~~~~~~~~~~~~~~~~







2013年5月7日 星期二

naruto ╳ 卡臣聯合企劃第二回 -《東莞家族》


naruto  卡臣聯合企劃第二回
《東莞家族》






Hello!我叫阿得,今年25歲,大學副學士畢業後,做過兩年寬頻sales,人工得個雞碎咁多。我收入唔高又無乜儲蓄,只好在大角咀租住一間幾十尺的房仔。而家再無「套房」租架啦,雖然招牌寫「套房」,其實咪又係「劏房」。又焗又逼、晚晚有瞓棺材的感覺,每朝醒來,我已經分唔清楚自己係生定係死?我對天發誓:「我唔要做窮人!」



如果要脫貧,首先要搵過份有「錢途」嘅職業。香港經濟只靠金融地產旅遊零售四大行業。我把心一橫,投身做「自由行生意」的珠寶金行做門市sales,生意真係唔講得笑。

大陸人日日托住一袋袋人民幣落香港掃黃金珠寶。「周大福珠寶」同「六福珠寶」已經合併,重組成「周六福珠寶」。我自問都算「後生靚仔」,成功被聘在「周六福珠寶」做營業員,踏上脫貧的第一步。

近日黃金價格下跌,大陸人托錢落香港掃金,買金好似買菜咁瘋狂。我開單都開到手軟。而改變我命運的人終於出現了。她就是來港掃金的大陸女人,她叫「戚芹」。

45歲的戚芹,來「周六福」一口氣買了十斤金。大陸人改名真有一套,單字一個「芹」,剛中帶柔。她說已經離婚,沒有小朋友,在大陸有生意。我見她風韻猶存、春色明媚。我諗不如試吓「淘古井」啦,如果呢舖搞掂的話,我就可以疊埋心水上岸嘆世界。

我搞gag說:「我叫阿得(Duck) ,妳叫戚芹(Chicken),我們好襯啊!」戚芹聽後笑得很開心,她似乎幾鐘意我喎,我碰巧第二天放假,打蛇隨棍上,約她遊覽香港,戚芹笑著答應。



第二天,我帶戚芹去石澳,打算睇Rubber Duck。怎料等極都等唔到隻鴨鴨游過。她沒有失望。我倆就在海邊一吻定情,Yeah!我發達啦!我脫貧啦!

戚芹說後天回國了,叫我不如一起回大陸吧,認識一吓她的家鄉。我求之不得啦。我即時打電話向「周六福」辭職,我腦中突然想起阿「山聰」。





戚芹帶我回東莞,她家族在東莞開雞場,是正經的雞場。她是家族第三代的承繼人,怪不得她的父母改她名字叫「戚芹」。我參觀她經營的烏雞場,嘩,烏雞四處走動。在我眼中,牠們全是會走動的人民幣。我何止脫貧,直情發達添呀。



事情並非一帆風順,H7N9禽流感殺到東莞地區,我當然擔心會中招。網上流傳一個防感藥方:板藍根加白醋加海鹽,功用可防沙士防流感防輻射,我立即服用,仲加重份量。

結果當晚電視新聞報導:中醫師呼籲民眾不要盲目服用,藥方無效之餘還會對身體有害。我睇完單新聞後唔使一分鐘,上吐下瀉,被送去東莞醫院,證實是腸胃炎。唔通真係「財多身子弱」?都話中國文化博大精深架啦。



住院期間,戚芹沒有來探我,我腦中突然想起阿「超雲」。我打算出院後立即去箍煲。

當我出院後發覺事情並不簡單。原來戚芹賄賂地方官員,經營「黑心企業」。如今遭查出。戚芹想用十斤黃金擺平件事,怎料新上任的中委會總書記習先生下令肅整貪風,戚芹賄賂失敗,她唔想坐監,唯有掉低一切,逃亡去阿努阿圖。

市政府用「打擊H7N9禽流感」為藉口,把雞場內千幾隻烏雞一把火燒毀。我離遠望著雞場冒起的濃烈黑煙,我的發達夢亦一併燃燒。唉!香港份工無咗、戚芹走咗、我又病到手軟腳軟,今次真係輸Q哂。

發達夢破了,心碎離開東莞。我坐在回港的龍巴上,聽著mp3,突然shuffle彈出呢首歌:「剛剛聽到望到便更改,不知那裡追究……耗盡我這一生,觸不到已跑開 」我的眼睛紅了起來。


後記
大家記得睇naruto的作品啦,下次再玩過啦。

二少爺:沒料到我所失的,竟已是我的所有。



一生何求 - 陳百強
作詞:潘偉源
作曲:王文清

冷暖那可休 回頭多少個秋
尋遍了卻偏失去 未盼卻在手
我得到沒有 沒法解釋得失錯漏
剛剛聽到望到便更改 不知那裡追究
一生何求 常判決放棄與擁有
耗盡我這一生 觸不到已跑開
一生何求 迷惘裡永遠看不透
沒料到我所失的竟已是我的所有
一生何求 曾妥協也試過苦鬥
夢內每點繽紛 一消散那可收
一生何求 誰計較讚美與詛咒
沒料到我所失的竟已是我的所有

35 則留言:

  1. 你篇故事性強過我好多啦,點會輸呀~

    回覆刪除
    回覆
    1. 你以形式和抵死取勝,尤其是廁所一幕

      我就太被框框所限制,只顧講故事,你贏。

      刪除
  2. 卡臣:

    你的故事有著完整性,naruto那個是合併了數個笑話.

    回覆刪除
    回覆
    1. 就各人性格,出了風格各異的故事。

      刪除
  3. 呢個故事幾好喎,行文流暢之餘又有教育意義,要踏實做人,一陣過去睇埋naruto嗰篇先。

    我最鐘意「我叫阿得(Duck) ,妳叫戚芹(Chicken),我們好襯啊!」,你食字技巧越嚟越高喇。 :)

    另外,我一開頭睇「阿得」、「東莞」,心諗唔係咁啱咁橋嘛,咁邪。 :O

    回覆刪除
    回覆
    1. 係呀,我都覺得好巧合

      一早我已決定將電影「東京家族」改名做「東莞家族」,所以故事設在 東莞,

      近期興rubber duck, 所以叫男主角做阿得

      真巧合、你那邊的阿得還有戲做,期待啊

      刪除
    2. 我個故事嘅部分靈感來自劉德華嘅「按摩女郎」,所以主角叫「阿得」。

      為咗配合故事嘅發展同埋合理化,地點就設定咗喺「東莞」。

      刪除
    3. 原來這樣,事情太巧合了

      我都好鐘意呢首歌,貪佢有故事性
      我都曾經改編過這歌

      刪除
    4. 首歌裡面嘅「按摩女郎」好無奈,講出咗理想唔可以當飯食,唉。

      你鍾意首歌,希望你都鍾意小弟嘅求其之作喇。 :)

      刪除
    5. 你點會求其呀,咪呃人啦

      按摩女郎其實想夾band,我覺得好勁啊

      http://carson-chung.blogspot.hk/2012/04/blog-post_20.html

      刪除
    6. 啱啱睇咗,睇番就記得睇過喇。一次無心嘅「按摩」,竟然可以搵番理想,呢篇有正面意義,請考慮番叮。 :)

      你嘅「按摩」情節都好仔細喎,唔通......Andy係你個friend。 :p

      「我要四號呀!」 <-- 呢句對白,我嗰篇都有喎,哈哈。

      刪除
    7. 一定叮,遲啲先

      我憑想像寫咋,同你一樣,right?

      刪除
    8. 我諗咗大綱後,部分情節係請教朋友而嚟嘅,他略有經驗。 :)

      刪除
    9. 唔係你喇,呢d活動你唔鍾意玩嘅。

      刪除
  4. 我以為自己係睇緊30something個blog呀! 完整又貼近時事, 正!

    江湖散人

    回覆刪除
    回覆
    1. 從今次經驗所得,D相越無關係越好玩

      呢次你開題。。。先相後字

      搵次我開題。。。先字後相

      :)

      刪除
  5. 回覆
    1. fb見到國內有人叫「展賓周」,怎會無戚芹呢?

      刪除
    2. 卡臣:

      乜話?「展賓周」?我寧願叫戚芹喇!

      刪除
    3. 男人失去生存義意,生不如死。

      刪除
  6. 哇,將近期的熱門話題寫晒入去,連習生也粉墨登場,好嘢!

    回覆刪除

LinkWithin

Blog Widget by LinkWithin