~~~~~~~~~~~~~~~~







2015年10月5日 星期一

討厭聲音


討厭聲音

我記得我細個的時候,聽到好嘈的地盤打樁聲;還有在九龍城聽到飛機升降的轟隆引擎聲。如今因為起樓技術進步了,機場又搬了,這些噪音今天已少聽到。今次就讓我數一數我討厭的聲音。

第十位:巴士煞車聲
站在鬧市馬路旁,一輛巴士駛至巴士站,傳來刺耳的車呔煞車聲。不過近年來,可能冷氣巴士性能改善了,已很少再聽到這些巴士煞車聲。但我在港鐵的車廂內,就聽到刺耳的行軌尖音,所以我明白點解乘客鍾意搭地鐵戴耳筒聽歌。

第九位:磨瓦煲
我在廚房的時候,如果聽到「瓦煲」和「瓦煲蓋」的磨擦聲,我一定起雞皮。真係諗起都已經毛管戙。

第八位:指甲刮黑板
留了長指甲的人,在黑板上抓刮,發出的刺耳聲,令我打冷震。大家有否看過電影《大白鯊》呢?其中一幕:船長就示範了指甲刮黑板,震懾全場。

第七位:試手機鈴聲
有人買了新電話,需要設定電話功能。他選擇電話鈴聲時,會反覆試聽各種電話鈴聲。對於我來說,唔停的電話聲,是十分煩厭,仲辛苦過在機舖內。

第六位:試警鐘
公司有防火演習,警鐘隔一陣響幾吓,響幾吓之後停咗,過一陣又響過。嘩!好煩擾呀!心血少啲都俾個警鐘嚇死,精神虐待呀。

第五位:修路鑿地
香港地政署的一個特色:「掘爛條路重舖後再鑿爛條路」。工人用「鑽地機」鑽爛條石屎路,嘈音震耳欲聾,心情也煩躁埋。炎炎夏日加上修路噪音,最為吃不消。

第四位:鑽牆
閒來留在家中享受吓寧靜的生活,突然傳來鄰壁的裝修聲音,電鑽鑽牆聲就最攞命。電鑽聲好似直鑽入腦袋中,唔知點解,鑽好耐都鑽唔停,乜咁多嘢鑽嘅咩?

第三位:補牙洗牙
有補牙洗牙經驗的朋友,都領教過牙醫儀器的電鑽聲。嘩!高頻刺耳,雙手出力抓緊椅柄,如像受到酷刑虐待。

第二位:BB仔喊
雖則我喜歡跟小朋友玩,但如果小朋友或嬰兒不停咁喊,咁就大鑊啦!搭飛機時,需要困在一個固定空間內幾小時,如果你隔離位有個喊唔停嘅BB仔,咁就人都忟埋一份。

第一位:睇戲傾偈
點解香港人咁鐘意睇戲時講嘢呢?返屋企睇碟慢慢傾過夠啦!最最最討厭睇戲時有人傾偈講電話,或者問劇情,一定影響睇戲心情。不如戲院座位加設headphone,戴上去睇戲,斷絕一切無謂聲音。


二少爺說:最鐘意的聲音是音樂。

8 則留言:

  1. 卡臣:

    我聽人講,最恐怖是晚上貓的叫春聲。

    回覆刪除
  2. 唔知点解,我地尼度d 印度人用个滴剪草机,简直吵到嗌救命咁,真系乞人憎咯!

    回覆刪除
  3. 仲有隔離屋睇AV時開到大大聲,搞到人心癢癢。 :p

    回覆刪除
    回覆
    1. AV片仲好,如果係真人發聲,仲心癢癢呀!

      刪除
  4. 以上所有噪音 (包括留言中提到的) 都惹我討厭,我加多一項:戲院 / 劇場 / 課室等等密閉場所內斷續的咳嗽聲或用力索鼻聲。

    回覆刪除
    回覆
    1. 戲院 / 劇場入面,有人摷膠袋搵嘢食,沙沙聲,好討厭啊

      刪除

LinkWithin

Blog Widget by LinkWithin