~~~~~~~~~~~~~~~~







2013年8月28日 星期三

老細話…


多謝desertfox送我相片。

老細話



香港人鍾意叫顧客做「老細」,例如︰「老細幾多位?」、「老細mark開邊位?」、「多謝哂老細!」打工仔又習慣叫公司管理階層做「老細」,「老細落咗order」「老細又發癲!」、「老細都無面俾!」。不如數吓「老細」最常講乜說話:



第十位:「今日放工前send俾我!」

老細叫下屬做嘢,定下了 deadline。例如「今日放工前要」、「今日lunch前要」,下屬死趕爛趕之下完成工作,把工作報告文件以電郵send給老細時,才發覺老細已經晨早走咗,去打golf或沖涼,真是吹脹。

第九位:「去邊度食?你哋話事!」
每逢佳節、慶功或公司慰勞下屬,老細請下屬食飯。老細話:「去邊度食?你哋話事啦!」七嘴八舌,當咁多位同事投票,取得共識後,最終,當然去幫襯老細想食嗰間食肆。雖然全世界都贊成去酒店食buffet喎,但係老細話決定去食上海菜。咁出錢嗰位當然大聲啲。

第八位:「不如我幫你做埋?好唔好呀?」
老細吩咐下屬做嘢,下屬唔記得做,或者唔想做,藉詞推搪。獲得老細當眾人面前,大聲一喝:「不如我幫你做埋?好唔好呀?」老細仲會補充多一句:「不如你份糧出埋俾我呀!?」下屬聽後只好死死地氣去做啦。

第七位:「單嘢睇緊啲!唔好爆鑊呀!」
老細有啲大project不容有失,擔心有所差池。跟下屬千叮萬囑:「單嘢睇緊啲!唔好爆鑊呀!」或者恐嚇下屬:「如果單嘢爆鑊,你就唔使再返工嚟!」做下屬,最重要就係「唔好爆鑊」同埋「識得補鑊」。

第六位:「check真啲!再覆我
老細失驚無神,突擊問下屬一條問題。下屬無心理準備之下,猶豫不決,唔肯定答案之際,老細一句:「check真啲!再覆我」下屬如小學生般,慌失失走去找出答案,盡快回覆老師。

第五位:「你喺度做咗幾耐?
無論老細想升一個staff或想炒一個staff,他的開場白都是:「你喺度做咗幾耐?」分別是笑笑口定嚴詞厲色。或者下屬天資差劣,不斷重覆犯錯,講嘢無point仲遊花園。老細聽完下屬胡扯一輪之後,緩緩地說:「你喺度做咗幾耐?是但一個新人都醒過你多多聲啦!」

第四位:「我無講過!係你聽錯!」
除非被下屬偷偷錄音,否則老細知道死無對証,可以隨時出爾反爾。老細更理直氣壯:「我無講過!係你聽錯!」其他欺善怕惡的擦鞋同事見狀,落井下石,立即撲出幫拖:「老細一向都無咁講過囉!一定係你聽錯或者記錯啦!」

第三位:「咁你有乜solution?」
當下屬遇上工作的難題時,入房問老細如何處理?老細先發制人:「咁你有乜solution?」下屬腦海一片空白之際,老細叫:「咁你諗到再返嚟見我!」下屬門後輕嘆:「唉~ 如果我有solution,我就做咗老細,使鬼嚟搵你咩?!」老細打發下屬出房後,繼續上網睇實股市行情。

第二位:「我唔理!總之你同我死掂佢!」
老細金句:我請你返嚟係幫我解決問題,唔係增加我嘅問題。所以老細唔會埋你有乜難處限制,大石責死蟹:「我唔理!總之你同我死掂佢!」注意句中的「死」字,延續中國傳統君主臣子的處殺習俗。

第一位:「呀邊個邊個!」
老細的腦袋用來記一些對他有意義的資料,例如:股票賣買、客戶資料、市場消息、生意大計,二奶三奶。但員工的名字對他來說,卻是無乜意義。老細見到任何一名員工,都冠以:「呀邊個邊個!」。「呀邊個邊個!同我Book張機票,」、「呀邊個邊個!同我過嚟!」對於老細來說,除了靚女staff之外,每個員工的面孔都是糢糊不清。


二少爺說︰70年代尾「的士高」曲式的廣東歌。

12 則留言:

  1. 第四位喺我嚟講係第一位...「我無講過!係你聽錯!」, 有D再衰D就係明明係佢自己講, 但係話自己講相反, 總之就係唔認衰!

    回覆刪除
    回覆
    1. 嘩!話自己講相反,又真係幾賤喎!

      大石責死蟹。

      刪除
  2. 卡臣,我建議你寫完「老細話」之後,可以寫吓「老婆話」、「老表話」......而我就諗到「老舉話」喇。 :p

    老舉話老細那話兒一d都唔細。

    回覆刪除
    回覆
    1. 哈哈!good idea 呀

      我試過被人話我「腦細」咋!

      刪除
    2. 男人「腦細」唔緊要,只要五肢發達就得喇。 :)

      刪除
    3. 五肢發達? 我都想我第五肢能立地。咁就可以當凳坐。

      刪除
  3. 卡臣:

    睇你呢篇嘢,以為自己入了歡場消遣。嘻嘻!

    回覆刪除
  4. 最憎D老细叫人地“阿边个边个”,简直一D都唔尊重人,真系无家教,抵糟佢!

    回覆刪除

LinkWithin

Blog Widget by LinkWithin