~~~~~~~~~~~~~~~~







2013年7月8日 星期一

作狀說話

作狀說話



廣東話「作狀」解作:扮作有型、煞有介事、懶有深度、自稱高級品味等等講「作狀嘢」時,要配合model姿勢、Chok聲和擺出高傲不屑的表情。務求獲得風靡萬千的戲劇效果。以下是我聽過的典型十句「作狀說話」:


第十位:「唔知點解我食極都唔肥?」
這句說話的潛台詞是:「我是得天獨厚!」通常一位瘦妹在一班肥胖女士面前,裝出一個懶「迷惑」的樣子說:「唔知點解我食極都唔肥?」等旁邊一班抖啖氣飲啖水都會肥的肥女人聽到後,咬牙切齒!某些女名模在人背後狂做運動、節食抽脂,然後在記者面前炫耀自己係「得天獨厚」。

第九位:「太pop啦!我唔鍾意!」
懂聽歌和愛睇電影的人,都喜歡在人前顯示自己有深度和品味偏鋒。「吓?英烈褒曼?太pop啦!我唔鍾意!我鍾意維斯康堤多啲。」扮影癡者必熟讀世界電影大師的profile。品味越另類越小眾越難明越深奧,就自覺得越有型有料到。

第八位:「下次等我帶你去見識啦!」
朋友聚會商量去邊度食飯邊度玩?最初大家梗係話無所謂,邊度都得。結果有一些自命品味高級的朋友,一坐低就彈三彈四,「嘩!呢度咁渣架!」之後就會如數家珍般講自己去開邊度的高檔地方;「係members only,你入唔到架!」、「下次等我帶你去見識啦!」結果下次呢,當然又無回事啦。

第七位:「最憎同蠢人講嘢!」
自命高人一等之徒,最喜歡講呢句。佢又有幾醒呀?咪一樣五十步笑一百步。若果真係有料的人,當然唔會踩低人哋來抬高自己。真係叻嘅,自然有辨法跟唔同人溝通。

第六位:「我太細個,未聽過!」
香港社會歧視年紀大的人,歌手明星要嫰口,高齡又難搵工,結果人人都愛扮後生,如果一班人講從前集體回憶時,有人會扮天真地說:「我太細個,未聽過!」林黛、梅蘭芳就扮大霧可以話未聽過,如果連「張惠妹」都話:「我太細個,未聽過!」就未免太作狀啦。

第五位:「如果用錢可以解決到嘅問題,就唔係問題!」
體驗財大氣粗的豪氣精神,暴發戶信奉「財可通神、錢是萬能」的信仰教理。並非人人都有資格和膽量說出這句話,所以講這句時,不妨留意旁人聽後的反應。並且作好心理準備,你有可能會成為綁匪的下一個目標。

第四位:「My show time!」
遇到難題時,當眾人束手無策之際,有人在人堆中昂然步前,先用眼神橫掃在場所有人士之後,滿懷信心講一句:「My show time!」跟着三扖兩撥施展渾身解數及高難度動作。順利解決難題,獲得全場讚嘆。但若果失手的話,就會由半空撻落無底深淵,變成My shit time

第三位:「Sorry!我啲中文唔係咁好。」
混血兒、ABC、留學生、國際學校學生,或者跟以上人士一起玩樂的香港土著,紛紛對人講:「Sorry!我啲中文唔係咁好。」就大條道理加重「R」音,從此跟一般港爛劃清界線。特別在酒吧和的士高內,大家爭著扮鬼仔鬼妹,咁先有market。並加入大量Coolhey~manyodamn! Shit

第二位:「我要係18歲前掘到我第一桶金!」
對於某些人來說:錢的比重排最前位置。他要用賺錢來肯定自己的存在意義價值。他在父母朋友同事情侶前發誓:「我要係18歲前掘到我第一桶金!」至於那桶金確實有幾多錢?用什麼手法去掘?點解係18歲前?則無明確交待。大抵講出來時,覺得自己有型有理想有氣勢便算數。之後又有誰會認真地去記起你講過係「黃金」定「帛金」

第一位:「我係一個完美主義者!」
喺人面前稱自己係「完美主義者」都幾肉麻!自己係唔係「完美主義者」,應該由旁人定論,並而唔係自己話係就係。講出這句話的人已經好唔完美。太扮嘢而且overdone。再者,這些所謂「完美主義者」都是雙重標準,對別人的要求非常嚴謹,要求自己的則極為寬鬆。


二少爺說:好鐘意TVB啲現代舞dancer,可惜已經轉哂行。


47 則留言:

  1. 扮abc真係幾難頂,尤其是係溝女嗰陣。 :o

    回覆刪除
    回覆
    1. 諗住你呢排忙,買雞精你提神添。 :)

      刪除
    2. 她婚後息影,對丈夫非常忠貞。

      刪除
    3. 丈夫溫柔唔燥熱,因為飲得多太太煲嘅竹蔗矛根精

      刪除
    4. 她有潔癖,客廳常放有消毒酒精。

      刪除
  2. 我係一個完尾主義者。

    事事快D完尾,無煩腦!

    回覆刪除
  3. 聽到有人扮ABC/CBC好好笑㗎免費小丑娛樂大眾。

    回覆刪除
  4. 卡臣:

    我有個朋友好大食,但他非常瘦.人人都覺得奇怪.

    回覆刪除
  5. 卡臣,
    "作狀說話"呢個話題真係可以出一本書,可以探討吓背後自悲心態... "唓!我都唔睇中文書!" 吓?咁即係點?

    回覆刪除
    回覆
    1. 我從來唔會睇八卦雜誌,太CHEAP啦,哎呀,掉咗本FACE出嚟添

      刪除
  6. 第五位:「如果用錢可以解決到嘅問題,就唔係問題!」...我都講過喎,但真架喎;當時朋友生意上可能要賠錢,另方面屋企人健康出問題,佢覺得好煩時,我都係話佢公司果個唔係問題,叫佢集中顧左屋企人先

    回覆刪除
    回覆
    1. 呢句無問題,只要筆錢不是天文數字便可

      其實貸款公司廣告可以用呢句

      刪除
  7. 【我要係18歲前掘到我第一桶金!】,边度使话等几多岁喔,随便搵D狗屎、猫屎、牛屎、猪屎、鸡屎,唔止一桶,要几多桶“金”都得啦!

    回覆刪除
  8. 第五句是我與朋友之間成日攞黎講笑架,哈哈!

    回覆刪除
  9. 「我係一個完美主義者!」

    难道他是不食人间烟火的神仙吗?呵呵。。。

    回覆刪除
  10. 浸過幾年咸水返香港就滿口英文又話唔識睇中文....其實好膚淺!

    回覆刪除
    回覆
    1. 好似妳咁,法文咁叻妳都無攞出嚟炫耀過

      刪除
  11. 卡 你係著名舞臺劇、電影演員,又創作無數故事、又大隻...都無show quali啦!

    回覆刪除
    回覆
    1. 唏! 我呢啲七線尾八缐頭演員,乏善可陳。

      刪除

LinkWithin

Blog Widget by LinkWithin