~~~~~~~~~~~~~~~~







2012年5月23日 星期三

一張張賣身契


一張張賣身契

大家好!又係我二少爺啊。今次唔重溫英文歌嘞,改為聽一首1978年的廣東歌:許冠傑的《賣身契

我一向鐘情有故事性歌詞的歌,呢首《賣身契 》就講故仔,講一個投胎的故事。歌詞通俗抵死。我兒時喜歡的填詞組合就是許冠傑加上黎彼得。

故事內容講:
一個BB在投胎之前,要為玉皇大帝簽賣身契後,才批准投胎轉世。當BB出世長大成人後,搞大女朋友個肚,要為未來外父外母簽賣身契後,才可以娶老婆。婚後兩人誕下小孩,為口奔馳。小朋友成為他們的兒女債。呢首歌講出一個BB由出世到成為人父期間不斷簽賣身契的故事。

四張賣身契
我細個聽呢首歌嘅時候,聽到「賣身契」呢三個字,只聯想到「賣身莽父」、「賣藝不賣身」,並唔係太明白歌詞意思。估唔到時隔幾十年後,終於明白哂當中意思,仲好有共鳴。34年前寫的歌詞,歷久常新。

電影《賣身契 》的英文譯名叫《The Contract 》。現實生活中,我們除了簽那些健身美容電話寬頻收費電視合約之外,人生中還有好幾張重要的賣身契:工作、買樓、結婚和子女。

先唔好講藝員歌星要簽的演藝合約。普通人要工作,以勞力換取金錢維持生計。一旦簽下那張appointment letter,你便接受了這公司的offer。從此,原本自由自在的你,便需要每星期一至星期五,晨早準時九時回到某一個地點工作九小時,賣出你的時間、自尊、體力或腦力,換取月尾的薪金。直至某天你或者公司終止這份契約。

一講到喺香港買樓,就真係貴到飛起。一旦簽下那張樓宇買賣合約,你雖然榮昇為業主,但從此,你便要替棟樓賣身,每月把份糧奉獻給地產商或銀行。香港人為買樓上車,搏命打工就是為了棟樓。唔敢亂消費或找賺職,又驚無錢供樓,乜都係為咗棟樓。

今年雙春兼潤月,宜嫁娶。一旦簽下那張結婚證書,你/妳便成為另一人的合法丈夫或合法妻子。身體、感情和金錢都獻給對方。但香港的離婚率也高,所以呢張賣身契最唔穩陣,雙方隨時都可能終止合約。

今年龍年,發生嬰兒潮,大家都想生「龍仔龍女」。一旦BB出世,你在BB的出世紙填上父母的姓名,咁你呢一世都會為該名合法子女無條件附出。有個廣告話喺香港養大一個細路仔要港幣400萬,嘩!真係唔係講笑。而且「老豆養仔」唔等於「仔會養老豆」,唔怪得歌仔都有得唱:「一生兒女債,計都計唔哂」。

佛學思想教我們擺脫束縛枷鎖,雖然可以唔買樓唔結婚唔生仔,但幾多人可以唔返工呢?


二少爺說:歌詞中的「柯彌吉蒂」不是指「Hello Kitty」。




賣身契 - 許冠傑
作曲:許冠傑
作詞:許冠傑 / 黎彼得 

蘇蝦仔未出世,都去搵玉皇大帝,
聽佢講番啲世俗條例,
拎起張賣身契,豈勢咁擰頭擰髻,
好坐低聽孤家講出一切。

喂!我要你架勢,你梗一家富貴,
我發起啷嚟,會將你墊屍底,認真巴閉,
簽番張賣身契(賣身契),攪掂筆入境費(仲要洗禮)
咁蘇蝦仔至准出世。

蘇蝦仔大個咗啦喂,識拍拖學人地曳,
一次偷雞喊亦無謂,
返香閨論婚禮,俾八姑窒頭窒勢,
好女婿 呢單認真襟計。

喂!你咪當免費,走精面咪制(咪制)
我聽錢駛,你好挖倉底,重要三牲酒禮,
簽番張賣身契(仲要屋契),攪掂筆外母費(杰過西米)
咁蘇蝦仔至准出世。

香港地為生計,乜嘢都受人限制,
睇報紙多多制度條例,
加差餉電費水費 啲餸乜愈來愈貴,
恩愛夫妻都頂心頂肺。

喂!咪太過閉翳,瞓醫院更貴(太貴)
養班馬騮仔,有苦暗啞抵,仲要交足書簿費,
一張張賣身契(賣身契),枕住咁累你一世(做到甩肺)
唉!總之一句柯彌吉蒂(前世)

26 則留言:

  1. 買樓同返工都係等價交換啫. 結婚生仔就唔係囉, 呢兩樣先係真正負擔...

    回覆刪除
    回覆
    1. 不過而家啲人対婚姻兒嬉,唔賣身,隨時分開。

      刪除
  2. 卡臣:

    香港人從來不知什麼叫交重稅,所以沒有歌仔唱。交重稅不是賣身,是賣命。頂!

    回覆刪除
    回覆
    1. 卡臣:

      楓葉國,雞是合法,但賣笑是犯法的。兩星期前法院判決賣笑犯法是規憲,現在要等最高法院定奪,但差人暫時不可放蛇捉嫖客。

      此地打工一族,出人工時已經扣了稅,自顧人士和生意人才要定期繳稅。北美大部份人是餐搵餐食餐餐清,不可能要他們留錢交稅的。

      加拿大的無稅日是七月頭至七月中,美國是五月中。即是說,在楓葉國,每年一月至七月的個人收入,是用來交稅的,七月份之後的收入,才是打工仔自己的。

      刪除
    2. 雖說重稅,但你們政府福利好,老有所依,香港則等死。

      刪除
    3. 卡臣:

      加拿大的福利是給草根的「無產階級」,與我們無關。

      羊毛出在羊身上,當香港老有所依時,稅收已由15%升至50%了。

      這裡的報稅複雜到嚇死你,你未經歷過,很難想像得到的。

      刪除
    4. 香港人交稅養班狗官,強積金又蝕哂,頂!!

      刪除
  3. 回覆
    1. 你是自僱人士,自己就是老闆。賣身給自己

      刪除
  4. 所以我覺得有能力簽下一張張賣身契,又活得瀟灑的,是人一生的最高境界。

    又,佛爺,乜賣笑原來唔係指當娼呀?

    回覆刪除
    回覆
    1. 活得瀟灑,要有好多錢作後盾先得。

      刪除
    2. 咖啡:

      我和卡臣心靈相通,大家心知賣笑即是娼妓,不需要明言的。男人雖然粗心大意,但講起鹹野,就只需要講一半,便可馬上領悟到的。嘻嘻!

      刪除
    3. 男人講鹹嘢,講頭兩個字已笑咗先

      刪除
  5. 都是錢作怪,只怪現代人冇可能做到自給自足

    回覆刪除
  6. 好钟意听许冠杰的歌声,很干净~~:-P

    回覆刪除

LinkWithin

Blog Widget by LinkWithin