~~~~~~~~~~~~~~~~







2014年9月19日 星期五

外科醫生話︰


外科醫生話

記憶中,我最早接觸到外科醫生的印象,是來自我兒時睇香港電視劇,從那些場面和對白,揍合成對醫生的輪廓。香港一些電視劇以醫生和醫院做主題,今次數一數香港電視劇中,外科醫生通常會講什麼說話?

第十位:「網上搵到一個外國嘅病例。」
電視劇中的醫生遇上罕見病症,束手無策。但醫者父母心,永不放棄。結果醫生通宵上網,終於在互聯網上找到一個外國病例,並找到治療的頭緒。第二朝早醫生對病人的家屬說︰「網上搵到一個外國嘅病例」,家屬大喜,終於找到治療的曙光。

第九位:「根據化驗報告結果顯示...
外科醫生相信報告和數據,所以病人接受身體檢查後,就輪到醫生睇報告,向病人解釋病情時,第一句開場白就是:「根據化驗報告結果顯示...」病人好緊張,迎接可能是一個好消息,也可能是一個壞消息。

第八位:「唔好意思,趕住返醫院救人!」
一輛名貴汽車超速,遭交通警截停在路旁,醫生好緊張咁向交通警出示証件:「唔好意思,趕住返醫院救人!」咁交通警就會網開一面,放走醫生。而在電視劇中,醫生間中也會濫用這個特權。

第七位:「同佢傾多啲偈,幫佢恢復記憶。」
病人患上失憶症,癡癡呆呆。醫生對病人的家屬說:「同佢傾多啲偈,幫佢恢復記憶。」雖則講就係咁講,但在電視劇中,失憶病人最後好返,通常全靠另外一吓意外的頭部撞擊,立即乜嘢都記返起哂!

第六位:「手術好成功,但係病人仲未渡過危險時期。」
病人遇上嚴重意外,送到急症室搶急。病人家屬朋友站在急症室外心急如焚地等候。手術燈熄了,醫生走出來,病人家屬一擁而上:「醫生!點呀?」 醫生除下口罩,喘一口氣:「手術好成功,但係病人仲未脫離危險時期。」在電視劇中,ICU中的昏迷病人,通常都是有化妝,面色紅潤

第五位:「你哋要做好最壞嘅心理預備。」
手術室的手術燈熄滅了,醫生步出來,病人家屬朋友一擁而上:「醫生!點呀?」 醫生除下口罩,搖搖頭:「你哋要做好最壞嘅心理預備。」,之後轉身離開,家屬朋友失聲哭了出來,唯有祈禱,等待奇蹟出現。

第四位:「對唔住,我哋已經盡哂力。」
醫生要向病人家屬報告死訊,不會直接地說「病人已經死亡。」而是婉轉地說:「對唔住,我哋已經盡哂力。」意思是撇除了所有醫療失誤和失當,醫生已經盡哂力,都救唔返病人,只因病人體質太潺弱了。

第三位:「大家鎮定啲,我係醫生!」
在鬧市街頭,有途人突然受傷或昏迷,旁人措手無策。這個時候,醫生剛巧路經,立即十分鎮定地從人群中走出來,表示身份:「大家鎮定啲,我係醫生!」進行初步急救:「大家退後,俾多啲空氣、解開佢嘅頸喉鈕……」旁邊的女主角被醫生的魅力所吸引著。

第二位:「Certified!死亡時間係
病人的脈搏儀器,由有節奏的起伏,最後變成了一條直線。病人失救死亡,要紀錄低死亡時間,醫生用「Certified」一字,證實病人的死亡。「Certified!死亡時間係下午38…..

第一位:「Clear!」
病人的脈搏由強轉弱,接近停頓,在這危急關頭,醫生出最後法寶,用電激儀器,刺激病人心臟,令它再次跳動。醫生向身邊人大嗌:「Clear!」電擊到成個病人彈起,之後再進行心外壓和人工呼吸。但病人始終都係無乜反應,醫生重複向身邊人大嗌:「Clear……」成為醫生的專業術語。



二少爺說︰我第一次接觸到「血癌」兩個字,是1985年聽到張學友的《遙遠的她》。


20 則留言:

  1. 其實呢, 有案例同有治療方法之間係要好長時間

    回覆刪除
  2. 卡臣:

    仲有,病人做完手術若果仲唔醒,醫生就會同家人講:『病人醒唔醒得番,要靠佢自己嘅意志.』

    昏迷咗都仲有意志,真喺做戲咁做!

    回覆刪除
  3. 仲有,兩名醫生喺pantry嘅對話:「喂,新嚟嗰個女護士好正喎,有冇興趣先?」

    回覆刪除
    回覆
    1. 跟著鏡頭一轉,在貯物室幽暗處

      刪除
    2. 那個女護士爬上長梯,去取大櫃頂上的醫療物品。

      刪除
    3. 女護士跌倒,昏迷,醫生入房見狀⋯

      刪除
    4. 醫生二話不說,伸出安祿之手替她驗查

      刪除
    5. 此時,女院長唔知點解突然出現,男醫生反客為主,先問女院長做乜?

      刪除
    6. 女院長笑而不語,慢慢走到女護士身邊,從背後取出......

      刪除
    7. 竟然取出一碟星州炒米和一杯吸不仙奴,難道院長係街頭魔法王?

      刪除
    8. 女護士聞到美食嘅香味,即時彈起身,點知醫生快佢一步

      刪除
    9. 點知醫生快佢一步,搶飲COFFEE,之後好痛苦在地上抽蓄

      刪除
    10. 不消幾分鐘,醫生口吐白沫,七孔流血。女護士同埋院長一邊食星州炒米、一邊欣賞這一幕......

      刪除
    11. 好嘢~~黑色哈佬喂字幕打出,廣告一個

      刪除
    12. 佩服,呢個尾收得好,仲有黑色大海馬緊接字幕出現添。

      刪除
    13. 我佩服你才是,twist得好,我先埋到尾,其實啱啱睇到電視廣告

      刪除
  4. 粵語長片好似仲有句「節哀順變」>.<!

    回覆刪除

LinkWithin

Blog Widget by LinkWithin