物業代理

物業代理

我上班的地方，
附近有一個新落成的樓盤；
在售樓處門外有一大班物業代理結集。
如鯊魚般徘徊尋找襲擊目標。
以下是我對物業代理的概括印象，
數出物業代理的十種特色：


第十位「膚色黑黝」
由於代理們長期於戶外曝曬，
所以他們甚少是膚色白哲。
而且由於長期站立、睇樓、流汗，
他們的身型都黑黑實實居多，
新樓盤仍有工程要執手尾，經常有曬黑的地盤佬出入，
代理和地盤佬，替新樓盤帶來海南島的熱帶風情。

第九位「嚼香口膠」
和客人傾談時，
有口氣便成為最大障礙，
所以他們都愛嚼香口膠，
保持口氣清新之餘，又可以有啲勢藝，
但面對客人時，他們仍繼續嚼香口膠，
欠缺尊重又輕佻，幫趁你買就奇！

第八位「戴Bluetooth或免提裝置」
代理們的雙手留返嚟揸file或售樓書，
所以講電話時用Bluetooth或免提裝置。
而且用藍牙給予客人一種專業、高科技、
多電話多客多生意的錯覺。
見他們站在一角自言自語，表面是跟客人問價還價，
其實是約朋友食晚飯而已。

第七位「手戴蜜蠟」
售樓是一種銷售性工作，
代理們多迷信，依賴運氣的重要性。
所以他們手戴蜜蠟或配戴水晶來催生財運；
代理們手上黑黃啡色的蜜蠟，
替他們添加多一分麻甩佬味（可參考巴士阿叔的左右手）。

第六位「窄身恤衫西褲」
代理們愛穿窄身恤衫西褲，
而恤衫顏色多以粉紅、粉橙、淺紫、草綠等鮮色，
愛恤衫摺袖，加條搶眼的領帶。
窄身西褲以黑色為主；配以尖頭高踭的黑鞋。
結果令他們看起來更MK！

第五位「凌亂髮型」
年輕的代理們愛梳「凌亂髮型」，
用成支GATSBY將頭髮摷亂，或者染髮，
代理們模仿日本雜誌內東京街頭髮型速寫，
但付出的代價就是代理似model多過似物業代理。
個人的專業性可信性徹底破產！

第四位「顏色框眼鏡」
年輕的代理們愛配戴有顏色框的膠眼鏡，
白色、黃色、紅色、綠色、紫色等等。
身為sales，配戴金絲眼鏡可以提高成熟穩重的形象，
但一副「顏色粗框膠眼鏡」則弄巧反拙，
讓客人會產生「刮你兩巴掌」的正常心理衝動。

第三位「斜孭袋」
代理們身上的電話、香口膠、PSP、
證件、銀包、鎖匙、紙巾等雜物，
都放在一個「斜孭袋」內，
騰空兩手去做銷售工作。
代理們愛用名牌斜孭袋，來突顯自己的收入懶高，
魚目混珠用深圳A貨，大有人在。
有些代理則不用斜孭袋，
喜愛把所有雜物都塞進褲袋內。
褲浪有咁大兜得咁大兜！

第二位「鍥而不捨」
代理們必備的「打不死」、「死纏爛打」精神，
是入行的最低消費額。
就算客人斬釘截鐵話無錢買樓，
代理們必會說：「銀行一定借足俾你」，
你話：「買樓唔係買菜，要諗清楚」。
他會答：「好多人都係無心插柳之下執到筍嘢，你的起心肝去買反而買唔到，
做人係咁架啦！」
佢要求簽番份臨時合約：「碌卡俾住少少首期先，好快趣簡單，15分鐘都唔使，就做業主。」
總之他們有齊所有標準答案，勢要迫客埋死角為止。

第一位「結隊煲煙」
代理們壓力大，成日俾公司捽數，
食無定時，又要忍大小二便，
只好靠吸煙來舒緩壓力。
而且在非繁忙時間，無客人出現之際，
聯群結隊到去煲煙打發時間，亦未嘗唔係一件賞心樂事。
代理們圍着煙灰盎，互相吹水收風交換情報。
很多市場行情、樓市趨勢、江湖傳聞、男歡女愛，
也是在煙灰缸前燃燒出來。
不懂抽煙的代理，就像不懂講粗口的苦力一樣，
總是欠缺一點神韻。