~~~~~~~~~~~~~~~~







2013年7月1日 星期一

打官腔


打官腔

如果有人講嘢無稜兩可,鐘意帶你遊花園,講咗嘢又好似無講過,既保底又保守。我哋會話佢講嘢十分之「官腔」,現在試吓數一數做官嘅人點樣打官腔?

第十位:「繼續尋求共識」

即是「仲未傾過」、「仲搞緊」、「仲未傾掂」、「傾唔埋欄」的意思,「繼續」表示離成功的目標,還有一段距離。希望記者們放過當時人一馬,唔好成日煩住哂!等官員透氣,遲啲先好再嚟問過。

一字記之曰:「耍」!



第九位:「值得鼓舞、高度評價」

即是「幾好!」「OK Good!」、「今次掂啦!」「威番一次!」的意思,用於攞獎揚威、成功申辦、大陸派餅、自救自強、舉世創舉。無奈人生不如意事十常八九,所以這句只會間中出現一吓,曇花一現。
一字記之曰:「誇」!

第八位:「深切慰問哀悼」
對於所有天災人禍死人塌樓,高官在電視前擺出一副憂心戚戚表情,對傷者發出深切慰問、對死者發出深切哀悼。但公式化慰問變成Programmed咗嘅例行工事,變成無情感的官式慰問語。
一字記之曰:「假」!

第七位:「成立跨部門協調小組」
爆咗大鑊,幾個政府部門都有份上身,時候,就需要成立一個跨部門協調小組去補鑊。高官回答:「已經成立跨部門協調小組。」意思即係指:請記者們去問跨部門小組,唔好再問我(纏我)啦!
一字記之曰:「卸」!

第六位:「有待獨立小組調查報告」
當媒體揭發政府某部門出錯或醜聞,政府成立獨立小組,調查有無人需要負責?高官面對咪高鋒,回答:「一切有待獨立小組調查報告」叫記者等報告出咗先講啦,一招順水推舟連消帶打。
一字記之曰:「閃」!

第五位:「唔排除有呢個可能性」
即是「或者啦?」的官式講法,面對記者的問題,如果答案是「100%絕對無可能。」高官可以一口堅決否定,但如果答案是「對」的話,高官會答:「唔排除有呢個可能性」。就算100%肯定都好,都要為自己的答案留有餘地。
一字記之曰:「流」!

第四位:「只係個別事件」
例如警隊有魔警、醫院醫死人、食環署吞泡,高官回應:「呢啲只不過係個別事件!」政府的污點只是滄海一栗,其他公務員仍然是高效率、公正嚴明。但市民不會相信污點只是滄海一栗,而應該是冰山一角。
一字記之曰:「瞞」!

第三位:「現階段不作任何回應」
即是「而家我唔想答你」的官式禮貌答法,現階段不作回應;並非意味着下階段會回應,記者們也不會天真地寄望下次遇上官員,他會作出回應。所以記者們如實照寫,寫:「現階段官員不作任何回應」
一字記之曰:「拖」!

第二位:「表示震驚!」
見過大風大浪的官員,泰山崩於前都不動於色。無奈官員嬌生慣養,容易驚青騰雞。所以見乜大鑊嘢爆咗就「表示震驚」。這一句回應只暴露出官員的危機處理經驗不足。官員們表示震驚,讀者觀眾們對官員如此反應,都一齊表示震驚!
一字記之曰:「慄」!

第一位:「深表關注」
「深表關注」是官腔中最官腔的一句。記者訪問有關官員,對某事件發表意見,官員一面正經地說:「深表關注!」難道有關官員夠膽說:「唔係好關我事!我唔太關注」或者「係咁咦關注啦!」雖然讀者觀眾們未必會「深表關注」官員作出的「深表關注」回應,但你做得官,納稅人出糧俾你,你的工作就是需要你去關注事態發展,如今官員將應有的工作職務來當作自己的回應,糊混過關。

再者,「深表關注」立場中立,沒有附加任何私人好惡語氣、正面或反面的暗示、buy或唔buy的感緒,最適合出自官僚僵化的公務員口中,所以「深表關注」成為官腔的第一位,實至名歸。
一字記之曰:「廢」!


二少爺說:我只當過「量地官」。





12 則留言:

  1. 哈哈,打官腔我都識,仲成日用添。 :p

    舉個例「工作上會受到別人的注意,但並不代表成名。」

    一字記之曰:「吹」!

    回覆刪除
    回覆
    1. 下!原來呢句係吹架!等我仲捧呢句為金科玉律,回水呀!

      刪除
    2. 哈哈,唔洗咁快嗌回水住,聽咗我點拆先。 :)

      你今年喺香港有劇上,係咪多咗人留意先,坐底我喺街留意到你張banner吖。

      但係呢種「受到別人的注意」,並唔係「代表成名」喎。

      凡事有先後、因果、步驟o架嘛,一步登天只會讓人飛得越高跌得越痛。所以呢,你繼續努力就啱o架喇。喺第10集嗰張poster度,你都算排第二喇,話唔定喺第11集度,你個大頭放係中間呢。 :)

      刪除
    3. 明白明白哂! 又有道理喎
      好! 咁我繼續努力啦


      刪除
  2. 卡臣:

    仲有「無可奉告」最常用.

    回覆刪除
    回覆
    1. 「我唔會評論個別事件。」

      「我再無補充。」

      刪除
  3. 做官当然要会打官腔。
    难道是人在江湖,身不由己?

    回覆刪除
    回覆
    1. 同意啊,辭官之後才可憑良心說話。

      刪除

LinkWithin

Blog Widget by LinkWithin