~~~~~~~~~~~~~~~~







2013年6月11日 星期二

努力才能被愛慕



努力才能被愛慕


女士在車廂內,無意間望到司機證,突然驚訝地問阿堅:「司機,請問你以前係咪讀東華三院第七紀念中學架?」

阿堅十分驚訝:「係呀!妳點知架?」

阿堅還未清楚發生什麼事情,這名女士已急不及待地相認:「你係陳偉森呀嘛!我係朱小美呀!中四嗰年同你同班,4A呀!你記唔記得我呀?」

阿堅當然未能想起她是誰,不過他知道這位女士一定因為「司機名牌」而誤認了自己是阿Sam
 
阿堅一時之間貪玩,隨口應了她一句:「係呀,十年啦!好耐無見喇!阿…阿…小美!」
朱小美:「嘩!唔見你咁多年,你個樣變哂!」

Sam於中學時代是學校的風頭躉,當過籃球隊隊長,穿針球技精湛,而且高大有型,所以阿Sam十分受女同學歡迎。所有校內和校外的球賽,都有一大群女同學在場內,為阿Sam這萬人迷打氣。

由於阿堅也是籃球隊隊員,二人因此而熟絡,結成老友,只是阿Sam4A、阿堅讀4B,現在講起,阿堅也記起讀隔離班的朱小美,有點面善。

朱小美十分興奮,向阿堅說:「真係估唔到可以撞返你,當年你係籃球隊隊長,嗰陣你有型又靚仔,而家好似肥咗啲喎!」
 
阿堅亂答:「無計啦!要搵食!邊有時間打籃球吖,仲要成日坐喺度開工,有乜辦法唔肥呀?!」
朱小美:「嗰陣時,好多女同學都好仰慕你架,你知唔知道呀?」

阿堅腦裏突然想起:以前每逢籃球比賽時,總會有一名身型肥胖,手持旗仔的女同學於籃球場邊大聲為阿Sam打氣,阿堅和其他隊員經常取笑阿Sam「艷福無邊」。

阿堅也是挑通眼眉之輩,一聽到朱小美含情脈脈地問這條問題,心裡也猜到一二,明白她芳心暗許的心意。

阿堅決定將錯就錯,整蠱阿Sam,講了一個唔負責任的美麗謊言。
阿堅:「好多人鐘意我?係咩?唔覺喎!我剩係記得嗰陣逢比賽,妳都會企喺場邊幫我打氣,其實嗰時,我已經……有留意妳架啦!」

朱小美聽後靜了下來,只是經倒後鏡,痴痴地凝望「阿Sam」,眼濕濕。這時候,的士剛好到達旺角中心。

朱小美在付車資時,想抓緊繼續和「阿Sam」保持聯絡的機會,問「阿Sam」做唔做「八折的」,想他向取卡片,阿堅為了脫身所以唯有辯稱:「Sorry!我唔係八折黨,所以無印卡片。」

阿堅故意找錢時展示自己無名指上的結婚指環:「我頂住後面啲車喇,有緣的話我地一定會再見!」

朱小美亦明白事理,下車後,只有依依不捨地望著心目中的「阿Sam」駕車離去。

阿堅立即callSam,把剛才巧遇朱小美及整蠱他的事情一五一十告訴阿Sam

Sam立即鬼煞咁嘈:「唔係吖化?!你咁大整蠱?嗰個黐脷根又醜嘅肥妹呀?嘈喧巴閉,成日係度纏鬼住晒,嗰時佢唔知醜,仲成日專登走埋嚟……又話請我食蛋糕……
Sam在電話旁停唔到口咁談論著朱小美的醜事瘀事。

* * * * * *

另一邊廂,朱小美落車後站在旺角街頭,仍然十分回味剛才跟「阿Sam」的對話。

當年礙於自覺身型肥胖樣貌醜陋,怕會被阿Sam拒絕,所以一直不敢去向他表白心意,估唔到終於喺十年後,才知道「阿Sam」原來一早也在留意自己。突然一道光芒在她身上散發出來,所有自卑感一掃而空。挺起胸膛,妸娜多姿地走入商場店舖交貨。

Sales
妹:「嘩!Mimi姐,做乜今日咁風騷?咁happy呀?」
朱小美:「哈哈!Zoey,開心係唔需要原因架!」

時裝店的微型Hi-Fi,正播放鄭秀文的一首舊歌:「 因有自信 所以美麗 使我自卑都放低 在半空之中親你 不管身世 

朱小美不禁一起輕輕跟著唱。


二少爺說:對你不止感激敬禮,當你知己才是虛偽。



34 則留言:

  1. 話時話,真係好耐無撞過以前啲中學同學...

    回覆刪除
    回覆
    1. 我都係,等我在這裡呼籲一下我的中學同學撞下我先。

      刪除
  2. 回覆
    1. 順口一句,橫竪以後不再見,何楽而不為?

      刪除
  3. 阿堅都算係唔錯喇,送咗份咁「自信」嘅禮物畀Mimi姐。希望佢唔好畀呢份自信沖昏頭腦,變成自大喇,否則......

    我反而對最後出場嘅Zoey好奇喎,係咪靚女嚟先?

    另外,多謝你就住我,唔用動物做主角,否則我真係坐咗喺度喇。

    回覆刪除
    回覆
    1. 一句鼓勵,可能改變人一生。

      Zoey是一個典型sales girl. 化妝玩電話抽煙唱K咁囉,吱吱喳喳。

      我就算出了動物,你第二集就可以扭成鬼或機械人做主角。唔使驚。

      刪除
    2. 一句鼓勵,可能改變人一生。 <-- 呢句啱呀,可能我哋有時鼓勵咗人改變咗人都唔知道。

      咁Zoey唔係我杯茶lu。 :o

      我會扭成變型金剛或者係機械獸,再與人類大戰三百回合。

      刪除
    3. 咁就堅啦個故事!睇到讀者打爆個mon!

      刪除
    4. 讀者打爆完個mon再搵我哋賠錢添呀。

      刪除
  4. 卡臣:

    只隔十年都認錯偶像,小美唔止身材腫脹,頭腦都發酵.嘻嘻!

    回覆刪除
  5. 小美看到的士司機証,有相有名,已認為他是sam,小美只看見阿堅後尾枕,只從倒後鏡見到阿堅雙眼,咪認錯囉

    回覆刪除
    回覆
    1. 卡臣:

      係喎!一時無記起的士司機証是有相片的.

      以前好似聽你提過去蘇杏璇位於尖沙咀的餐館食飯,料想不到她這麼快便仙遊,真是可惜!

      刪除
    2. 佛爺果然記性驚人,我去過蘇杏璇的素食館,08、09年的舊事了,見過她真人,對客不錯,佛教徒吧,昨天終於去了如來佛處,病纏十年,也是一個解脫。

      刪除
    3. 卡臣:

      哈哈!你真係搞笑,我冇乜記性架!只係記得你講過蘇杳璇出來跟你們一夥人合照咋!

      刪除
    4. 係呀! 跟我們家族親戚一起影,你仲話無記性?

      你一定記得邊個AV女優個芳名,唔會搞錯

      刪除
  6. 真系要多D赞下人地咯!可以俾人地有自信心,功德无量架!

    回覆刪除
  7. I am still the same size as 15 years ago :)

    Unfortunately most of my female classmates from middle school had all gotten married and have kids.

    回覆刪除
    回覆
    1. 15年都無肥到,好嘢!

      我就,不堪提了。

      刪除
  8. Yes, you got a lot bigger, but it was all muscle :)

    回覆刪除
  9. 另一邊廂,朱小美落車後站在旺角街頭,仍然十分回味剛才跟「阿Sam」的對話。

    當年礙於自覺身型肥胖樣貌醜陋,怕會被阿Sam拒絕,所以一直不敢去向他表白心意,估唔到終於喺十年後,見到「阿Sam」原來走哂樣變成了一名烏歪肥胖的麻甩佬,朱小美慶幸自己當年並無跟佢拍拖,否則做咗佢老婆,依家想退貨都唔得,諗落寧願繼續單身好過。突然一道光芒在她身上散發出來,所有自卑感一掃而空。挺起胸膛,妸娜多姿地走入商場店舖交貨。

    回覆刪除
    回覆
    1. 正呀呢個結局!

      我的結局
      女主角要別人肯定、自己才開心。

      你的結局
      女主角自己想通了,令自己開心
      你的版本更自強正面


      你得閒多啲出手至得架!

      刪除
    2. 其實呢篇文第一次登嗰陣,我已經諗咗呢個結局,估唔到會重遇翻。

      你講得啱,好多嘢都係要自己想通咗,先可以令自己開心,我都仲喺度努力學習緊!

      刪除
    3. 你08年唔寫,到13年才寫出來,可謂一段緣份。

      自己開心就乜環境都好過啲。

      下次翻叮遇啱就請出手。

      刪除
    4. 吓?乜呢篇係五年前㗎嗱?日子真係過得好快呀!咁亦都証明咗你嘅作品係經得起時間嘅考驗。

      其實你翻叮舊文,會唔會覺得可以寫得更好而修改下㗎?

      刪除
    5. 係囉,香港五年間的審美角度沒有變過
      仍然憎人醜、對肥歧視,所以這故事沒脫節

      會啊,翻叮時睇吓有無錯字,改吓情節,好多科技都進步咗,要UPDATE返。

      刪除

LinkWithin

Blog Widget by LinkWithin