~~~~~~~~~~~~~~~~







2013年8月2日 星期五

卡拉永遠OK


卡拉永遠OK


佳節生日送行洗塵祝捷慶功升職離職等等聯誼活動,都會在卡拉OK內進行。數一數在卡拉OK內,除了顧客的歌聲外,最常聽到的十句說話:

第十位:「房間冧巴係
有朋友遲到,由其他朋友先攞房,邊唱邊等。再call朋友:「喂!房間冧巴係106號!」。大聲地︰「我 – 1 – 0 – 6 – 房!」(因為房內太嘈吵)。再補多一句:「而家去到邊?快啲到呀!」

第九位:「今日做緊特價,攞半打先吖!」
入房坐低唔使一分鐘,啤酒女推廣員入房sell啤酒︰「今日做緊特價,攞半打先吖!」如果客人見女推廣員靚女,調情說:「有乜嘢送先?叫夠一打妳俾妳電話號碼吖。」

第八位:「唔該換mic!」
唱唱吓發覺咪(Mic)拆聲或無聲,按零字到服務台:「唔該換mic!」但通常服務員進來搞兩吓,mic就正常返。當服務員一離開,mic又立即失靈,好邪。

第七位:「要MTV版定演唱會版?」
remote落在某人手中,其他朋友叫他順便點歌,如果該首K歌有兩個以上的版本,就要問:「要MTV版定演唱會版?」

第六位:「要杯蔘茶!」
有酒飲的地方,就會有人飲醉酒。有朋友飲大咗wingwing吓,朋友就會替他致電到服務台:「要杯蔘茶!」但蔘茶未到,佢就已經嘔到一地都係。

第五位:「每人要俾
K埋單時,某人為了簽脹積分先用信用卡結帳,再將錢碼跟朋友平均攤分。把房間燈光調校明亮點。計算之後說:「每人要俾xxx元」,跟一番錢銀交收找續。

第四位:「有冇人識唱?」
有很多新歌試唱,並非個個朋友識唱。當有人想試唱某一首新合唱歌時,就要問房內其他朋友:「有冇人識唱?」結果冇人識唱都照點播,最多按remote的「伴唱」掣,唔唱唔心息。

第三位:「邊個點架?」
當電視畫面出現的K歌無人攞mic認頭,就有人大聲問:「邊個點架?」通常真兇去了廁所或者去取buffet食物或者醉倒,在場人士手急眼快馬上按delete制。

第二位:「Cut呀!」
當朋友以為識唱,發覺其實唔識唱、播錯歌、播錯版本、或者唱得很難聽的時候,就有人大聲嗌:「Cut呀!」或者臨埋單時爭取時間唱多幾隻歌,就會唱到首歌未夠一半,就已經嗌:「Cut呀!」

第一位:「Mic喺邊度?!」
十幾人喺一間房,只得三支咪,在Demand 大過 Supply的經濟理論下,大家要爭相搶mic。有些朋友不埋男女歌都唔放過,點都要唱埋一份。一mic在手就不想再放低。另一方面,顧客付錢來唱K,沒有攞mic,就等如白俾錢,所以大家都視mic如命。猙獰人性一面大暴露。打牌睇牌品可知人品,唱K睇歌品也可知人品。

二少爺說︰我有些朋友可以獨自去唱K,我還未夠膽試。


10 則留言:

  1. 講開卡拉ok,我都有幾年冇去過喇,我諗而家去到,10首歌有10首都唔識唱。 :o

    回覆刪除
    回覆
    1. 咁去卡拉ok夜總會啦,有女PR 教你唱架。

      刪除
    2. 卡臣:

      夜總會公關只係教唱K,不如去報讀音樂學校.嘻嘻!

      刪除
    3. 卡臣:

      我驚我去到會唔留心學唱歌喎,學極都學唔識。 :p

      佛爺:
      去音樂學校,搵杜麗莎學唱歌。 :o

      刪除
  2. 睇完好想再去唱K,好耐無去過喇。

    回覆刪除
  3. 仲有, 當點咗隻歌大家都唔識唱, 但又想聽下, 就會:「唔該開伴唱!」

    回覆刪除
    回覆
    1. 又係喎,但通常伴唱唱到一半,都係放棄嗌cut。

      刪除

LinkWithin

Blog Widget by LinkWithin