~~~~~~~~~~~~~~~~







2012年8月20日 星期一

討厭聲音

討厭聲音

我記得我細個的時候,聽到好嘈的地盤打樁聲;還有在九龍城聽到飛機升降的轟隆引擎聲。如今因為起樓技術進步了,機場又搬了,這些噪音今天已絕跡。今次就讓我數一數我討厭的其他聲音。

第十位:巴士煞車聲
站在鬧市馬路旁,一輛巴士駛至巴士站,傳來刺耳的車呔煞車聲。不過近年來,可能冷氣巴士性能改善了,已很少再聽到這些巴士煞車聲。但我在港鐵的車廂內,就聽到刺耳的行軌尖音,尤其是「將軍澳線」過東隧那一路段,最為刺耳。

第九位:磨瓦煲
我在廚房的時候,如果聽到「瓦煲」和「瓦煲蓋」的磨擦聲,我一定起雞皮。真係諗起都已經毛管戙。

第八位:指甲刮黑板
留了長指甲的人,在黑板上抓刮,發出的刺耳聲,令我打冷震。大家有否看過電影《大白鯊》呢?其中一幕:船長就示範了指甲刮黑板,震懾全場。

第七位:試手機鈴聲
有人買了新電話,需要設定電話功能。他選擇電話鈴聲時,會反覆試聽各種電話鈴聲。對於我來說,唔停的電話聲,是十分煩厭。

第六位:試警鐘
公司有防火演習,警鐘隔一陣響幾吓,響幾吓之後停咗,過一陣又響過。嘩!好煩擾呀!心血少啲都俾個警鐘嚇死,精神虐待呀。

第五位:修路鑿地
香港地政署的一個特色:「掘爛條路重舖過後再鑿爛條路」。工人用「鑽地機」鑽爛條石屎路,嘈音震耳欲聾,心情也煩躁埋。炎炎夏日加上修路噪音,最為吃不消。

第四位:鑽牆
閒來留在家中享受吓寧靜的生活,突然傳來鄰壁的裝修聲音,電鑽鑽牆聲就最攞命。電鑽聲好似直鑽入腦袋中,唔知點解,鑽好耐都鑽唔停,乜咁多嘢鑽嘅咩?

第三位:補牙洗牙
有補牙洗牙經驗的朋友,都領教過牙醫儀器的電鑽聲。嘩!高頻刺耳,雙手出力抓緊椅柄,如像受到酷刑虐待。

第二位:BB仔喊
雖則我喜歡跟小朋友玩,但如果小朋友或嬰兒不停咁喊,咁就大鑊啦!搭飛機時,需要困在一個固定空間內幾小時,如果你隔離位有個喊唔停嘅BB仔,咁就人都忟埋一份。

第一位:睇戲傾偈
點解香港人咁鐘意睇戲時講嘢呢?返屋企睇碟慢慢傾過夠啦!最最最討厭睇戲時有人傾偈講電話,一定影響睇戲心情。不如戲院座位加設headphone,戴上去睇戲,斷絕一切無謂聲音。


二少爺說:成首歌最鐘意呢句:「討好眾人 換來自己抖震」。



樓上來的聲音 張學友   
作曲:藍奕邦
作詞:林夕

樓上來的聲音 樓下來的聲音
誰共誰現在做甚麼 不要緊
喧嘩作樂 為何如此吸引

寧靜時的聲音 彷彿飛不走的蚊
混雜著內心的噪音
今天假日 為何毫不吸引

靜處在家中竟有壓力 
就似擔心失去價值
寧願日日夜夜大聲播 
情歌 真不真實也好過

如何能將工作當戀愛進了又退 
從早午晚都拉鋸那有樂趣
何不躲進浴缸裡痛快地流淚
如何能將戀愛當工作奮鬥下去 
如早午晚找不到半個伴侶
何不休假 像清水一般空虛

人為何不開心 想一天到晚興奮
但願做甚麼都滿分
討好眾人 換來自己 抖震

26 則留言:

  1. 指甲刮黑板,毛管戙呀!

    另一樣我好唔鐘意嘅聲音係人地食完野,用條脷了牙嗰啲 jip jip 聲

    回覆刪除
    回覆
    1. 講起食嘢,我對於飲湯飲到「殊殊」聲,反而唔討厭,可能我係囉,嘻嘻

      刪除
  2. 和人近距離時,好多聲音我都抗拒!

    回覆刪除
    回覆
    1. 同事食完嘢飲啖茶水滾動一番再吞下去,想死!

      刪除
    2. 即是漱口聲音,不過飲埋又幾勇嘅。

      有人㗩香口膠到㗩㗩聲,或答答聲。幾討厭

      刪除
  3. 我最怕補牙洗牙, 除咗聲音外, 劈大個口合唔埋, 好似被人強姦咁.

    回覆刪除
    回覆
    1. 擘大合唔埋,感覺如強姦,你呢個比諭好貼切。

      刪除
    2. 仲有我好驚去gym聽到D男人舉鐵時hee hee hai hai, 覺得好似佢地俾人強姦咁.

      刪除
    3. 我做gym都見唔少,hei hei ha ha咁叫,又把啞鈴大力掉落地,好原始人的擧動。

      刪除
  4. 一班麻甩佬圍埋,粗口橫飛!都幾過癮!

    回覆刪除
  5. 第一位bb喊聲真係好慘,
    尤其長途機上,十多小時被折騰,又不好投訴,做媽媽的已經很累很煩呢。
    重有初學小提琴的鄰居
    每日拉牛咁聲
    唉!
    另外,我好怕時鐘滴答聲,
    如果在朋友家留宿而有這種鐘
    我會弄停它,或放進柜內,否則無法入睡。

    回覆刪除
    回覆
    1. 妳討厭的鐘滴答聲,我反要靠它幫我入眠

      我在K房內,有時要忍受朋友的噪音

      刪除
  6. 我最怕女人的罵聲,和地鐵裏大大的粗口聲(粗口那個男生沒講過,但地鐵裏的真係特別惡頂)!

    回覆刪除
    回覆
    1. 我見過啲女仔,表面斯文,一開口勁過咕喱佬

      我都討厭它上司和客戶的聲音,一聽到就煩厭

      刪除
  7. 我又加幾嗰:

    夜晚鄰居開派對重base
    打鼻鼾
    夜晚瞓覺時蚊喺耳邊嗡嗡嗡

    哈好似都同瞓覺有關。

    回覆刪除
    回覆
    1. 我又回幾句:

      咪高峰的feedback v v 聲
      貨van炸機聲
      電視的假拍掌假笑聲

      刪除
  8. 細個隔離屋唱爆炸K也是很難頂的。

    我而家一聽《傷心太平洋》就打冷震。

    回覆刪除

LinkWithin

Blog Widget by LinkWithin