~~~~~~~~~~~~~~~~







2007年10月22日 星期一

時裝店sales

時裝店sales

週末假日的時侯,
我會行時裝店作window shopping,
每間時裝店內sales講嘅說話差不多,
現在數一數時裝店sales有乜公式對白。


第十位 「呢件貨新返架!」
顧客買衫梗係想買今季最新最流行,
如果可以預買到明年最新的時裝就更好!
所以sales必會推介給顧客:「呢件貨新返架!」
希望顧客對該件衣服會加多些分數。
但「呢件貨新返架!」的意思可能等於:
「呢件上年嘅舊貨啱啱由大陸嗰倉運返落嚟架!」


第九位 「我同妳keep住先,睇吓仲有無嘢啱?」
減價時節顧客買得特別疏爽,
左手執一件右手攞一件。
Sales見妳手上抱着一堆衫都幾辛苦,
就會同妳講:「我同妳keep住呢幾件先,睇吓仲有無嘢啱?」
等妳無後顧之憂再買多幾件。


第八位 「買多一件就有discount喎!」
當顧客埋單時,Sales先問妳:「有無會員咭?」
有會員咭就享有discount,
如果無會員咭就問:「而家買多一件就有discount喎!」
希望遇到貪平宜的顧客就可以開張單大啲!
此句推廣到超市便利店,
顧客結帳時收銀員會問:「加多2蚊可以換購一包喉糖喎!」


第七位 「多謝哂!下次再嚟睇過!」
很典型也很機械式的Sales必講金句。
如果顧客無購物就會講:「多謝哂!下次再嚟睇過!」
如果顧客有購物就會講:「多謝哂!下次再嚟幫襯!」
有些Sales會交足戲,擠出一點笑容,
有些則木無表情,眼無focus、口齒不清地喃喃。


第六位 「啱款就著上身試試!」
如果顧客望著某件衫多過5秒,
Sales就會從顧客身後彈出講:「啱款就著上身試試!」
顧客有時覺得自己購物情緒給Sales騷擾,
便會轉身走人,
剩下的Sales變成一個失望的漁夫,
望著受驚的魚兒快速地游走。


第五位 「試啱個size先。」
如果顧客有心試又有心買,
就會拿去更衣室試一試。
試後總覺得其他顏色或款式更靚,
問Sales有無紅色?有無開胸?有無圓領?
而該件貨品又放在貨倉中某處需要時間去找,
Sales驚浪費時間白找一趟而最終貨品size不適合客人,
就會叫顧客「試啱個size先。啱size我入倉攞件新俾妳。」
這樣入倉摷那件衫就一定適合客人無誤,
Sales的子彈就不會虛發!


第四位 「同妳check吓邊間分店仲有貨?」
遇上心頭好可惜只剩下display那一件,
Sales就會主動講:「等我同妳check吓邊間分店仲有貨吖?」
如果分店有貨,替客人留貨後,
客人會覺得千辛萬苦得到的特別可貴!
如果真係全線斷貨,
Sales就會說:「妳留低姓名同電話,
有貨就一定第一時間call妳。」


第三位 「隨便睇、慢慢揀。」
顧客一踏入店舖內,
迎面劈頭第一句就是:「隨便睇、慢慢揀。」
雖然有點多餘,
難道會叫顧客「嚴謹睇、速速揀。」咩?
但這句「隨便睇、慢慢揀。」就像催眠般,
讓顧客更加知道自己是顧客,
讓Sales更清楚自己是Sales;
再一次界定彼此的授與受的關係。


第二位 「攞埋鏡拼拼!」
時裝店怎可能沒有鏡,
如果顧客拿起件衫入更衣室試身是2人單獨約會的話,
那麼攞起件衫埋鏡拼拼,就只是2人蜻蜓點水般點點頭。
「攞埋鏡拼拼」時,人與衫的關係當然無著上身咁密切,
隨手拿起隨手放低,不拖不欠;
切合時下年輕人的現代愛情觀。


第一位 「嘩!Miss呢件衫好啱妳喎!」
有些Sales會hard sale一點,
當顧客試完衫後會讚美顧客穿得靚:
「呢件衫真係好襯妳呀!」、「妳完全可以carry到呢件衫!」
「呢件衫將妳嘅優點表露無遺!」、「呢件衫著到妳好sharp!」
「我從來未見過客人可以著得呢件衫咁靚!」
讚美幾句,客人又開心,Sales又可以開單,
老闆有錢賺,又能夠剌激經濟!
何樂而不為呢?

8 則留言:

  1. Carson你俾你個email我, 我add你入我個private list, 咁你就可以睇我個blog, 因為我依家淨係俾朋友睇. :D

    回覆刪除
  2. Cora,
    好啊!
    多謝妳的邀請,

    carsonchung@gmail.com

    妳的blog變為私人性質
    有什麼特別事發生?

    回覆刪除
  3. 埋 lai 睇 埋 lai kan
    唔準試, 要先比你睇

    回覆刪除
  4. Sales妹,
    "埋嚟睇 埋嚟揀"
    這句街市小販也有用到
    c

    回覆刪除
  5. naruto

    sales問:要唔要我試比你睇?
    ==>如果係胸圍內褲就無妨

    回覆刪除
  6. sales: 賤格...不過...另加收費都可以諗諗嘅

    回覆刪除

LinkWithin

Blog Widget by LinkWithin