~~~~~~~~~~~~~~~~







2013年1月23日 星期三

超市風光

超市風光

無乜香港人未幫襯過超級市場囉呵?尤其當士多辦館陸續被超市所取締。在超市中你會看到什麼具香港特色的風景呢?現在就數一數超市十大風光:

第十位:難取出著的手推車
購物手推車如串燒般,一架跟一架連體排在超市入口處。手推車由於日久生互相著,顧客需要跟購物車用力摶鬥一番後才能拉出一架。而手推車內會找到上手留下來的購物單據。

第九位:試食
當超市內有試食攤位,會引來顧客圍觀試食,湯包、芝士、魚蛋、水餃、紅酒、奶類、健康食品等。勇於嘗試的香港人當然不甘後人。但試完之後即閃人,真係會買的:十中只得一二。

第八位:摷碎銀付款
雖然百達通於上世紀已經出現,但是碎銀毫子仍未被淘汰。當超市為了跟對手競爭而減收幾毫子,導致埋單時不會是完整的零頭(例如:47元零8毫子)。有些顧客會在收銀處付款時挖空銀包拚揍散銀。把銀包內聚積漸多的碎銀一舖過使哂佢。但這個搜挖行動會延誤排後面的輪侯時間,而遭人嘴咒或黑面。

第七位:付款
超市為了加強競爭力,引進「加多啲錢買多件」的優惠。有時顧客混淆貨架上優惠牌而攞錯非特價品。在收銀處付款時才發覺該貨品沒有優惠,或者攞少件而計返正價。數情況經常發生在顧客完成付款後,站在門口拿著收據計一餐後,才回頭跟收銀員理論,結局同樣也會拖延排在後面顧客的輪候時間。

第六位:加多幾蚊可以換件咩呀
超市跟商戶合作,某件商品在某天會做特價品。在cashier結帳時,收銀員會多口問句:「先生、小姐,加多幾蚊可以換件咩呀」。通常是喉糖、潤唇膏、香口膠之類。成為售貨員機械式的對白。

第五位:揀較大件的「再包裝食品」
大型超市有自製加工食物部,把食物加工再包裝出售。例如:燒味、菜蔬、湯包、盅飯、刺身拚盤等。每包size均有大有細,精明的消費者挑選最平又最大size的食品。把貨品又搓又揸一輪之後,又放回原處。經蹂躪後的食品最終命運變成「賣剩蔗」。

第四位:臨收舖掃平價食品
大型超市有自製加工食物部,例如:燒味、麵包、壽司、餸菜、甜品、魚生、切好的水果等等。因為這些食物易變壞,不能留待明天再售賣。所以超市臨收舖前會大減價,引來某些精打細算的客人臨收前趁低吸納。

第三位:揀貨架較後排的商品
第五位提到顧客會揀較大件的貨品,咁identical goods(相同貨品)應該唔使點揀啦呱?原來顧客都要揀。例如兩包相同牌子同味道的即食麵放在貨架上,顧客便會揀貨架較後排的即食麵,心理上太多人會摸過最前第一包而不乾淨。另一原因是超市把就快過期的貨品放最前,希望盡快賣出。但顧客會揀expiry date較遲的貨品。同樣,在雪櫃也會挑較後的汽水,(因為放在後面的汽水較前面的更涷)。造成超市的貨架執貨員,暗暗咀咒這些顧客。
       
第二位:到處亂放不要的貨品
顧客購物行為隨自己思路隨時改變,最初揀了一排朱古力,行行吓怕肥又唔要,但他不會把朱古力放回貨架原位,而是行到邊就隨手放低。所以你可以在罐頭貨架內找到一支「潔廁得」。在乾貨架中找到其他乾貨已經令人激氣,在乾貨中找到「濕貨」就更令人憤怒。在護膚品貨架內找到一包「急涷雞翼」、真係「乜都夠膽死」。超市貨架的凌亂程度高低,成為該區居民的公德心和修養的探熱針。

第一位:叫人排多條隊
香港人出名趕時間,就算自己唔趕時間都愛先人一步。超市付款鬥快更是指定動作。除非是獨自購物,否則臨付款時,一定叫同行的人排另一條隊,睇吓邊條隊快啲到。如果付款處突然多客人排隊,超市會安排派多一個收銀員開多個counter收錢,這時大家的目光和腳步就對準新開的counter,收銀員條鎖匙未插入部收銀機,已經有幾部購物車剷埋去。其實超市已經開設「收銀快線」供購物十件以下的顧客使用,但香港人「成日唔知趕乜」的DNA發作,總之要快人一步,踏出間舖。


二少爺說:超市取替街市,新一代小朋友未必去過街市。

一分鐘都市一分鐘戀愛 - 林憶蓮


尋一分鐘的戀愛
而一分鐘可找到什麼 Shoo Do Wop
尋一分鐘的天氣 都市仿似一個快鐘
動作太急仿像怕會落空
東撲西撲衝了再衝
人學會一分鐘之中找到愛一個
認識不深不過那算什麼
橫豎隔一分鐘雙方都會各飄散
當天的我四衝 尋一分鐘的戀愛
而一分鐘可找到什麼 ShooDo Wop
尋一分鐘的天氣 都市仿似一個快鐘
動作太急 因為怕會怕會落空
全賴你將光陰一分一秒也給我
內心開始知你愛我極多 全賴你肯花心思去瞭解我
在快速世界你讓我 尋一分鐘的戀愛
而一分鐘可找到什麼 ShooDo Wop
尋一分鐘的天氣 都市仿似一個快鐘
再敢去愛與付出真我 ShooDo Wop
停下快速世界你讓我
在快速世界 疾風世界 沒空世界

32 則留言:

  1. 近年先至出現嘅 :)

    先生/小姐,有冇儲分?

    回覆刪除
    回覆
    1. 如果有的話,下一句將會係「多謝你支持環保」。

      刪除
    2. 結果又搞到環保袋過多,屋企有十幾個。

      刪除
    3. 其實環保袋過多都係唔環保嘅。掉又唔係,留番又阻住晒d位 :o

      刪除
    4. 係囉,如果環保袋多用途,可以當衫著,多好!

      刪除
    5. 呢個提議唔錯,如果你屋企有衣車,整件背心應該唔難嘅 :)

      刪除
    6. 呢個題目好難,我諗咗好耐先諗到 :o

      一條「行人路行人」 :)

      刪除
    7. 今朝起身發現鬚根滿面,於是我就用「剃鬚刀剃鬚」。

      刪除
    8. 哈哈

      咁玩法真係玩唔完...

      錄影機錄影
      剪草機剪草
      影印機影印..

      刪除
    9. 係呀,越諗諗多嘢,下次開D複雜D嘅再玩過喇

      刪除
  2. 八達通增值,攞印花,換煲。。。阻鬼住哂

    回覆刪除
  3. 卡臣:

    哎呀!我中哂好多呢度D缺點!

    回覆刪除
    回覆
    1. 都不是什麼缺點,人之常情啫。因為我都中。

      刪除
  4. 10th: 剛剛有十蚊銀個陣有款車一架連一架,要落銀先解到鎖,冇十蚊銀就冇車用
    3rd: 由細做到大~

    回覆刪除
    回覆
    1. 10th : 我在外國機場的行李車見過
      3rd: 我都係呀。

      刪除
  5. 揀貨架較後排的商品
    ^^^^^^^^^^^^^^^^^^
    呢個我成日忍唔住要咁做
    如果唔係實畀我放到過期

    回覆刪除
  6. 卡臣,找来的歌很配合意境呢!赞!

    回覆刪除
  7. "其實超市已經開設「收銀快線」供購物十件以下的顧客使用,但香港人「成日唔知趕乜」的DNA發作,總之要快人一步,踏出間舖。"

    三十件貨都係排收銀快線,行到去扮盲。

    回覆刪除

LinkWithin

Blog Widget by LinkWithin