~~~~~~~~~~~~~~~~







2009年10月24日 星期六

無謂勸諭


無謂勸諭

政府經常勸諭市民:戒煙、戒賭、親子、滅蚊、做運動、選民登記、防止虐畜、環保意識、多菜少肉、定期驗身、駕駛安全、工業安全、戴安全帶、戴安全套。以下是十個「無謂勸諭」,講咗出嚟盞嘥氣,左耳入右耳出,無人聽咗會去理會:

第十位:「唔好抄啦!」
揸車時觸犯了交通條例,又被鐵騎巡警捉到。司機向阿sir求情:「阿sir,俾次機會,唔好抄啦!」難道阿sir會被你一句簡單求情說話感動到,收番張牛肉乾嗎?結果咪始終都要抄牌。

第九位:「你唔好埋嚟!」
當風化案將要發生之前,強姦犯笑淫淫一步一步逼近女事主,女事主驚惶地叫:「你唔好埋嚟呀!」很明顯,沒有強姦犯會因為這個勸諭而卻步。相反,女事主驚慌地:「你唔好埋嚟呀!」只會更加刺激到強姦犯的腦部中樞神經,女事主越叫「唔好!唔好!」,強姦犯越有性衝動。

第八位:「唔好食啦!」
父母老一輩經歷過戰火,對食物特別珍惜。如果兒子見到母親吃隔夜飯餸,就會勸諭:「唔好食啦!」對身體無益。但要令到長輩將食物倒入垃圾桶是一件十分艱鉅的任務。母親一句:「食得唔好嘥!」,轉眼就已經放哂入口,咀嚼並吞埋。

第七位:「唔好喊啦!」
朋友被愛人撇甩,宣佈失戀。見朋友失戀後眼濕濕或想喊,上前安慰:「唔好喊啦!」唔講猶自可,一講對方就立即淚線崩潰。越勸對方就喊得越勁。另外,中學會考放榜日,考得差的同學打開成績通知單一看,立即眼濕濕,同學安慰:「唔好喊呀!」同學聽後立即抽泣或飲泣。

第六位:「唔好打呀!」
小朋友百厭搞搞震,父母見狀,唔打唔鬧唔得。如果小朋友闖下大禍,激到父母彈起,非重手打仔不可,孩子先出眼淚,再求情:「唔好打呀!」父母見個仔反抗仲打多兩吓。不過今天父母很少施行體罰,剩下虐兒虐妻虐老個案,繼續發生。在屋邨聽到絕望呼叫:「唔好打呀!」

第五位:「唔好亂諗嘢啦!」
情侶夫妻相處多年,其中一方疑似外出鬼混,掀起茶杯裏的風波。被懷疑的一方作出解釋:「唔好亂諗嘢啦!」結果另一方聽後,不但不會就此收貨罷休,仲會越諗越猜疑,越入牛角鑽。釀成家庭暴力,或血案收場。

第四位:「唔好講俾人知!」
朋友同事情侶夫妻之間,有秘密要分享。披露者講之前鄭重聲明:「千祈唔好講俾人知!」突顯秘密的機密程度。最後,咪又係揚開哂,通街都知。所以這句「唔好講俾人知!」欲蓋彌彰。

第三位:「唔好死呀!」
醫院病房急症室內,病人彌留之際,親友愛人跪在床邊,緊握病人的手哭求:「唔好死呀!」但生老病死是人生必經的自然定律。難道你叫唔死,就可以阻止到死亡來臨咩?最諷刺就係呢頭講完「唔好死呀!」,嗰頭病人就立即喺你面前斷氣死埋。

第二位:「咪走!」
警察捉賊,一路跑一路嗌:「咪走!」唔止嗌一聲,仲要一邊跑一邊嗌:「咪走!咪走!」試問邊個賊佬會咁聽差佬話,聽到「咪走!」之後,就會跟著乖乖地停低,然後舉高雙手,等差人拉呢?

第一位:「唔好飲啦!」
朋友失戀、失意、生意失敗、至愛去世,玩頹廢,借酒澆愁。做為好朋友的你,勸他重新振作做人,搶走他手上的酒杯,大力搖晃他的肩頭:「唔好飲啦!」但要叫一個飲到醉醺醺的人「唔好再飲啦!」是一件非常艱難而無成效的事情。慳返啲力扶佢返屋企好過喇。

獨醉街頭 - 譚詠麟
作曲:陳美威
填詞:簡寧

獨醉於街頭 酒樽掟向半空
像要把愛情 消失於破裂中
酒精添著苦惱 此刻強作輕鬆
只想可避開你 多可愛的面容

我退避 情深卻是冷
我拒絕 仍張開的臂彎

忘記這痛哀的背影
昨天的笑聲
忘記你那一抹柔情
求心窩的接觸
從這刻可結束
忘記這半濕的眼睛

忘記這痛哀的背影
假裝的笑聲
忘記你那一臉柔情
如芳心早變改
求不必講我知
誰願去聽

24 則留言:

  1. 果真都是無謂的勸諭, 但有些總是不由得從自己口中說出, 勸諭父母, 妹妹, 老公和朋友..... 什至自己.

    回覆刪除
  2. 屌.....我鐘意睇呢啲。

    我仲想加第十一個無謂勸諭:

    「您咁老,唔好食乜乜乜乜乜喇,要健康呀」

    其實我覺得係多能七餘,都有得你叫「幾吖歲人」,正所謂果頭近,就算幾 keep 住健康都唔會有幾多日子啦,何不趁仲有啖氣時,盡量享受下人生呢。見有好多所謂「後生嘅」成日叫老嘢呢樣唔好食果樣唔好做,老實講,開心食飽至拜拜,都好過乜都唔享受入棺材呱 ~~~

    回覆刪除
  3. 肥貓

    既然都知道勸諭是無謂,
    但唔講又好似唔舒服.
    咁....都係要講嘅

    +++++

    大文sir

    果然係大文sir
    言之有理

    如果80歲阿伯話想去深水埗嫖妓
    我一定支持
    牡丹花下死嘛

    回覆刪除
  4. 有個朋友經常勸我唔好上鹹網.我次次都鬧佢講來多餘!佢都繼續咁講,比佢激死!

    回覆刪除
  5. 佛爺

    香港係自由社會
    意見接受
    態度照舊

    回覆刪除
  6. eben

    如果勸諭被當作耳邊風
    咁我不如慳返啖氣

    回覆刪除
  7. 在九龍塘一家時鐘酒店的房間內,一名只脫剩「丁」字內褲、嬌滴滴的艷女躺臥床上,向站於床邊的精壯男兒說:『車臣!唔好戴套喇!我要同你直接溝通呀!』但男兒沒有停手,繼續拆開套子的包裝袋啊!嘻嘻!

    回覆刪除
  8. 佛爺

    係咩?!
    我睇報紙
    話通常係男人唔願戴
    由女方勸諭男方戴套喎

    anyway,你話車臣又唔係講我
    由佢啦

    回覆刪除
  9. 咁講法,仲有冇人去讀社工系呢?

    回覆刪除
  10. 卡臣:

    任何風流男兒,月戰十女,年戰百女,他不會記起她們!若果他在戴套時,其中一位叫他不要戴套,他便不會忘記她,因為「反常」。嘻嘻!

    回覆刪除
  11. 搭巴士要緊握扶手,我都覺得係廢架;咁都要勸諭

    回覆刪除
  12. 咖啡:

    西方發達國家,20-50歲的年齡組別,很大比重的住院病人是精神病的。絕症不一定是生理病,有不少心理病也是絕症啊!

    回覆刪除
  13. coffee

    我諗仲有社工
    始終都要盡力勸

    +++

    佛爺

    你最明白箇中道理

    咁多精神病人?
    唉,可能十個人當中有七個short
    (我當然是十份七啦)

    +++

    naruto

    在馬來西亞
    政府勸諭:睡在火車軌會死人的

    回覆刪除
  14. I.minor

    "大部份唔好都係無用嘅"...所以無謂囉

    回覆刪除
  15. 依家啲膠袋印住唔好將佢當玩具俾小朋友玩,都係為咗一啲白痴父母而寫。

    你揀呢首片尾曲,我搲嘥頭,直至睇到最後一句,咁都俾你諗到,你真好嘢!

    回覆刪除
  16. 歪歪

    呢篇的片尾曲,我都諗了好耐

    如果由你揀的話
    你會揀邊首呢?

    回覆刪除
  17. 對第八位尤其有同感呀!我就係嗰個衰仔喇~

    回覆刪除
  18. largeheadboy

    我同朋友外出吃飯
    有嘢食唔哂我包底
    唔想浪費嘛
    結果....咪肥囉

    回覆刪除
  19. 卡臣:

    貪食就貪食喇!唔洗解釋喇!嘻嘻!

    回覆刪除
  20. 你問我會揀邊首歌?

    聽不到的說話

    誰願意講出一些自欺的說話
    妳叫我以後忘掉妳

    回覆刪除
  21. 歪歪

    果然勁
    你揀的歌貼切得多了!
    好嘢

    回覆刪除

LinkWithin

Blog Widget by LinkWithin