~~~~~~~~~~~~~~~~







2014年9月7日 星期日

百年好合


百年好合

(這篇是新寫的)

婚姻乃人生大事,可以舖張可以從簡,悉隨尊便。如果決定擺酒就要安排婚宴。我都出席過不少婚宴,今次就數一數婚宴中最經常聽到的十句說話。

第十位︰大家俾啲熱烈嘅掌聲
婚宴司儀講完開場白,又播完「新人成長Video」,係時候要請一對新人進場。新郎新娘在宴會廳的門外等候,MC說︰「大家俾啲熱烈嘅掌聲,歡迎一對新人進場。」賓客就鼓掌,並放花炮,婚禮進行曲奏起,大門打開,Spot Light照射,新人在掌聲中進場。

第九位︰未影相嘅朋友請到台前
有一些賓客遲到,未能在開席前上台跟新人合照。所以到敬酒環節之後,新郎新娘空閒返啲,當新娘補妝後,就會叫MC呼籲︰「未影相嘅朋友請到台前」,一些未合照的朋友便到台前排隊「補飛」,或者影過的親友都會再影。

第八位︰我正式宣佈你哋成為夫婦
新人喜歡請律師到婚宴現場,即場辦理註冊手續,無非都是想眾親朋戚友見証他們的誓約。律師問完雙方意願,又無人反對之下,便會說︰「我正式宣佈你哋成為夫婦」,禮成,並拍片紀錄成為證據。

第七位︰多謝嗲哋媽咪
新人要當眾來賓致詞,可能父母出錢資助自己搞婚禮,或者有感於父母養育之恩,所以新郎通常都會講︰「多謝嗲哋媽咪!」 最重要就係要講埋︰「仲要多謝外父外母!」,新娘也識做講聲︰「仲要多謝老爺奶奶!」

第六位︰酒微菜薄,招呼唔到
無論新郎新娘開席前致詞,或者男女親家排成一排送客時都例必講呢一句,就係︰「酒微菜薄,招呼唔到」,成晚咁多賓客,一對新人無機會跟每一位來賓打招呼傾偈,所以要講聲「招呼唔到」。

第五位︰飲過新抱茶,富貴又榮華
婚宴上的一位重要角色︰「大襟婆」,增添不少歡樂氣氛。而台上敬茶環節,十分精采。更應列入「聯合國非文質文化遺產」項目。其他金句包括︰「飲過新抱茶,好快做嫲嫲。」、「一啖飲到尾,年頭賺到年尾」、「戴過金手鈪,好快買豪宅」、「戴過金戒指,生個金童子」、「金鍊戴上頸,好快住山頂」。

第四位︰咀佢!咀佢!
一對新人在台上切完蛋糕,又合交杯之後,司儀點會咁輕易放過新人,問嘉賓還欠甚麼?來賓便齊心大叫︰「咀佢!咀佢!」新人徇眾要求,錫下滿足大家。

第三位︰恭喜哂!
賓客由步入宴會廳,見到新人的家人,講聲恭喜(如果相熟的話)。見到新郎新娘,衷心講恭喜。離開時在門口見到男家女家烈隊送客,握手道別時,又講聲恭喜。不過現代人並非個個都咁有禮貌,有些賓客唔多會/識講。

第二位︰飲杯!
記憶中我兒時去飲,最喜歡的環節便是餸來起筷前,成圍大聲嗌︰「飲杯!」,到了今天,只要該圍枱全部都是好朋友,仍保留這「嗌飲杯」的習慣。但如果混來一些陌生人,大家便怕尷尬,改細細聲講「大家起筷」。

第一位︰1~2~3
司儀試咪時,會講︰「testing 1~2~3」。而賓客來到婚宴時,當然要跟新人合照留念。攝影師說︰「1~2~3」便按下快門。賓客就坐時,碰見好耐無見的朋友,找人幫手影合照,又數「1~2~3」。或者朋友們自拍,也得要數「1~2~3」。現在大家都愛用電話都拍照,所以「1~2~3」成為第一位。


送給Irene

二少爺說︰現在婚禮少了以前的玩新人環節,大家都好。




14 則留言:

  1. 講起又係喎,我都冇乜印象...我怕人多,所以好少去婚宴...>.<!

    回覆刪除
  2. 卡臣:

    加拿大的華人飲宴都是「劃位」的,不會跟一些不相識的人同檯.

    回覆刪除
    回覆
    1. 香港就為了減少圍數,揍夠12個一枱,張三加李四

      刪除
  3. 卡臣,你講嘅係表面或台上「最經常聽到的十句說話」,我補充少少台下嘅說話先。

    一眾男賓客說:嘩,你睇吓,班姊妹個個都低胸,今次嚟飲真係有得睇,又有得食喇。

    一眾姊妹說:你哋睇吓,個新郎咁cheap o架,畀咁少錢開門利是,遲吓肯定餓死老婆瘟臭屋。

    回覆刪除
    回覆
    1. 哈哈! 真係要寫返個台下版,

      例如︰我都會話︰嘩! 乜有抽獎?! 你估晚會咩!

      刪除
  4. 卡臣,我結婚無擺酒,所以無請你飲,有機會補番數...^^!

    回覆刪除
    回覆
    1. 唔使補返數,結婚一次夠喇。
      哈哈,係咪

      刪除
    2. 卡兄,
      我意思係如果有機會就請你飲嘢乍... 唔係再擺酒呀... 大吉利是>.<!
      無論如何,祝中秋快樂...

      刪除
  5. 香港请酒,系咪晚上9点过后先至入席架?好似话仲要先俾D宾客打麻雀、食炒粉顶下肚?

    回覆刪除

LinkWithin

Blog Widget by LinkWithin