~~~~~~~~~~~~~~~~







2013年1月7日 星期一

電視劇典型對白


電視劇典型對白

近十幾年來,本地拍攝的電視劇,起用同一班演員,用不同的角色名字,去演同樣的情節和講同樣的對白。就像車仔麵的餸料,自由配搭出看似不一樣,但其實差不多面口的車仔麵,但食客又無反對,繼續吃下去。

無論是:制服系列、專業系列、家族系列、辦公室系列、魔幻古裝系列、都有愛情、死人、復仇、三魚關係、邪不勝正的情節。肥皂劇對白萬變不離其宗,數一數其中十大常用對白。

第十位:「你哋唔好嘈啦!」
劇情一定會安排有爭吵,無論父子間、夫婦間、情侶間、兄弟朋友同事之間。這時候一位較具份量的人見狀,就會大聲說:「你哋唔好嘈啦!」通常都會奏效,然後大家乖乖收聲,跟著不歡而散。

第九位:「你聽我解釋先!」
劇情一定會安排有誤會發生,有人製造誤會就有人需要解釋,通常一方在逃避時,另一方就會激動地說:「你聽我解釋先!」結果通常會換來電話cut線、追車仆親、兜頭一杯水、或一巴掌。

第八位:「你一定無事嘅!」
劇情會安排有人患重病甚至逝世,場景是醫院病床,病者躺在床上奄奄一息,床邊人流著淚、聲音顫抖地說:「你一定無事嘅!」為了加強悲歡離合的元素(或者演員無期)而安排病者要死。下一場就見到病者的黑白照片放在石碑上。在香燭前特寫鏡頭。

第七位:「我哋無可能架!」
劇集中的愛情線,除了青梅竹馬、日久生情外,還安排身份地位懸殊、有家仇國恨的情侶邂逅,或者違反世俗道德標準的禁戀。一方就會忍痛說:「我哋無可能架!」讓觀眾替他們的無奈感到戚戚痛,但歷盡萬劫的情侶結局時終成眷屬。

第六位:「點解你要咁對我?」
無論親情、愛情、或友情,只要其中一方做了傷害對方的事情,受害的一方就會問:「點解你要咁對我?」除了向人質問之外,這句對白亦適合主角對天狂嗌!
當主角受到命運作弄之後,大聲問個天:「點解要咁對我?」當然是因為編劇要專登寫佢遭遇慘啲啫。

第五位:「大家都係女人」
女人在生活中面對的家庭壓力、感情糾紛、心理生理問題,女人之間當然明白女人之苦。這句對白指:大家(女性)都是過來人,不用明言亦心照不宣。其實這句對白的真正對象(受眾Receiver),不是劇中的對手,而是電視機旁邊的女性觀眾,觀眾馬上產生女性集體共鳴。一定要集集追看下去。

第四位:「唔食啦!我返房先」
當一家人在開飯時,其中一名家庭成員表示不滿,或者失戀、被炒、情緒低落,便會無胃口說:「唔食啦!我返房先!」如果是有錢家庭,就會說:「唔食啦!我返上房先!」留意:「返上房先」表示他的住宅至少有兩層或以上。隨即跟著一聲大力砰門聲。

第三位:「我會離開香港」
劇中的男女主角要分開,無論是被逼、自願、逃避、尋夢、或者放逐自己,都想引發起觀眾自己的一些自身的離別經驗回憶。最後當主角臨入閘時都會調轉頭,駁鏡另一主角在街頭喪跑及最後傻笑擁抱。其實觀眾都預主角走唔成,佢哋買親機票都唔搭,益航空公司。

第二位:「你走咗就唔好再返!」
少年為了理想或鬥氣要離家出走,父母就會話:「你走咗就唔好再返!」。太太要離婚拾行李,丈夫就會話:「你走咗就唔好再返!」而呢一句通常會跟「你試行出呢個門口」一起使用,但這句話通常收不到阻嚇作用,主角一定更堅決地頭也不回大步出走,並換來一吓大力的砰門聲!木搭的佈景牆馬上搖晃。

第一位:「就當我無生過呢個仔!」
是劇中最Powerful的一句!父母子女反目成仇,最能觸動到注目倫理關係的觀眾。下一個鏡頭是父或母心臟病發作,當場抽搐倒地。同一道理,把「就當我無生過呢個仔!」變成「就當我無識過你!」、「就當我無嫁過俾你!」都是希望把一些已發生的事情改變。而當觀眾花時間看了一齣難睇的電視劇,就會對自己說:「唉~~ 就當我無睇過呢齣劇!」亦希望你唔會覺得:「唉~~ 就當我無睇過篇嘢!」

除了以上十大位置外,其他入選對白包括:
「媽呀!妳應吓我啦!」、「醫生,我啊爸點呀?」、「離(婚)咪離囉!」、「大家開開心心食飯囉!」、「我跪喺度求你!」、「你原諒我一次啦!」、「你唔好講!我唔想再聽!」、「我都係被迫!」、「我唔想幫爹地手,我自己想闖吓」、「你唔係我,你唔會明架啦!」、「我係過來人又點會唔明吖!?」等等。


二少爺說:我細細個是電視汁送飯的。

強人 - 羅文

作曲:顧嘉煇
填詞:黃霑

是與非 如何分對錯
恨與哀 誰人解因果
敵友之間紛爭 難為彼我
恨愛可有界線 同是分不清楚
 看世間 成敗轉眼就過
弱者 強人都犧牲多
莫記此中得失 不記恨愛相纏
只記共你當年 曾經相識過

35 則留言:

  1. 啱啱聽到一句 :p

    痴線,邊個話我緊張佢呀 :o

    回覆刪除
  2. 回覆
    1. 我好似寫過,等我check check 先。

      刪除
    2. eric

      原來真係寫過: 請click去

      http://carson-chung.blogspot.hk/2012/02/blog-post.html

      刪除
  3. 想拍拖的時候:我想同你喺埋一齊…
    想分手的時候:我地無可能喺埋一齊架啦…

    回覆刪除
  4. 哈哈哈哈~~~~~仲有仲有----
    生旧叉烧好过生你个衰仔!

    回覆刪除
  5. 我仲諗「你聽我解釋先!」會係第一位添!

    仲有一句, 通常唔係電視劇, 而係大show經常聽到的: 「好, 我地事不宜遲...」

    回覆刪除
    回覆
    1. 你講得啱,因套套劇一定有誤會,先有戲做。


      司儀Show又真係果句喎!笑死。
      馬上交俾錄影廠先。

      刪除
  6. 回覆
    1. 除咗胡囧囧, 歐陽Bobby都擅長講呢句!

      刪除
    2. 好似小生花旦通通都要講呢句,

      還有:「我同佢無嘢! 你千祈唔好誤會」

      刪除
  7. 我唔睇電視劇集好耐,如果十年如一日的話,唉吔,諗唔到呀:)

    回覆刪除
  8. 卡臣:

    女:『乜哥,我有佐呀!點算呀?』

    男:『下,咁得人驚!』

    呢兩句似乎漏佐喎!嘻嘻!

    回覆刪除
    回覆
    1. 女:『乜哥,我有佐呀!點算呀?』

      男:『吓,咁我諗我哋要坐低好好傾吓╴』

      跟著閃人..

      刪除
    2. 卡臣:

      係喎!你的表述合理好多.嘻嘻!

      刪除
    3. 卡臣:

      唔洗驚喎!我都冇話你經驗豐富.我寫咁多鹹故,招招都有經驗,我虧了九千年喇!嘻嘻!

      我宜家寫緊個鹹故,床戰果部份諗得好混亂,幾乎諗到虧佐.希望今個禮拜可以放得出呢篇橫刀奪床的鹹故喇!

      刪除
    4. 電腦好返啦,太好,咁快啲重出江湖啦

      刪除
    5. 卡臣:

      我宜家用個雲端Dropbox同步寫的故仔,驚鬼佐個Windows 8,不過Photoshop都仲係要靠佢,因手提電腦只可打字,唔夠力執相.

      刪除
    6. 咁就好啦,電腦幫人,也間中激死人。

      刪除
  9. 我好抗拒一個場面。。。永遠講人壞話(秘密)要喺公司廁所大大聲講,而永遠隔離房有人聽到,呢條橋愛回家都出左十次

    回覆刪除
    回覆
    1. 又係喎,好公式化的廁所戲,另一個地方是PANTRY沖咖啡。

      刪除
  10. 翻叮都好味!

    你地唔好嘈喇....

    噢,唔嘈邊有戲做!

    回覆刪除
    回覆
    1. 我估某些觀眾,真啲希望電視入面啲人收聲。

      刪除

LinkWithin

Blog Widget by LinkWithin