~~~~~~~~~~~~~~~~







2014年3月24日 星期一

點指兵兵


點指兵兵

黃大仙某茶樓的二樓,晨運客正在嘆早茶,一盅兩件。眼鏡蛇扮成茶客,一人獨坐一張檯。表面上他正睇緊蘋果日報的豪情版,實則用眼尾監視在三米以外的一名茶客︰四十歲男人,一副江湖人物的衣著服飾和打扮,呢位江湖大佬叫「黑鬼德」,身旁坐了一個保鑣。

眼鏡蛇拿著點心紙,行去黑鬼德張枱對開那架點心車,他向點心阿姐講:「唔該一籠蝦…」「砰嘭」一聲!一槍先「辣」低旁邊的保鑣,再舉槍指向黑鬼德個頭,黑鬼德唔係浪得虛名,他極速拔出腰間手槍,向眼鏡蛇還擊,「砰嘭」一聲!眼鏡蛇如Matrix般拗腰,緊緊避過子彈,在鼻尖前擦過,黑鬼德乘機翻枱,發足逃走。

兩吓槍聲巨響,全場茶客恐慌起哄,茶客趁機唔使找數埋單,「嗱嗱林」蜂擁逃走,有人更趁亂,對女伙計、女茶客乘機抽水揩油,場面十分之混亂但興奮。

眼鏡蛇狂追黑鬼德,跑到人來人往的大街。眼鏡蛇隨黑鬼德跑進一個公園內。公園內樹高又多遊樂設施,一時間失去黑鬼德蹤影。眼鏡蛇立即握緊手槍,提高警覺。因為不知道黑鬼德會在哪一個角落,突然跳出來偷擊自己。

同一時間,警員Sir一人在黃大仙下邨行「單咇」,突然通訊器召喚:「PC24601,有人報案,目睹一名中國藉男子,手持擬似手槍物體,進入黃大仙公園,你去睇睇,over。」李Sir:「Roger,不過你記得要派多啲增援嚟呀!」李Sir暗自嘆氣:「吓!對方有槍咁大鑊?今晚仲買咗飛睇蔡楓華演唱會添架,千祈唔好有事啊!」李Sir死死地氣向黃大仙公園走去。

眼鏡蛇在公園內尋找黑鬼德,但毫無發現。眼鏡蛇在鞦韆架前遇上一名手持玩具槍的四歲男童,突然聽到背後的李Sir大嗌:「差人咪郁!」嚇得眼鏡蛇失去重心向前仆,撞倒該名小男孩,兩人倒跌在地上。一支真槍和一支玩具槍同時掉在鞦韆下的軟膠塾上。

Sir拔出配槍,好緊張又口震震叫眼鏡蛇:「舉起雙手,慢慢起身,將地下支手槍踢過嚟!」眼鏡蛇認得Sir,上個星期在背上臨時紋上「I’M NOT SICK ILLER」後遇上的那個警員。

眼鏡蛇照辦。踢了四歲男童的玩具槍去李Sir腳旁,給他拾起檢查,眼鏡蛇:「阿Sir,我同個小朋友玩『點指兵兵』啫。」

Sir叫四歲男童拾起地上另一支真手槍傳過來。眼鏡蛇趁他們視線轉移之際,高舉的雙手施展「彈指神功」,兩枚五蚊銀挾勁射出,樹枝上兩隻白鴿被擊中墮地。

Sir正快要接過男童遞上的真手槍時,眼鏡蛇:「阿Sir,有兩隻死白鴿呀!禽流感呀!H7N9呀!」眼鏡蛇指著地上兩隻昏死的白鴿大嗌。李Sir大驚,心諗︰「嘩!禽流感?死人嗰喎!自己命仔緊要呀!打工啫,唔使搵命搏呀。」

Sir唔再check手槍啦,立即大步後退,並call台:「黃大仙公園發現兩隻死白鴿,懷疑禽流感呀。」疏散公園內的人。眼鏡蛇趁亂速閃,又一次化險為夷。

眼鏡蛇下一步需要找回男童,換番支真槍。但一時間又唔見咗個男童,突然傳來「砰嘭」一聲……

原來男童喺搖搖板前,一槍隊冧咗黑鬼德。剛才黑鬼德匿埋喺搖搖板打電話班馬時,遇上手持真槍的男童。男童見黑鬼德又揸槍,天真地舉槍大叫一聲「嘭」!怎料眼鏡蛇改裝了自己的手槍作「聲音操控」,聽到「嘭」一聲便會自動開槍。黑鬼德倒地,雙眼睜開,死得不明不白。

Sir聽到槍聲,趕到搖搖板,需要逮捕男童。男童的爺爺更接近精神崩潰:「點解我帶個孫仔嚟公園打韆鞦,會搞出人命架?!」李Sir更自言自語:「唉!呢份口供有排落呀?今晚實睇唔到蔡楓華演唱會啦!」

眼鏡蛇得意洋洋咁逃離現場,黑鬼德已除。又係到「完成任務signature」的時候,咦?乜銀包內所有現金都用光哂喇?又唔記得撳機添,袋中只有一張茶樓點心紙,一於照撕啦,紙碎四揚。

紙碎四散後,眼鏡蛇聽到背後一把聲音說:「先生,唔該身分證」。眼鏡蛇上得山多,今次終於遇上一名食環署檢察。


二少爺說︰點指兵兵,而家啲細佬仔唔識玩囉。

22 則留言:

  1. 卡臣:

    眼鏡蛇真喺好命,只喺隊冧個保鏕,最醒目嗰個大佬,就有條lan代勞,自己又唔駛咩上身。

    回覆刪除
    回覆
    1. 眼鏡蛇唔濫殺無辜,「一槍先「辣」低」指槍傷他,使他沒有攻擊能力啫。

      刪除
  2. 卡臣:

    我聽中文收音機講,夏蕙BB、慕蓮BB和魯芬BB嘅至尊三人組,喺紅館開幾場騷,喺咪真架?邊個咁大膽,夠贍出錢做啲咁嘅嘢,唔驚啲錢渣都無埋咩?

    回覆刪除
    回覆
    1. 千真萬確呀! 夏蕙BB出錢搞的慈善SHOW,慕蓮BB和魯芬BB只是嘉賓而已。

      你不能錯過造千載難逢的機會,買機票回香港睇啦!

      刪除
    2. 卡臣:

      唔駛喇,魯芬BB跳鋼管舞,羅馬柱都會被佢搞斷呀!嘻嘻!

      刪除
    3. 呢個重量級陣容,真係天橋柱都搖斷呀!

      刪除
  3. 哈哈,眼鏡蛇真係好彩喎,佢次次都有人幫佢執手尾嘅,仲有替死鬼添。 :)

    回覆刪除
    回覆
    1. 當初寫唔覺,而家睇返,「找替死鬼」似乎成了每集主題

      刪除
    2. 仲有,每集「完成任務signature」都係唔同嘅,呢個都係特色之一。 :)

      刪除
    3. 係呀,每集都要撕唔同嘅紙,而且通常撞板

      刪除
    4. 撞板多過食飯都係眼鏡蛇系列嘅特色嚟喎。

      銀錢、機票都撕過,咁會唔會撕埋溪錢㗎?

      刪除
    5. 撕埋中咗頭獎嘅六合彩獎券添呀

      刪除
    6. 攞住d殘骸去馬會,希望佢哋會接受喇。

      刪除
    7. 為了變成下期金多竇獎金,我都希望馬會唔認數

      刪除
  4. 蔡枫华戈个时代,D人好似仲未曾识得禽流感尼家嘢窝?

    回覆刪除
    回覆
    1. 妳真不知道,蔡枫华今時今日都有開演唱會,不過就小型一點。

      刪除
  5. 睇呢篇睇到笑左出聲!
    一口氣睇返呢幾日既眼鏡蛇系列~

    回覆刪除
    回覆
    1. 打後幾篇,仍然都係眼鏡蛇陪著`大家。

      刪除
  6. 卡臣,故事情节的发生说时迟那时快,一气呵成,紧张到我啊。。。尤其是黑鬼德被「嘭」掉那一刻!

    回覆刪除

LinkWithin

Blog Widget by LinkWithin