~~~~~~~~~~~~~~~~







2014年7月9日 星期三

敷衍回應


敷衍回應
有時候,朋友情侶同事家人跟你講嘢,長篇大論,吟吟沉沉,你無心機聽,只想敷衍回應。今次揀選了十句「百搭敷衍回應」,可在不同的情況下使用,但其實,求其亂咁使用都無問題,因為對方都知道你正在敷衍他。

第十位:「我點知吖?」
當對方問了一個常人很難解答的問題,由複雜的政治時局、宗教哲學到外星人,聽到對方第一句,便知道是關於難答問題,自己的大腦已經可以熄機,繼續扮聽,Skip去所有內容,待對方講完,你敷衍回應一句:「我點知吖?」對方便知道你無能力提供答案。

第九位:「我明你講乜!」
當對方陳述緊一件複雜事情或解釋一個深奧道理,對方都驚你聽唔明咁複雜的事情,發出懷疑目光,繼續扮聽,Skip去所有內容,待對方稍為停頓,你敷衍回應一句:「我明你講乜!」對方便知道你follow到,繼續長篇大論。

第八位:「唔係呀嘛?」
當對方講緊一單匪夷所思,但又未能引起你絲毫興趣的事情,對方不斷口沬橫飛,你繼續扮聽,Skip去所有內容,待對方講完,你敷衍回應一句:「唔係呀嘛?」
對方便知道你也覺得unbelievable,有共鳴。有人愛將「唔係呀嘛?」讀作「唔係呀化?」增加其趣味。

第七位:「係咁架啦!」
當對方講緊一宗日常生活見怪不怪的事情,將一件無關痛癢甩東西無限放大,對方少見多怪,但聽到你打呵欠,繼續扮聽,Skip去所有內容,待對方講完,你敷衍回應一句:「係咁架啦!」對方便知道你已經對該事情麻目了。

第六位:「人之常情啫!」
當對方談論緊別人的是非,無論讚或彈,對方細訴這人的是非好壞、黑白錯對,但你其實唔識那人。繼續扮聽,Skip去所有內容,待對方講完,你敷衍回應一句:「人之常情啫!」咁無論對方讚或彈某人,都是正常之人性驅使。可加多一句:「人之常情啫!俾著係你,你都會係咁啦!」

第五位:「真係無嘢好講!」
當對方投訴緊一單好激氣的事情,一肚子氣!叫人感到冤屈,不滿和憤怒,但事情跟你無關係。繼續扮聽,Skip去所有內容,待對方講完,你敷衍回應一句:「真係無嘢好講!」等於你對一些不合理的事情無話可說。其實表達了你對「事不關己」的事情「No Comment」而已。

第四位:「呢啲嘢話唔埋!」
當對方講緊一些「無稜兩可」的道理時,正所謂「世事無絕對」,結論可以是正確、也可以是錯誤,繼續扮聽,Skip去所有內容,待對方講完,你敷衍回應一句:「呢啲嘢話唔埋!」表示你對那些「公說公有理、婆說婆有理」的事情,無絕對答案可言。

第三位:「你有你嘅道理。」
當對方發表緊一些「自己認為正確」的偉論或道理時,把自己的決定和行為合理化、講到自己的做法大條道理。繼續扮聽,Skip去所有內容,待對方講完,你敷衍回應一句:「你有你嘅道理。」表示你明白:他的說話中包含了他的邏輯,不過,該邏輯是否合乎情理,則見人見智。

第二位:「咁搞嘢?!」
當對方講緊一些違反常理、出人意表的事情或經歷時,而對方眼中這些離奇事情,並未能引起你的興趣。繼續扮聽,Skip去所有內容,對方講完後,要求你講出意見,你敷衍回應一句:「咁搞嘢?!」「咁搞嘢?!」三個字包含了強烈的驚嘆情緒,「咁搞嘢?!」等於你認同該事情的荒誕性。

第一位:「咁睇你點睇啦?!」
當對方遇上問題,要求你提供睇法和要求時,對方首先將整件事情由始至終,每個細節都娓娓道來,成份口供咁詳述悶爆你。繼續扮聽,Skip去所有內容,對方講完事情經過後,要求你講出立場意見,你敷衍回應一句:「咁睇你點睇啦?!」將對方的問題,立即變成自己的問題,反問返對方。好似打網球咁,球來一擋,隨手一抽,打番過去,慳水慳力。



二少爺說︰這篇寫於2009年,而家玩whatsapp,敷衍回應是「表情符號」。



10 則留言:

  1. 網絡上嘅標準敷衍回應係:thx for share :p

    我要畀心機學,進階可以用複合嘅敷衍回應,我嘗試吓造句先。

    起:
    呢單嘢 「咁搞嘢?!」,「唔係呀嘛?」,我聽完之後「真係無嘢好講!」。
    承:
    不過諗落都算係「人之常情啫!」,世事嘅嘢「係咁架啦!」,「呢啲嘢話唔埋!」。
    轉:
    此終「你有你嘅道理。」,「我明你講乜!」。
    合:
    件事到最後邊個啱,「我點知吖?」,都係「咁睇你點睇啦?!」

    一次過用晒10句,畀10個combo對方,咁就係一個好嘅聆聽者喇。 :)

    回覆刪除
    回覆
    1. 多謝哂,你呢個回應一點也不敷衍,仲有起承轉合,有消化並發揮。佩服~

      email的敷衍.....noted / read

      刪除
  2. 卡臣:

    做乜每段都有個Skip字?呢篇喺咪叫做「Skip嘢大全」呀?嘻嘻!

    回覆刪除
    回覆
    1. 因為...我寫完第十位之後,copy and past 九次,再改,所以段段差不多。

      刪除
  3. 如果对方系电话到讲,敢就容易啦!可以继续上网,久唔久对住个电话“唔唔”、“哦哦”、"系呀?系咩?系囖!”

    回覆刪除
    回覆
    1. 對呀,有時我都話入LIFT收唔到,隨手CUT線。

      刪除
  4. 我發現用唔同語氣, 聲調, 表情講呢十句說話, 效果同後果都可以有好大分別...
    可以由敷衍變認真都得... 呢篇文, 真係睇你點睇 (好認真咁講) >.<!

    回覆刪除
    回覆
    1. "呢篇文, 真係睇你點睇 "<---敷衍回應示範

      你說得對,溝通來說,身體語言和表情佔80%,說話內容佔20%,

      刪除

LinkWithin

Blog Widget by LinkWithin