~~~~~~~~~~~~~~~~







2013年6月7日 星期五

怎麼可以將手腕忍痛劃損


怎麼可以將手腕忍痛劃損



(這篇是新寫的)


四月的某個晚上,Peter跟同事們去銅鑼灣唱K,今晚是公司某位輕女同事的生日,她邀請了她的女朋友一起來慶祝。Peter希望今晚在K party識到女仔。

36歲的Peter在九龍灣某日本汽車公司做個小經理。他生性怕醜,上一次拍拖已是三年前的事。前度女友是在學日文班認識,跟Peter感情轉淡後,便告分手。

PeterK房內先飲兩杯酒,壯壯膽。房內見到一個吸引的目標,新潮打扮後生女、cool cool哋,借機上前搭訕。後生女叫Aubrey22歲,Peter傾落覺得她幾有性格,愛恨分明、主觀聰穎。Peter被她吸引著。成功取得電話號碼後,第二日試吓date人,又OK喎,Peter Aubrey幾次單獨約會後,變成一對情侶。

* * * * * *

兩人年齡相差14年,其實外表都唔係好合襯。年輕的Aubrey偶爾向Peter發吓小姐脾氣。Peter立即哄回女友。有時候,PeterAubrey似一對父女多過似一對情侶。

Peter在認識Aubrey那晚上,早已留意到Aubrey兩隻耳都釘滿耳窿,很多金屬鐵環掛在耳朵。Peter某次約會時好奇地問Aubrey為何雙耳釘滿窿?Aubrey性格率直,毫無忌諱地直接告訴Peter:她以前有個男友是Band友,男友衣著好punk,叫她打多幾個耳窿,Aubrey太愛男友,照辦。Peter聽完後,心裡不高興,妒忌她的前度男友。Aubrey甘願為前度忍痛打耳窿,Peter心中酸溜溜。

* * * * * *

兩人拍拖未夠兩星期,天氣開始回暖,Aubrey穿短袖衫,露出手臂。Peter留意到Aubrey手腕有很多條疤痕,應該是「界手」所導致。Peter婉轉問Aubrey為什麼要「界手」呢?Aubrey性格率直,毫無忌諱地直接告訴Peter:她以前有個男友是髮型師,男友脾氣暴粗,對她不好,Aubrey情緒低落時,就「界手」發洩。Peter聽完後,心裡不高興。女友為另一個男人傷害自己身體。Peter憎恨她的前度,心中真的酸溜溜。

* * * * * *

某晚,他們在親熱時,Peter首次發現到Aubrey腰背有一個紋身圖案。是一個英文名:MarkPeter先壓著心中那股怒氣,問Mark是誰?Aubrey性格率直,毫無忌諱地直接告訴Peter:她以前有個男友叫Mark,是黑社會蠱惑仔,男友和Aubrey紋情侶紋身,在自己身上紋上對方名字。

既然Aubrey已跟前度分手,Peter要求她可否去做鐳射脫紋身?手術費包在Peter手上。Aubrey也不是善男順女,立即發爛,說自己十分喜歡這個紋身。Peter退一步,要求AubreyPeter這英文名在她身上,Peter也願意在自己背脊紋上Aubrey。但Aubrey堅拒絕了!她的理由是Peter呢個英文名實在太「娘」了,紋在身上,一定俾人笑死。

Peter被取笑個英文名「娘」,這一吓他真的火光了。立即同Aubrey吵大鑊!骨子裡,因為Aubrey甘願為前度男友穿耳窿、界手、紋身。但對自己呢?Aubrey為自己做過什麼?只是跟自己吃喝玩樂、娛樂消費、買乜買物。

Peter開始懷疑自己被人搵笨,又係嘅,Aubrey22歲,自己36歲,可能當你係「人肉提款機」咋。Peter一想到這裡,瘋了地罵,Aubrey當然唔好惹,立即還擊。鬧到兩人反哂面,順便宣佈分手。Peter大喝:「我對妳付出,但係妳為我做過乜嘢呀?」轉身各行各路,Peter回到家中,嬲到徹夜失眠。

* * * * * *

第二朝,Peter起床上班時,扭開電視睇晨早新聞。嘩!不得了,新聞報導今晨4時,一名22歲少女家中為情割脈自殺,證實不治。她就是Aubrey了!

Peter看到新聞,他的心情是這樣:
先是震驚,怎麼昨夜還見到生勾勾的女友,今早已經陰陽相隔?
之後感到傷心,畢竟相處了三個星期,始終有感情。
但之後又感到欣慰,因為女友終於肯為自己做啲嘢,仲係為自己去尋死,勁過為前度穿耳窿、界手、紋身,呢啲簡直濕濕碎。為自己結束生命喎,Peter立即有種贏返哂的勝利感。

又睇唔出Aubrey呢啲90後咁睇唔開,表面咁硬淨,原來內心咁脆弱。情海一翻波就尋死。Peter跟她相識三周,Aubrey的家人和朋友不知道他的存在,所以警方沒有找他問話。Peter也沒有致電Aubrey家人慰問。

* * * * * *

第二天早上,Peter的心情跌落谷底。新聞有跟進,警方從Aubrey的朋友追查到真相:前晚Aubrey跟現任男友鬧分手,Aubrey在家中飲醉紅酒後,情緒激動下自殺。Aubrey之前也有嘗試自殺的紀錄。

警方透露:Aubrey的現任男友叫Mathew,是一名時裝設計師。最近Mathew疑似改變性取向,搭上一名男化妝師的第三者。AubreyMathew因此多次爭吵。前晚深夜Mathew在電話中向Aubrey宣佈分手後,Aubrey便先飲酒後割脈。

Peter知道真相後,十分傷心。AubreyPeter消磨原來是為了向Mathew報仇。更加為自己表錯情而難堪。以為Aubrey肯為自己犧牲性命,原來只是一廂情願。唉…. Aubrey從來不會為自己做過什麼。

Peter心中那疑問題又響起:「我對佢付出,但係佢為我做過乜嘢呀?」。手電突然響起。是收數公司追數佬打來。Aubrey終於為自己做啲嘢。之前約會時,AubreyPeter行開去洗手間時,偷拍下Peter銀包內的身分證,作為給貸款公司的擔保人資料。Aubrey借了十萬,急需一筆錢去整容隆胸,留住Mathew的心。怎料她人一死,收數佬立即找擔保人Peter,唉….冤孽

一個女仔,甘願為前度男友們穿耳窿、界手、紋身、甚至整容隆胸。Peter終於明白到自己從來都稱不上是她的男友。


二少爺說:祝彼德忘記過去,展望將來。

33 則留言:

  1. 睇完呢個故事,我又學到嘢喇。 :)

    原來拍拖千祈唔好問「我對佢付出,但係佢為我做過乜嘢呀?」,一問完之後,peter就賴晒嘢喇。 :p

    回覆刪除
    回覆
    1. 係囉,但係出咗半斤力,當然想攞返八兩。

      但只付出,無回報...又好痛苦。

      刪除
    2. 咁我要接埋一句「家陣惡搵女,邊有半斤八両咁理想,吹漲…」

      便宜莫貪呀,如果有靚女咁主動,我哋做男人真係要定力夠d,否則輕則破財,重則要洗定籮柚o架,我見唔小呀,有機會低調地同你分享吓。 :o

      刪除

    3. 「港女要搵食,邊有半斤八両咁理想,吹漲…」

      有料分享?
      不如化成故事 ,在你那邊開個刑事系列啦

      刪除
    4. 當初「柒公民系列」嘅原意就係「刑事系列」,講述以陪審員嘅角度去睇一件刑事案件。因為嗰個殺人故事係我虛構出嚟,所以公開都冇所謂。

      但係上面講嘅「料」好真實吓,當中涉及好多唔方便公開地發表嘅觀點,呢d觀點或者與出嚟嘅最終結果相反,所以唔敢寫出嚟,black and white唔好嘅,自己捉蟲就弊喇。

      刪除
    5. 原來如此,咁低調啲,我都唔想去探監。

      刪除
    6. 或者寄信畀我,做pen friend都得。

      到時我唔用得電腦打字,只可用筆寫blog,可能要麻煩你代我出post :p

      刪除
    7. 世純:

      你試下將那些真人真事改一改寫出來,我有不少故事情節,都係改自身邊,或從其他人聽回來的真實事件.

      刪除
    8. 世純

      入冊? 記得沖涼時唔好執番梘呀

      佛爺

      我都係改身邊人故事

      刪除
    9. 佛爺:

      我有時都會改身邊嘅事,但係涉及法律方面,就要改得小心d。

      卡臣:

      呢d嘢我當然會注意喇。另外,如果嚟探我,順手帶d凡士林喇,因為我怕痛呀。 :p

      刪除
    10. 卡臣、世純:

      沒有一些真實事情作根基,很難發揮想像力.近日聽到一個二十五六歲的華裔電腦工程師,去了美國微軟工作.強勢母親是香港移民,她將個仔當了五歲來管,「窒」到個仔既女朋友飛起.女朋友也是香港移民的下一代,操非常流利廣東話,她竟然可以啞忍伯母的「明窒」,簡直奇怪?我就從這件真人真事中,構想出達西和伊莉莎白的造型.

      刪除
    11. 照咁睇,女友看在男友工程師份上,暫時啞忍。一旦結婚,就會毒死奶奶,再呃保險金。

      刪除
  2. 有代價的感情,怎會長久!
    大14年,始終有代溝。。。
    真係人生一個教訓。

    回覆刪除
    回覆
    1. 最衰女主角係利用peter嚟激男友,咁多因素,變成不合襯。

      刪除
  3. 卡臣:

    這個故事簡直好好笑!由頭笑到尾,最後仲衰到被收數公司上門,真係「筍緣」!嘻嘻!

    回覆刪除
    回覆
    1. 卡臣:

      我今早起身,仲覺得個故事好好笑!最「賤」就係個美女上了天堂,仲有收數公司來「回魂」,咁至抵死!嘻嘻!

      刪除
    2. 係呀,女仔一層層咁推進,由耳窿、界手、紋身到自殺,一層層咁推到極端。
      遇到一位都大叫瀨嘢

      刪除
  4. 个女朋友又穿耳窿、纹身兼界手,都系shot shot地架啦!个傻佬仲以为揾到个后生女友,好着数添!

    回覆刪除
  5. 都上過床親密過, 叫做各取所需啦, 雖然被人呃咗感情...

    回覆刪除

LinkWithin

Blog Widget by LinkWithin