~~~~~~~~~~~~~~~~







2008年10月23日 星期四

消聲匿跡 - 下集

消聲匿跡 - 下集

阿飛唔埋一切,冒著被汽車車死的危險,衝過馬路,口中大叫「Kelly!Kelly.......」怎料Kelly耳戴ipod,充耳不聞。

正當阿飛奔跑到對面馬路時,Kelly剛好截停一部的士,登車而去。阿飛想追,但環顧四周,揾一部的士睇吓都無。「難得個天肯俾我遇番Kelly,唔好咁玩我啦!」急如鍋上螞蟻,這時一部電單車正迎面駛來。

阿飛無計可施之下,路中心「大字型」截停了這部「薄餅速遞電單車」,硬著頭皮,問電單車司機可唔可以車佢一程?

阿飛問完都自覺荒謬,人哋開緊工,點會肯幫自己? Pizza哥哥望著情急的阿飛,沉默了兩秒:「上車啦!」

阿飛千多謝萬多謝Pizza哥哥,阿飛戴上spare頭盔後,成世人首次登上「薄餅速遞電單車」的後座,踩油狂追。

阿飛緊張地說:「唔該追住前面架的士!KT2592嗰部!」Pizza哥哥點一點頭:「坐穩啦!」全速追逐100米前那部的士。

Pizza哥哥一邊追的士,一邊大聲向後面的阿飛講:「你好彩啦!我上個月同我「掃把」嗌交,遞信resign。今日啱啱last day,送Pizza遲咗?我專登架!佢吹得我脹咩?!」阿飛只是傻傻地附和Pizza哥哥:「啱嘅!.......係嘅!.......」

五分鐘追逐後,目標的士停在火車站前,Kelly下車,入閘轉乘火車。阿飛多謝完Pizza哥哥後,除下頭盔,跳下電單車,直追入閘口。

突然Pizza哥哥在阿飛身後大聲嗌:「喂!」阿飛以為對方要攞錢作酬勞,回頭望見Pizza哥哥,笑說:「喂!攞盒Pizza去食啦!」
阿飛:「但係.......你咪會.......俾客人投訴囉?!」
Pizza哥哥:「理得佢呀!.......記得要追到女朋友返嚟呀!」
阿飛點頭道謝:「一定會!」Pizza哥哥駕電單車離去。

阿飛在火車入閘機前,伸手入褲袋取出銀包中的八達通時,Shit!剛才在茶餐廳門外抽煙,銀包和電話仍留在茶餐廳內。阿飛現在身無分文。

阿飛情急之下想跳閘進入,突然被一名閘內穿黃藍色制服的站務員喝止:「喂!你做乜呀?!」
阿飛:「Sorry!我唔記得帶銀包,通融一次呀大佬!俾我入閘呀!」
站務員:「呢位先生,你買飛啦!我唔可以俾你入架。」
阿飛:「呢度有個Pizza,仲熱架!你收咗佢!當我買飛吖!」
站務員:「先生,我幫唔到你!你快啲賣飛啦!」

阿飛只好向其他準備入閘的乘客埋手:「小姐呀,唔該!借幾蚊俾我,妳攞走個Pizza!無毒架!」、「太太呀,唔該!借幾蚊俾我,我要入閘追返我女朋友呀!」
結果乘客們當阿飛精神有問題,擰歪面唔埋他,急急入閘。阿飛擔心火車隨時會載走Kelly,十分徬徨。

阿飛無計可施之際,面前的閘突然發出「嘟」一聲。一名40歲西裝男士,手拍八達通,向阿飛示意:「入啦!」
阿飛十分感激:「多謝哂!俾個pizza你吖!」
西裝男士:「使乜客氣,幾蚊雞算得乜?快啲去追返個女朋友先講啦。」
原來西裝男士之前也有與女朋友追逐的相同經歷,十分理解阿飛這刻的焦急心情,故出手相助。

阿飛入閘後,究竟上「往羅湖」的月台?還是「往尖東」月台?二分一機會,阿飛最後選擇了跑上「往羅湖月台」。弊傢伙!唔見Kelly喎。

阿飛反而見到對面「往尖東」月台上,Kelly正一邊看愛情小說、一邊等候火車。這時往尖東的火車,剛好駛入月台,阿飛遙遙地大叫:「Kelly!Kelly!」可惜Kelly戴著headphone,充耳不聞。Kelly被火車遮擋了阿飛的視線,車廂內乘客太多,阿飛看不見Kelly蹤影。阿飛很失望,掩頭蹲下,花了這麼多工夫去追她,最後還是功虧一簣。

當火車站發出「嘟…嘟…聲」後,火車駛離月台,對面月台上剩下Kelly站於原地,她望見6米以外滿頭大汗的阿飛。兩人遙遙對望,恍如隔世。

阿飛狂揮手,全速拆返到Kelly那邊月台。原來剛才站在Kelly旁的一位中學生,見阿飛向這邊大聲呼叫。中學生好奇地問Kelly:「小姐,對面嗰位先生好似叫妳喎。」Kelly直覺告訴自己:對面的人是阿飛。多得這一位中學生一攔,火車閉門駛離後,兩人終於在火車站的兩邊月台再次相遇。

阿飛奔到Kelly跟前,唔理咁多,先向Kelly說:「妳嫁俾我啦!」Kelly臉上沒有半點輕奮,向阿飛搬出一段從愛情小說裡看回來的理論:「我憎你唔敢承擔,愛情好似劃火柴咁,最初劃嗰一吓最光最熱,之後慢慢變暗變弱,當火柴燒到尾,你覺得痛覺得灼熱,就立即放手,咁樣、段感情咪冇咗囉!你明唔明?」

Kelly的說話一針見血,阿飛一時言塞。Kelly見阿飛無言,轉身背向阿飛,大步走遠。
行了幾步,背後的阿飛大聲叫:「Kelly!」

Kelly回頭望阿飛,他已從袋中取出火柴,「咔嚓」一聲點著火柴。當火柴燒到最尾時,阿飛忍痛唔放手,咬緊牙關:「鳴~唔~」火柴雖然熄滅、燒成灰燼,但殘渣仍被挾在阿飛的食指和母指之間。

阿飛苦笑說:「我無放手喎!」Kelly見狀立即走上前,檢查阿飛手指的傷勢,甜絲絲說:「正傻佬嚟架!」 兩人冰釋前嫌,阿飛心中默唸:「我會遵守諾言,從今會好好對待Kelly。」

兩人隨後坐在火車站月台的長櫈上,互相交換這三個月的近況,Kelly去了什麼國家?阿飛如何鍥而不捨地找尋她? 一面傾、一面分享Pizza哥哥送的微溫pizza。

阿飛右手手指灼了個水泡,放在膝蓋上休息,左手緊握著Kelly的右手,Kelly用左手把Pizza一口一口餵到阿飛嘴裡,這個Pizza份外好味。令到這Pizza的味道昇華,除了面前有吐露港的日落景色作伴碟之外,還因為有一份失而復得的真摰感情在烘托著。

Fade out


情有獨鍾 - 張宇
作詞:十一郎
作曲:張宇

在妳的門前 我看到另—雙鞋
猜測妳跟誰 在狂吵之後的夜
妳是否流淚 哭訴和我的決裂
在他面前 輕易贏得安慰

妳怪我忽略 妳想透露的疲倦
妳視而不見 我努力做的體貼
我們的差別 在於對愛的感覺
妳要濃烈 我要細細如水

我以為我的付出妳懂 愛卻出現裂縫 
怪我沒有他溫柔
用一夜去守候 可能失去的妳 
認真的心是否有用

我以為我的付出妳懂 愛卻出現裂縫 
情到谷底才肯說
留下驚慌的我 沒有機會重頭 
破碎的心 還是對妳 情有獨鍾

86 則留言:

  1. 韋嚇凸

    多謝上香先!

    咦?你blog未有文章喎
    動筆啦!

    回覆刪除
  2. 笑兄

    等大家係風雨飄搖的日子
    笑一笑, 唔好咁灰啦~~

    回覆刪除
  3. Michelle

    浪漫呢~
    咪幾好~~

    btw, 我買了「天水圍日與夜」DVD
    未買快買!

    回覆刪除
  4. 嗯~我依家明白點解通常D大團圓結局既戲都系火車駛過後男女對望果刻完結...原來系高潮度結束系燦爛D。果種滿足感過後落返黎先完就好似D股票冇系最高位放咁--冇咁high。

    唔系話個結局唔好,純粹個人喜好。

    回覆刪除


  5. 明白嘅!
    你指的結局就「言有盡而意無窮」
    我的結局就畫公仔畫出腸

    我下次再努力啲!

    回覆刪除
  6. 如果我系嗰女仔, 我会为呢单野感动, 不过最后都系会放弃嗰男仔.

    回覆刪除
  7. lo哥

    咦?
    我可以寫童話故事喎!

    ++++++++

    小瓶子

    >不过最后都系会放弃嗰男仔.
    咦?
    妳給我提供了一個女性睇法
    我身為男性,以為可以破鏡重圓添

    回覆刪除
  8. 卡臣:尋晚好早就穩周公子傾計了,今朝來追翻個下集~~~掂啊!!!個pizza哥哥的出場好烈火戰車feel哦,不過送pizza的車就稍遜風騷。

    小瓶子:如果真系愛這個男人,還是會繼續落去的,畢竟找到一個愛自己,自己又愛的人,唔系想像中感容易的~

    回覆刪除
  9. 卡臣哥哥:果幅大頭相系阿強定系阿飛啊?!

    回覆刪除
  10. >我的結局就畫公仔畫出腸

    了解。呢個係你既「特色」;)

    其實在此之前,我估相信大部份人都同我一樣希望知到點解個女仔會冇上車。不過呢個係一個dilema:唔知-個故事好似流於夾硬黎;講左-故事性又會從高潮墜落。

    回覆刪除
  11. 卡臣:

    個結局好好, 好sweet+溫馨,我好鍾意! ^^
    結局"畫公仔畫出腸"? 其實唔關畫唔畫出腸事, 如果寫到你明佢唔明, 咪o徒鬼氣! 我覺得最緊要令到讀者仿如置身其中, 呢下先勁麻! 不過卡臣一早已經到呢個功力! ^^

    我想kelly未放低亞強, 對他仲有一絲希望+愛意, 所以先可以再一齊, 如果kelly 完全死心或另有一個肯同佢結婚既人出現, 咁亞強就..無行lu.

    回覆刪除
  12. 畫公仔畫出場好啊~因為有D似我感蠢蠢鈍鈍的人。哈哈哈。

    回覆刪除
  13. carmen

    如果係「烈火戰車」
    車手應該追到的士
    所以整架「削」啲嘅pizza電單車
    襯番阿飛

    相中人是阿強

    +++++++++



    你講得有道理
    真是進退維谷
    見好就收?定畫蛇添足?
    唯有...
    寫我想見到的結局

    ps 你給的意見很重要,讓我檢討

    回覆刪除
  14. 自由

    >我覺得最緊要令到讀者仿如置身其中, 呢下先勁麻!
    ==>我真係做到?
    多謝先(就算係大話)

    >我想kelly未放低亞強, 對他仲有一絲希望+愛意, 所以先可以再一齊,
    ===>
    同意!
    kelly在月台質問阿飛點解逃避?
    她有一絲希望,希望阿飛堅強番一次
    但阿飛語塞
    kelly真的失望,轉身走
    好彩阿飛身體力行
    證明了自己決心
    咁咪破鏡重圓囉

    +++++++++


    carmen

    妳邊度蠢?
    最傻係我

    回覆刪除


  15. 多謝個pizza?

    幾時去大尾篤再食過?


    ++++++++

    hana

    張相我表妹去夏威夷旅行
    俾我借用
    襯哂故事結局
    留意相中沙灘上有隻大大大海龜

    回覆刪除
  16. 淨係揾支火柴燒吓手指就叫身體力行呀? Kelly 嘅角色性格果然好統一呀吓。

    回覆刪除
  17. xiao zhu
    >淨係揾支火柴燒吓手指就叫身體力行呀?
    ==>唔係咁多人肯燒自己隻手指呱?!

    回覆刪除
  18. 阿強果然守諾言,依家先知原來米高安哲羅係根據阿強張相來畫亞當個樣嘅!

    我一直都好鍾意你將「人間有情」呢個信念帶俾讀者,等大家唔好咁灰,好可惜喺現實生活所發生嘅,往往都係相反,我唯有靠睇你嘅故事嚟繼續安慰自己。

    唔好誤會我唔信你嘅故事,只係有感而發,覺得如果呢個世界真係好似你所寫嘅人間有情咁就好囉。

    回覆刪除
  19. 現實生活太殘酷,呢D情節又真系小說裡面先會有。

    回覆刪除
  20. 歪歪

    米高安哲羅? 嘩!創世紀呀!

    >人間有情
    ==>我相信呢個世界(香港)
    都有故事中Pizza哥哥和8違通西裝漢存在.
    不過遇十個只有一個係
    少之又少


    ++++++++

    carmen

    好似Pizza哥哥咁
    佢幫手有少少因素是和經理鬥氣
    專登送遲啲
    專登送pizza俾阿飛(當公司漏單)
    當然...他有考慮幫助焦急的阿飛

    回覆刪除
  21. 『人間有情
    ==>我相信呢個世界(香港)
    都有故事中Pizza哥哥和8違通西裝漢存在.
    不過遇十個只有一個係
    少之又少』

    睇嚟你比我樂觀好多,對呢個世界嘅人仲好有信心,所以你先可以寫到呢啲故事。

    回覆刪除
  22. >==>唔係咁多人肯燒自己隻手指呱?!

    中意玩火果d就知道其實就算燒到都唔係咁痛
    而且用手輕輕一捏d火就熄咩都冇感覺

    回覆刪除
  23. 臣兄都幾多產架喎
    成日都可以甘快寫到d 短篇小說

    我個人比較鐘意睇個篇IT 人想去溝女又被人周到正一正...haha

    回覆刪除
  24. 歪歪

    我諗我樂觀嘅!
    仲樂天!

    ++++++



    原來如此
    未玩過火真係唔知
    仲以為會好痛添!

    回覆刪除
  25. 數奇門

    >成日都可以甘快寫到d 短篇小說
    哦....左抄右抄啫!

    你鐘意睇個篇IT 人想去溝女又被人周到正一正?
    ==>原本我都想寫
    一諗起你都寫, 仲寫得咁好
    珠玉在前
    我都無謂獻醜啦

    回覆刪除
  26. 寫得好?

    近來無出去玩..
    肚中墨水都開始乾塘了

    回覆刪除
  27. 如果你都算乾塘,感有D人咪可以稱之為黃河斷流?!

    回覆刪除
  28. 數奇門

    >近來無出去玩啫,
    咪寫回憶錄囉!

    >肚中墨水都開始乾塘了?
    唔好咁謙
    加啲想像
    加鹽加醋
    一定好睇

    回覆刪除
  29. I am still trying to picture him running around inside the train station with a pizza. a hot dog may be easier to run with :)

    回覆刪除
  30. 哇, 你地真係留message 留得勁快喎
    係咪大家係同一時間5點零開始等放工 ?
    今日好似個鐘壞左囉..等極都未到六點-_-

    carmen, 啱啱去左你個邊睇過, 加油呀~

    回覆刪除
  31. 皆因今日病左,大家照顧我,無俾咩也俾我做,所以閒到~~~

    數奇門:謝謝~
    你快D用念力校快D個鐘啦~~

    回覆刪除
  32. desertfox

    OK架!
    大把人拎餸拎貨周火車站走!
    香港人嘛~

    ++++++++

    carmen & 數奇門

    我都係....等收工
    快啲~~~~

    回覆刪除
  33. 哈哈,瘋幫我講埋添。

    其實係架,揸住支火柴喺手,就算唔特登整熄佢,由得佢燒晒,都唔會起水泡嘅,因為根本係好快就會燒完架喇。

    回覆刪除
  34. Love the dramatic happy ending!
    Life is beautiful....

    回覆刪除
  35. 卡臣:
    正啊~好sweet既結局~

    但點解寫到阿飛好似有d先知咁既?
    咁多人同佢同樣遭遇?

    回覆刪除
  36. xiao zhu

    原來如此
    未玩過火唔知添
    謝教~謝教~

    ++++++++

    巴黎

    妳身在歐洲
    樂而忘返定啦?

    ++++++++

    佚名

    >好sweet既結局
    sweet?
    啱啱食正pizza塊菠蘿?

    >咁多人同阿飛同樣遭遇?
    ==>係咩?
    得西裝哥哥有同樣情侶追逐經歷啫

    回覆刪除
  37. 卡臣:
    啱啱食正pizza塊菠蘿?
    -->我要食芝士個個位!
    芝心批正啊!~~

    >咁多人同阿飛同樣遭遇?
    ==>係咩?
    得西裝哥哥有同樣情侶追逐經歷啫
    -->你文章講到,好似好多人咁樣

    回覆刪除
  38. 佚名

    芝心批正啊!~~
    =>我要勁多芝士粉唔該!
    tabasco就唔使喇

    回覆刪除
  39. >>carson

    我唔浪漫. 我覺得你仲會諗...

    回覆刪除
  40. lo哥

    哈哈
    小說唔係新聞紀錄
    加啲浪漫元素,幻想
    文字娛樂嘛

    回覆刪除
  41. 『我諗我樂觀嘅!
    仲樂天!』

    我除咗羨慕之外,仲替你高興。

    可惜對我嚟講人年紀越大,經歷過唔開心嘅事,同體會過世界唔公平嘅對待,我真係好難可以好似你咁。

    唔好意思逼你聽我呻𠻹。

    回覆刪除
  42. 卡臣:
    我要勁多芝士粉唔該!
    tabasco就唔使喇
    -->但我覺得pizza hut d芝士粉唔好食者
    我頭先去左食pizza hut~yeah~
    好飽啊~~

    回覆刪除
  43. 歪歪

    >唔好意思逼你聽我呻𠻹
    ==>千祈唔好咁講!
    其實世界唔好就係人都知
    不過...唔係一面倒嘅
    世間尚有情, 比例多寡啫?

    送首歌俾你:

    美麗在心頭 歌手:黃耀明
    作曲:黃耀明/李端嫻
    填詞:林夕


    微笑有甚麼理由 好開心我不用想太久
    回憶中的鏡頭 期待中的溫柔
    還有然後還有

    快樂有很多理由 最快樂是懂得遺漏
    甚麼都想追求 甚麼都可放手
    然後還有然後

    誰都想貪新忘舊
    誰不是一路上一邊看一邊走
    不錯過任何挑逗 也不為任何人等候

    誰都是一去不回頭
    醜陋留給塵埃 美麗在心頭
    花花世界有我的 海市蜃樓

    +++++++

    佚名
    妳頭先去左食pizza hut~
    同朋友分享
    份外好味!

    回覆刪除
  44. i like the romantic happy ending.

    your recent novel reads like a movie with shots and stills between the lines, well done.

    回覆刪除
  45. 卡臣:
    妳頭先去左食pizza hut~
    同朋友分享
    份外好味!
    -->梗係啦,佢請,唔駛錢:P
    不過我今日食左4餐啦!就來食第5餐
    仲要食甜品,呢次唔肥死就奇啦!

    回覆刪除
  46. 緣份要有各種因才會得果,但沒有盡力的話,亦都結不成果,所以兩人在一起隨緣之外,還要靠自己努力,但看到男友如此不負責任,早就要撇咗佢啦!!!
    寧願要個不濟的男人,總好過要不負責任的男人!
    祝天下間有情人得到幸福!

    回覆刪除
  47. nost,

    多謝先!
    有埋分鏡同場口?
    嘩!
    自己都唔知添

    ++++++++

    佚名

    怕肥?
    妳咁後生
    大把本錢啦!

    回覆刪除
  48. 逍遙小妹

    正所謂:浪子回頭金不換嘛
    俾次機會啦!

    我都祝天下間有情人得到幸福!

    +++++++

    den

    歡迎之至啦
    做得唔好, 俾啲意見啊!

    回覆刪除
  49. 『世間尚有情, 比例多寡啫?』

    承你貴言,希望尚在人間。

    好多謝你送嗰首歌俾我,尤其自知外表無睇頭,能夠「美麗在心頭」都係件好事。

    回覆刪除
  50. 歪歪

    「美麗在心頭」叫大家去蕪存菁
    將啲醜惡嘢忘記
    留返啲美麗東西在心頭
    人咪可以繼續在花花世界的旅程囉
    (所以, 做人唔好咁灰)

    回覆刪除
  51. 卡臣:
    怕肥?
    妳咁後生
    大把本錢啦!
    -->本錢用用下就無ga la!
    所以要慳d駛啊!

    回覆刪除
  52. 好嘢,又大團圓,我最鍾意大團圓!

    回覆刪除
  53. 佚名

    所謂:青春大哂!
    盡情使用!!
    大叫:我對青春無悔!

    ++++++

    校長

    呢排興happy ending
    睇你個幸福樣就知!

    回覆刪除
  54. 卡臣:
    所謂:青春大哂!
    盡情使用!!
    大叫:我對青春無悔!
    -->你覺得我年輕時,我覺得其他人年輕,一個看一個,哈^^0

    回覆刪除
  55. 卡臣:
    真敏感,我只係話自己老><!
    心老><!

    回覆刪除
  56. pizza 哥哥既出現真係好搞笑呀 !!
    八逹通先生無蝕底架 ! du 入閘唔扣錢架~ 佢去票務處, 話 du 錯左就得架~

    回覆刪除
  57. 係囉~~ 以為唔會有人車佢去追 kelly, 又有喎~, 以為入唔到閘, 又有人幫喎~ 以為走左班車, 但kelly 又仲响度喎~~
    真係寫故仔至會咁巧合~

    回覆刪除
  58. kateyip

    係呀
    只有故事情節才能補現實之不足

    現實中, 阿飛只會再失去kelly多一次咋

    回覆刪除
  59. 月台上係唔比劃火柴架,罰款$5000,唔該

    回覆刪除
  60. naruto

    雖然罰款$5000
    但追返女友喎
    唯有硬食一次啦

    回覆刪除
  61. 扣人心弦喎!

    naruto講得啱,月台唔俾劃火柴,重要唔俾食野!

    另,故事頭張相係咪你黎,有d似喎!不過又似近排大熱的排骨仔!

    回覆刪除
  62. 佛爺

    你忽略了細節
    上集講到:「某一個周末下午,阿飛跟死黨在茶餐廳吃下午茶,」
    朋友睇住佢銀包

    回覆刪除
  63. I.minor

    故事頭張相係我嚟架
    2008年個樣
    用個software key自己個樣入去

    回覆刪除
  64. 0岩0岩得閒睇下
    原來我睇過呢個story
    但係冇印象呢~
    有情人終成綣屬

    回覆刪除
  65. 卡臣:

    係喎!我沒留意有人看管荷包。

    卡臣,張照片真係你?我以為係明星?

    回覆刪除
  66. 故事好緊湊!
    我還以為你會貼「劃火柴」首歌添,故事貼文張相應係你掛:) 好特別!

    回覆刪除
  67. 好鍾意你啲情節,夠晒出人意表,但個結局好似太“大團圓”(不這你唔駛理我,我一向比較悲情!)

    張相幾靚喎!

    回覆刪除
  68. 佛爺

    忘記情節,無所謂啦
    又唔係偵探小說

    似明星?
    氹得我開心到瞓唔著

    ++++

    coffee

    陳曉東的劃火柴
    我也喜歡呀
    不過想上下集都係張宇啫

    相中人係我呀

    +++++

    Tee

    多謝proof reading
    已改了

    +++

    單無雙

    我喜歡happy ending
    我的其中一篇「晚間收銀」(2010年3月)
    也特地寫過happy ending version
    可能我唔想人傷心啦

    回覆刪除
  69. 「氹得我開心到瞓唔著」

    卡臣:

    唔好嚇我呀!我唔好果味野架!嘻嘻!

    回覆刪除
  70. 大團圓結局永遠都是最好的
    不過我覺得 kelly 太快原諒阿飛

    回覆刪除
  71. 佛爺

    唔使擔心
    我都唔好果味野

    +++

    largeheadboy

    因為篇幅有限
    咪落雨收柴
    快趣原諒佢算數

    回覆刪除

LinkWithin

Blog Widget by LinkWithin