~~~~~~~~~~~~~~~~







2015年3月23日 星期一

超人手錶


超人手錶

80年代初,香港經濟開始起飛,但很多人仍過著清貧的日子。七歲的阿超(即是今天的Alex),跟父母租住觀塘廉租屋,父親做地盤工人、母親因要照顧阿超,在家中做「家庭件工」:即是從附近山寨廠攞物料回家裝嵌或包裝,幫補家計。阿超十分聽話,課餘時都會主動幫媽媽「黐膠花」、「黐公仔頭」。那一代的小朋友,不像今天般被溺愛,會做家務和比較聽話。

那一代的廉租屋,其中一個特點:就是鄰里關係比較密切,左鄰右里姓乜名乜做緊乜都知道。不像今天隔離屋有無人住都唔清楚。

阿超愛跟同邨的同齡小朋友到樓下玩,到黃昏食飯時候便會自動歸家。那時候電視台播映「日本超人片」,小朋友們通通都是超級擁躉。睇完超人片的後遺症,就是小朋友們會模仿「超人打怪獸」,當然他們不是真的打架,只是模仿招式和扮射死光扮死。但問題來了:小朋友們 誰來扮超人?誰來扮怪獸呢?

超人片中,男主角要靠一隻「超人變身手錶」,大嗌聲:「變身!」後,幾聲「焦焦焦」加上幾吓閃光,「噔!噔!噔!」男主角便變成十層樓咁高的超人,跟住落場打怪獸。

玩具商見到此商機,出產了這種「超人手錶」,在百貨公司內售賣,五十元一隻。如果小朋友戴著「超人手錶」,他便可以有權扮超人,無錶的小朋友,只有扮怪獸的份兒,阿超當然是後者啦。

阿超回家嚷著父母要買50元的「超人手錶」,媽媽當然唔理佢,解釋50蚊可以買好多餐餸。老豆不解溫柔,大聲鬧阿超:「玩玩玩?仲唔去讀書!」、「唔讀好書,想學老豆日日去擔泥呀?衰仔!」阿超咬著嘴唇退下。

第二天早上,媽媽接阿超放學,途中對阿超說:如果阿超下次測驗考到100分,媽媽就送他「超人手錶」,作為獎勵。阿超立即精神起來,有希望買手錶啦,阿超便可以變超人!

阿超回家立即專心溫習,屋邨小朋友們來到門口,叫阿超出去玩,阿超引拒了,心諗:「我買到超人手錶,先至收拾你哋!」

星期五舉行測驗,阿超好有信心去應戰。份測驗券難不了阿超,阿超考完,心情大喜!下周星期一派券後,便可以拉媽媽去百貨公司買「超人手錶」。

星期一老師派券,阿超接過測驗券後一看,竟然是95分!自己犯了一個唔小心錯誤,扣了5分。阿超十分失望,回家後悶悶不樂。媽媽知道阿超平日只考得6070分,今次有95分已是大進步,但媽媽決定不買「超人手錶」給他,以身作則教導阿超:「規則就是規則,不能偷雞賴貓。」阿超扮不到超人,垂頭喪氣。

第二朝早起身,阿超發現右手手腕上,竟然被晝了一隻手繪的手錶!原來媽媽用黑色箱頭筆,在阿超右手,晝了一隻手錶作補償。阿超笑了,落床找媽媽。

媽媽從抽屜中取出一隻平價塑膠電子手錶,送給阿超。原來昨天媽媽從山寨廠取電子錶殼回來,加裝錶帶。她發現工廠工頭,無意間數多一隻錶給她,媽媽把它留下,送給阿超。

阿超很高興,雖然手錶沒有機關,不懂發光發聲,但它是自己第一隻手錶。阿超多謝媽媽後,出門口跟小朋友玩。自已戴著太空電子錶(『太空』兩字是阿超自行加上),阿超終於可以扮第一次超人了,很爽呀!回家連睡覺時也捨不得除下手錶。

可惜第二天,其中一位小朋友買了最新款的超人雷射手錶,阿超的電子錶完全被比下去,扮不成超人。阿超唔玩,嬲爆爆回家。阿超在家中想:與其自己激氣,不如積極反擊。阿超見家中有顏色通紙和汽水樽蓋,決定DIY做手工,用膠水左黐右黐,把電子錶改裝成「土砲超人手錶」,立即出去跟小朋友們比拼過。「大堆頭」製作,令阿超又爭回超人的角色。

如是者,當有小朋友買了新玩具錶,阿超便要回家把手錶「推土重來」改裝,而且愈戰愈強,size愈來愈大、外型愈來愈誇張,錫紙、螺絲、鐵線、吸管、燈泡乜都用上。阿超便在這環境下訓練出他的創意和手工技術。

* * * * 

阿超升上中學後,爸爸當上地盤扎鐵師傅,家庭的經濟條件改善了。阿超有零用錢,他唔食飯慳錢來買「高達」模型,在家中砌呀砌。因為砌得太靚的關係,班中那些有錢仔同學,願意出一百元手工費,把模型交給阿超叫他代砌。阿超有錢收、又有模型砌,何樂而不為呢?他從砌模型中獲得認同和肯定。

* * * *  

中五會考後,阿超只考得十分,讀不成預科也不考慮重讀。父親叫阿超去做電工學徒,起碼有一技旁身,做師傅自力更生。但阿超根本對電子技工無興趣,反而認為自己對美術設計有天份。媽媽學穿兒子心意,花口水去說服丈夫,更供學費給阿超去「大一設計學院」讀商品設計。

阿超在那裡學習顏色運用、視覺美學、商品製作。畢業後,Alex(阿超改了英文名)在一間美資公司做Product Development technician。工餘時間砌Action Figure,改裝Figure到出神入化。

在女朋友鼓勵下,Alex參加全港公開Action Figure比賽,憑著十幾年的經驗、技術和大膽創意,Alex打敗對手們,贏了公開組冠軍,有五千元獎金。獎金事少,闖出了名堂事大,相信Alex日後將會變成潮流達人,跟流行品牌cross-over,名利相收。

* * * * 

第二朝早媽媽起身,媽媽發現右手手腕上,竟然被人用黑色箱頭筆晝了一隻手繪的手錶。當然是Alex的傑作。年邁的媽媽,破嘴笑了。

Alex從抽屜中取出一隻三千元的名貴手錶,替媽媽戴在她手上。Alex用那筆比賽獎金買下這枚手錶,報答她那隻啟蒙塑膠電子錶和供讀設計學院的學費。

兩母子,相對微笑,血濃於水,何須再多言呢?

改編至廖惠玲的《手錶》




二少爺說︰我細個的時候,睇超人片長大。不像現在的小朋友般要學小提琴、鋼琴、芭蕾舞、外語、珠算….

16 則留言:

  1. 玩親情+勵志,好感人喎,呢篇冇乜印象。 :o

    其實阿超唔係因為扮唔到超人而唔開心,佢係畀D戴住「超人手錶」嘅小朋友講嘅一句說話激親,你哋對住阿超大喊:「錶你有冇?」

    回覆刪除
    回覆
    1. 一講到母親的包容栽培,就容易打動別人

      阿超大聲回應:「條脷無毛!」

      刪除
    2. 阿超嘅母親好識教仔,自細就透過園藝教導阿超做事有耐性、愛惜生命等做人道理。
      阿超長大以後,在外每當遇到令佢生氣嘅人和事,佢都會想起母親嘅教誨,自然咁講一句「番屋企調理農務喇!」

      刪除
    3. 阿超嘅母親教佢要用「有機肥料」,阿超會燒紙灰作肥料,他一遇不高興事情,就會「燒你數薄」,以作肥料。

      刪除
    4. 除咗用紙灰之外,佢仲有一種家傳秘方嘅有機肥料,就係「bb嘅便便」。母親話bb係天真無邪、有赤字之心,係非常聖潔嘅。

      佢一唔高興,就會大叫呢個秘方肥料嘅洋文: holy shit!

      刪除
    5. 阿超做FIGURE 發咗達,因為戀母情義結,喜歡年紀大的女人,特別是MODEL。「調戲老模」

      刪除
    6. 靚模嫩模見阿超年輕有為,又有錢又靚仔,竟然鍾情於老模,自己釣唔到金龜,不禁感嘆地說一句:「調戲老模兮」

      刪除
    7. 一些偏激的靚模嫩模,更指責老模是殘花,大叫:「調戲老模殘花兮」!

      刪除
    8. 老模薑越老越辣,以行動回應她們的冷嘲熱諷,拖著阿超「跳佢老舞」,激到班靚模扎扎跳。

      刪除
    9. 跳老舞講腰力,跳得多,條腰出返嚟,老模得戚問人︰「腰你有無」?!

      刪除
    10. 老模年紀大,跳跳吓跌親,仲起唔番身添,阿超企咗喺度唔知點算。

      靚模們落井下石咁對阿超話:「go to help(hell) her la」

      刪除
  2. 難得有人識得大一設計學校,我去見工,有d人聽到未聽過
    興趣變成事業是好,但我做了幾年,整個人都變得沒創意

    回覆刪除
    回覆
    1. 我讀過大一架,商業平面設計,不過遠古年代了....

      有沒有創意視乎工作環境,例如老闆日日要係交橋,真係搾乾腦袋,有趣都變成苦事,相反在刻板的工作中,偶爾反叛下創新,又好過癮

      刪除
  3. yau:

    創意跟聯想力有關,要經常不能集中精神的人,才會有創意。你的性格可能不適合創意的行業。

    回覆刪除
    回覆
    1. 有人話張辦公枱越亂,創意越高,唉.....我辦公枱OK整理....唔怪得喇

      刪除

LinkWithin

Blog Widget by LinkWithin