~~~~~~~~~~~~~~~~







2013年6月5日 星期三

恐嚇說話


恐嚇說話



在我們的成長過程中,確實聽過很多言帶恐嚇性的說話。恐嚇說話只是一種意識,無實際行動,希望把對方嚇窒繼而屈服,讓我數一數印象最深刻的十句。



第十位:「如果你搞唔掂?你聽日唔使返工!」
火爆老細常用的威脅說話,用「打爛飯碗」來恐嚇下屬一定要完成艱巨任務,如果不成功,便成仁,立即炒魷。好彩香港有平機會,如果妳有身孕或者你是同性戀者,你都可以用你的特殊身份來保住份工。

第九位:「唔好行埋嚟!如果唔係我跳落去!」
企圖跳樓自殺者危坐天台邊,見到警察消防員走埋嚟,大聲嗌:「唔好行埋嚟!如果唔係我跳落去!」自殺者的企圖是尋死,但竟然用自己條命做威脅,勒令警員唔好接近。究竟佢真係想自殺?定係想做場大龍鳳引人注意呢?真係當事人先清楚。

第八位:「我爛命一條,最多咪攬住一鑊熟!」
所謂「趕狗入窮巷」,「好佬怕爛佬」,爛佬唔怕爛命一條,「缸瓦撼陶瓷」。所以貧富懸殊的社會,低下層邊緣人常用呢句來恐嚇有錢佬。電視劇/電影中見到演員要引爆石油器或放火,就大嗌:「我就爛命一條,最多咪攬住一鑊熟!」「一鑊熟」是屬於80年代,現今,就算打邊爐都好少聽到「一鑊熟」。

第七位:「我做人仲有乜意思呀!我死咗去好過囉!」
遭拋棄的怨婦、失戀被遺棄情人,常用此句。對方突然提出分手,失驚無神毫無心理準備下,情緒失控,捶胸頓足!呼天搶地!「我做人仲有乜意思呀!我死咗去好過囉!」邊講邊作狀爬窗、刀、飲滴露。希望以死威脅對方,收回分手的決定。另外,不孝子女激親阿媽,阿媽都會喊著講呢句。

第六位:「我就爆你大鑊!」
每個人都有秘密,分別在於「見得光」定「唔見得光」?假如知道別人的一些不光彩的秘密,可以藉以要脅。「如果你唔俾一百萬我,我就爆你大鑊!」由娛樂圈爆料、商業犯罪、桃色醜聞、謀財害命,到政治陰謀,此句都適用。「爆大鑊」已是上一代的用詞,如今好少用。改用:「篤爆、踢爆、揚開佢」。

第五位:「你做到咁絕?我做鬼都唔放過你呀!」
中國人比較迷信,相信有鬼神、超自然力量。所以如果要威脅人,要借靈界鬼魅來嚇唬對方最work。「你做到咁絕?我做鬼都唔放過你呀!」著紅色衫去自殺,化成怨氣沖天的厲鬼,纏身報復。撈偏門及撈家,比較信邪,會容易屈服。

第四位:「信唔信我port你呀?!」
政府拍宣傳短片:「今時今日,咁服務態度係唔夠。」釀成投訴風氣,「消費權益在你手,據理力爭要開口。」結果服務員稍一怠慢,顧客立即破口要投訴,抄低Staff number:「信唔信我port你呀?!」從而獲得通容著數:快有檯、舊貨換新貨、無限次維修、送物送乜服務員為保飯碗或免麻煩,唯有叫經理出嚟處理投訴顧客。

第三位:「咁我哋不如分手啦!」
男女關係,外弛內緊,寸土必爭。如果一方提出的要求,未獲對方接納支持,被拒絕一方只好出絕招,用整份感情作賭注,女方說:「叫你偷支警鎗俾我玩都唔制,咁我哋不如分手啦!」結果好多傻事荒謬事,都在這種威脅情況下發生,釀成悲劇收場。當然有些情況下,對方一口氣應承,去開香檳慶祝。

第二位:「你唔應承我,我就跪喺度唔起身!」
弱方哀求強方,不能行硬,只好行軟,死纏唔放。男士求婚、借錢救命、挽留決裂情人、求醫生救人,皆適用。以前「跪喺度」呢一條蹺,仲有人會受,現在只覺好「娘」。男士當眾跪喺度求婚,以為用群眾壓力作脅,但如果女士唔鐘意都唔會work。上一次聽「你唔應承我,我就跪喺度唔起身!」好似已經是看粵語長片/武俠片的時候。想只用誠意來打動對方,在物質掛帥的社會來說,似乎十分戇居。

第一位:「妳試吓行出呢個門口,妳出咗去就唔好再返嚟!」
家庭暴力事件、離婚個案、虐妻虐兒案件,愈來愈多,逼到受害者忍無可忍,執嘢走人。施虐者出言恐嚇:「妳試吓行出呢個門口,妳出咗去就唔好再返嚟!」受害者當然唔受威脅,亦唔想再返嚟呢個破碎的家。呢句都係5060年代,男尊女卑社會才聽到,現在女性經濟獨立,再無太太會當丈夫是一張長期飯票。就連電視劇中也少聽到這句對白。


二少爺說:秋官效應啊!

26 則留言:

  1. 卡臣,
    以下是真人真事實錄...
    老細:如果你搞唔掂?你聽日唔使返工!
    同事:得你呢度有公返呀?我聽日去第二度返工!

    回覆刪除
    回覆
    1. 打錯字:得你呢度有工返呀?我聽日去第二度返工!
      跟進老細收咗聲...同事第二日辭咗職...
      矣...何必呢...

      刪除
    2. 輸人唔輸勢,辭工都是遅早問題。

      刪除
  2. 又打錯字:跟住老細幾日都收咗聲...
    哈!你懷疑是我講的?有機會先同你講:-)

    回覆刪除
  3. 哈哈,我成日睇到呢句,我諗都算啩。因為通常聽完呢句嘢之後,大部份人都會亂講嘢,或者係講咗d唔應該講嘅嘢,最後令自己賴嘢。 :p

    唔係事必要你講,除非你願意講,但係你所講嘅說話,我哋將會用紙同筆記底,將來有可能......,咁你而家有冇嘢想講?

    回覆刪除
    回覆
    1. 職業病呀。

      你見識咁廣博,有無見到大佬啲恐嚇口供架?

      刪除
    2. 聰明嘅大佬比較寡言,或者等埋「栗子」嚟先講嘢。至於愚蠢嘅大佬,同上喇... :p

      刪除
    3. 唔怪得栗子咁好賺,咁多人搵佢地做嘢。

      刪除
    4. 栗子有好有壞,好似揀生果咁,睇吓個樣知喇。

      另外,大佬通常有食慣咗嘅栗子,長食長有。 :)

      刪除
    5. 嘩嘩嘩,咁揚嘅,低調D好,呢度好多人睇o架 :o

      有次見過粒大栗子,帶住好多栗子,好壯觀呀。 :o

      刪除
    6. 哈哈!我講緊稱雄稱霸嘅栗子嘛。

      大佬多馬傍,栗子都唔失威!

      刪除
  4. 全部都係電視劇常見對白,現實生活中其實好少聽

    回覆刪除
    回覆
    1. 果然明眼人

      我之前在整理電視劇對白時衍生了這一篇。

      刪除
  5. 卡臣:

    我見過有個公司的開國功臣經常要脅老細話唔撈,老細都嚇到震.後來老細請了個新主管,佢又照嚇.新主管將佢炒佐,唔洗佢自己話唔撈喇!

    回覆刪除
  6. 達仔恐嚇說話:你仲唔餵我,信唔信我唔屙吖啦

    回覆刪除
  7. 大耳窿收数,最钟意话拆佢棚骨,仲要掟左佢落街!

    回覆刪除
  8. 回覆
    1. 哈哈!係呀!交贖款的過程好複雜添呀!

      刪除
  9. 哈,仲有:我屋企係賣叉燒包嘅,磔磔磔~~~~~

    回覆刪除
    回覆
    1. 哈哈!我剛買了電鋸、漒水和雪櫃,

      刪除

LinkWithin

Blog Widget by LinkWithin