~~~~~~~~~~~~~~~~







2015年6月17日 星期三

唱K回憶錄

 

K回憶錄

第一次唱K
我第一次唱K,應該是1988年吧。那年聖誕節前夕,我跟中學同學去旺角火車站上蓋的一間酒廊餐廳吃晚飯。因有一名男同學之前去過,大讚好玩,叫我們一起去玩。

現時位於旺角火車站的美心快餐店,27年前是一間酒廊餐廳,餐廳中央置有一座電子琴。菜單是多款「扖餐」,枱上有紙筆,填上枱號和想唱的歌,交給侍應。8時許,琴師出現,他的外貌有點像「大L」,是那種喉沙煙酒夜鬼Feel(當然我知道他不是大L)。他開始叫枱號,顧客便興高釆烈走上枱,由電子琴伴奏,顧客引聲高歌。

第一首K
當我飲緊忌簾湯時,琴師叫我們的枱號。第一次唱K喎!我唔多唔少都好緊張啦!我怕醜唔夠膽獨唱,我一行三人走上台,琴師按琴鍵,音樂引子起。是齊秦的《大約在冬季》。這首歌在那個年代十分火紅,國語歌再打入本地市場。沒有它,就沒有後來的張洪量、趙傳、陳淑華、李宗盛和滾石。

講返唱K,有人壯膽下,唱完最後一句:「會是在….~~ 」之後,台下同學們鼓掌,我沒有自我放大扮歌星的投射,只像初中生上音樂堂的感覺。我返回位繼續飲涼了的忌簾湯。這就是我第一次唱K的印象。

K歌養大我
踏入90年代,卡拉OK如雨後春筍,由借LD入房唱、到DJ入歌、到電腦自動化。由K BuffetK Lunch、睇英超、打遊戲機到K房獨立廁所,卡拉OK經歷過幾次脫變。

K最瘋狂的時候是大學時代,放學放假走堂去唱K。一百幾十元買一個私人空間供我們唱歌發洩。我成長的愛情觀,也是由K歌中汲取,所以難免會偏向悲觀。林振強、林夕、黃偉文、周耀輝就是神父,K房就是教堂,K歌就是聖詩,培養虔誠的K教徒。

時代再壞 時代再好 也只是唱一種悲歌
卡拉OK的光輝不再,以前生日過節迎新送舊升職洗塵annual dinner,都去唱K,好難訂位。現在則隨時都有位。年青人唔出街唱K,在家中上網就可以消磨整個晚上,經互聯網一樣可以跟朋友聯誼。難怪卡拉OK邁向末路。加上商場租金昂貴,卡拉OK經營艱難下,不斷收縮。以前有Big Echo、第一、Energy、加州紅等,現在只剩下一間集團式卡拉OK

我上次去唱K已經是2010年的舊事,我的K腳早已變得心歸。我的唱K時代已成歷史,所有K的片段,都變成回憶。



二少爺說︰以前唱通宵都得,而家12時已經打喊路。

4 則留言:

  1. 卡臣:

    K房就是炮房,K歌就是性詩,培養虔誠的nP淫徒。嘻嘻!

    回覆刪除
  2. 旧时滴人系冲凉房做歌星,而加就可以做K房歌星咯!

    回覆刪除

LinkWithin

Blog Widget by LinkWithin