審美眼光跟中國人唔同,阿強自問樣貌身材屬「爛茶渣」一類,華人女性唔吼自己唧,估唔到鬼妹反而鍾意?!阿強心諗:電影橋段中,男女主角衝入廁格內,速戰速決!今晚呢幕激烈情節,終於輪到喺自己身上發生喇!

弊!無安全套喺身!廁所有冇得賣?保鮮紙可唔可以代替? 唔用鬼妹又mind唔mind呢?入男廁定女廁?臭唔臭呢? 有冇AIDS呢?差佬會唔會突然著燈查牌拉人呢?鬼妹夠唔夠18歲呢?鬼妹會唔會嫌自己短呢?可唔可以之後跟鬼妹結婚再移民外國?……

一大堆內心對話之後,阿強得到一個結論: 呢位係鬼妹喎!一生可能得一次咁嘅機會咋!有得食唔食,罪大惡極!

阿強內心進行一番自我正邪道德爭扎, 最後,獸性戰勝了理性,人終歸總要死一次!
阿強鼓起勇氣,趁這個千載難逢機會,側頭向鬼妹,因音樂太嘈,只好將自己嘴巴貼近她耳邊問:「Can you speak English?」鬼妹大聲答:「Je suis Française, Je ne comprend pas l'Anglais.」 一聽就知佢講緊法文,嘩!法國人出名浪漫、激情、男女關係又好隨便架喎! 今次夜蒲竟然抽中壓軸特別大獎!終可嘗到正宗地道的French Kiss。

好!既然對方係浪漫法國妹,先調一調情,再趁機拉鬼妹走開,阿強用右手手指頭在鬼妹玉手上溫柔地孺動遊走,一路摸一路掃,咦?點解鬼妹中指隻戎指,個design咁熟嘅?係一個骷髏頭? Oh No!阿強發覺自己拖著係一隻右手呀!

原來當第二個model出場果陣,Ray(同行的designer)靜雞雞竄到阿強的左手邊,
左手邊的阿Ray用右手繞過阿強身後,拖着阿強的右手! Ray是一個camp camp地的fashion designer,飲大兩杯後,在酒蒸揮發之下,自我控制能力減低,豁出去觸摸阿強,試探吓阿強係咪自己的「同類」? 阿強剛才給Dave介紹認識阿Ray時,他手上的骷髏頭戎指令他留下印象,阿強知道那隻「玉手」非鬼妹後,立即甩都甩唔切,馬上消失喺人堆之中。

唉~~乜嘢情挑鬼妹、乜嘢狂野快餐,通通都係自己幻想出嚟!阿強覺得場內音響太嘈,有啲頭暈,同Dave講:要先走一步, 其實阿強患有「人群恐懼症」,見到成班友仔好似標童咁上哂身,係咁猛fing猛搖, 加上阿Ray會隨時再次出現,阿強一早已經想閃。阿強如今告辭,因為他已經見識過什麼是Rave Party!

阿強沒有帶走什麼,除了帶走法國妹側面迷人的微笑,
那一笑更勝Musée du Louvre內的Mona Lisa。
雖然法國妹只虛幻地曾經活在阿強的回憶裡,
但人生有機會狂野過,總好過從未狂野過吖!

72 則留言:

  1. nost

    呢件事發生喺1999年度,

    阿強係咪我?
    呢個議題,之前都討論過
    我諗你心中有數啦!

    另, 祝中秋快樂!

    回覆刪除
  2. 是真是假已經無所謂,最重要是故事好睇咁得呢!

    回覆刪除
  3. 逍遙小妹

    >最重要是故事好睇咁得呢!
    ==>咁.....即係好唔好睇呀?

    唔...我明嘅...

    另, 祝中秋節快樂!

    回覆刪除
  4. 嘩,卡臣有啲係親身野來架喎。。。嗯嗯~

    我上次都去過一次d club, 真係唔知做咩好 =.=; 不過當然係無所斬獲~ 我同呢啲地方簡直係格格不入。

    中秋節快樂呀卡臣兄~

    回覆刪除
  5. 同埋,個人覺得公司拍拖好危險。

    回覆刪除
  6. lo哥

    你去上海啲club呀?
    港澳同胞仲有冇市場呀?
    不過, 俾人用眼神嫌棄真係好赤裸無癮:(


    lo哥, 你都中秋節快樂呀!

    回覆刪除
  7. lo哥

    公司拍拖好大壓力
    俾人指手劃腳....

    兩人話題都係講公司
    仲有朝見夕見
    好快就生厭

    所以要是但走一個

    回覆刪除
  8. 咁攪笑架!鬼妹换左同志。

    - 點解中國男人認為自己短小就不如鬼仔,唔關事個喎。

    - 其實好多法國人都驚aids,一定要安全措施。

    - 當然相對嚟講,法國妹真係比較主動開放,唔識扮純情。

    - 物以罕為貴,香港男人係法國妹眼中神秘又特別。

    Dit-on Carson, tu comprends bien le français. La pleine lune est trop belle ce soir!Bonne fête!

    回覆刪除
  9. 阿強咁型咁MAN,係會吸引D同志既。
    當係另類compliment啦。。

    回覆刪除
  10. >>Carson

    無留意喎。。。起碼我啲FRD叫做有啲女比佢high下...
    =.=; 我第一次去.

    ---

    係ga! 我唔會亂掂公司女[IT那有女!]

    回覆刪除
  11. 巴黎

    >點解中國男人認為自己短小就不如鬼仔,唔關事個喎。
    ==>係咪真架?!咁我不再自卑啦!充滿力量喇!

    >物以罕為貴,香港男人係法國妹眼中神秘又特別。
    ==>我都係果句:請問去法國最平機票幾多錢啊?

    Dit-on Carson, tu comprends bien le français. La pleine lune est trop belle ce soir!Bonne fête!
    ====>喂!唔好蝦我啦
    我識鬼以上堆雞腸點解呀?

    有冇有心人幫我翻譯一吓?
    不過如果係鬧的說話
    就唔使翻啦
    merci~

    ++++++++

    eric

    有一日, 有一個素食主義者
    抽中獎,免費食牛肉100碟
    素食主義者話:可唔可以換豆腐或菜瓜?
    吓?一係要一係唔要?
    唉~~~~天啊!

    +++++++

    lo哥

    >叫做有啲女比佢high下...
    阿強都有去過中環CLUBBING
    舞池入面
    男揩女,女俟男
    男摸男'女磨女

    真係要寫多篇啊~

    工程界仲齋
    一來少女同事
    二來就算有女同事, 她都好Man

    回覆刪除
  12. 翻譯:
    「你唔好扮野喎!你d 法文肋肋聲,今晚個月色鬼咁靚,祝你中秋快樂!」

    有心人上

    回覆刪除
  13. 有心人

    多謝哂!
    乜咁早起身?
    我8:38問,你可以8:52已經翻譯完

    但..請問有冇翻錯?
    ...其實係咪叫阿強:人一世物一世, 男人都要試吓!

    多謝翻譯
    祝中秋節花好月圓


    ++++++

    郵差叔叔

    多謝哂!!!!
    錯字已改
    請受小弟一拜, 叩!

    回覆刪除
  14. 卡臣:
    這個人不會是卡臣哥哥吧...掩嘴再偷笑...wakakaka:P
    唔好嬲wow

    回覆刪除
  15. Hey Sweets, do check out www.onlinepasarmalam.blogspot.com if you are free ^.^ Thank you!

    回覆刪除
  16. 點解中國男人認為自己短小就不如鬼仔--->其實中國男人自卑心作祟,最重要技巧,短小也可以精幹呢~~呵呵

    臣兄~~

    故仔當然好得啦,唔得的話,邊有咁多回應呀!係咪?

    祝各位中秋節快樂

    說起辦公室戀愛,我公司都有好多,有異性,亦有同性的,最重要係大家來自不同部門就得呢!!!

    回覆刪除
  17. Rave Party? 未去過,聽到都搖頭!

    幾十歲人,都唔會去喇,話之班人有幾狂!

    回覆刪除
  18. 佚名

    >這個人不會是卡臣哥哥吧
    ==>換鬼咗佢
    費事眼冤!

    +++++++++

    Qiuting

    hehe :P

    +++++++

    Ray

    我地無可能嘅呢!
    i'm serious~

    回覆刪除
  19. 逍遙小妹
    >最重要技巧,短小也可以精幹呢~~呵呵
    = 我仲以為最重要係「彼此相愛」添
    我太天真太傻啦!


    >故仔當然好得啦,唔得的話,邊有咁多回應呀!係咪?
    = 咁多回應...可以係鬧或者恥笑...都唔奇吖!

    >說起辦公室戀愛,
    = 我公司都有,不過其中一方很快便resign
    可能有壓力 (分手後仲要日日見, 好慘架!)

    ++++++++

    laulong

    rave party...而家都絕跡
    一於clubbing 吓
    分分鐘你的意中人在那裡等候你呢?

    回覆刪除
  20. Clubbing?

    啲 waiter, waitress, bar tender, secure, 男女酒客詫意地問我:

    咦,阿伯,你黎執紙皮牙?

    回覆刪除
  21. laulong

    嘩!你個樣咁後生
    入場唔成問題

    喇! 揾晚試試
    包你話我無介紹錯!

    回覆刪除
  22. 點會呀laulong,有人會問:

    帥哥,可唔可以坐你隔離唧?

    回覆刪除
  23. 巴黎

    劉校長
    係囉!係囉!
    有少女support你啦!
    一於go!go!go!

    唔使怕醜!

    回覆刪除
  24. 卡臣:
    換鬼咗佢
    費事眼冤!
    -->哎啊~難道說對了...kakaka:P
    做咩要搵頭像啊??唔做型仔啦??

    回覆刪除
  25. 唉就算即刻飛去L.A.都剩你時光倒流15小時啫!
    少女時代早已過去,如今巳作人婦,不過間唔中clubbing無壞嘅,同三五知己把酒談心,人生幾何....

    回覆刪除
  26. 一早返到公司睇到你單甘既艷遇
    真係人都生猛d

    回覆刪除
  27. 卡臣:

    嘩..我都未去過rave party, 多謝你篇文帶左我去見識, 下次可以扮野話自己去過..呵呵
    亞強真係慘,d不可思議既事永遠都有佢份, 唔通呢個係佢既宿命?

    我呢2日去左國內短線遊, 森波拉直情悶爆+晒爆...

    回覆刪除
  28. 卡卡,巴黎:

    你地真係好嘅啫,來個網上敬老、慰老義工服務!

    >>可唔可以坐你隔離唧?

    哈哈,知我有白花油旁身,可以問我借嘛!

    巴黎,嗰边白花油貴唔貴啫?

    回覆刪除
  29. 佚名

    唉~
    型乜鬼?!
    怪型異型就有我份

    ++++++++

    巴黎

    我覺得clubbing啲house music好吵耳
    根本傾唔到計
    出嚟耳都痛埋~
    年紀大,機械壞


    ++++

    數奇門

    咁我就開心啦!

    回覆刪除
  30. 自由

    rave party呢啲上世紀嘅舊事
    成為我的集體回憶一部份

    阿強...佢唔講佢啲開心嘢唧
    佢都有佢幸運地方

    國內旅行...天氣酷熱呀!

    ++++++

    laulong

    我同你, 一落到去
    少女立即雞飛狗走
    唉~~~

    回覆刪除
  31. 哎吔流浪兄,我最怕聞到d白花油駆風油架,所以真係唔知價。不如查Chanel隻Egöiste男人香水,好鬼迷人架....少女少婦都鍾意架!

    卡卡,你同流浪落到club,d 女生會痴住你地唔放...
    嘩好型喎,第一次嚟呀?

    回覆刪除
  32. 串錯添,應該係Egoïste至啱。

    回覆刪除
  33. Ray:

    阿強held my hand first!

    --------------------------

    阿強,

    I still miss your soft, strong hand!

    回覆刪除
  34. >卡卡,你同流浪落到club,d 女生會痴住你地唔放...
    第一次嚟呀?

    你~地~去~左~砵~蘭~街~呀??


    死呀! 我好鬼愛亞婆香水架..尤其去大陸d廁所, 真係一支在手, 世界(廁所)通行!
    唔通我咁快連更年期都過埋?

    回覆刪除
  35. Egoïste 香水?我去買我去買!

    hahaha...哩次仲唔一鋪翻生!

    回覆刪除
  36. 阿強,好耐無見!

    每次嘅「阿強回憶錄」我都睇得好過癮,今次阿強色迷心竅到竟然唔發覺自己拖著係一隻右手,真係無得頂!

    『阿強...佢唔講佢啲開心嘢唧
    佢都有佢幸運地方』

    做乜唔講阿強啲開心嘢唧,唔好次次都係啲撞板嘢嘛,不如起個「阿強周記」呀!

    P.S. 卡臣,你幾時去過巴黎呀?

    回覆刪除
  37. 未去過rave party

    至唔鍾意「男揩女,女俟男」!
    (我不好同性)

    回覆刪除
  38. 卡臣:

    你駛唔駛搭單叫狼校長買Egoïste 香水?
    唔係實斷貨都似~

    回覆刪除
  39. 卡臣:

    唔駛驚..唔駛驚..有得賠..有得賠!

    http://hk.news.yahoo.com/article/080916/4/88pm.html

    回覆刪除
  40. 巴黎

    >d 女生會痴住你地唔放...
    嘩好型喎,第一次嚟呀?
    ==>嘩!有冇搞錯?
    邊間club呀?!
    通常女仔隻眼生喺頭殼頂
    點會理我吖?

    +++++++++

    moore

    好耐無見
    自從舞台上一別
    阿moore, 我地十年無見

    你唔使擔心阿強
    佢食得瞓得
    隻手仍然咁粗糙

    ++++++

    自由

    去大陸d廁所?
    必備白花油和香煙
    不過,嗰堆千年糞
    層層疊疊
    真係見證咗歷史

    回覆刪除
  41. LAULONG
    >你去買Egoïste 香水?
    搭我買兩支吖唔該!

    我仲要外塗內服
    每日四次,飯後服
    希望快啲見效!

    ++++++++

    歪歪

    整個「阿強周記」呀?
    季選太耐,
    好似「月刊」好啲

    我1996年夏天去過巴黎
    背囊黨
    共四位同學一起去玩咗5個星期

    奀奀

    回覆刪除
  42. 海火火女

    未去過rave party都唔係乜損失!
    其實都幾燃燒青春
    無乜得著

    ++++++++

    自由

    >你駛唔駛搭單叫狼校長買Egoïste 香水?
    ==>最新消息
    全市所有Egoïste 香水被一名神秘中國藉男子掃清貨

    校長做事好徹底呀!

    AIG話無事唔使驚...承妳貴言啦!

    回覆刪除
  43. 卡臣:

    Egoïste香水...
    佢直情沖涼又用,浸腳又用, 洗面又用...就黎要內服添~

    回覆刪除
  44. 嘩留番兩支比我好喎,用開有感情,d亞洲女人話我好man好法國。

    回覆刪除
  45. 1996年既夏天,我記得係塞納河邊,見到一個背囊大隻港男,比幾個法國少女狂追....

    回覆刪除
  46. 自由

    我直情用Egoïste香水嚟
    淋花,煮飯,洗衫,沖茶,養魚....
    今次一定得!

    +++++

    移民香港既法國人

    >d亞洲女人話我好man好法國。

    嘩!Egoïste香水嘅威力, 唔係講笑!

    令我想起一套德國電影「香水.一個殺人的故事」

    回覆刪除
  47. 卡臣:
    唉~
    型乜鬼?!
    怪型異型就有我份
    -->有藝術家氣質啊!!夠「蒼桑」啊!(唔記得正字點寫^^0)

    回覆刪除
  48. 巴黎

    >見到一個背囊大隻港男,比幾個法國少女狂追....
    ==>皆因大隻港男太變態,偷了法國妹條底褲,
    被人追幾條街, 最後大隻港男跳入塞納河才可逃脫.....

    回覆刪除
  49. 佚名

    嘿嘿
    我都醒唔起「蒼桑」正寫係乜

    睇吓有冇有心人幫手

    回覆刪除
  50. lo哥

    >叫做有啲女比佢high下...
    阿強都有去過中環CLUBBING
    舞池入面
    男揩女,女俟男
    男摸男'女磨女

    真係要寫多篇啊~

    工程界仲齋
    一來少女同事
    二來就算有女同事, 她都好Man

    ---

    係呀!我嗰兩個frd business人,正常既,我唔正常囉。

    寫呀!我會繼續睇~哈哈,我E+用緊google reader share. 你有無用?

    回覆刪除
  51. lo哥

    如果你係唔正常? 咁我正情變態囉。

    寫呀!我會繼續睇~哈哈,
    多謝先
    你給我莫大鼓勵

    google reader share?
    其實....我係電腦白痴
    我極其量只識寫吓blog咋

    回覆刪除
  52. 25/9 buffet dinner at Marco Polo Gateway, OK ?

    回覆刪除
  53. 卡臣:
    睇吓有冇有心人幫手
    -->睇來冇人打救「蒼桑」佢啦><

    回覆刪除
  54. >1996年既夏天,我記得係塞納河邊,見到一個背囊大隻港男,比幾個法國少女狂追....

    你認錯呀!大隻男係俾法國老虎狗女追呀!最後大隻港男跳入塞納河才可逃脫.....

    >嘩!Egoïste香水嘅威力, 唔係講笑!
    呢隻香水仲勁過印度出o個隻喎!

    >睇來冇人打救「蒼桑」佢啦
    佚名...旅客講左點寫呀! 係滄桑

    回覆刪除
  55. 『我1996年夏天去過巴黎
    背囊黨
    共四位同學一起去玩咗5個星期』

    奀奀,你好!(咁大隻仲叫奀奀?)

    唔係咁啱呀嘛,我都係1996年夏天去過巴黎,係一個月單人旅程嘅其中一站。唔知有冇响巴黎見過你呢?因為記得當年住嘅「酒店」係一本香港熱門旅遊書介紹,所以去到啲住客都係香港嚟嘅後生仔女。

    好可惜睇唔到大隻港男跳入塞納河逃脫嘅情景!

    期待下一期嘅「阿強月刊」!

    回覆刪除
  56. 巴黎

    二十幾歲人.
    心境都可以好滄桑架

    同樣, 幾十歲, 可以好天真
    如我..

    ++++

    brenda & cliff

    OK 喎!

    ++++++

    佚名
    「蒼桑<---算罷啦!

    回覆刪除
  57. 自由

    大隻男係俾法國老虎狗女追呀

    老虎狗要食肉腸?

    多謝巴黎相助
    教我「蒼桑」點寫

    印度神牛?唔怪得校長要掃貨啦?!

    ++++++++

    歪歪

    嘩!係一個月單人旅程?
    超級型呀!
    cool~~~~
    有冇艷遇先?!

    1996...咁蹺?

    下次post張舊相俾大家過目先
    (果陣我未有digital)

    回覆刪除
  58. 「我直情用Egoïste香水嚟
    淋花,煮飯,洗衫,沖茶,養魚....」

    - 唔係呀,成七百幾兩銀一支架!你真係 富貴!
    - 我驚你搽得太香,吸引成街d女仔跟你返屋企,到時比阿卡嫂扭耳仔就唔好啦!

    p.s. Egoïste係自私、自我既意思。

    回覆刪除
  59. 巴黎旅客:

    卡臣同校長係隱形富豪黎架!!
    7百零蚊打個乞"痴"都無呀!!
    呵呵

    回覆刪除
  60. 真係1996咁蹺呀!

    『單人旅程?超級型呀! 』

    唔算型,只係好自由。

    『有冇艷遇先?!』

    見到好多人冇著衫,咪係响博物館入面嗰啲石像囉!

    『下次post張舊相俾大家過目先
    (果陣我未有digital)』

    果陣digital都未流行,如果唔係我當年啲沖印費就唔洗咁融。

    回覆刪除
  61. 行姐&巴黎:
    >睇來冇人打救「蒼桑」佢啦
    佚名...旅客講左點寫呀! 係滄桑
    -->哎呀!真係發雞盲啦:P
    滄桑...有水...寫左蒼天個蒼...hehe

    回覆刪除
  62. 巴黎 / 自由


    >成七百幾兩銀一支架!你真係 富貴!
    妳地誤會啦
    我唔係富翁
    相反.我係大慳家
    因為我通常用「兩滴」水嚟
    淋花,煮飯,洗衫,沖茶

    ++++++

    歪歪

    可能我們之前見過面吧!
    好玄妙啊!

    +++++++

    佚名

    滄桑<---睇blog學中文
    多謝巴黎老師啊!

    回覆刪除
  63. 好野來ga. http://google.com/reader

    去試下!

    回覆刪除
  64. lo哥

    果然好介紹
    可以訂閱同SEARCH
    正呀!

    回覆刪除
  65. 卡臣:
    滄桑<---睇blog學中文
    多謝巴黎老師啊!
    -->仲要多謝埋我wow...唔係我寫錯左你都唔會學到啦....(好無懶的說法...:p)

    回覆刪除
  66. 佚名

    多謝妳!

    多謝妳扮唔識,等我學到嘢
    好苦心啊!

    回覆刪除
  67. 卡臣:
    多謝妳扮唔識,等我學到嘢
    好苦心啊!
    -->wa~0.0...呢個講法仲無賴啊!!
    我都學到野啦!!多謝卡臣指導:P

    回覆刪除

LinkWithin

Blog Widget by LinkWithin