~~~~~~~~~~~~~~~~







2008年10月1日 星期三

喂喂喂!

喂喂喂!

港鐵車廂內,一名20歲中國藉年輕男子,
他的電話響起,他望見來電顯示後,急不及待接聽:

*「喂!.....喂.....大聲啲!.....喂......」
△「喂!.....喂......好窒呀!.....喂!聽唔聽到呀?!」
...........


「喂.....而家好啲啦,......咩話?......我部電話最新款,唔關部電話事!
.....係呀!搭地鐵過緊隧道嗰陣,好容易斷線嘛,
吓?關我咩事呀!.....妳問吓電話公司點解啦!......
.......我唔係串妳!我意思即係......我都好想問吓電話公司點解咁易斷線囉!......喂!......喂!唔係嬲吖?咁易嬲?乜妳咁小器架!......
......我唔係咁意思,但係妳有時.....唉~~算啦算啦!
唔好講啦.....哦!......好~係妳叫我講架咋!我聽妳話,我先講咋!

嗱!唔講遠,就講嗰次我哋上Yuki屋企玩佢新買嗰隻狗仔,Yuki叫我幫手一齊餵狗仔,無理妳一陣之嘛,妳就跟住成晚黑面。我認衰仔專登遞支可樂妳飲,
妳就當住我班friend面前,鬧我零醒目!做乜隊支甜嘢俾妳飲!
想落我面吖嘛!OK!跟住輪到我黑面啦,咁妳就成晚「柄」埋一面喪煲電話粥,當我哋全部透明,第日我仲俾班friend串我「削」,嗰鑊我真係灰爆!
我有冇怪過妳呀?!係無呀!我仲借埋部PSP過妳,等妳看舖嗰陣打,驚妳悶親!

仲有嗰次,我哋行旺角,妳話想出過部新電話,行咗一陣,
我話口渴想入「七仔」買啲嘢飲,妳就話唔好!
想正正經經坐低飲杯嘢「Hea」一陣,咁好啦!我成日都就哂妳,妳知架!
好啦!妳就由街頭行到街尾,唔係嫌呢間污糟、就嫌嗰間多麻甩佬,嗰間嫌人多唔想等位。結果無間肯入,渴到我P哂K!
最後咪幫趁太子間Circle K!妳有冇諗吓我嘅感受吖?…

吓?......唔係!....我唔係咁嘅意思!.....我無話過妳唔愛我! 不過有時妳真係好飄忽囉!
嗰晚我契妹約我一齊落中環「北京」玩,佢都有叫埋妳一齊去玩架!
我叫埋妳去,妳就扭轉塊面行開,眼濕濕話唔想阻住我哋,我聽完之後超搲頭!
我話我同佢無嘢啦,佢條仔阿Van妳都識架!妳剩係識得喺度勁嘆氣,
仲話一個係咁、兩個又係咁!點解條命生得咁坎坷?!
最後我話唔去玩囉!妳又話妳唔係啲咁小器嘅人!我當堂O哂嘴!
咁我話一於去啦!妳又話去咗就返嚟幫妳收屍,我真係超無奈!
俾着係妳,我諗妳都會當堂撻低喺地下度啦!

仲有上次.....我......喂!hold hold先,我有電話入,
.................................
『喂!......吓?家居電話優惠?無嘢呀你!?唔好再打嚟呀!』.....

喂!.....妳仲喺唔喺度吖?.......唔係我契妹打嚟,啲傳銷電話之嘛!.....我做乜要呃妳唧!......都話唔係我契妹打嚟囉!.......我頭先都未講完,
嗰次妳話一個人睇舖好悶,叫我落嚟銅鑼灣揾妳,陪妳一齊看舖,
又話好恨食雪糕夾餅,叫我買,OK!我咪去到無雷公咁遠嗰度買囉!
我一句都無怨到!仲驚佢溶,跑返嚟,好啦!買咗返嚟啦,
妳先至話要「薄荷石板街」雪糕!仲叫我山長水遠再去買過?!.......
妳有冇理吓我嘅感........喂!......喂!.......
喂!....喂.......大聲啲!......好窒呀!......喂!」
Repeat * 2 次
Repeat △ 3 次


51 則留言:

  1. 各方好友

    你/妳們在9月「一家人嘛」及「又一家人」的寶貴留言,已轉載至:
    2007年10月6日「一家人嘛」;及
    2007年10月16日「再嚟一家人」內保存.

    敬請注意

    回覆刪除
  2. 一路睇一路笑,電話內容似曾相識,應該每日都會係地鐵、巴士上演。血淋淋的私人生活、幼稚對白,強迫性要全車人聽到!

    回覆刪除
  3. 啊! 唔怪得搵唔番一家人睇呀!
    嘩...呢篇好傳神....一個字"正"!!
    我係女都睇唔過眼, 如果我係仔, 飛佢9年呀!仲喂....

    回覆刪除
  4. 巴黎

    雖然對白低能
    但都是我成長階段有講過
    (當然少了很多潮語)
    諗番都耳熱面紅(羞恥中)

    ++++++

    自由

    因為想keep番每個月十篇文
    齊整啲美觀啲
    所以請移玉步啦

    佢地一個願打一個願捱
    我地第三者,唯有祝福佢地啦!

    回覆刪除
  5. >佢地一個願打一個願捱
    我地第三者,唯有祝福佢地啦!

    呢個當然呀! 唔通走去同佢講"分手呀!分手呀!"
    哈哈哈

    回覆刪除
  6. 自由

    唔通走去同佢講"分手呀!分手呀!"
    咁又係!
    寧教人打仔,莫教人分妻

    周街叫人"分手呀!分手呀!"
    都幾青山feel喎

    回覆刪除
  7. 「因為想keep番每個月十篇文
    齊整啲美觀啲」
    原來卡臣是完美主義者。

    你的綿綿情話應該感人肺腑、生鬼動聽,令無數美少女神魂顛倒....

    回覆刪除
  8. 巴黎

    「十」字幾好吖
    好完整!好完滿咁!

    我的綿綿情話應該幾搞笑
    妳知我的style啦
    我煞有介事講肺腑情話
    只會換來喜劇效果

    對方都會喊
    不過唔係感動到喊
    而係笑到喊

    回覆刪除
  9. 『雖然對白低能
    但都是我成長階段有講過』

    「我同佢(契妹)無嘢啦」呢句特別聽得出係你响成長階段中講過啦!

    其實以我嘅觀察,通常啲人响街度傾電話聲浪越大,所傾嘅內容就越無聊。文中嘅一字一句就係好好嘅例子!

    舊年响法國坐火車,發現佢地唔俾人响車廂內講電話,要講就要走去近門上落嘅「講電話專用範圍」,雖然我都見到有人偷雞响車廂內講,但係就細聲到周圍嘅人係聽唔到。或者巴黎旅客可以有更詳細嘅補充。

    遲啲連响飛機都可以講電話,我真係唔敢想像坐長途機時點算!

    回覆刪除
  10. 通常認契妹都係想溝但溝唔到.

    回覆刪除
  11. 歪歪

    「唔好講啦.....哦!......好~係妳叫我講架咋!我聽妳話,我先講咋!」
    ==>呢句我都常講

    你講開舊年响法國坐火車,我又講吓日本火車
    乘客狂收短訊,狂send短訊
    手指打過不停
    用sms text溝通
    靜好多!

    +++++

    nost

    >通常認契妹都係想溝但溝唔到.
    ==>對於我來說,契媽都係!

    +++++++



    似乎你心同身受,好有共鳴喎
    咁....算罷啦

    回覆刪除
  12. 卡臣:
    如果我係佢男友就="=
    等佢慢慢發瘋,彩佢都傻
    豬多要求,飛左佢


    因為想keep番每個月十篇文
    齊整啲美觀啲
    所以請移玉步啦
    -->嘜卡臣咁追求呢d榮慾感啊!

    我以前開blog唔公開,更加無link俾人,但我一得閒都寫~係讀中三開始興xanaga先同你share...同用yahoo就可以用電腦search文章先有人回下我,其實回亦如是

    有點兒奇怪,為甚麼常常有人去我yahoo blog叫我去佢blog留言?其實留言有咁重要咩?

    不過如果有朋友來留言當然係開心d...但無留言唔代表就唔寫blog,我認為寫blog只係生活的記錄及分享平台

    有隨,有興趣就留一言,落一下足跡,令我知道閱讀者你的觀看,使我更有發文的推動力
    但無亦如是

    卡臣唔好嬲wow!我唔係鬧你啊><!

    回覆刪除
  13. 我以前開blog唔公開,更加無link俾人,但我一得閒都寫~係讀中三開始興xanaga先同人share...然後用yahoo就係可以用電腦search文章先有人回下我d文,其實回亦如是,不回亦如

    如果要有留言先開心,咁寫blog咪好辛苦?

    隨心隨意隨緣,是最快樂~~~無驅無束才是享受~
    Let enjoy your life~^^

    回覆刪除
  14. 佚名

    我明白妳說什麼
    但我只是不想9月有12篇文章
    所以keep番10篇

    因為第10篇「生日願望」之後
    重溫「一家人嘛」,因為故事中男主角想要一兒子, 是有舖排的
    而「又嚟一家人」,是下一集,錢幣的兩面
    所以重溫埋

    基本上跟留言多少無關
    不過妳這個聯想反而令我啟發一點東西
    原來.....

    回覆刪除
  15. 卡臣:
    我明白妳說什麼
    但我只是不想9月有12篇文章
    所以keep番10篇
    -->哦!原來係咁^^
    其實我都係up廢話者

    基本上跟留言多少無關
    不過妳這個聯想反而令我啟發一點東西
    原來.....
    -->係無關ga...係引發聯想^^
    你明白就好啦!我講野成日講講下就離題!飛topic飛得好快@@!

    令你啟發??原來???咩啊???

    回覆刪除
  16. 佚名

    其實我都係up廢話

    我啟發到原來我給人的印象是虛榮囉~

    回覆刪除
  17. 卡臣:
    其實我都係up廢話
    我啟發到原來我給人的印象是虛榮囉~
    -->不,說笑而且,卡臣沒有給人這感覺^^
    不用擔心:P

    亂up當秘給啊!

    回覆刪除
  18. 佚名

    亂up當秘笈....也是我的專長啊!

    回覆刪除
  19. 聽你咁講,睇嚟响呢方面法國人同日本人都比較文明,識得喺公眾地方尊重其他人嘅空間。

    我記得細個嗰陣同阿媽講話:「如果個電話可以拎出街打就好方便喇!」我阿媽答我話:「科技日新月異,第日有咁嘅發明都唔出奇。」終於人人都有部手提電話,勢估唔到新科技係會帶嚟新噪音。

    回覆刪除
  20. 講 "咁我地分手啦" 喎,尋日先至飛咗一件落街!

    回覆刪除
  21. 睇完有千般感受在心頭.....
    我諗得太多喇 XD

    小弟搬左網址,內容一樣,得閒黎坐 =)

    回覆刪除
  22. 歪歪

    好嘢!
    唔通你有預知能力?
    快啲講6個號碼出嚟


    ++++++

    laulong

    吓?
    你昨天又甩了一位女友
    灑脫~~~

    +++++++



    難道你有類似遭遇?

    我知你搬了
    但只是一個空版面
    未寫嘢?

    回覆刪除
  23. 卡臣:
    亂up當秘笈....也是我的專長啊!
    -->oh~!give me five!!yeah!

    回覆刪除
  24. 吓?唔係我甩人呀,係我飛落街吖,喺 ground floor 嘅窗口!

    回覆刪除
  25. 爺爺:
    吓?唔係我甩人呀,係我飛落街吖,喺 ground floor 嘅窗口!
    -->飛落街??0.0?
    點飛啊??

    回覆刪除
  26. 佚名:

    你仲唔送套"超人衫"俾你亞爺著住飛?

    回覆刪除
  27. 歪歪:法國的火車有分idzen(寧靜車卡)及idzap(有娛樂設備車卡),其實許多人都不會大聲講電話,會覺得不好意思,所以都會自動自覺出走廊傾。

    卡卡:我也留意到日本人的sms文化呢!不擾民。

    回覆刪除
  28. Laulong, 佚名

    校長,你飛落街,雖然喺 ground floor 嘅窗口唧!磨親下半身就唔好啦
    好傷架嘛!

    做乜受咁大刺激呀?
    飛撲晚霞乎?

    ++++++

    自由

    叫校長紅底褲外穿?
    妳想睇好耐呢?

    回覆刪除
  29. 巴黎

    香港人講廣東話慣大聲
    真係令人神經衰弱

    妳15號飛去巴黎呀?
    又打風啦
    預祝妳順風先

    +++++

    jessie

    這對情侶絕配?
    旺角仲多
    俯拾皆是

    回覆刪除
  30. >叫校長紅底褲外穿?
    擋煞一流, 保你家宅平安, 你要唔要張傍身?

    回覆刪除
  31. 自由行

    乜校長紅底褲外穿用來擋煞咩?
    我以為吹桃花運添~~~

    回覆刪除
  32. 『唔通你有預知能力?
    快啲講6個號碼出嚟』

    我嗰啲係童言無忌,唔係有『預知能力』。早知人人都會有部手提電話,我就應該勞力讀書,發明手提電話發大達啦。

    所以你要我講6個號碼出嚟,我唯有氹你開心講38、24、36,拆散咗都有6個號碼嘅!

    最後要多謝「巴黎旅客」提供補充,下次我都會揀返「寧靜車卡」坐。

    回覆刪除
  33. 唓,唔著紅底好耐 lu. 依家做番學生仔,做小白兔!

    Ground floor 窗ロ飛落街唔會死,我咪飛咯,高少少我都唔制呀!

    其實我畏高又怕死!

    回覆刪除
  34. 卡卡:

    仲吹運?唔好喇,頂唔順喇!

    haha, 廢人廢噏!

    回覆刪除
  35. 佚名

    妳係九龍灣呀?
    妳當街大聲嗌三聲:卡臣!
    我就會出現架啦!

    +++++++++

    歪歪

    多謝提供號碼先
    我一於照買

    你又去巴黎?
    唉~~兩個字>>>>>>羨慕!

    +++++++

    回覆刪除
  36. laulong

    你怕死?
    有冇搞錯?!
    你直情係「求愛敢死隊!」

    ++++++

    小瓶子

    嗰电话内容超夸张?
    妳搵日落旺角兜個圈吖
    保證妳聽到大同小異的對話
    唔信?
    妳親自求證啦

    回覆刪除
  37. 卡臣:
    妳係九龍灣呀?
    妳當街大聲嗌三聲:卡臣!
    我就會出現架啦!
    -->你當我傻ga!!
    你不如你叫啊!佚名!佚名!佚名!or 風之舞!風之舞!

    我頭先去左德福kfc任拎、同行淘大,之後就上樓開餐~~

    回覆刪除
  38. 佚名

    我去咗 megabox 健身呀
    打風唔成

    回覆刪除
  39. 卡臣:
    我去咗 megabox 健身呀
    打風唔成
    -->嗚~所謂既4日大假無望...對我而言,要返工,有放假等於無假放@@!

    回覆刪除
  40. 吓,乜你唔記得38、24、36係你契妹嘅三圍數字嚟㗎咩?

    如果你咁買都中到六合彩,到時記得分返一半俾我呀!唔好誤會吔,我唔係貪錢,只係驚你 「財多身子弱」,諗住幫輕下你咁啫。

    回覆刪除
  41. >>卡臣

    我留意咗好耐, 原來卡臣有啲怪癖ge.. 既然你認,我斷定你有10篇怪癖症...

    回覆刪除
  42. 佚名

    祝妳預工作如娛樂!
    或者苦中作樂

    ++++++

    歪歪

    如果我有錢,我一定分俾你
    (弊在我無吖嘛~~)

    +++++

    lo哥
    我都懷疑自己有「強迫症」呀!

    回覆刪除
  43. 卡臣:
    祝妳預工作如娛樂!
    或者苦中作樂
    -->兩樣都有~有時是娛樂,有時是苦@@

    回覆刪除
  44. 佚名

    打工的藝術:第一講
    有工開是恩賜
    有錢賺才可放肆

    第一講~完

    回覆刪除

LinkWithin

Blog Widget by LinkWithin