~~~~~~~~~~~~~~~~







2013年1月4日 星期五

《一代廚師》


《一代廚師》

一名本地大導演,他出名製作嚴謹,「慢工出細貨」。拍一套電影要花上好幾年的時間。行內人稱這位導演為「郭大導」,他多次獲得國際獎項,揚名海外。

郭大導只拍藝術電影,票房一般啦,主流觀眾嫌他的電影太悶太難明。郭大導有藝術家脾氣,懶理票房多少、懶理評論,但就一定有電影公司肯為他開戲。

郭大導出名要求嚴謹,創作劇本方面,猶如海上漂流般,遙遙不見陸地。他花很多時間和資源在美術服裝佈景道具方面,而電影資料搜集的功夫,更是一絲不苟。

他正在拍攝一套《一代廚師》的電影,內容講中國各大地方名菜的門派鬥爭。郭大導早在2002年已經有意拍攝此片,但每套電影都需要一個醞釀期,至2008年郭大導正式決定開拍。一間歐洲電影公司願意投資此片,注下大筆資金。郭大導開始著手前期準備工作,第一步是資料搜集。

20082011年,郭大導走遍中國大江南北,拜訪中國名菜的各大門派。電影公司都知道郭大導的「超慢作風」,所以派出攝影師隨隊,把這3年的國內走訪會面,拍成一套90分鐘紀錄片《一代廚師 - 廚師之路》,鏡頭中見到郭大導跟助手,虛心向各大名廚請教菜色的竅門和心得。這套《一代廚師 - 廚師之路》紀錄片,安排在戲院上映及發行DVD,讓影迷望梅止渴。電影公司的投資已經太耐,需要一點中期回報。

《一代廚師》在2012年正式開鏡,以郭大導的往績,電影公司預計郭大導至少需要兩年時間才可完成First Cut,剪接和後期要一年時間左右,預計2015有得睇。

* * * * * *

怎料,奇蹟發生了,影壇奇蹟發生了!郭大導的《一代廚師》只花了半年時間便拍完,仲做埋後期,慶功宴都食埋,可以隨時排期上映呀。對於歐洲電影公司來說,也不敢相信這個好消息。

電影公司擔心電影質素,驚它是粗製濫造,怎料電影保持一貫水準,仍然是「大明星擺PoseMTV式影像意識流。」電影公司終於放下心頭大石,立即開香檳慶祝!

郭大導以6個月完成《一代廚師》,成為娛樂版的大新聞!更被列為「香港娛樂圈十大不解謎團」之一。

娛樂版的大新聞,陸續有來:郭大導宣佈暫時放下導演筒,退出影圈。嘩!這條新聞一出,觀眾趕入戲院向《一代廚師》這套告別作朝聖,刺激票房上升。對歐洲電影公司的投資算是有個交待。郭大導的收山之作,在一片叫好叫座的讚賞聲中落畫。

* * * * * *

點解咁戲劇性呢?原來郭大導一向的夢想,不是做導演,而是當一個廚師,開一間自己設計和主理的餐廳。他的藝術性格飄忽,突然厭倦再拍電影。他在2007年舖路淡出影圈,2008年找到歐洲電影公司肯投資。郭大導就利用電影公司的資金去做3年飲食research,公器私用。三年間,郭大導掌握不少地方菜式的竅門和秘訣。原來電影中的《一代廚師》,講的就是他自己。

2012年他開拍《一代廚師》,因為是他最後一套電影,郭大導有點「是但求其、落雨收柴」。以前一個shot要拍100 個 take 先 OK,現在拍34take便收貨。他要盡快完成電影,開始籌備他的餐廳事業。所以超速6個月完成,快趣收埋尾數,全力去搞餐廳生意。

* * * * * *

食家和觀眾們,熱切期待郭大導的新餐廳開張。結果,郭大導在選擇地點、裝修設計方面,已經花了兩年時間,仍然毫無定案。新餐廳開幕日期,貫徹他的作風,只聞樓梯響,猶如海上漂流般,遙遙不見陸地。


二少爺說:我想慢工出細貨,不過老闆唔BUY。

32 則留言:

  1. 有個大導忽然想拍風月片....

    kakaka~~~

    回覆刪除
  2. 郭大導真係叻呀,一招公器私用,你要向佢多加學習呀 :p

    回覆刪除
    回覆
    1. 好呀!開公數、打斧頭,我都唔弱架!

      刪除
    2. 如果郭大導安排間新餐廳喺《一代廚師》上畫之日開張,咁就真係高招喇 ;)

      刪除
    3. 可惜郭大導間餐廳做乜主題菜色仲未決定到,可能要等17年。

      刪除
    4. 求其整咩畀客人食都得喇 :)

      班食客buy佢嘅話,佢畀白粥人哋食,d人都食到舐舐脷o架喇。

      刪除
    5. 最快捷的方法就是將「金雀」改成「花樣年華」餐廳。搞掂!

      刪除
    6. 卡臣兄,我哋一路都係講緊郭大導o架喎,無端端點會變咗王家衛o架 :p

      刪除
  3. 其餘九大不解之謎係乜?可以寫九集

    回覆刪除
  4. 已經有十個謎等你去破解

    http://carson-chung.blogspot.hk/2008/10/blog-post_19.html

    回覆刪除
  5. 郭大導有個令人羡慕的特點, 不事生產, 仲一樣有錢開飯. 咁又唔錯喎.

    回覆刪除
  6. 卡臣:

    郭大導搜羅天下美食開餐廳,咁即係整「雜會飯」,雞頭、鴨屎忽、鵝鞭等.嘻嘻!

    回覆刪除
    回覆
    1. 你呢碟雜會飯,安全起標喎,有無雜交飯?

      刪除
    2. 卡臣:

      滿地可有一家雜交會所,八年前被政府以雞竇之名關閉.個老闆條氣唔順,力言他的會館,男女都要付費,怎可以叫做雞竇?結果最高法院判決,雜交會所,不是雞竇,可以重新營業.

      刪除
    3. 又有道理呀,大家付款入場,成為一個平台大家搵食,那會是雞竇?否則交友網絡也是。

      刪除
    4. 卡臣:

      最初被衛道之士罵雜交會所玩「多P」床戲,但原來根據法律,玩多P床戰是告不入的,政府惟有告佢係雞竇.嘻嘻!

      刪除
    5. 咁成年人在私人地方清醒地自願玩十人大串焼都係私人嘅事,與人無攸。

      刪除
  7. 回覆
    1. 以為要拍兩代,老豆拍唔完,俾個仔繼續拍落去。

      刪除
  8. 郭大導會唔會將尋日過期嘅罐頭儲起,然後加落佢新餐廳招牌炒飯俾人食?

    回覆刪除
    回覆
    1. 除了鳳梨罐頭,還有齋啡、熱狗、廚師沙律。

      刪除
  9. 公器私用早就係佢的代名詞
    東X西Y已見識過,訪問講過的野都係亂咁砌出黎

    回覆刪除
    回覆
    1. 如果我想去布宜諾斯旅遊,我都想開拍春x乍x

      刪除
  10. 卡大導o既作品應該叫《春卷炸兩》。

    回覆刪除
    回覆
    1. 故事簡介已經寫好

      卡臣係香城o既舞台劇演員,去布宜諾斯旅行,係為左吸收新o既演戲靈感,不幸到步不久就俾人打劫,所以被逼滯留。其間為左賺取生活費用,開左檔落邊檔,賣佢自創o既食品春卷炸兩。

      開檔一星期後,卡臣結識一位每日幫襯o既東歐美女Anna。因為工作關係長駐的Anna,邀請卡臣夜晚到她家作客。飽暖之後對亞洲充滿興趣o既Anna,因為言語不通,只能靠一雙手開始同卡臣互相交流。

      漫漫長夜裡,卡臣同Anna兩對手之間由聖母峰遊到華東平原,再帶到印尼o既熱帶兩林。翌日Anna為左答謝卡臣,決定帶卡臣去遊覽布宜諾斯。

      接下的兩星期,在城市中不同場景下,東歐o既神秘感覺、探戈音樂o既激情,白色o腸粉包住黃色o既炸春卷,就此引發出一段奇情迴盪o既故事.....

      「點解...一定係腸粉包住條炸春卷?」

      「因為炸春卷太脆弱,一受傷佢就會流眼淚,我唔想見到佢喊,所以要搵又暖又軟o既腸粉黎好好保護佢。」

      刪除
    2. 太好啦!寫得呢個劇本太好啦,真係可以攞去拍片!

      有意境又充滿公路電影的味道。

      呢有一句咁煞食的対白,一定令人想入場,不過應該拍十年。Happy together!

      刪除

LinkWithin

Blog Widget by LinkWithin